Hinangan 25
25
Si Paul si harapan Gubnul Pestus
1Pagpuwas tellum bahangi amban katekka si Pestus laꞌi si lahat paggubnulanne miyaꞌan, pī iye pataked amban Kesarea hap Awrusalam. 2Paglaꞌi si Awrusalam, pī si iye meꞌ nakuraꞌ meꞌ imamin duk meꞌ nakuraꞌ meꞌ Yahudihin moꞌo meꞌ tuntutde pu si Paulin. 3Pākude pu si Pestus, dinaꞌak binoꞌo si Paul pī si Awrusalam. Peggeꞌ andang ne bakas pagisunande weꞌ hapaꞌande si Paul duk papateyde iye si lān. 4Saguwaꞌ sambungan si Pestus siye, paꞌinne, “Īꞌ si Paul ginuwaldiyahan laꞌi si Kesarea. Sōng balik du ku pī laꞌi. 5Ambat kaꞌam meꞌ taga kapatutin nuhut aku padurul pī si Kesarea duk tuntutanun bi iye laꞌi bang asal niyaꞌ tahinangne laꞌat.”
6Patennaꞌ pe si Pestus laꞌi si siye si Awrusalam meꞌ walum bahangi atawa sampūꞌ, ubus padurul ne iye hap Kesarea. Tekka laꞌi, pagellew dambuwaꞌin ningkoloꞌ iye dem bilik paghukum-hukumanin duk daꞌakne binoꞌo pī padiyalem si Paul. 7Pagtekka si Paul, pinagliputan iye weꞌ meꞌ Yahudi matekka amban Awrusalamin. Tinuntutan iye weꞌ de meꞌ tuntut basag, saguwaꞌ gaꞌ niyaꞌ purebade. 8Manjari missā si Paul para si dine. Paꞌinne, “Gaꞌ niyaꞌ bakas tahinangku kuntara si saraꞌ bangsa kami Yahudi, atawa kuntara si langgal mahadje īꞌen, atawa si Sultan Nakuraꞌ si lahat Romahin.” 9Saguwaꞌ si Pestus, kabayaꞌannen tasulutne meꞌ Yahudihin. Hangkan tinilew si Paul weꞌ ne, paꞌinne, “Ngatu ke kew pataked pī si Awrusalam duk laꞌi ne kew hukumku sabab meꞌ tuntut si kaꞌu inin?” 10Paꞌin si Paul, “Tiyaꞌ ne ku nengge tuꞌu si paghukum-hukuman Sultan Nakuraꞌin. Subey tuꞌu pangahukuman akuhin. Asal kataꞌuhannu teꞌed, Tuwan, weꞌ gaꞌ niyaꞌ bakas tahinangku laꞌatan si meꞌ Yahudihin. 11Bang sabennal-bennal asal kalanggalanku saraꞌin, atawa bang niyaꞌ bakas tahinangku talep pamapateyan aku, maglillaꞌ ku pinapatey. Saguwaꞌ bang gaꞌi du toꞌo meꞌ tuntutde si aku inin, gaꞌ niyaꞌ aꞌa makasōngan aku pī si antanande. Mabayaꞌ ku hinukum weꞌ Sultan Nakuraꞌin.” 12Manjari pagubus si Pestus magisun duk meꞌ bagellalnen, sambunganne si Paul, paꞌinne, “Peggeꞌ mabayaꞌ kew hinukum weꞌ Sultan Nakuraꞌin, hangkan pinapī kew si Sultan Nakuraꞌin.”
Si Paul si pagharapan Sultan Agarippa duk si Bernike
13Tiggel-tiggel puwas miyaꞌan, tekka laꞌi si Kesarea Sultan Agarippa duk si Bernike, pungtinaꞌine dende. Pī siye patindew pu si Pestus pangaddatde iye. 14Paglabey bang piyem bahangi, inakahan sultanin weꞌ si Pestus sabab palkalaꞌ si Paulin. Paꞌinne, “Niyaꞌ tuꞌu dambuwaꞌ aꞌa tinahan weꞌ si Pilik. 15Pagpī ku laꞌi si Awrusalam, inakahan ku weꞌ meꞌ nakuraꞌ meꞌ imamin duk meꞌ kabahiꞌan Yahudihin meꞌ tuntutde si iyehin. Pākude si aku ilaboꞌ iye. 16Saguwaꞌ sambunganku siye weꞌ dumaꞌin addat kami bangsa Roma ngalaboꞌ sine-sine aꞌa bang gaꞌi dahuꞌ iye tapagtāmpak duk meꞌ manuntutan iyehin, supaya kasambunganne meꞌ tuntut si iyehin. 17Hangkan pagtuꞌu ne siye magtipun, gaꞌ ne ku magdayan-dayan. Saguwaꞌ pagsasumuhin ningkoloꞌ ne ku si bilik paghukumanin duk daꞌakku ne si Paul inin binoꞌo padiyalem. 18Nengge meꞌ kuntaranen nuntutan iye. Kannalku weꞌ tuntutde si iyehin sabab meꞌ hinangan laꞌatan bakas tahinangne, saguwaꞌ dumaꞌin. 19Pagjawabanden hatiꞌ sabab āgamade du duk sabab dambuwaꞌ aꞌa matey inēnan si Isa. Saguwaꞌ paꞌin si Paul weꞌ aꞌa miyaꞌan ellum koꞌ. 20Duk peggeꞌ gaꞌi ku magkataꞌu-taꞌu bang inumey pagpaliksaꞌku meꞌ miyaꞌan,” paꞌin si Pestus, “hangkan tinilew weꞌ ku si Paul bang ngatu ke iye pī si Awrusalam hinukum laꞌi sabab meꞌ palkalaꞌne miyaꞌan. 21Saguwaꞌ mabayaꞌ iye hinukum weꞌ Sultan Nakuraꞌ si Romahin. Makitahan dahuꞌ iye duk subey koꞌ Sultan Nakuraꞌin nettas hukuman palkalaꞌnen. Hangkan dinaꞌak iye weꞌ ku ginuwaldiyahan samantaꞌan gaꞌi pe iye taboꞌo pī si Sultan Nakuraꞌin.” 22Paꞌin Agarippa pu si Pestus, “Batang isab takaleku aꞌa inin.” “Sumu takalenu du iye,” paꞌin si Pestus.
23Pagsasumuhin tekka pī Agarippa duk si Bernike. Magsemmek siye duk meꞌ semmekde mamahalgaꞌin duk siye pinahadje weꞌ meꞌ aꞌahin. Padiyalem siye si bilik paghukum-hukumanin magtuhut duk meꞌ kapitanin duk meꞌ aꞌa mabangsahan si lahat miyaꞌan. Manjari dinaꞌak ne weꞌ si Pestus si Paul binoꞌo padiyalem. 24Paglaꞌi ne si Paul diyalem, paꞌin si Pestus, “Sultan Agarippa, duk kēmon kaꞌam matuꞌu si kami inin, tiyaꞌ ne takitebi aꞌa tinuntutan weꞌ meꞌ Yahudihin kēmon, meꞌ Yahudi matuꞌu si lahat inin duk meꞌ Yahudi si Awrusalamin. Pākude teꞌed weꞌ aꞌa inin subey pinapatey. 25Saguwaꞌ sakaliꞌ pinaliksaꞌ weꞌ ku, gaꞌ niyaꞌ kasuwaꞌku sababne pamapateyan iye. Duk peggeꞌ mabayaꞌ iye hinukum weꞌ Sultan Nakuraꞌin, iye pikilankun daꞌakku iye binoꞌo pī. 26Saguwaꞌ gaꞌ niyaꞌ sababne panulatanku Sultan Nakuraꞌin,” paꞌin si Pestus. “Hangkan hep boꞌoku iye pitu paharap si kaꞌam, pasōng ne teꞌed si kaꞌu, Tuwan Agarippa, supaya pagubus tapaliksaꞌnu palkalaꞌ inin, kaw du paꞌin niyaꞌ sulatku si Sultan Nakuraꞌin. 27Peggeꞌ bang si aku,” paꞌinne, “gaꞌi patut magpaboꞌo pilisu pī si Sultan Nakuraꞌin bang gaꞌi inaka tuntut si iyehin.”
ទើបបានជ្រើសរើសហើយ៖
Hinangan 25: yakV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019, Wycliffe Bible Translators, Inc. All rights reserved.
