1 Kurintu 10
10
Ini ne Mekeatag te Imbaag te Kenà ki Ebpengarap dut te Kenà Tidtu ne Ebpengerapan
1Menge suled, iyan niyu pegitunga ke netemanan rengan dut te menge apù dey ne menge Hudiyanen ne miduma ki Moises. Su neelungan dan te sehulapun ne tuus te miduma ke Eleteala kandan. Ne mibpevayà dan te ralan ne mibeelan te Eleteala diyà te rahat ne ed-ingaranan te Merihà ne warà nelened. 2Su ke kineruma ran dut te sehulapun wey ke kineapet dan te rahat ne iring te nebunyahan dan su wey ran mesakup ni Moises. 3Ne langun dan ne nekekaan te egkeenen ne imbehey kandan te Eleteala. 4Ne nekeinum dan te ed-inumen ne imbehey red kandan te Eleteala su langun dan ne nekeinum ketà te wayig ne ebpuun te batu ne impekita kandan te Eleteala. Su arà ne batu ne insempità ki Hisu Kristu ke miduma kandan ne mibehey kandan te langun ne kurang dan. 5Ne misan ketà te rekelà se tavang kandan te Eleteala ne kerekelan kandan ne warà mekesuhat te hinawa te Eleteala, ne ketà puunan ne merakel se minatey kandan diyà te tanà ne kenà egkeubpaan te etew ne impevayà dan.
6Ne ini se netemanan dan ne impesurat te Eleteala su apey ki egkevaag ne kenà ebpeketahù te hinawa ta se ed-ulaula te iring ketà te meraat ne ned-ulaula ran. 7Ketà be ne kenà tew en iya ebpengerapen ke kenà tidtu ne ebpengerapan su iring ketà ke mid-ulaula rut te ruma ne menge etew rengan. Su ruen impesurat ne Lalag te Eleteala ne egkahi te, “Miburunburun dan se egkaan wey ed-inum dut te indrenà dan ne siparat. Nekeipus dan ne midsesayewsayew ran, ne ketà ne nekevaal dan te meraat ne ulaula.” 8Ne ruma pà ne kenà tew ed-iringan arà se mid-ulaula dut te ruma ran dengan ne mid-ulaula ran te kegkiyugà. Su tembù be midusa ran te Eleteala ne deruwa nepulù wey tetelu nengivu se minatey kandan te senge keandew rà. 9Ne ruma pà maa, ne kenà tew ebpenggeraman ke Eleteala dut te meraat ne ed-ul-ulaan tew. Su ini ke mid-ulaula rut te ruma ne menge apù tew rengan ne iyan indusa kandan ne mibuntal dan te menge uled ne mibpematey ran. 10Ne duen pà lavew ruma, ne kenà ki ebpemivig mekeatag te ed-ul-ulaan te Eleteala. Su arà ke mid-ulaula rut te ruma ne menge apù tew rengan ne mibpeveyaan dan te Eleteala te suluhuen din te ed-imatey kandan.
11Ne langun arà ne nengetemanan dut te menge apù tew dengan ne ibaag keytew su apey kenà ki ebpeked-ulaula ketà te nenged-ulaula ran. Ne ini ke impesurat ne Lalag te Eleteala su apey ki ebpekeuram ne kenà ki edusaan iring kandan, su ke kegkebangkit kayi te dunya ne mehaan en.
12Ne engketà be ne embiya ruen etew ne iyan din egkepegitung te kenà din ed-ul-ulaan ke meraat su mevaher en se sarig din, ne iluta rin pà lavew su kalu ke ebpekevaal ded sikandin te salà. 13Ne ke penggeraman ne ebpekeuma keykew ne warà bira rin dut te penggeram ne ebpekeuma dut te langun ne menge etew. Ugaid ne ke Eleteala se egkeserihan nevenar ne edtavang keykew, su kenà din idluhut ne ebpekeuma keykew arà se penggeram ne kenà nu egkegaga. Ugaid ne arà penggeram ne ebpekeuma keykew, ne ibehey rin keykew ke gaga te ed-engkenà su apey ka ebpekeliyu ne kenà nu ed-ul-ulaan ke meraat.
Kenà Egkepakey ne Sikitew ke Mibperetiyaya Ki Hisus se Egkaan te Pan te Edtenuran Tew Ke Kinepatey Rin
Mekeatag Keytew ne Egkaan Ki Rema dut te Egkeenen ne Indrenà ne Siparat diyà te Menge Busew
14Engketà be, menge suled ne igkelimu ku, ne kenà kew ed-amung dut te menge etew ne ebpengarap te kenà tidtu ne ebpengerapan. 15Su sikiyu ne metau kew en ne ebpegitung, tembù be ruen ini se egkehiyen ku ne pegpegitunga niyu ini. 16Ketà te edtumanen tew ke edtenuran te kinepatey ni Hisus mekeatag keytew, ne ruen ed-inumen ta te kebpeselamat tew te Eleteala. Ne kayi te ed-inumen tew ini ne tuus te mibpekidseveka ki ki Hisu Kristu su atag dut te lengesa rin ne impetudà din kayi te keyta. Ne ketà te kegkaan ta rut te pan ne ebpenebtevien ne tuus ini te mibpekidseveka ki ki Hisu Kristu su atag dut te lawa rin ne minatey diyà te pinebelavag ne kayu. 17Na geina te seveka rà ke pan ne arà si Hisu Kristu, ne netuenan tew te misan merakel kiyu ne mibperetiyaya ne iring te seveka kiyu rà su seveka rà ke pan ne mibpenevìtevì keytew.
18Pegpegitunga niyu rema ke ed-ul-ulaan te menge Hudiyanen. Su embiya ebpekeamung dan te egkaan dut te ibpelengesa ran ne ibehey diyà te Eleteala, ne tuus arà te nekeamung dan en te ebpengarap te Eleteala. 19Ne engketà ded ke menge etew ne edrenà te siparat diyà te kenà tidtu ne ebpengerapan, ne nekeamung dan dema te ebpengarap dut te kenà tidtu ne Eleteala. Ugaid ne ebpesebutan ku keniyu te warà iya lalew ran ketà. Ne ini se kenà tidtu ne ebpengerapan ne warà iya igketavang dan dut te menge etew ne edrenà te siparat diyà te kandan. 20Ugaid ne iyan ku egkehiyen ne arà se idrenà ne siparat te menge etew ne warà mebperetiyaya diyà te kenà tidtu ne ebpengerapan ne iyan dan ebehayan ketà ne ke kenà egkekita ne ed-ingaran te busew ne sugsuhuen ni Setanas ne kenà ke tidtu ne Eleteala. Ne kenà ku egkiyuhan ne sikiyu ne ebpekeamung te ebpengarap te menge vusew. 21Su kenà egkepakey ne ebpekeamung kew te ed-inum dut te ed-inumen ne tuus te mibperetiyaya kew ki Hisu Kristu, ne arà pà ne ed-inum kew rema dut te ed-inumen ne indrenà ne siparat diyà te menge busew. Ne kenà egkepakey rema ne egkaan kew te pan ne tuus te mibperetiyaya kew ki Hisu Kristu, ne arà pà ne egkaan kew rema dut te egkeenen ne indrenà ne siparat diyà te menge busew. 22Su embiya iring ketà se ed-ul-ulaan niyu ne egkevehayan niyu ke Eleteala te kegkeepesi rin keniyu. Ne kenà kew ebpekeliyu rut te kedusa rin keniyu.
23Ruen egkahi te, “Egkepakey ne ed-ul-ulaan tew te misan engkey en ne ulaula asal kenà salà.” Ugaid ne iyan ku egkehiyen ne kenà langun ketà ne ebpeketavang dut te menge ruma tew. Su misan egkepakey ne ed-ul-ulaan tew te misan engkey en, ne kenà langun ketà ne ebpekepeiseg te sarig dut te menge ruma tew. 24Warà perem dut te sikiyu ne ebpegelep te kandin dà ne keupianan, ke kenà keupianan ded dut te ruma ne menge etew.
25Tembù be egkehiyen ku te egkepakey ne egkaan kew te usa ne idehang diyà te pedian asal kenà eduwaruwa se hinawa niyu wey kenà kew ebpenginginsà ke embiya indrenà arà ne siparat diyà te kenà tidtu ne ebpengerapan. 26Su warà egkeenen ne imbehey te Eleteala ne kenà egkepakey ne egkekaan. Su ruen impesurat ne Lalag te Eleteala ne egkahi te, “Ke langun ne dunya wey ke langun ne nekeriken ketà ne pekearen te Eleteala.”
27Ketà ne embiya ruen duma nu ne kenà ebperetiyaya ki Hisus ne ed-inggat keykew te egkaan diyà te valey rin ne egkiyug ka, ne keena nu misan engkey se ibpekaan din keykew. Ne kenà ke en penginginsà ke endei ebpuun su apey warà ibmesakit te hinawa nu. 28,29Ugaid ne embiya ruen etew ketà ne mibperetiyaya ki Hisus ne egkahi te ayan se egkeenen ne indrenà ne siparat diyà te kenà tidtu ne ebpengerapan, ne kenà nu keena su arà se ibpetuus kandin te salà embiya egkaan ka. Tembù be kenà nu keena su apey kenà ebmesakit se hinawa rin.
Ne kalu ke ruen egkahi te, “Meambe ke kenà ku egkekaan arà te netuenan ku ne kenà salà? Su meambe ke iyan ku edumaan ke itungan dut te ruma ne etew? 30Su embiya mibpeselemetan ku te Eleteala arà se egkeenen ku, ne meambe ke egkehiyen te ruma ne etew te meraat ne egkekaan ku misan mimpeselamat a ketà?”
31Ugaid ne egkehiyen ku keniyu te iyan kenà tew kegkaan ketà. Iyan tew kenà kegkaan su ke langun ne ulaula tew te kegkaan wey ked-inum ne iyan tew ked-ul-ulaa se egkereyù te Eleteala. 32Ne sekitew, ne kenà ki iya ed-ulaula te misan engkey en ne egkepeneheewit ke ruma tew te ebpekedsalà misan Hudiyanen sikandin, etawa kenà Hudiyanen, etawa ve ke ruma tew red te mibperetiyaya ki Hisus. 33Iringi niyu ke ed-ul-ulaan ku su layun ku ebpemengaa ke ralan te kegketevangi ku te langun ne menge etew. Su kenà ku iyan ebpegitungen se kedì dà ne keupianan, ugaid ne ke keupianan dut te langun ne menge etew. Su iyan ku ked-ulaula kayi su apey ku egkepeneheewit sikandan te kebperetiyaya ki Hisus ne ebpekeliyu ran dut te keberedusaan dan.
ទើបបានជ្រើសរើសហើយ៖
1 Kurintu 10: mbi
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 1989, Wycliffe Bible Translators, Inc. All rights reserved.