Maki 6
6
MiNasaledi Yesu hikilowena.
Madiu 13:53-58; Luke 4:16-30
1Yesu Yailo yana fafali gihege tu gina Tauna yana melaleya. Ada ana tomuliya hivebwa'uliyena. 2#Yo 7:15Ada sabati againe givebutu manuwa-abavehawala ana egana sinagogi againe givehawala. Ada tufoidi moya'aidi yana vehawala hinogalini-yo hiyaulowoga higayo, “Hida hima kaliva-kawowo nonogana givehavehawala. Hida nuwahuya givaina-ma gavana ana inuba? Hai faiwala givaini-yo abaveyaulowoga gififaisewani? 3#Yo 6:42Ide bana kalivai-nadi inubana kahalamanena. Bana Meli natudi, manuwa ana to'aiyogona, Yemesa Yosese Yudasi Saimoni tawadi. Kadu nouneyao buye kamimiyami.” Au hidedemi miNasaledi yadi wa'ago'uga buye hive'agahegahe tu hikilowena.
4Ada Yesu gigahedi gigayo, “Kaliva moya'aidi Yaubada bonana ana to'awatalatalaina hive'amohimohinena tu tauna yana melala tauna yana yo'o tauna ana unuma kalivai-dina keke hidave'amohimohineni.”
5Ada medede againe keke tamo aituha fifiwalana anafaiweya gidafaisewani. Au to'aulolo tufoidiga agaidiya nimana gisena be gisiveyawadi. 6Ada yana yo'o yadi vetumagana keke fa'ina, giyaulowoga. Ada au melala tulina tulina agaidiya ginunuwaliliuga tu givehavehawala.
Yesu yana yo'o tuwelo kaliva adi veluga fa'ina gi'iveninisedi.
Madiu 10:5-15; Luke 9:1-6
7-8 #
Lu 10:1
Tu Yesu yana yo'o tuwelo giyowanidi be givebutu luhei luhei amine gi'atuhegedi. Abavehimeya yafune fa'idiya giveledi ada hidede amine givehimeyedi gigayo, “Keke tamo gavadi yamina againe wananauweni, keke a'a keke vainuwana keke mani ami foseya wananauweni, au yami aiwalagaga. 9Ageyafayafa wana'osena kadu ami aikeva sa'eyanaga wana'osena. 10Hai tonimanuwa yana manuweya ginalukuwemi, medede againe wanamiyami tu wanalowoga-havagi ana toveya. 11#Af 13:51, 18:6Ka'i melala sa'eyana againe wanayemu tu kaliva keke hinavetobohiyanemi ada yami laumamala keke hinavenogaleni digo, mena melalai-nadi wanahegena againe fwayafwaya agemiya wanavagahegehegena, higa Yaubada yana ila'a badi agaidiya ana iya'iyaya.” Hidedemi Yesu ana tomuliya givenuwa'atadi.
12Ada au hilowoga be hina kaliva moya'aidi agaidiya hilulumamala be higa yadi dewa koyona hinavenikohiyeni-yo Yaubada againe hinahagaviladi. 13#Ye 5:14Yafune moya'aidi hiwavidi ada to'aulolo moya'aidi hibunamidi be higa hisiveyawadi.
Yoni Tobafitaiso gi'alika.
Madiu 14:1-12; Luke 9:7-9
14 #
Md 16:14
Tu kini Helodi Yesu ana tomuliya yadi faisewa valeyana ginogalina, fa'ina melala moya'aina agaidiya Yesu ana egana give'aliyahega. Kaliva tufoidi higahegahe higayo, “Bana wadevama Yoni Tobafitaiso gimididi-havagi. Hidema fa'ina abaveyaulowoga tulina tulina gififaisewana.”
15Kadu tufoidi higayo, “Bana hima to'awatalatalaina tuwaina ana egana Elaiya.” Kadu tufoidi higayo, “Hida hima Yaubada bonana ana to'awatalatalaina badi to'awatalatalaina tuwaidiyao amine.”
16Atu Helodi yadi ve'agahegahe ginogalina againe, gigahe gigayo, “Bana au velemodi Yoni Tobafitaiso. Iya gavehimeya be u'una hinikehegena-ma kalivai-nadi gimididi-havagi.”
17-18Helodi hidedemi gigahe fa'ina boi tobohiyana vavinena adi egana Helodiyasi givaidi ada bana Yoni Helodi gidakeyena gigayo, “Tobohiya Filifi vavinena uluhabuyedi fa'ina, nagi ana vehimeya keke uda'itave'avini.” Hidedemi Yoni gigahe fa'ina Helodi yana kaliva gi'iveninisedi be Yoni hikive'avina ada hiyogona be deliya hisena. 19-20Badi Helodiyasi yadi nuwakoyo Yoni againe hilulu'uyena ada higahegahe vaita kaliva hinaluve'alikana tu higa-wayoga, fa'ina Helodi Yoni give'amohimohinena. Bana Yoni kaliva mahamahalina yana dewa yegayegana ma gihalamanena fa'ina, gilugolegolena. Nuwanuwana Yoni yana laumamala ginanogalina tu ana nogala againe nuwana givegafo'uya'uya.
21Helodiyasi himiyami himiyami tu yadi tova hagihagina gilakayemu. Helodi yana tubuga ana toveya yana a'a lakahina gitagova be yana yo'o buye hi'a. Ana toveluga kikaiwabudiyao kadu yana togiyomatana kadu Galili ana kaliva lakahidiyao giyowanidi be hi'ela.
22Hivemwavemwamwala tu Helodiyasi natudi kwamayoku giluku yo'o matadiya givagavaga. Helodi ana wakawaka buye himatamatawabuwabu tu nuwadi gikiveyamumu-mo'ena. Au kini kwamayoku gigahena gigayo, “Gavadi gavadi fa'ina unave'o'ola, medema ganavele.” 23Kadu kwamayoku againe giwonadabadaba gigayo, “Yaubada matane gagahe velemo'ena be gavadi gavadi fa'ina unave'o'ola au yaku abavehimeya hafuna amine ganavele.”
24Ada ulaulatanina gihobu be gina hinana agaidiya gitoliluvaluva gigayo, “Gavadi fa'ina ganave'o'ola?” Badi higayo, “Yoni Tobafitaiso u'una ana ainike fa'ina.”
25Ada auhe'ama gimaduna Helodi againe giluku give'o'olena gigayo, “Tova adamoya udavehimeya be Yoni Tobafitaiso u'una hinanikehegeni tu nau'a againe hina'aliyena be bana ali'alikana gana'itana.”
26Kini Helodi kwamayoku yana ve'o'ola ginogalini-yo nuwana gikabubu-mo'a tu ana wakawaka moya'aidi matadiya giwonadabadaba fa'ina, keke nuwanuwana yana wonadabadaba bana againe ginayawelini. 27-28Au yana tolugaviya sa'eyana gimadu'iveninisena be higa Yoni u'una ginanikena be gina'aliyena. Au gina deliya Yoni u'una ginikena ada nau'a againe gi'aliyena be ulaulatanina givelena. Ada ulaulatanina gina hinana giveledi. 29Ada au Yoni ana tomuliya valeyana hinogalini-yo hi'ela wowona hivaina be hinauwena tomohuyehuyeya hihuyana.
Yesu kaliva faifi tausani give'adi.
Madiu 14:13-21; Luke 9:10-17; Yoni 6:1-15
30 #
Lu 10:17
Tu afositolo Yesu againe hiyewadi gavadi gavadi moya'aina higugaiyena kadu hivehawalayena-ma hivenuwa'atana. 31Ada kaliva nau ela keke yawaidi fa'ina, Yesu ana tomuliya buye keke adifaiweya hinaveyawai-yo hina'a. Hidema fa'ina Yesu gigahedi gigayo, “Ide'eyaogaga wa'ela be kana melalagaga againe kanaveyawai.” 32Au wakeya hiyage melalagaga againe hina adikaibe himiyami.
33Tu tufoidi moya'aidi yadina hi'itana-ma hi'itayakahidi, ada melala moya'aina agaidiya hitauya agediya himaduna be Yesu ana tomuliya buye magigidi himadubodana. 34#Md 9:36Yesu wakeya gihobu ada yo'o lakahina gi'itadi-yo gi'itanuwakabubuyedi, fa'ina yadi miyami ana ita'ita vaita sifi adi to'itave'avina keke ma amine. Au givebutu gaitoma moya'aina fa'ina gikivetuvetunu.
35 #
Mk 8:1-9
Ginunauwena tu mala gisilavina ada tomuliya Bana againe hi'ela higayo, “Mala a gisilavina ada melalagaga againe kamimiyami. 36Yo'o una'atuhegedi be melala eda'ufoya kadu awa'awanidi agaidiya hinana adiga hinakimonena.”
37Tu Bana gigayo, “Auwe, omi wanave'adi.” Badi higayo, “Hima yo'o lakahina. Hai mani anavaini-yo anana a'a anakimoneni adifata amine? Fa'ina a'a fatana vaita kaliva sa'eyana yana faisewa vaikohi eita fatana amine.”
38Au Yesu gigahedi gigayo, “A'a gavaiyehi omi agaimiya? Wana wa'ita.” Ada hina hi'itana againe Yesu hivenuwa'atana higayo, “Beledi kabi'odi faifi kadu igana luhei.”
39Hidede amine hivenuwa'ata-yo Yesu gigahedi be yo'o hinavehimeyedi be higa unuma unuma amine isisi'u againe hinavetoga. 40Au unuma unuma hanaledi o ka'i fifiti amine hivetoga. 41Hivetoga-yo a'a faifi kadu igana luhei givaidi digo lobameya gi'italele Tamana againe givesiule, au a'a gikihinehineni-yo ana tomuliya giveledi be higa badi yo'o agaidiya hinafolakena. Kadu igana luhei gikihinehinena be moya'aidi agaidiya hifolakena. 42Ada au moya'aidi hi'a be hi'ahiyauwa. 43Ada tomuliya hina a'a kadu igana ana tufo kwadakwada hikwakwana againe feyawa tuwelo hivemagadi. 44Badi kaliva a'ai-nadi hi'a-ma adi kilagalaga au 5,000.
Yesu ni'u getane ginudadana.
Madiu 14:22-23; Yoni 6:16-21
45Tu tomuliya kwadakwada hikwakwana gihavaina, auhe'ama Yesu gigahedi be wakeya hinayage wai hinanagona be yuwa fafaline melala ana egana Bedasaida againe hinamididamana tu Bana Tauna ginamiya be yo'o gina'atuhegedi. 46#Mk 1:35; Lu 5:16, 6:12Ada ahe gilukafoiyedi-yo oyeya gilaka be Tamana againe ginave'o'ola.
47Ada au mala gibogi-mo'a tu badi tomuliya wakeya wese gawaneya hinauna tu Bana'e ma anakaibe avaleya gimiyami. 48Bolimana lakahina gimadu be waka giluluveyeveyewana fa'ina tomuliya hiwoifaiwala-wayoga ma Yesu gi'itadi. Ada mala kabisona ginalauna tu Yesu badi agaidiya gi'ela'ela, ni'u getane ginunudadana tu au ginanu'atuvagavaga. 49#Lu 24:36-37Tu Yesu ni'u getane ginunudadana ma hi'ita-yo hitatawayana hivaitana balauma hida'itani. 50Fa'ina tomuliya moya'aidi hi'itana be himatautave'ine. Auhe'ama gigahedi gigayo, “Wa'asevatu. Hima Iya ga'ela'ela, keke wanamatauta.”
51-52 #
Mk 8:17
Ada Bana badi agaidiya wakeya giyage-yo bolimana gi'atagona. Ada hiyaulowoga-mo'a, fa'ina Yesu yana faiwala a'a ana kivetubuga againe keke hida'itahalamaneni, nuwadi au abodana.
Yesu to'aulolo Genesaleda againe gisiveyawadi.
Madiu 14:34-36
53Tu tobuya hidamana'ela-yo fafali ana egana Genesaleda againe hihobu waka hiluhifona. 54-55Wakeya hidahobu ma kaliva Yesu hi'itayakahina ada medema awa'awana melalina moya'aina agaidiya himaduna, hivebutu to'aulolo adi wa'ivi hiwahidi ada hai Yesu gimiyami valeyana hinogalina, medede againe hi'aliyedi. 56#Mk 5:27-28Ada au hai Yesu gi'ela'ela ka'i melala kabi'ona o lakahina o ka'i awa'awanine, medede againe to'aulolo hi'aliyedi be melala hinafane hisedi ada hihawayafeyafena be higa to'aulolo ginahawahegedi be ana kaleko bwatanaga hinakibwa'ena. Ada gaveyao moya'aidi hikibwa'ena, medema hiyamumu.
ទើបបានជ្រើសរើសហើយ៖
Maki 6: viv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2003, Wycliffe Bible Translators, Inc. All rights reserved.