Maki 11
11
Yesu doniki kwaune Yelusalema againe giyemu.
Madiu 21:1-11; Luke 19:28-40; Yoni 12:12-19
1Yesu ana tomuliya buye Yelusalema hi'iveda'ufona tu melala luhei Bedefegi kadu Bedani oya Olive againe hiyemu. Medede againe hiyemu tu ana tomuliya adi'iselu gigahedi be wai hinanagona. 2Gigahedi gigayo, “Omi wai wananagona yuwa melala againe wanaluku, ada wanalukuluku tu doniki natudi ai againe hiluhifona-ma wanamadu'itana. Mena doniki kwaune keke tamo hakwadi boi gidayage. Au wanayauna be wana'aliyena. 3Ada ka'i tamo hakwadi ginagahe ginagayo, Gavana fa'ina wayauyauni? au wanagahena wanagayo, Yama Kaiwabu nuwanuwana me'ama ada aimo tova kabi'ona ginaveleyewemi.
4Au tomuliya adi'iselu hina doniki natudi manuwa eda'awaneya gava melaleya hiluhifona-ma hinuhagana, ada au hiyauna. 5Ada badi tolauboda medede againe himidimidi-ma higahedi higayo, Gavadi wagagauga? Gavana fa'ina doniki natudi wayauyauni?” 6Ada Yesu gigahe amine higahedi, ada au hihawahegedi be hina. 7Au doniki natudi Yesu againe hi'aliyena, adi aikeva kwaune hiyavelina be Bana giyage. 8Ada kaliva moya'aidi yo'o agaidiya adi aikeva edeya hiyaveyavelina, kadu tufoidi ai laganina walukulukumina faheya hikuyana-ma edeya hiyaveyavelina. 9-10#Sam 118:25-26Ada kaliva tufoidi wai hinagona tufoidi wai himulina, ada Yesu buye hinauna tu hikovakova higayo,
“Hosana, O adavadava.
Kaiwabu ana eganeya u'ela'ela-ma au Yaubada ginanuwakabubuye.
Tuwai-mo'ena bwaneneda Devida yo'o moya'aidi givehimeyedi amine,
O'eni Devida bwanenena unavehimeyema.
Yaubada ya abavehimeya ginanuwakabubuyena,
kadu tomiyalobama o hinadavadava
yadi hosana hinayakahina.”
11Ada Yesu Yelusalema againe gilakayemu gina manuwa-tafalolo lakahina againe giluku ada gaitoma moya'aina gilumatavilena. Kadu gihobu ada mala ahe gilavina fa'ina yana yo'o tuwelo buye Bedani againe hina.
Yesu ai ana egana fiki gi'alatabutabuyena.
Madiu 21:18-19
12Bogi hida mala gilauna Bedani againe hitauya Yelusalema againe hinauna tu Yesu mafu gilauna. 13Yuwa lauveya ai ana egana fiki walukulukumina gi'ita-yo gina be ka'i tamo guwana gisena-ma gina'itana. Gida'ita ma lukuminaga gidauda, fa'ina medema keke fiki yana tova yoyo. 14#Mk 11:20Au ai againe gigahe gigayo, “Aimo tova mulina kadu keke unayoyo be kaliva guwa gina'ani, keke-mo'a.” Hidedemi Yesu ai gi'alatabutabuyena tu tomuliya hinogalina.
Yesu manuwa-tafalolo lakahina againe giluku.
Madiu 21:12-17; Luke 19:45-48; Yoni 2:13-17
15Hinauna tu Yelusalema againe hilakayemu, au Yesu manuwa-tafalolo lakahina ana eda'awaneya giluku givebutu badi mene manuwa-tafalolo againe hilukimokimone-ma giwavidi, mani tulina tulina ana tosenisi yadi tolama givetala'afufuna kadu kaliva bunebune abaveyao fa'ina hikimonevedamanedi-ma yadi abavetoga gituwabwatavilana. 16Ada kaliva moya'aidi gihawatadi be keke tamo lokoloko kimone fa'ina manuwa-tafalolo ana eda'awaneya hinaselukuweni.
17 #
Ais 56:7
Au givebutu yo'o givehawaledi gigayo, “Yaubada bonana eto'etoladina gavaimi gigahe ma ma'i wahalamanena o ka'i keke? Gigayo,
Yaku manuwa hinavewagana abave'ove'o'ola ana manuwa yo'o tulina tulina fa'idiya.
Tu omi'iyao ma vaita tokai'afu yadi abaga amine wafaisewana.” Hidede amine Yesu gidakeyedi.
18 #
Mk 14:1
Tu badi abaveyao ana tofaisewa kikaiwabudiyao kadu Mosese yana vehimeya ana tovehawala Yesu yana dakeya hinogalina, au himatausena fa'ina hivebutu eda hilelena be higa hinaluve'alikana. Kaliva moya'aidi Yesu yana vehawala nuwadi gi'abina be hiyaulowoga fa'ina, mena kaliva kikaiwabudiyao Yesu himatausena.
19Ada au mala gisilavina Yesu ana tomuliya buye hilowoga be Yelusalema hihegena.
Yesu vetumagana be ve'o'ola fa'ina givehawala.
Madiu 21:20-22
20 #
Mk 11:14
Bogi hida mala gilauna kadu hitauya ada edeya hinauna tu ai ana egana fiki hi'itana, ai lukumina matatabuna gi'awa'ulona tu walamina giwelolona. 21Fita nuwana gi'afolena ada Yesu againe gigahe gigayo, “Tovehawala u'ita. Fiki u'alatabutabuyena-ma a gi'awa'ulona.”
22Yesu gigahedi gigayo, “Yami vetumagana Yaubada againe wanasena. 23#Lu 17:6Gagahe velemo'ena hai kaliva ginavetumaganadona, medema hida oya againe anafaiweya ginagahe ginagayo, Una lehageya utowa. Ka'i ase'asena keke gina'amalakibo tu ginavetumagana vaita gavaimi gigahe amine ginalakayemu velemo'ena, au givetumagana amine ginanuhagana. 24#Md 7:7; Yo 14:13-14Yami vetumagana amine wananuhagana fa'ina kadu ganagahe. Gavadi gavadi fa'ina wave'o'ola, wanavetumagana be higa vaita medema ahe wavaina, ada au gavadi fa'ina wave'o'ola-ma wananuhagana. 25#Md 6:14-15Wave'o'ola tova, ka'i tamo hakwadi omi agaimiya gikoyo, au yana koyona wanavenuwauluyena be higa Tamami lobameya gimimiyami-ma kadu yami koyona ginavenuwauluyena. [ 26Atu ka'i omi tobohiyamiyao yadi koyona keke wanavenuwauluyeni, kadu keke Tamami lobameya gimimiyami-ma yami koyona ginavenuwauluyeni.]”
Yesu yana abavehimeya inubana fa'ina hitoliluveluvena.
Madiu 21:23-27; Luke 20:1-8
27Tu Yesu ana tomuliya buye Yelusalema againe kadu hilakayemu. Ada Yesu manuwa-tafalolo lakahina ana eda'awaneya ginunudadana tu abaveyao ana tofaisewa kikaiwabudiyao kadu Mosese yana vehimeya ana tovehawala kadu kaliva lakahidiyao Bana againe hi'ela. 28#Yo 2:18Ada hitoliluveluvena higayo, “O ugahema, ha'againe ya abavehimeya uvaini-yo mena gaitoma tulina tulina boiyesedi hidei manuwa-tafalolo lakahina againe ufifaisewadi? Hakwa'adi mena abavehimeya givele-yo hidedemi uhuluva?”
29Yesu gigayo, “Yaku toliluvaluva sa'eyana omi agaimiya ganasena. Ka'i bonaku wanafatana amine o yaku abavehimeya inubana fa'ina ganavenuwa'atami. 30Hakwa'adi abavehimeya Yoni Tobafitaiso givele-yo kaliva gikivebafitaisoyedi? Ka'i yana abavehimeya Yaubada againe give'inuba o ka'i kaliva agaidiya? Bonaku wafata.”
31Yesu gigahe-yo badi hivebutu buye hivekwageya higayo, “Ka'i kanagahe vaita Yoni yana abavehimeya Yaubada againe gidave'inuba au Bana ginagahe ginagayo, Ka'i Yaubada againe digo, gavadi-yo Yoni yana gahe keke wadavetumaganeni? 32#Md 21:46Tu ka'i kanagahe vaita kaliva agaidiya gidave'inuba....” A! Mema yo'o himatausedi higa vaita gavaimi hinakivekoyodi, fa'ina moya'aidi hinuwanuwa vaita Yoni Yaubada bonana ana to'awatalatalaina.
33Hidedemi tonagona hinuwanuwa fa'ina Yesu yana toliluvaluva hidede amine hifatana higayo, “Ka'iwa. Ime keke adahalamaneni.”
Ada Yesu gigayo, “Omi keke wadagaheku fa'ina, meda anafaiweya Iya keke ganavenuwa'atami hade'againe yaku abavehimeya give'inuba-yo hida gaitoma gafifaisewani.” Hidede amine Yesu miYuda adi tonagona agaidiya gigahe.
ទើបបានជ្រើសរើសហើយ៖
Maki 11: viv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2003, Wycliffe Bible Translators, Inc. All rights reserved.