Afositolo 28

28
Folo yana miyami Molita againe fa'ina.
1Tu abavagave'avina againe ahe alaka-yo himula ana egana anogalina higa Molita. 2Ada Molita kaliva veyaveyaodiyao ada hihinekalikaliyema be hilusiuleyema, ada ai hikulina be anavevala fa'ina wehi buye gilugaga againe ime avekwadudu. 3Ada bana Folo gina ai giwahi be yana itava ai gi'ala'alata againe gidahegelakahina ma oloto koyona givala'inena fa'ina giyemu, ada nimane gi'aiyovaga tu gikudave'avina. 4Ada badi Molita kaliva oloto Folo nimane gikudave'avina-ma hi'itana againe, buye hive'agahegahe higayo, “Ha! hida kaliva makewa toluve'alika, ada keke lehageya gidatowa'alika tu adamoya higa yana dewa ana laufata viviluwa nimane alika ginanuhagana.” 5#Mk 16:18Tu Folo oloto gilukakina be ai againe gibe'u, ada keke tamo vita gidanuhagani. 6#Af 14:11Tu badi kaliva hilulubodena hivaita wowona gidatubuga o ka'i gidamadu'alika. Au hilulauboda hilulauboda tu keke tamo gavadi bana againe gidalakayemu fa'ina nuwanuwa tulina nuwadi gi'afolena, ada higayo, “Bana hidevama kadu viviluwa sa'eyana.”
7Tu kaliva sa'eyana gimiyami, ana egana Fabiliyo, himulai-nadi ana tovehimeya, ada bana yana babi liline taliyeya ime alaka. Ada bana yana manuweya givega'aulema-yo aiyeta tohiye yana nuwakabubu againe amiyami. 8Ada tamana gi'aulolo ana iviya gidauda, wowona vaita ai kadu kamona gihiwahegena lakahina. Au Folo to'aulolo againe giluku ada give'o'oleni-yo nimana bana againe gisena be gisiveyawana. 9Bana giyamumu-yo kadu to'aulolo moya'aidi medema himulai-nadi againe himiyami-ma hivebutu hi'ela'ela, ada yadi yamumu hinuhagana. 10Kadu nuwakabubu moya'aina hivelema, ada muliya akidewadewa be anayage ana toveya, amaga ama gufa yadi nuwakabubu hidodona.
Folo yanana Loma againe fa'ina.
11Au Molita againe vaikohi tohiye amiyami tu waka sa'eyana againe ayage be alowoga. Wakai-nadi ma melala ana egana Alekisanidiya againe gitauya be himulai-nadi againe gimiyami bolimana ana aituheya. Ada waka ana egana Viviluwa Natuluga. 12Au wakeya anauna tu melala ana egana Sailakusi againe ayemu be ahobu aiyeta tohiye amiyami. 13Kadu ayage-havagi be anauna tu melala ana egana Legiumi againe ayemu. Bogi ada mala gilauna mala dikudikukuna giyemu, ada au aiyeta luhei ahegedi-yo melala ana egana Futiyolai againe ayemu. 14Ada medede againe tovetumagana tufoidi anuhagadi be higahe fa'ina badi agaidiya awakawaka tafalolo sa'eyana. Ada ahegedi tu ana Loma tufone alakayemu. 15Tu badi tovetumagana Loma againe valeyama hinogalina au hilowoga be hinamaduvega'aulema. Tufoidi abavaga'auta ana egana Afiyo againe ave'anauhaga. Kadu tufoidi melala ana egana Abamiyami Tohiye againe ave'anauhaga. Ada Folo gi'itadi-yo Yaubada againe givesiule ada gi'asevatu.
Folo Loma againe miYuda agaidiya gilumamala.
16Tu Loma alakayemu againe, kabemani Folo hihawahegena be manuwa sa'eyana againe anakaibe ginamiyami, tu tolugaviya sa'eyana gi'ita'itave'avina be keke gina'ota fa'ina. 17Ada au Folo aiyeta tohiye gimiyami tu miYuda yadi tonagona Loma againe gikovavaga'auhidi. Ada ahe hivaga'auta againe gigahedi gigayo, “Tobohiyakweyao, iya keke tamo gavadi koyona gadafaisewani, keke. Keke yada yo'o agaidiya gadakoyo, kadu keke yada dewa bwanenedeyao hivehawaleda-ma gadahawavekoyoyeni. Keke gadakoyo nonogana miYuda Yelusalema againe hikive'aviku be miLoma agaidiya hihegenauweku. 18#Af 26:32Au badi hivedewayaugiku tu gavadi koyona gafaisewani-yo alikeya hidahegeku-ma keke tamo hidanuhagani fa'ina nuwanuwadi hinayauku be ganana. 19Tu badi miYuda higahedi be keke hinayauku, fa'ina eda sa'eyanaga againe akufaiweya ganana, higa gave'o'ola be Loma Tokaiwabu Sisa againe ganakotu. Hidedemi gave'o'ola tu keke vaita tamo gavadi fa'ina tauku yaku yo'o bana matane gadahawavekoyoyedi, keke. 20#Af 26:6Ada hida gaitoma iya agaikuya gilakayemu fa'ina omi gakovavaga'auhimi be buye kanalukahihi. Au adamoya yogoyogoniku wa'itaku. Bana'e ide miIsileli kabodabodana be ginakibababaleda amanadi iya gavetumaganena fa'ina, hida bulava kainumula againe yogoyogoniku gamimiyami.” Hidedemi Folo miYuda yadi tonagona gigahedi.
21Tu badi higahena higayo, “Keke tamo leta o fa'iniya Yudiya againe hida'etoladini-yo adanuhagani, kadu keke tamo hakwadi tobohiyama sa'eyana medede againe gidatauya be gida'ela-yo o fa'iniya gidavenuwa'atama, o ka'i gidahawavekoyoye. 22Tu ime nuwanuwama ya nuwanuwa ananogalina, fa'ina ahalamanena kaliva fafali moya'aina agaidiya hida Yesu kwanaNasaledi yana yo'o badi agaidiya o uluku amanadi hi'awalavedi.” Hidedemi higahe.
Folo yana laumala anavelu Loma againe.
23Hidemi higahe tu tova hisena be Folo againe hinavaga'auta-havagi. Ada tovai-nadi giyemu againe, yo'o keke kabi'ona bana againe hivaga'auta. Yana kivetuvetunu malalauga givebutu be ginunauwena mala gibogi, ada Yaubada yana yo'ogaga ana luku fa'ina gilumamaledi. Gigaluvaluva be yana gahe Yesu fa'ine velemo'ena ma ginaseyemaunena be badi hinavetumaganena fa'ina. Ada Mosese yana buki-vehimeya againe kadu Yaubada bonana ana to'awatalatalaina velugadiyao yadi etoladi agaidiya bonai-nadi giyakahina, au badi Yesu fa'ine gavaimi higahegahe-ma giyakahina. 24Ada tovanenega tufoidi higahe higayo, “Au wona velemo'ena,” ada hivetumaganena. Tu tufoidi ma keke nuwanuwadi hinavetumaganeni. 25Au buye hivekwageya ada hivebutu hilowolowoga tu Folo yana gahe sa'eya-mo'ena badi gilukahihiyedi gigayo,
26 # Ais 6:9-10 Unana be hida yo'o miIsileli unagahedi unagayo,
Tova moya'aina Yaubada bonana wananoganogalina
tu keke halamana wanavaini.
Kadu wana'ita'itana tu keke wana'itahalamaneni.
27Au hida yo'o taudiyao nuwadi hikivefanina,
tagadi hi'ivekuluna, matadi hikive'uyuyuna.
Keke hidahawahegedi be matadi ganakivemahalini,
o ka'i tagadi ganakifoleni o nuwadi ganakiyauni.
Au keke nuwanuwadi Iya agaikuya hinahagaviladi
be ganakiveyamumudi fa'ina.
Au hidedemi Yaubada bana Aiseya awane gigahe.
28 # Af 13:46 Ada hidede amine Folo Yaubada bonana giyakahini-yo kadu gigahedi gigayo, “Au nuwanuwaku wanahalamane-hagihagiyena Yaubada ahe givehimeya be yo'o tulidiyao yana kibababala fa'ina hinanogalina, ada au badi'iyao amanadi hinavenogalena.” [ 29Ada hidede amine gigahe-yo badi miYuda hivebutu hilowolowoga tu yana gahe fa'ina buye hivekwavekwageya.]
30Tu bana Folo medede againe gimiyami malamala luhei. Kadu manuwa gimiyamiyanina-ma fatana tauna giseusena, ada gaveyao moya'aidi hi'ela be hina'itana medema yana wavemwamwala gilusiuleyedi. 31Yaubada yana yo'ogaga ana luku fa'ina gilumamaledi, kadu Kaiwabu Yesu Keliso fa'ina givehawaledi, ada au yana wa'asevatu gilukahihi ada keke tamo hakwadi gidahawatani. Au hidede amine.

ទើបបានជ្រើសរើសហើយ៖

Afositolo 28: viv

គំនូស​ចំណាំ

ចែក​រំលែក

ចម្លង

None

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល