Afositolo 26
26
Folo Kini Agelifa matane tauna gilugolegolena.
1Tu Agelifa Folo againe gigahe gigayo, “Au gahawahege be tauni fa'iniya unalukahihi.” Ada Folo nimana gikilakahina givebutu tauna gilugolegolena. 2Gigayo, “Kini Agelifa, nuwaku giyamumu fa'ina adamoya o mataniya gamidimidi be gaitoma moya'aina fa'ina miYuda hihawavekoyoyeku-ma iya tauku ganalugolegoleku. 3Wona velemona nuwaku giyamumu fa'ina o'eni miYuda yada dewa moya'aina kadu gaitoma moya'aina kavekwavekwageyena-ma uhalamane-hagihagiyena. Hidema fa'ina gave'o'ole be ya wa'atuvefa'ila yaku kahihi unavanenegena.
4 #
Af 22:3; Fl 3:5-6 Au miYuda moya'aidi yaku dewa boi kabi'okuya be tova adamoya ganunauwena-ma ahe hihalamanena. Tauku yaku melala againe kadu Yelusalema againe gavaiya'amine iya gahuluva ma au hihalamanena. 5E, boi tuwaina hihalamaneku ada ka'i badi nuwanuwadi amine, au iya fa'ikuya adifaiweya hina'awatalatalaina higa boi kabi'okuya yada tafalolo ana yo'o sa'eyana againe galuku, adi egana Falisi. Badi Falisi Mosese yana vehimeya ana idibumuhiga againe miYuda velugadiyao hitubuhegedi, ada iya Falisi fa'ina kadu hidedemi gahuluhuluva. 6#Af 28:20Ada tova adamoya yaku nuwanuwa sa'eyana fa'ina hivekotuku. Boi tuwai-mo'ena Yaubada bwanenedeyao agaidiya giwonadabadaba higa yana Tovegida adi kibababala fa'ina gina'iveninisena. Hida Yaubada yana wonadabadaba iya ganuwave'avina fa'ina hivekotuku. 7Ada au ide miYuda yada yo'o tuwelo matatabudi uyadayada be bogi Yaubada hihawahawadavadavana tu hinuwave'avina higa Yaubada giwonadabadaba amine, au badi agaidiya ginalakayemu. Ho Kauveya, miYuda higahe vaita hida nuwanuwai-nadi hidanuwave'avini tu iya kadu hidedemi ganuwave'avina nonogana hihawavekoyoyeku. 8Ide omi miYuda, gavana fa'ina wagahe vaita Yaubada keke anafaiweya kaliva alikeya ginasivemidididi?
9Tu boi iya tauku ganuwanuwa vaita gidalubodaku be gadavedivediwe kaliva Yesu kwanaNasaledi ana egana hivetumaganena-ma gadakivekoyodi. 10#Af 8:3Ada Yelusalema againe hidedemi gahuluva. Abaveyao ana tofaisewa kikaiwabudiyao yadi vehimeya againe Yaubada yana kaliva moya'aidi gakive'avidi be deliya gasedi. Muliya hivedewayaugidi againe, ka'i tovedewayauga hivehimeya be vaita alikeya hinahegedi, au iya gave'ehe. 11#Af 9:1-2Kadu tova keke sa'eyadi manuwa-abavehawala sinagogi tulina tulina agaidiya ganauna be gamunumunudi higa yadi vetumagana hidahegena. Au Yesu yana kaliva agaidiya ga'ila'a-mo'a fa'ina gana lauveya mali fafali melalai-dina agaidiya galuku be gakivekoyodi.
Folo yana hagavila Yesu againe gilukahihiyena.
Afositolo 9:1-19, 22:6-16
12Tu tova sa'eyana gamidi be Damasiko againe ganana. Abaveyao ana tofaisewa kikaiwabudiyao hivegideku, ada aku vehimeya fefe againe hi'etoladina be ganauwena higa tovetumagana ganakivekoyodi fa'ina. 13Kauveya unogali! Edeya ganauna tu mahalina lakahi-mo'ena lobameya ga'itana, mema kauwana yana mahala gitubuhegena. Ada iya'eku kadu kaliva hivebwa'uliyeku-ma buye gituvemahalima. 14Au moya'aima babiya abe'u tu ago'ago sa'eyana ganogalina bona Hibeliu againe gigaheku gigayo, Saulo, Saulo! Gavana fa'ina ukikivekoyoku? Ya dewa vaita bulumakau amine. Wagana yana fuluma gi'utu'utu'atugena fa'ina, bulumakau tauna gi'ivekoliyana amine, meda o'eni yaku nuwanuwa udibudibutoyogena fa'ina tauni ase'ase una'ive'aulolona.
15Ada iya gagayo, Kaiwabu, O hakwa'adi?
Bana Kaiwabu gigayo, Iya'eku Yesu, ada Iya ukikivekoyoku. 16Au umidi. O againiya ga'ivemogataliku be yaku tofaisewa ganavegide. E, gavegide be tova adamoya u'itaku ma valeyaku una'awatalatalainena, kadu gavadi aimo tova mulina gana'ivemogatalina-ma una'awatalatalainena. 17Tauni ya yo'o miIsileli agaidiya ganalugolegole, kadu yo'o tulidiyao agaidiya ganalugolegole be keke hinakivekoyo. Au badi agaidiya gana'iveninise be matadi unakivemahalina. 18#Kl 1:13; 1Fi 2:9Unakivetuvetunudi be keke uyuyuya hinamiyami, au mahalina againe hinahagaviladi be hinamiyami, kadu keke Setani yana abavehimeya againe hinamiyami, au Yaubada yana abavehimeya againe hinahagaviladi be hinamiyami. E, hinahagaviladi be Iya agaikuya hinavetumagana, ada yadi vetumagana fa'ina Yaubada yadi koyona ginayawelina, ada yana yo'o mahamahalidiyao agaidiya ginalukuwedi. Hidemi Kaiwabu gigahe.
Folo yana faisewa Yesu fa'ine gilukahihiyena.
19Kini Agelifa unogali! Hida vehimeya lobama ana Kaliva giveleku-ma keke gadadibutoyogeni. 20#Af 9:22,28, 22:21Au nagona Damasiko kadu Yelusalema againe galumamala. Muliya miYuda yadi melala moya'aina agaidiya kadu yo'o tulidiyao agaidiya galumamala gagayo, Yami dewa koyona wanahegena be Yaubada againe wanahagavilami, ada yami hagavila velemo'ena ma yami huluva hagihagina againe wanaseyemaunena be moya'aidi hina'itana. 21#Af 21:30-31Hida yaku laumamala fa'ina miYuda manuwa-tafalolo lakahina againe hikive'aviku ada higaluvaluva be hidaluve'alikaku. 22Tu Yaubada yana veluga agaikuya tuwaina be ginunauwena tova adamoya fa'ina, adamoya-mo'a hidedei gamidimidi be moya'aimi agaimiya ga'awa'awatalatalaina, kabi'omiyao kadu lakahimiyao leleleya. Boi tuwai-mo'ena Mosese kadu Yaubada bonana ana to'awatalatalaina velugadiyao gavaimi aimo tova mulina ginalakayemu-ma higaheye-vagahina. Ada badi higahe amine, meda iya gagahe. Keke mali venuwa'ata gadalukahihiyeni. 23#Lu 24:46-47Ada badi to'awatalatalaina higahe vaita Yaubada yana Tovegida Keliso aulolo tagiya gidanuhagana, kadu gida'alika be gidamididi-havagi. Au Bana'e gidamiditowamidi fa'ina, miYuda agaideya kadu yo'o tulidiyao agaidiya mahalina fa'ina gidalumamala.”
Fesito be Agelifa Folo yana lugolagola fa'ina buye hive'agahegahe.
24Ada au hidedemi Folo tauna gilugolegoleni tu Fesito bana againe gikova agona lakahina gigayo, “Folo, o kabakabaleya. Tova moya'aina buki uhawahawana fa'ina uvekabakabaleya.”
25Tu bana Folo gigahe gigayo, “Kauveya Fesito, iya keke gadavekabakabaleya, au nuwanuwa velemona kadu tunutunugina galukahihiyena. 26#Yo 18:20Kini Agelifa, hida gaitoma ahe uhalamanena fa'ina akufaiweya o againiya ganagaheye-mo'ena, keke tamo gavadi ganasevauyeni. Gaitoma ahe gilakayemu-ma keke hukune gidalakayemu, au kabu'avane gilakayemu fa'ina iya gavaita hida gaitoma moya'aina uhalamane-'owona. 27E, Kini Agelifa, gavaiyami? Ka'i Yaubada bonana ana to'awatalatalaina yadi gahe uvetumaganena? Makewa uvetumaganena ma iya gahalamanena!”
28Au bana Agelifa Folo againe gigahe gigayo, “Ka'i mene o unuwanuwa vaita tova adamoya ya laumamala kali'uhona againe udasive'auyeku-yo Yesu Keliso gadavetumaganeni?”
29Bana Folo gigayo, “Ka'i laumamala kali'uhona o ka'i tunugina au ai'adi, tu Yaubada againe gave'o'ola be iya ganuhagana amine kadu o'eni unanuhagana, ada moya'aimiyao adamoya yaku gahe wavanevanenegena-ma kadu wananuhagana. Tu keke nuwanuwaku hida bulava kainumula againe omi hinayogomi.”
30Hidedemi gigahe-yo bana kini gitowamidi kadu kabemani ada Benisi, kadu moya'aidi badi buye hihiyoto-ma himidi. 31#Af 25:25Ada hihobu be buye hive'agahegahe higayo, “Ayoma! Bana hida kalivai-nadi keke tamo gavadi koyona gidafaisewani tu hima gavana hidamiyaluve'alikani o ka'i deliya hidamiyaseni.”
32Ada au Agelifa Fesito againe gigahe gigayo, “Ka'i bana hida kalivai-nadi keke gidave'o'ola be Loma Tokaiwabu againe gidakotu digo, adafaiweya kadayauna be gidana.”
ទើបបានជ្រើសរើសហើយ៖
Afositolo 26: viv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2003, Wycliffe Bible Translators, Inc. All rights reserved.
