Afositolo 23
23
Folo miYuda yadi Koniselo agaidiya gikotu.
1Tu Folo Koniselo gi'itakwanekwanedi be gigahedi gigayo, “Tobohiyakweyao, tova moya'aina nuwafouku yegayegana Yaubada matane. E, boi kabi'okuya gahuluva yamumuna be ganunauwena tova adamoya, ada keke tamo gavadi koyona fa'ina Yaubada gadamatauseni-yo gadavenuwanauna.” 2Folo hidedemi gigahe tu abaveyao ana tofaisewa adi tokaiwabu, ana egana Ananaiyasi, badi kaliva Folo liline himidimidi-ma givehimeyedi be bana awane hinamununa. 3Au Folo gigahena gigayo, “Yaubada makewa o ginamunu, o ya huluva vaita tuhi kwauna hikilumina ana ita yamumuna tu hinagena ma bwanebwanenena. O mene uvetoga be ide miYuda yada vehimeya amine unavedewayaugiku. O tovedewayauga nonogana vehimeyai-nadi keke uda'abini, fa'ina kaliva ugahedi be hinamunu-kawowoku.”
4Gigahe-yo kaliva bana liline himidimidi-ma higahena higayo, “O hakwa'adi? Bana wadevama Yaubada yana abaveyao ana tofaisewa kikaiwabuna tu o u'ihawadamanena.”
5 #
Yem 22:28
Au Folo gigayo, “Tobohiyakweyao, me bana abaveyao ana tofaisewa adi tokaiwabu ma keke gadahalamaneni. Ka'i gadahalamanena digo, keke hidede amine gadagahe, fa'ina Veyao Tuwaina ana buki gigahe gigayo,
Yami yo'o adi tovehimeya keke wanahawavekoyoyeni.”
6 #
Af 24:15,21 Himiyami tu Folo a gihalamanena koniselo yadi yo'o luhei. Tufoidi adi egana Sadusi kadu tufoidi adi egana Falisi. Yadi yo'o luhei fa'ina nuwana gi'afolena, au samuba hinagene gikova gigayo, “Tobohiyakweyao, iya Falisi, higa iya yo'o tafatafalolodiyao adi egana Falisi kalivana. Yaku nuwanuwa sa'eyana fa'ina adamoya wanavedewayaugiku, higa iya ganuwave'avina vaita badi to'alika aimo tova mulina hinamididi-havagi.” 7Ada hidedemi gigahe-yo badi Falisi kadu Sadusi hivebutu hivekwageya, ada au hinuwanuwaluga. 8#Md 22:23Hinuwanuwaluga higa badi Sadusi ma higahe vaita kaliva keke alikeya hinamididi-havagi, kadu vaita lobama ana tovenuwa'ata keke, kadu balauma keke. Tu badi Falisi ma hinuwanuwa vaita hida gaitomai-dina tohiye au velemo'ena, mididi-havagi, lobama ana tovenuwa'ata, balauma.
9Au buye hive'akovakova agodi gilakata, ada Mosese yana vehimeya ana tovehawala tufoidi, badi Falisi kalivai-dina, hitowamidi higahe toyogina higayo, “Keke tamo gavadi koyona bana againe adanuhagani. Ka'i velemo'ena balauma o ka'i lobama ana tovenuwa'ata edeya bana againe gilukahihi.” 10Ada au yadi vekwageya againe hifaiwala-mo'a fa'ina, togiyomatana gimatauta vaita Folo hidave'asitaineni. Au yana tolugaviya givehimeyedi be yo'o hinafadiya hinahobu, Folo hinalemadi be yadi manuwa toyogina againe hinanauwena.
11 #
Af 28:16,23 Hinauwena tu bogi againe Kaiwabu gi'ela Folo liline gimidi gigahena gigayo, “Una'asevatu. Hidedei Yelusalema againe Iya fa'ikuya ahe u'awatalatalaina, kadu aimo Loma againe meda anafaiweya afaiweya uda'awatalatalaina.”
MiYuda hivevai be Folo hinaluve'alikana.
12Mala gilauna tu miYuda tufoidi buye hivaga'auta be hivevai. Yaubada matane hiwonadabadaba higayo, “Keke tamo gavadi ana'ani o ka'i anayuni tu nagona Folo analuve'alikana. Yaubada, au uhalamanema.” 13Ada tovevai adi yo'o foti (40) kadu gavaiyehi amine. 14Hiwonadabadaba gihavaina, hina abaveyao ana tofaisewa kikaiwabudiyao kadu kaliva lakahidiyao hivenuwa'atadi higayo, “Ime Yaubada matane awonadabadaba higa vaita keke tamo gavadi ana'ani tu nagona Folo analuve'alikana. 15#Af 25:3Au omi'iyao kadu Koniselo moya'aidi togiyomatana againe wanave'o'ola be yana kaliva Folo omi agaimiya hinasehobuyena. Omi wanagahe vaita nuwanuwami wadatoliluveluveni-yo yana dewa wadahalamane-hagihagiyeni. Tu Folo keke omi agaimiya ginayemu, fa'ina ime akidewadewa be edeya analuve'alikana.”
16Hidedemi hivevai tu kaliva sa'eyana, Folo nouna natudi, kaliva yadi nuwanuwa higa edeya hinaluve'alikana ma ginogalina, au gina tolugaviya yadi manuwa toyogina againe giluku Folo givenuwa'atana. 17Bana Folo ginogalini-yo tonagona sa'eyana gikovana be gigahena gigayo, “Hida kwanatubulakahina togiyomatana againe unanauwena. Yana nuwanuwa sa'eyana fa'ina ginavenuwa'atana.”
18Au tonagona kwamana ginauwena be togiyomatana gigahena gigayo, “Bana filisina ana egana Folo gikovaku, ada give'o'oleku be hida kwanatubulakahina o againiya ga'aliyena, yana nuwanuwa sa'eyana ginalukahihiyena fa'ina.” 19Ada togiyomatana nimane gi'abina be gisi'aliyeni tu gigahena gigayo, “Yavanuwanuwa unagaheyena.”
20Bana gigayo, “MiYuda yama tonagona buye hivevai, ada bogiyadi hinave'o'ole be ya kaliva Folo Koniselo agaidiya hinasehobuyena. Hinagahe vaita hidatoliluveluveni-yo yana dewa hidahalamane-hagihagiyeni. 21Tu keke unavenogaledi fa'ina yadi kaliva adi yo'o foti (40) kadu gavaiyehi amine edeya hinaveu be hinabodana. Badi hida kalivai-dina Yaubada matane hiwonadabadaba higa vaita keke tamo gavadi hina'ani tu nagona Folo hinaluve'alikana. Ada ahe hikidewadewa tu ya vehimeya higa Folo Koniselo agaidiya unahawahegena fa'ina hibodaboda.”
22Au hidedemi kwamana givenuwa'ata ada togiyomatana gigahena gigayo, “Hida ya venuwa'ata iya agaikuya keke tamo hakwadi againe unalukahihiyeni. Au unana.”
Folo Loma kabemani ana egana Filikesi againe hinauwena.
23Kwamana gina tu togiyomatana yana tolugaviya adi tonagona luhei gikovadi be gigahedi gigayo, “Wanakidewadewa. Adamoya uyuyuya kauwana ana bai naeni amine wanalowoga be Sisaliya againe wanana. Ami tolugaviya hanaledi luhei (200) agediya hinana, kadu kaliva seveniti (70) hosi agaidiya hinayage be hinana, kadu to'ai'onaga hanaledi luhei (200) yadi wagiyo hinana. 24Kadu'e, hosi tufoidi Folo fa'ina wanakidewedewedi, ada kabemani lakahina ana egana Filikesi againe wananauwena. Au wana'itave'avi-hagihagiyena be keke tamo vita eda againe ginanuhagani.”
25Togiyomatana yana kaliva adi'iselu givehimeyedi gihavaina, Filikesi yana leta gi'etoladina ada leta hidedemi gigahe.
26Yo siule kabemani Filikesi, o kaliva lakahi. Adamoya iya Kelodiyo-Laisiyasa nimaku una'itana.
27 #
Af 21:30-33, 22:25-27 MiYuda hida kaliva o againiya ga'iveninisena-ma hikive'avina higa hidaluve'alikana fa'ina, tu bana valeyana ganogalina higa bana Loma kaliva, fa'ina yaku tolugaviya buye ahobu ana alugolegolena. 28#Af 22:30Iya nuwanuwaku ganahalamanena ka'i gavadi-yo hihawavekoyoyeni, fa'ina gasehobuyena be yadi Koniselo matadiya galukuwena. 29Ada inubana ahe ganuhagana, higa keke tamo gavadi koyona gidafaisewani tu kadamiyaluve'alikana o ka'i deliya kadasena, au miYuda yadi vehimeya gaitomana fa'ina hihawavekoyoyena. 30#Af 23:12-13Tu muliya miYuda tufoidi hivevai be hinaluve'alikana, ada kaliva sa'eyana yadi nuwanuwa fa'ina givenuwa'ataku. Ganogalini-yo auhe'ama yaku kaliva gavehimeyedi be o againiya hina'aliyena. Kadu badi kaliva hihawavekoyoyena-ma gavehimeyedi be o againiya hinavekotuna.
Au hidedemi togiyomatana Filikesi yana leta gi'etoladina.
31Tu tolugaviya yadi togiyomatana yana vehimeya hidibumuhigena. Folo hivega'aulena be hinauwena, ada medema bogi-nadi againe hina melala ana egana Adifadalisi againe hiyemu. 32Mala gilauna tolugaviya agediya hinana-ma hilowoga, yadi manuwa toyogina againe hiyewadi tu badi hosi kwaudiya hinana-ma Folo hivebwa'uliyena be Sisaliya againe hinauwena. 33Hiyemu tu kabemani lakahina yana leta hivelena, ada Folo bana nimane hisena. 34Bana kabemani lakahina yana leta gihawana gihavaina, Folo gitoliluveluvena gigayo, “O gava fafali kalivana?” Ada Folo gigayo, “Iya Silisiya kaliva.” 35Bana kabemani ginogalini-yo gigahena gigayo, “Badi nuwanuwadi hinavekotu-ma hina'ela-yo o kahihi gananogalina.” Au yana kaliva givehimeyedi be Folo Helodi yana manuwa lakahina againe hinalukuwena, ada medede againe tolugaviya hina'itave'avina.
ទើបបានជ្រើសរើសហើយ៖
Afositolo 23: viv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2003, Wycliffe Bible Translators, Inc. All rights reserved.
