Afositolo 10
10
Koniliyo Fita giyowanina.
1Tu kaliva sa'eyana Sisaliya againe gimiyami, ana egana Koniliyo, ada bana togiyomatana miLoma yadi ame adi yo'o sa'eyana agaidiya, yo'o-nadi fafali ana egana Itali againe hiyemu. 2Ada bana totafalolo, bana'e kadu yana manuwa hinagena moya'aidi buye tova moya'aina Yaubada againe hihawadavadava. Kadu tova moya'aina miYuda yadi koyokoyo agaidiya nuwakabubu gifolafolakena, ada aiyeta sa'eyana sa'eyana Yaubada againe give'ove'o'ola. 3#Af 9:10Tova sa'eyana kauwana giwahivekenana againe give'ove'o'ola tu gi'eno'ita, ada Yaubada yana tovenuwa'ata sa'eyana gi'itana bana againe gi'ela ana egana giyakahina gigayo, “Koniliyo.”
4 #
Ha 8:4
Au bana Koniliyo gimatautave'ine ada tovenuwa'ata againe gi'itadona gigayo, “Kauveya, gavadi-yo u'ela?”
Bana tovenuwa'ata gigayo, “Yaubada ya ve'o'ola moya'aina a ginogalina, kadu ya nuwakabubu koyokoyo agaidiya ufolafolakena-ma a gi'itana, ada medema againe nuwana ginauna. 5Au kaliva tufoidi Yofa againe una'iveninisedi be kaliva sa'eyana hinayowanina, ana egana Saimoni, kadu ana egana velugana Fita. 6#Af 9:43Ada adamoya wagakoyona Saimoni againe giwakawaka bana wagakoyona yana faisewa ma bulumakau kwafilidiya lokoloko gibubuna. Ada yana manuwa taliya liline gidadauda.”
7Hidedemi tovenuwa'ata gigahe be gina, tu Koniliyo ana agetoga adi'iselu kadu yana tolugaviya sa'eyana giyowanidi be hi'ela. Bana tolugaviya higa Koniliyo ana toveluga, ada bana kadu Yaubada gimatamatausena. 8Au badi hi'ela be tovenuwa'ata yana gahe fa'ina gilukahihiyena, ada Yofa againe gi'atuhegedi.
Fita gi'eno'ita.
9Tova anavelu badi aimo hinauna ada Yofa eda'ufo hiyemuyemu tu bana Fita manuwa getane gilaka be ginave'o'ola fa'ina, ada kauwana getadiya gilaka. 10Ada Fita mafu gilauna ada nuwanuwana a'a gina'ana. Au anaga aimo gitagotagova tu gimiyami ada gi'eno'ita. 11Ada yana ita againe lobama gi'ayavalina be gaitoma sa'eyana vaita lifi lakahina amine gihobuhobu, vaita gaveyao hukuna fowa hida'abi'abini-yo babiya hidatunevelowoni. 12Ada lifi hinagene kevakeva moya'aidi himiyami madumadugidiyao gayagayagidiyao yaveyavegidiyao, waumidi tulidi tulidi. 13Ada ago'ago sa'eyana ginogalina gigayo, “Fita, umidi. Au tamo kevakeva umunu be u'a.”
14 #
1Veh 11:3,13,20,26 Bana Fita gigayo, “Kaiwabu, keke-mo'a! Mema kevakeva koyodiyao ime miYuda matameya ada boi keke tamo hidevama gada'u'ani.”
15Tu agona ginogali-havagilena gigayo, “Gavadi moya'aina Yaubada gikiveyamumuna-ma o keke unahawavekoyoyeni.” 16Ada au hidede amine gigahena tohiye, au lifi lobameya tamo hakwadi gisilakahina.
17-18Tu Fita yana ita ana nuwanuwa aimo ginuwanuwadadaneni tu kaliva Koniliyo gi'iveninisedi-ma hitolitoliluvaluva be higa ha'againe Saimoni yana manuwa gidauda-ma hinahalamanena. Au hinuhagani-yo yana eda'awaneya himidi ada hilautoli higayo, “Ka'i mene Saimoni-Fita gimimiyami?”
19 #
Af 11:12
Tu bana Fita ma yana ita gavaimi ana kaivila ma aimo ginuwenuwena tu Alu'aluwa Mahalina gigahena gigayo, “Unogali! Mene kaliva adi'itoto yo'o tulidiyao kalivadi o hilelele. 20Au umidi be unamaduhobu ada omi miYuda ami hawata fa'ina keke unanuwanuwa, au badi buye wanana fa'ina Iya ga'iveninisedi be hi'ela.”
21Au Fita kaliva agaidiya gihobu be gigahedi gigayo, “Kaliva walelena-ma iya'eku. Gavadi-yo wa'ela?”
22Badi higayo, “Yama togiyomatana, ana egana Koniliyo, gi'iveninisema be a'ela. Bana kaliva hagihagina, tova moya'aina Yaubada gihawadavadavana ada miYuda moya'aidi hiwowomumuyena lakahina. Ada Yaubada yana tovenuwa'ata sa'eyana bana againe gi'ela givehimeyena ada o ginayowani be yana manuweya una'ela, higa gavaimi o unagahe-ma ginanogalina.”
23Au Fita yadi gahe ginogalini-yo gigahedi gigayo, “Au walaka'ela hidei kanada tu bogiyadi-yo kanana.”
Fita Koniliyo againe gina.
Bogi hida mala gilauna Fita gikidewadewa be kaliva buye hilowoga, kadu tovetumagana tufoidi, badi miYofa, bana hivebwa'uliyena. 24Hinauna tu tova anavelu Sisaliya againe hiyemu, ada au Koniliyo gibodebodedi. Tobohiyaneyao kadu yana yo'o buye gikovavaga'auhidi ada hibodaboda. 25#Ha 19:10; Md 4:10Au bana Fita gidaluku ma Koniliyo bana againe gi'ela gi'ibo'ula-mo'a be ginahawadavadavana. 26Tu Fita gisivemididina gigahena gigayo, “Au umidi! Iya keke Yaubada, iya tomiyababi.”
27Au Fita Koniliyo againe gilulukahihi tu manuweya gilukuluku, yo'o lakahina ahe hivaga'auta-ma ginuhagadi. 28Au gigahedi gigayo, “Ime miYuda ama hawata sa'eyana omi wahalamane-hagihagiyena, higa kwanamiYuda yo'o tulidi kalivana againe keke anafaiweya ginawakawaka o ka'i buye hinanunaudadana. Tu Yaubada halamana giveleku be higa keke tamo kaliva fa'ina ganagahe ganagayo, Wadema kaliva bwanebwanenena o ka'i keke yegayegana. Hidema fa'ina keke akufaiweya yo'o tulimi kalivana ganakiloweni. 29Ada hidema fa'ina o uyowaniku againe, keke gadadibutoyoga au gamadu'ela, tu iya nuwanuwaku ganahalamanena gavadi-yo uyowaniku.”
30Tu bana Koniliyo gigahena gigayo, “Aiyeta tohiye kahegedi againe yaku manuweya gamiyami gave'ove'o'ola, ada kauwana tova adamoya amine meda giwahivekenana. Gave'ove'o'ola tu auhe'ama kaliva sa'eyana wamagigikuya gi'ela gimidi ana vaigau ve'akinamanamalina. 31Ada gigayo, Koniliyo, Yaubada ya ve'o'ola ahe ginogalina, ada ya nuwakabubu koyokoyo agaidiya ginuwa-nunauyena. 32Au tamo hakwadi Yofa againe una'iveninisena be kaliva sa'eyana ginayowanina ana egana Saimoni Fita. Ada adamoya wagakoyona Saimoni againe giwakawaka, bana wagakoyona yana faisewa ma bulumakau kwafilidiya lokoloko gibubuna. Ada yana manuwa taliya liline gidadauda. 33Hidedemi gigahe fa'ina gamaduyowani ada o unuwakabubuyeku be u'ela. Ada au moya'aima hidei Yaubada matane avaga'auta be gavaimi Kaiwabu givehimeya ime agaimeya ma unagaheyena be ananogalina.”
Fita Koniliyo yana yo'o buye agaidiya gilumamala.
34 #
Lo 2:11
Tu bana Koniliyo gigahe-yo Fita givebutu gilumamala gigayo, “Adamoya halamana gavaina. Wona velemona Yaubada keke kaliva tufoidiga gida'ita'itadi, au moya'aida gi'ita'itada leleleya. 35Au gaveyao himatamatausena kadu hihuluhuluva tunutunugina, medema gi'itanuwakabubuyedi, ka'i kwanaYuda o ka'i yo'o tulimiyao kalivai-mina. 36#Ef 2:13-14Venuwa'ata miIsileli agaimeya gi'iveninisena-ma au wahalamanena. E, Venuwa'ata Yamumuna gihawavemogatalena higa Yesu Keliso yana alika fa'ina ime Yaubada buye aveyao, ada Bana Yesu kaliva moya'aidi adi Tovehimeya. 37-38#Md 3:16Kadu gaitoma lakahina Yudiya ana fafaliya gilakayemu-ma wahalamanena, higa Yesu kwanaNasaledi fa'ine. Yaubada Bana givegidena be Alu'aluwa Mahalina againe givemagana kadu gifaiwalavelena. Yoni gimidilumamala be kaliva gikivebafitaisoyedi tu muliya Bana Yesu yana faisewa Galili ana fafaliya givebutuna. Ada Yaubada Bana buye himiyami fa'ina, fafali moya'aina agaidiya ginunudadana kaliva giveluvelugadi, ada gaveyao moya'aidi Setani yana vehimeya againe himiyami-ma gisiveyawadi. Au hidedemi wahalamanena.
39-40 #
1Ko 15:4-7
Tu ime'eyao ma to'ita. Yana gugai moya'aina Yelusalema againe kadu miYuda yama fafali matatabuna agaidiya gifaisewadi-ma a'itadi. Kelose againe hitutuvefosena be hiluve'alikana, tu aiyeta anaveto againe Yaubada alikeya gisivemididina be gikiveyemaunina. 41#Lu 24:42-43Keke kaliva moya'aidi agaidiya gidakiveyemaunini be hida'itani, au ime'eyaogaga a'itana, ime Yaubada boi ahe givegidema be yana mididi-havagi fa'ina anahawavemogatala. Ada ahe alikeya gimididi-havagi againe, Bana buye a'au'a ayuyu. 42#Af 17:31Ada givehimeyema be kaliva agaidiya Bana fa'ine analumamala ada anahawavemogatala higa Yaubada givegidena be kaliva moya'aidi, yawayawadiyao kadu ali'alikadiyao, ginavedewayaugidi be laufata hinavaina. 43#Ais 53:5-6; Yel 31:34Ada tuwai-mo'ena Yaubada bonana ana to'awatalatalaina moya'aidi Bana fa'ine hihawavemogatala, yadi buki againe higahe vaita gaveyao moya'aidi Bana againe hinavetumagana, medema yadi koyona ana aiyawela Yesu againe hinanuhagana.”
Alu'aluwa Mahalina Koniliyo yana yo'o buye hinuhagana.
44Bana Fita aimo hidedemi gilulukahihi tu Alu'aluwa Mahalina tovanenega moya'aidi giluvaiyedi. 45Ada badi miYuda tovetumagana Fita buye Yofa againe hitauya-ma nuwadi givegafo'uya'uya, fa'ina Yaubada Alu'aluwa Mahalina yo'o tulidiyao agaidiya kadu gihawahegena. 46#Af 2:4Au agodi hinogalina, meya tulina tulina againe hilulukahihi Yaubada ana egana hikikilakahina.
47Hidedemi hilulukahihi tu bana Fita gigahe gigayo, “Keke tamo hakwadi hida kaliva anafaiweya ginahawatadi be gufa againe hinabafitaiso, fa'ina ime Alu'aluwa Mahalina anuhagana amine, kadu badi hinuhagana.” 48#Af 2:38; Md 28:19Au givehimeyedi be Yesu Keliso ana eganeya hinabafitaiso. Hibafitaiso gihavaina hive'o'olena be aiyeta tufona badi agaidiya ginamiyami.
ទើបបានជ្រើសរើសហើយ៖
Afositolo 10: viv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2003, Wycliffe Bible Translators, Inc. All rights reserved.
