SIRAC 41
41
Patey
1Patey! Say pakanunot labat ed ipapatey et ampait ed toon maaligwas, mambibilay a mareen ed pegley da ray kayaryan to, anggapoy kapagaan to, tan masamit ni so panangan to.
2Patey! Say sintinsia to maliket ya aawaten na toon mairap so bilay to, onkakapoy so laman to, mataktakken, ambelat iray gunigon to, bulag, tan anggapoy ilalo.#41:2 Diad tikston Hebreo bulag tan anggapoy ilalo; diad tikston Grigo mananumpa tan anggapoy anos.
3Ag ka ontatakot ed sintinsia na patey. Ag mo lilingwanan a sinmabid saray totoon akaona nen sika tan onsabid saray totoon ontombuk ed sika. 4Impaakseb ya na Katawan para amin a pinalsan mabilay. Siopa ka ya onsumlang ed labay na Sankatageyan? Diad pasen a panaayaman da ray inaatey, anggapoy wala ed siopaman no nambilay ka na samploy taon, sanlasus, odino sanlibo.
Say Pansumpalan da ray Totoon Maoges
5Saray anak da ray makasalanan ya ombabaleg irad pasen ya anggapoy dios et ompaway iran kabosubosul a totoo. 6Nabalang day antokaman a tawiren da, tan mansiansiad kababaingan iray dilin anak da. 7Tetelen na saray anak iray atateng da, lapud inkaplag dad kababaingan.
8Pakaskasi kayo, sikayon anggapoy takot ed Dios ya inkaindan yoy Ganggan na Sankatageyan a Dios. 9No wala ray anak yo, ondalan ed sikaray desyang, et ermen labat so natilak ed sikayo. No natumba kayo walay baleg a gayaga,#41:9 Diad tikston Hebreo No... gayaga; diad tikston Grigo Nianak kan nisamba. tan nisamba kayo anggan inatey kayo la. 10Say manlapud anggapo#41:10 Diad tikston Hebreo anggapo; diad tikston Grigo dalin. et ompawil ed anggapo; ontan met so nagawa ed saray totoon anggapoy Dios, ta asintinsiaan iran naandipat.
11Anggapoy kakanaan na laman na too,#41:11 Diad tikston Hebreo Anggapoy... too; diad tikston Grigo Naeermenan so impatey na laman na sakey a too. balet mansiansia ya anggad angga so maung a ngaran. 12Iyagel moy maung a ngaran mo; andokey ni nen say bilay mo tan mabayag niy pansiansia to nen say sanlibon kayamanan a balituk. 13Mansamput so maung a panagbilay, balet mansiansia ya anggad angga so maung a ngaran.
Saray Nepeg ya Ibaing
14Sikayo ran anak ko, sumpal yo so ibabangat ko tan mambilay kayon mareen. Say kakabatan ya ag nikakana et singa kayamanan ya inyamutanggapoy kakanaan dan dua. 15Maung ni so toon sasakuban toy inkakulang-kulang to nen say toon ag to ikakanay kakabatan to.
16Sikayo ran anak ko, dengel kayo, ta ibagak ed sikayo no kapigan so manepeg ya ombaing kayo.#41:16 Diad tikston Hebreo Sikayo... kayo; diad tikston Grigo Pagalangan yo iray ibabagak. No maminsan aliwan manepeg so ombaing.
17Diad arap na saray atateng yo,
ibaing yoy panggawa na immoralidad
Diad arap na manoley odino sakey a toon atagey so kipapasen to,
ibaing yoy pantila.
18Diad arap na huis, ibaing moy panggaway krimin.
Diad arap na tipon da ray totoo, ibaing moy panumlang ed ganggan.
Diad arap na sakey a kaaro odino kaiba, ibaing moy pansaol.
19Diad arap na saray kaabay yo, ibaing yoy pantakew.
Ibaing yoy ag panumpal na sipan,#41:19 Diad tikston Hebreo ag panumpal na sipan; diad tikston Grigo sikayon dili diad arap na katwaan na Dios.
pantalimeg na siko ed lamisaan a pananganan,
pansiblet no kekerewan kayo
20ag pangibano no nibano kayo,
panmolagat ed sakey a marotak a bii,
21ag pangiter na kekerewen na sakey a kanayon,
ag pangiter na kanepegan na sakey a too,
panmolagat ed asawa na sakey a laki,
22panggusto ed aripen a bii (arawi kad dokulan to!)
pamabaing ed saray kakaaro,
pamatombuk na balaw ed saray rigalo,
23pangibawag ed saray iyaamut.
Sikara yay panaon a nepeg moy ombaing, et pagalangan ka na saray totoo lapud ibaing mo.
ទើបបានជ្រើសរើសហើយ៖
SIRAC 41: PnPV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Philippine Bible Society New Testament © 1977, Bible © 1983