SIRAC 24
24
Say Panangidayew ed Kakabatan
1Dengel kayod Kakabatan! Ikikinon toy pankakanta to ray dilin dayew to ed arap da ray Israelita, saray dilin totoo to, 2diad tipon na Sankatageyan, diad arap na pakayari#24:2 pakayari; odino saray anghil. to.
3Siak so salita a sinalita na Sankatageyan
Kinobutan koy mundo a singa kelpa
4Ginawak ed sankatageyan a tawen so abung ko,
diad lusek a lorem so tronok.
5Nanakar ak a bukbukor diad kaliber-liber na limpek na tawen
tan nanakar ak a binmeltang ed dayat diad dalem na dalin.
6Nanoley ak diad#24:6 Nanoley ak diad; diad pigaran manuskrito Akayaryan ko so. intiron mundo tan saray daluyon na dayat,
diad amin a bansa, diad amin a katoowan.
7Ninmengneng ak ed amin a pasen a mananap na panayaman,
diad sakey a parti na mundo a panggawaan koy abung ko.
8Insan say Manamalsak ya amalsad sansinakuban
imbaga tod siak so pasen a panayaman ko.
Manggawa kad Israel na abung mo kuanto,
Saray kabyangay boleg nen Jacob so magmaliw a totoom.
9Pinalsa to ak diad ando lan ando, kasakbayan a ginmapo so panaon,
tan mansiansiay kiwawalak diad anggad angga ya onsabi.
10Nanlingkur ak ed sikato diad masantod Tulda
insan nanggawa ak na abung ko diad Palandey na Sion.
11Impanayam to ak ed Inararon Siudad
tan initdan to ak na pakaoley ed Jerusalem.
12Nanlamut ak ed pegley da ray gagalangen a totoo
a pinili na Katawan a kayaryan to.
13Binmaleg ak a singa saray kiew a sidro ed Libano,
singa saray sipris ed Palandey na Hermon,
14singa saray kiew a palmira na En-gadi,#24:14 na En-gadi; diad pigaran manuskrito diad gilig na dayat.
singa saray rosas na Jerico,
singa saray mararakep a kiew na oliba diad kaalogan,
singa saray kakiewan a platano diad abay na danum.
15Singa angub na pabalingit a kanila so ingas ko,
singa mansamyong a pabalingit tan sankaabigan a mira,
a nanlauk na astakti, onita, tan galbano,
say ambalingit ya insinso diad masanton Tulda.
16Singa kiew a robli ya isasalumpapak ko ray sangak,
marakep tan balibali.
17Singa wakal na ubas a papawayen ko ray marakep a simit ko;
nagmaliw ya amayamay tan marakep a bunga iray rosas ko.#24:17 Inyarum na pigaran manuskrito so birsikulo 18: Siak so ina na marakep a panangaro, na takot, pakatalus, tan masanton ilalo. Bangta andi-anggaan ak, niiter ak ed amin da ray anak ko a nginaranan ira na Katawan.
19Dago kayod siak, amin yon malabay ed siak,
tan mampesel kayod saray bungak.
20Nanunotan yo ak a masamit ni nen say dilo,
maung ni nen say dilon nanlapud obung na bayaung.
21Akan yo ak, et mampilalek ki nin mangan;
inom yo ak, et mampilalek ki nin oninom.
22Onur yo ak, et ag kayon balut nabaingan;
gawa yoy ibabagak, et arawi kayod kasalanan.
Say Kakabatan tan say Ganggan
23Say Kakabatan et say Ganggan, say Ganggan ya imbilin nen Moises ya onuren tayo, say sipanan na Sankatageyan a Dios, say tawir na saray sinagoga na Israel.#24:23 Inyarum na pigaran manuskrito so birsikulo 24: Mampabiskeg ka lawas ed Katawan; manayam kad kawalaan to pian pabiskegen to ka. Anggapoy arum a Dios no ag say Katawan a Makapanyarin-amin, tan sikato labat so manangilaban. 25Manlelepwas na Kakabatan so Ganggan a singa Ilog na Pison, singa Ilog na Tigris no panaon na panagborbor na bungay tanaman. 26Napnapno na pakatalus so Ganggan a singa Ilog na Eufrates, singa Ilog na Jordan no panaon na panagani. 27Mankirkirlap na saray bangat a singa Ilog na Nilo,#24:27 Diad sakey a dagdaan a patalus Mankirkirlap Nilo; diad tikston Grigo Pawawandagen ton singa silew iray bangat. singa Ilog na Gihon no panaon na panagborbor na ubas.
28Aliwan sigput so impakaamta na ononan pinalsan too ed Kakabatan, tan ag naamtaan a sigput na samput a too. 29Maawang nen say dayat so kanunotan na Kakabatan; aralem ni nen saray sankaaraleman a danum ed dalem na dalin so simbawa na Kakabatan.
30No para siak, impasen koy siak a dili a singa banawang na paranum a mangyaakar na danum ed tanamanan a manlalapud ilog. 31Ginetmak a salogen labat iray tanaman kon mambunga tan saray manrosas a tanaman, balet nagmaliw ya ilog so banawang, tan say ilog nagmaliw a dayat. 32Kanyan ipaparontal kod sikayo so aral ko; bebembenan ko na atagey, pian nanengneng ed anggan iner a pasen so liwawa to, a singa say ompapaway ya agew. 33Singa apuyanan a propita, iibung ko ray bangat ko, pian napinabangan ira na saray mantombuk a kailalakan. 34Nabirbir yo komun ya aliwan para siak labat so impankimey ko na pinasya, no ag ingen pian natulongan so siopaman a labay toy magmaliw a makabat.
ទើបបានជ្រើសរើសហើយ៖
SIRAC 24: PnPV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Philippine Bible Society New Testament © 1977, Bible © 1983