Say Kumadwan Libro na SARAY MACABEO 9
9
Dinusa na Katawan si Antioco
(1 Mac. 6:1-2; 2 Mac. 1:11-17)
1Diad saman met a panaon, si Antioco et onsesener ya agew-agew manlapud Persia, 2a diman linmoob ed siudad na Persepolis tan sinali ton takewan so sakey a timplo tan oleyan imay siudad. Nanaala na armas iray katoowan tan dinogpaan day Antioco, kanyan apasoot a pinmoliktar iray sondalo to a naplag irad kababaingan. 3Nen akasabid Ecbatana si Antioco, nibalitad sikato so agawad saray sondalo di Nicanor tan Timoteo. 4Mapalaloy pasnuk to tan ninunot ton pambayaren iray Judio ed samay inkatalo to. Kanyan ingganggan to may kutsiro na karwahi to ya ag ontotonda ya anggad pakasabi rad Jerusalem. Mapasapasang ya inkuanto, Pagmaliwen kon kamposanton napno na saray Judio so Jerusalem.
Balet ag to amta a sikatoy mamapaarap a mangakoy sintinsia na Dios. 5Diad tuay tua, kapangibaga tod sarayan salita, say Katawan a sankanengneng toy amin a bengatla, say Dios na Israel, et kinabil toy Antioco na ag nanengneng balet makapatey a bengatla. Sinmakisakit so eges nen Antioco tan anggapoy makapatondad saya, 6sakey a manepeg a dusa na toon makapasinagem iray impanpapairap tod arum a totoo! 7Balet ag yan balut akaekal na panagpaatagey to. Nagmaliw ni ingen a lalon malastug, tan diad pangipatnag toy ontan lan panagtaktakot ed saray Judio, ingganggan ton papelesen day ombatik. Lapud ontan lan peles na karwahi to, naplag tan diad inkabagtog to, sinmakit ya amin iray pokel to. 8Lapud inkalangas to, abaloan ton walay nidoma-doman biskeg to a mamatoluk ed saray daluyon na dayat tan manimbang na saray palandey. Balet biglan naplag tan abarnat ed dalin tan nakaukolan ya awiten ed amaka; sakey yan malinew a tanda na pakayari na Dios, sakey a tanda ed balang sakey a too. 9Anggan saray mata na saman ya anggapoy Dios a too et kinokorung na saray bigis tan nanlikna na ontan lan panotut tan dageyem. Diad mapalalon banget to, mandoluk ya amin iray sondalo to, 10tan anggapoy makatepel a mangawit tan mangiliber-liber ed sikato. Balet ag ni abayag ed sayan inkagawa, abaloan ton nabembenan tod saray lima to iray bitewen.
Nansipan ed Dios si Antioco
(1 Mac. 6:8-17)
11Mapalaloy inkaermenan nen Antioco tan naynay a nanliknay kairapan, lapud dusan inter na Dios ed sikato, kanyan anunotan toy maung tan tinmondad panagpaatagey to. 12Insan nen ag to la natepelan so banget na laman to, inkuanto, Manepeg ya amin a toon ompatey et paoleyan irad Dios tan ag da isipen a kapara ra. 13Nansamput lay panangasi na Dios ed kinen Antioco, balet sayan andi-kakanaan a too et nansipan ed Katawan: 14Inkuanto, Aminsan ginetmak a palanasen so Jerusalem tan pagmaliwen iman a masanton siudad a kamposanto a napno na saray Judio, balet natan ibabawag kon sakey lan siudad a walay kawayangan to. 15Implanok ya ibanbantak ko ray bangkay na saray Judio tan saray anak da, pian kanen ira na saray ayayep ed katakelan tan saray manok, ya atap, lapud imbilang ko ran aliwan manepeg ya ipompon. Balet natan, planok ya iter ed sikara iray singa kanepegan na saray mibabaley na Atenas. 16Sinamsaman ko nen saman so Timplo tan imbatik ko ray masanton kagawaan to, balet natan panoen ko na saray mararakep a rigalo tan saray kagawaan a magmaung ni nen saramay kagawaan nen saman, tan bayaran kon manlapud bulsak iray bili na saray bagat. 17Likud ed saraya, magmaliw ak met la a sakey a Judio tan onla ak ed inerman a kawalaay totoo, ta ibagak ed sikara so pakayari na Dios.
Say Sulat nen Antioco ed saray Judio
18Nakalan lay ilalo si Antioco tan ag to makalmo na makapaabig ed liliknaen to, lapud dudusaen na Dios onung ed kanepegan to, kanyan sinulat to ray Judio:
19Nanlapud Ari Antioco yan sulat a para saray Judio a sankatalonaan ed amin da ray ooleyan ko. Awat yo pay ampetang a pabanok. Pirawat kon maabig so laman yo tan maligwas so bilay yo.
20Iilaloan ko a sikayo tan saray kabyangay pamilya yo et mabiskeg so laman yo tan maung lawas so kipapasey bilay yo. Diad Dios so kawalaay ilalok, 21tan malikeliket ak a makanunot ed panamagalang yo tan say panangasi yod siak.
Diad isesempet kon manlapud Persia, asabian ak na mapalalon sakit, kanyan ninunot kon nakaukolan so panggawak na saray planon pankaabigan na karaklan. 22Ag ak ni nakalay ilalo ya onabig ak; diad tuay tua mataletalek ak ya ompawil so biskeg ko. 23Balet nanunotan ko a nantotoro si amak na onsalat a manoley, kapag onlan mibakal ed bokig na Eufrates. 24Ginawa to ya, pian no walay ag ilaloan a nagawa, odino walay maoges a balitan onsabi, ag ontakot iray ooleyan to, ta amta ra no siopay atilak a mangipangulo. 25Ontan met, amtak a lawas manaalagar na pankanawnawa iray manoley ed kaliber-liber na nanarian ko. Sikato yay makasengeg a tinorok si anak kon Antioco ya onsalat ed siak ya ari. Imamatalek kon naynay ed panangasikaso yo tan ikikinon kod sikayo kapag onla ak ya ombisitad saray luyag a bokig na Eufrates. (Pawitan ko met na kopia na sayan sulat.) 26Natan ipupurek kon ag yo lilingwanan iray maabig a bengatlan ginagawak a pankaabigan yo, para sinansakey ed sikayo tan para intiron bansa. Ipupurek ko met ya ituloy yoy pangiiter yoy maung a linawa ed siak tan diad anak ko. 27Mailalo ak a maptek tan mapangasi a manoley ed sikayo, a singa ginawak lawas.
28Kanyan sayan managpatey na too, ya insamba toy Dios, et nilikna to ray makapasinagem a kairapan a ginagawa tod saray arum a totoo, insan inatey a pangaskasiyan ed kapalandeyan na sananey a dalin. 29Say sakey ed saray malet a kaaro to a si Felipe et inala ton insempet so bangkay nen Antioco; balet, lapud antakot ed anak nen Antioco, linmad kinen Tolomeo Filometor na Egipto.
ទើបបានជ្រើសរើសហើយ៖
Say Kumadwan Libro na SARAY MACABEO 9: PnPV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Philippine Bible Society New Testament © 1977, Bible © 1983