Say Kumadwan Libro na SARAY MACABEO 1
1
Say Sulat ed saray Judion walad Egipto
1Nanlapud saray Judio ed Jerusalem tan Judea so sayan sulat a para saray agagin walad Egipto. Awat yo pay ampetang a pabano mi.
2Maung komun so Dios ed sikayo tan sumpalen to komun so impisipanan tod kindi Abraham, Isaac, tan Jacob a matoor to ran aripen. 3Itdan to komun so balang sakey ed sikayo na pilalek a mangigalang ed sikato tan manggawa na linawa to diad intiron puso tan kamarerwa yo. 4Tulongan to kayo komun a mantalus na Ganggan to tan saray bilin to. Itdan to kayo komun na kareenan, 5ebatan to komun iray pikakasi yo, pirdonaen to komun iray kasalanan yo, tan ag to kayo komun ikaindan a balut no panaon na gunigon. 6Diad Juda, ipipikasi mi kayo natan.
7Nen taon 169,#1:7 TAON 169: Kapara to yay 143 K.C. nen si Demetrio a Kumadwa so ari na Siria, sinulat mi kayo tan imbaga miy nipaakar ed panamasegsegang tan saray mairap ya agew a sinmabid sikami diad saramay taon kayari na inlaban nen Jason sumpad pakaoley diad Masanton Dalin. 8Pinoolan nen Jason tan saray totoo to iray puirta na Timplo tan pinapatey da ray totoon anggapoy kasalanan. Insan kami nampikasi ed Katawan, et inebatan to ray pikakasi mi. Kanyan angibagat kami na saray ayayep, angisaklang kami na saray bagat a trigo, sinelselan mi ray lamparaan ed dalem na Timplo, tan inlira mi ray masanton tinapay. 9Sikato yay makasengeg ya ipupurek mid sikayo a silibraan yod bulan na Kislev so sakey a pista, a kapara na Pista na saray Abung-abung. Nisulat ya nen taon 188.#1:9 TAON 188: Kapara to yay 124 K.C.
SAY SULAT ED KINEN ARISTOBULO
Say Impatey nen Ari Antioco
10Nanlapud saray Judio ed Jerusalem tan Judea, say Sinado na saray Judio, tan si Judas so sayan sulat a para si Aristobulo a kabyangan na boleg na saray papari tan bumabangat nen Ari Tolomeo, tan para saray Judio ed Egipto. Awat yo pay maliket a pabano mi tan mabiskeg komun so laman yon sabien to yan sulat mi.
11Misasalamat kamid Dios lapud inyagel to kamid baleg a kaatapan. Singa kami lalakin akaparaan a milaban ed sakey ya ari, 12balet pinagit na Dios iray kalaban ed masanton siudad. 13Nen sinmabid Persia si Ari Antioco, singa ag nayarin balut a taloen iray sondalo to, balet sikaray ategtegteg ed dalem na timplo na diosan Nanea diad panamegley na impantraidor da ray papari to. 14Linmay Ari Antioco ed timplo a kaiba to ray panmamatalkan ton sumisimbawa to, ta asawaen toy diosa, insan to alaen iray karaklan na kayamanan ed timplo a pinagkarigalod sikato. 15Nen nipaway la na saray papari iray kayamanan, linmoob ed timplo si Antioco tan pigaran totoo to, ta alaen da ra may kayamanan. Balet kaloob da, insara na saramay papari iray kaput 16tan tinutupak day Antioco tan saray totoo to manlapud saray puirtan akaamut ed bubida. Insan da tinetegteg ira may bangkay da tan imbobontuk dad saray totood paway iray kaolowan da. 17Nadayew komun so Dios lapud impanusa tod saramay totoon maoges! Nagalang komun so Dios lapud amin a bengatla!
Pinoolan na Apoy so Bagat nen Nehemias
18Diad kumaduamplo tan limay agew na bulan na Kislev, silibraan mi so Pista na Pamasimbaloy Panangisaklang a singa pansisilibra miy Pista na saray Abung-abung. Ninunot mi a nakaukolan ya ipaamta mid sikayo ya, pian nasilibraan yo met yan pista. Diad onya, nanunotan yo no panoy inlesa na apoy nen angibagat si Nehemias kayari na impamaalagey to na Timplo tan say altar. 19Diad samay panaon ya niaakar a priso ed Persia iray lalaki tayo, walay pigaran matoor a papari ya angalay apoy ed altar tan inyamut da, ya anggapoy makaamta, ed dalem na amagan bobun. Inyamutamut da may apoy, kanyan anggapoy akasokay. 20Kalabas na pigaran taon, nen panliketan la na Dios, say impirador na Persia et pinapawil tod Jerusalem si Nehemias, tan impaanap nen Nehemias imay apoy ed saray kabyangan na boleg na saramay papari. Imbalita rad sikami ya anggapoy nalmo ran apoy, no ag ta daiset labat a nanlarak a likido. Imbaga nen Nehemias ed sikara a mangala ray daiset tan inyakar dad sikato. 21Nen amin a bengatlan ibagat et nitapew la rad altar, imbaga nen Nehemias ed saray papari ya ikalbo rad saray kiew tan samay bagat imay likido. 22Nen asumpal yan agawa tan apalabas so pigaran bekta, pinmaway ed kawalaay lorem so agew, tan tampol a dinmalang ira may bengatlan walad tapew na altar. Ninmengneng so balang toon wadman tan mankelaw ed agawa. 23Nen popoolan na apoy imay bagat, impangulo nen Jonatan a Pangulon Pari iray totoon nampikasi, tan inmebat si Nehemias tan amin a totoo.
Say Pikakasi nen Nehemias
24Onyay pikakasi nen Nehemias: Katawan a Dios a Manamalsad amin a bengatla, makapataktakot tan mabiskeg ka, balet mapangasi tan matonung ka. Bukor mo so ari. Sika labat so mapangasi; 25sika labat so maabagey tan matonung. Makapanyarin-amin tan andi-anggaan ka; lawas ya akaparaan kan mangyagel ed Israel diad amin a gunigon. Pinilim iray lalaki mi a dilin nidoma-doman totoom. 26Awat mo pa yan bagat ya isasaklang min para amin ya Israelita; iyagel mo pa ray pinilim a totoo tan pagmaliw mo kamin masanto. 27Ibolus mo ray naaripen ed saray arum a dalin tan pantitipon mo ray totoo min ataytayak. Kasian mo pa ray totoo min napapairap tan nababalaw, pian naamtaan na amin a bansa a sika so Dios mi. 28Dusam pa ray maruksa tan mapaatagey a totoo a mamapairap ed sikami, 29insan mo pa iletneg ed masanton dalin mo iray totoom, onung na sinalita nen Moises a gawaen mo.
Nadngelan na Impirador na Persia so Nipaakar ed Apoy
30Insan nankanta na saray imno iray papari. 31Nen apoolan la may bagat, ingganggan nen Nehemias a say soluk a likido et ikalbo rad pigaran ankakabaleg a bato. 32Biglan dinmalang, balet inerep na samay apoy ed tapew na altar.
33Nanderengelan na saray totoo ed inerman a pasen imay agawa. Nadngelan na impirador na Persia a walay likido ya arumog ed pasen ya angyamutan na saray papari na samay apoy na altar, kasakbayan a nibantak irad arum a bansa. Nadngelan to met a si Nehemias tan saray kakaaro to et inkana ra may likido ya impamool na bagat ed tapew na altar. 34Nen impasokayan na impirador yan agawa tan nalmoan ton tua, impaalar to tan ginawa ton sakey a masanton pasen. 35Nagmaliw yan pasen a panamalooban na baleg a kuartay impirador tan inkana to yan kuarta ed impangiter to na saray rigalo ed siopaman ya akalay maung a linawa to. 36Si Nehemias tan saray kakaaro to et tinawag da na niftar imay likido a say kabaliksan to et kalinisan, balet saray karaklan a totoo et tinawag da na nafta.
ទើបបានជ្រើសរើសហើយ៖
Say Kumadwan Libro na SARAY MACABEO 1: PnPV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Philippine Bible Society New Testament © 1977, Bible © 1983