Say Ononan Libro na SARAY MACABEO 7
7
Si Alcimo a Pangulon Pari tan say Impibakal nen Nicanor
(2 Mac. 14:1-36; 15:1-36)
1Nen taon 151,#7:1 TAON 151: Kapara to yay 161 K.C. si Demetrio a lakin anak nen Seleuco et tinaynan toy Roma a kaiba to ray pigaran lalaki. Sinmakbit irad sakey a baley a walad gilig na Dayat na Mediteraneo tan diman imbawag nen Demetrio so sikaton dili ya ari. 2Legan nen Demetrio ya oonlad palasio na saray lalaki to, inerel na saray sondalo si Antioco a Kumalima tan si Lisias, ta plano ran iyakar irad kinen Demetrio. 3Nen nadngelan ya nen Demetrio, inkuanto, Ag ko labay iran nanengneng. 4Kanyan pinatey ira na saramay sondalo, tan sinalin nen Demetrio so trono.
5Insan saray Judion traidor tan anggapoy Dios ya ipapangulo nen Alcimo, a labay toy magmaliw a Pangulon Pari, et linma rad kinen Demetrio. 6Indadalem da ray arum a Judio, tan kuanda, Pinapatey nen Judas tan saray agagi to iray amin ya ontutulong ed sika tan pinagit da kamid bansa mi. 7Isisimbawa mi a mangibaki kay toon napanmatalkan mo, ta nengnengen ton amin iray aderalderal a kayaryan mi tan diad dalin na ari, tan dusaen toy Judas tan saray agagi to, pati amin da ray ontutulong ed sikara.
8Pinili nen Ari Demetrio so sakey ed saray sumisimbawa to a si Bakides a gobirnador na Baleg a Siria. Toon bibirbiren ed impirio tan matoor ed ari. 9Sikatoy nibaki a kaiba toy Alcimo a toon anggapoy Dios to. Say ari et tinoro ton Pangulon Pari si Alcimo tan ingganggan ton ombawi ed saray Judio. 10Tinmaynan irad Antiokia tan sinmabi rad Judea a kaiba da ray dakerakel a sondalo. Sinali nen Bakides a palikdoen si Judas tan saray agagi to. Angibaki na saray totoon mangibagay pikakaaro tod sikara. 11Balet nen anengneng nen Judas tan saray agagi to so ontan lan karakel na sondalon kaiba ra, ag da sinisia so imbaga da ra may imbaki.
12Sakey a grupo na bumabangat na Ganggan so linmad kinen Alcimo tan Bakides, ta onkerew iray katonungan. 13Sarayan totoon matoor tan maarod bansa ra so inmona-onan angibaga na getma ran mikaaro ed kindi Alcimo tan Bakides. 14Nanmatalek irad kinen Alcimo, sakey a parin say sengeg na pamilya to et si Aaron, kanyan abaloan dan ag to ra diwiten. 15Impurek tod sikara a say kareenan so getma to tan insamba ton anggapoy maoges ya onsabid sikara tan saray kakaaro ra. 16Balet kapanmatalek dad sikato, inerel tod sikara so anemaplon lalaki tan impapatey to ran amin ed sakey ya agew. Onung na ibabagay masanton sulat,
17Niibung so dala da ray matoor a totoo,
nikaykayat ed Jerusalem iray bangkay da,
tan anggapoy atilak a mangipompon ed saray inaatey.
18Nen agawa ya, tinmakot ya amin iray totoo ed kindi Alcimo tan Bakides, tan kuanda, Ag da amtay kabaliksan na katwaan odino katonungan. Walay sinambaan da, insan da lamlamang sinumlang! 19Tinaynan nen Bakides so Jerusalem tan inlira tod Bet-sait so kampo to. Ingganggan toy pangerel ed saray matoor a Judio tan anggan saray pigaran Judio ya akigampid sikato. Impapatey to ra, insan to ra impaimbantak ed aralem a bobun. 20Si Bakides impaoleyan tod kinen Alcimo so bansa, angitilak diman na dakel a sondalon ontulong ed sikato, insan la pinmawil ed ari.
21Ginapwan nen Alcimo a ginaway anggaay nayarian ton mangiligen na kipapasen ton Pangulon Pari. 22Akigampid sikato ya amin iray magulon totoo ed bansa. Naoleyan day dalin na Judea tan sikaray makasengeg na mapalalon inkairapan na saray Judio. 23Naimano nen Judas a say gunigon a gagawaen nen Alcimo tan saray totoo to et mapalalo ni nen saray ginawa na saray Hintil. 24Kanyan nanliliber si Judas ed intiron bansa na Judea a binmabawi ed amin da ray akigampid kinen Alcimo tan ag to ra inaabuloyan ya ontaynan ed saray baley tan onloob ed saray bario. 25Nen anengneng nen Alcimo ya ompapalaloy pakayari nen Judas tan saray totoo to, tan nen abirbir ton ag to la ra natulakan, pinmawil ed ari tan mapalaloy indalem ton kaogsan da.
26Insan say ari imbaki ton mangoput ed saray Judio si Nicanor, sakey ed saray gagalangen ya opisyal to tan mangakabosul ed saray Judio. 27Sinmabid Jerusalem si Nicanor a kaiba to ray amayamay a sondalo. Sinali ton palikdoen si Judas tan saray agagi to diad impangibaga ton mikaaro. Inkuanto, 28Ag nepeg a mankolkol ita. Onla ak ditad kawalaan mo ya olupen ak na pigaran sondalok ta mantongtong tay balibali. 29Nen sinmabiy Nicanor ed kawalaan nen Judas, marakep so impanbanowan da, balet saramay kalaban nen Judas et akaparaan irad saman a mangibatik ed sikato. 30Nen akabatan nen Judas a say imbisita nen Nicanor et kabyangan na komplut a sumpad sikato, tinmakot tan ag to la nilabay so mitongtong ed sikato lamet. 31Abirbir nen Nicanor ya akabatan so plano to, kanyan tinaynan toy Jerusalem ta mibakal ed kinen Judas diad Cafar-salama. 32Sakey a liman lasus iray apatey a totoo nen Nicanor, tan saray nakdaan a totoo to et batik iran inmamut ed tirinsira diad Jerusalem.
33Ag abayag kayari to yan inkagawa, linmad Palandey na Sion si Nicanor. Tinmaynan iray pigaran pari ed Timplo, ta abeten day balibali si Nicanor a kaiba da ray pigaran pangulo na saray totoo tan ipanengneng dad sikato so bagat a popoolan a nisaklang para ari. 34Balet binabalaw to ra tan dinotakan to ra onung ed ganggan diad panamegley na impanlukda tod sikara. Malangas a nansalita 35tan mamapasnuk ya anaktakot ed sikara diad panamegley na sakey a samba. Inkuanto, No ag nisukod siak a tampol si Judas tan saray sondalo to, poolan ko yan Timplo kapawil ko dia kayari na panalok. Insan tinmaynan a mapalaloy petang na olo to.
36Linmad patio ira may pari tan nanalagey iran akaarap ed altar tan Timplo. Ginapwan day nanakis tan nampikasi, 37Katawan, pinilim yan Timplo a pakagalangan na ngaran mo tan sikatoy pasen a panagpikasian tan panagkerewan na tulong a para saray totoom. 38Sika pa, Katawan, so ombawid saman a too tan saray sondalo to; abuloyan mo pa ran ompatey ed bakal. Nunot mo so ontan lan impasalita ray maoges sumpad sika, tan ag mo pa iyaabuloy a walay nakeraan ed sikara.
39Tinaynan nen Nicanor so Jerusalem tan inlira toy kampo to ed Bet-horon, a diman akikasakey ed sikato iray sondalon taga Siria. 40Ontan met, inlira nen Judas so kampo to ed Adasa a kaiba toy talon libon totoo to. Nampikasid man si Judas, 41Katawan, say Masanton Sulat ibabaga tod sikami a nen say sakey ya ari et angibaki na totoon manleglemew ed sika, pinmaway so anghil mo tan pinatey toy sanlasus, walomplo tan liman libon sondalo to. 42Ontan met natan, mekmek mo pad arap mi ira yan sondalo tan ipaamtam ed amin a katoowan a nadudusa si Nicanor, lapud nileglemew toy masanton Timplom. Dusam pa, onung na kanepegay kaogsan to.
43Nambabakal iray sondalo nen kumalabintalon agew na bulan na Adar, et atalo ray sondalo nen Nicanor. Si Nicanor a dili so inmonan apatey ed bakal. 44Nen anengneng na saray sondalo to ya inatey, imbabantak da ray armas da tan batik ira. 45Sanagew ya inosilan ira na saray Judio manlapud Adasa ya anggad Gezer. Legan dan onoosil, pinapaknul da ray trumpita a mangibandoy bakal, 46et pinmaway iray totoo ed saray kaliber-liber a bario na Judea tan dinodogpaan dad amin a dapag ira may ombabatik a sondalo. Kanyan apasootan ira may ombabatik ya ompoliktar a sinmubad saray onoosil a Judio. Amin da ra may kalaban a sondalo et inaatey irad bakal. Anggapod sikaray akabatik.
47Inaala na saramay Judio iray amin ya asamsam da, insan da pinotut so olo nen Nicanor tan say kawanan a taklay to a mapaatagey ton inonat nen saman. Inawit da may olo nen Nicanor tan samay taklay to, tan impanengneng dad paway na Jerusalem. 48Nanliket na balbaleg iray Judio. Imbiig da man ya agew na impanalo ra a sakey a nidoma-doman agew a pansilibra, 49tan impaakseb day sakey a ganggan a say kumalabintalon agew na Adar et nepeg a silibraan a tinaon. 50Nanaarin agano so kareenan ed dalin na Judea.
ទើបបានជ្រើសរើសហើយ៖
Say Ononan Libro na SARAY MACABEO 7: PnPV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Philippine Bible Society New Testament © 1977, Bible © 1983