Say Ononan Libro na SARAY MACABEO 11
11
Say Inkatalo nen Alejandro Epifanes
1Si Ari Tolomeo a Kumanem na Egipto et anipon na sondalon dakil ni nen buer ed gilig na dayat, tan amayamay met so tinipon ton bapor. Ginetma ton patitan si Alejandro, sakopen toy nanarian to, insan to iyarum ed dilin nanarian to. 2Kanyan linmad Siria tan insipan ton mikaarod sikara, et nilokasan na saray totood man iray puirta ra tan maliket dan inawat. Ingganggan nen Ari Alejandro ya onyay gawaen da, lapud katolangan to si Tolomeo. 3Balet nen mampapabaybay si Tolomeo, angipasen na saray sondalo ed kapag baley. 4Nen asabi toy Asdod, impanengneng na saray totood man so apoolan a timploy Dagon tan amin ya aderal-deral ed siudad tan saray kaliber-liber ton baley. Ataytayak ed amin a pasen iray bangkay. Diad dalan nen Tolomeo wadman a nantatapewan iray bangkay na saramay pinopoolan nen Jonatan legan na bakal. 5Imbaga na saray totoo ed kinen Tolomeo imay ginagawa nen Jonatan, ta inilaloan dan tetelen toy Jonatan, balet ag inmesel si Tolomeo. 6Inabet nen Jonatan si Tolomeo diad Jope, tan ginawa to ray manepeg a sirimonya. Nambanowan ira tan nansanlabi rad man. 7Inolup nen Jonatan ya anggad Ilog na Eleutero, insan pinmawil lad Jerusalem. 8Diad onya si Ari Tolomeo, diad komplut ton sumpad Alejandro, et inoleyan to ray baley ed gilig na dayat ya anggad baybay ed Seleucia a walad abay na dayat.
9Manlapud man si Ari Tolomeo sinulat toy Ari Demetrio na onya: Mampaknaan itan dua. Say anak ko et asawa la nen Alejandro, balet babawien ko lad sikato, paasawak ed sika, tan panoleyen ta ka ed nanarian nen amam. 10Magbabawi ak ed impangiter kon asawa nen Alejandro, lapud labay to ak a pateyen. 11Onyay impangakusa nen Tolomeo ed kinen Alejandro, lapud labay ton sakopen so nanarian to. 12Kanyan binawi nen Tolomeo ed kinen Alejandro imay anak to tan inter tod kinen Demetrio; inekal toy impisiglaotan tod kinen Alejandro, kanyan nagmaliw iran mankalaban. 13Insan linmoob ed Antiokia si Tolomeo tan inala toy trono na Siria, kanyan akatoon ed olo toy korona na Egipto tan say korona na Siria.
14Diad saman a panaon walad Cilicia si Ari Alejandro, lapud onlalaban ed pakaoley iray totood man. 15Balet nen nadngelan toy ginawa nen Tolomeo, ginmalaw a dogpaan to. Dakerakel a sondalo so impilaban nen Tolomeo, kanyan analo. 16Nen asabi nen Tolomeo so katagtageyan na pakayari to, batik ed Arabia si Alejandro ta paiyagel diman, 17balet walad may sakey a toon Arabe a manngaran na Zabdiel ya amotut na olo to tan impawit tod kinen Tolomeo. 18Kalabas na duay agew, inatey met si Tolomeo tan pinapatey na saray ombaley iray sondalon intilak tod saray tirinsira. 19Kanyan nen taon 167,#11:19 TAON 167: Kapara to yay 145 K.C. si Demetrio a Kumadwa so nagmaliw ya ari.
Nala nen Jonatan so Abig-linawa nen Demetrio a Kumadwa
20Diad saman met a panon tinipon nen Jonatan iray lalaki ed Judea, ta dogpaan toy tirinsira ed Jerusalem. Nanggagawa ra na amayamay a plataporman panlakob ya ikana ra ed idogpa ra. 21Balet wala ray pigaran traidor a Judio, a kabosul day dilin bansa ra, a linma rad kinen Demetrio a Kumadwa tan imbaga rad sikato a mampaparaan si Jonatan ya ondogpad Jerusalem. 22Nen nadngelan ya nen Demetrio, mapalaloy pasnuk to tan inyalis ton tampol ed Tolemaida so ayaman to. Sinulat toy Jonatan tan ingganggan ton tondaan toy pampaparaan ton ondogpa tan pinengnengan ton tampol ed Tolemaida, ta mantongtong ira.
23Nen apasabi nen Jonatan so impaibaga nen Demetrio, ingganggan ton ituloy so panlakob da tan amili na pigaran pangulo na saray Judio tan pigaran pari a milad sikato. Imposta toy bilay to 24diad inyakar tod ari ed Tolemaida. Angawit na saray kawes, pilak tan balituk, tan amayamay a rigalo, et indayew na ari. 25Anggaman a si Jonatan et inakusa na pigaran traidor a kabansaan to ya ag mangitaltalek ed ganggan, 26siansian maung so impanangkaili na ari ed sikato, a singa sarayay akaonan nanari nen say sikato. Pinagalangan to ed arap na amin a sumisimbawa to, 27pinaletan toy kipapasen to a Pangulon Pari, impawil tod sikato iray amin a gendat a kagalangan to, tan tinoro ton sankatageyan ed saray Kakaaro na Ari.
28Kinerew nen Jonatan ed ari a say dalin na Judea tan saray taloran lugar na Samaria#11:28 Say sankanayarian a tiksto taloran lugar na Samaria; diad tikson Grigo taloran lugar tan Samaria. et ag la mambayar na saray buis. Insipan nen Jonatan a no gawaen ya nen Ari Demetrio, bayaran to na samplon libon kilon pilak. 29Inmabubon si ari tan sinulat toy Jonatan a pamalet tod saya:
30Nanlapud Ari Demetrio yan sulat a para Ari Jonatan tan amin da ray Judio. Awat mo pay maliket a pabanok.
31Pian sikakabat kayo, ipapawit koy kopia na sulat kod Kagalgalang a Lastenes nipaakar ed sikayo:
32Nanlapud Demetrio yan sulat a para Kagalgalang a Lastenes. Awat mo pay maliket a pabanok. 33Ginetmak ya itdan na pigaran palabo iray Judio, lapud matoor ira a kagampi tayo tan susumpalen da ray nabebetangan da ed impipaknaan dad sikatayo. 34Papaneknekan koy pankanepegan da ed dalin na Judea tan saray taloran lugar na Efraim, Lida, tan Arimatea a natan et nataksing la ra ed Samaria tan sakop la ra na Judea, pati saray dalin a nasasakopan da. Pankaabigan ya na amin da ray onlan mangibagat ed Jerusalem. Bangta say pambayaran na tinaon a buis na saray bungay dalin na sarayan lugar et aliwa lan diad ari no ag ta diad Timplo la. 35Ontan met ya ag ko la ra pambayaren ed siak na kuartan manlapud kakaplo, buis na asin, tan saray arum a buis. 36Sarayan abitla ed sayan sulat et nepeg ya anggapoy ekalen ed arapen a panaon.
37Nakaukolan a mampagawa ka na nagnap a kopia na sayan ley tan iter mod kinen Jonatan, ta paipeket tod mapalaway a pasen diad pokdul a kawalaay Timplo.
Tinulongan nen Jonatan si Demetrio a Kumadwa
38Nen anengneng nen Ari Demetrio a manaariy kareenan ed dalin diad silong na pakaoley to tan anggapo la ray onsusumlang, binuyak to ray sondalo to tan pinasempet to la rad kaabungan da, likud ed saray uupaan ton sondalo a nanlapud saray islan Grigo. Lapud saya, amin a sondalon nanlingkur nen panaon na saray akaonan arari et akapasnuk irad sikato lapud naandian iray anapay-bilay. 39Si Trifo, sakey ed saray kagampi nen Alejandro, et anengneng to a manririklamon amin iray sondalo lapud ginawa nen Demetrio, kanyan linmad kinen Imalkue a sikatoy mamapabaleg ed kinen Antioco, say malangwer a lakin anak nen Alejandro. 40Nanayam ya abayag diman si Trifo tan kinokoyung toy Imalkue ya ipalima tod sikato imay ogaw, pian nagawa ton ari a kasalat nen ama to. Imbaga to met ed kinen Imalkue so nipaakar ed saray ley ya impaakseb nen Demetrio tan no panoy pamobosul ed sikato na saray sondalo.
41Impaibaga nen Jonatan ed kinen Ari Demetrio so kerew to ya ekalen to ray sondalo ton walad tirinsira ed Jerusalem tan saray tirinsira ed Judea, lapud tataktakoten da ray Judio. 42Inmebat si Demetrio: Gawaen ko so kekerewen mo tan no onsabiy pankanawnawa, iter kod sika tan say bansam so sankatageyan a kagalangan. 43Balet natan natulongan mo ak diad pangibakim na saray sondalom ya ibakalan da ak, lapud onlalaban ed siak ya amin iray sondalok.
44Kanyan si Jonatan angibakid Antiokia na talon libon impasal a sondalo to. Akaliket so ari nen sinmabi ra, 45lapud nantitipon ed siudad so sanlasus tan duamplon libon totoo a getma ran pateyen so ari. 46Balet akabatik ed palasio nen wala lad pakaoley na karaklan iray dalan tan gapwan da lay manggulo. 47Insan say ari kinmerew na tulong ed saramay Judion sondalo, et ginanatan day dinmagon tinmulong ed sikato. Nanliber irad intiron siudad tan akapatey ira na ag onkulang a sanlasus libon totoo. 48Inlaban day bilay na ari, balet sinamsaman day siudad tan pinoolan da. 49Nen anengneng na saray totoo a say siudad et sigput lan walad pakaoley na saray Judio, nakalan iray ilalo tan inmapireng irad ari. Kinerew dad 50sikaton mipaknaan a nagaway kareenan tan patondaen toy idodogpa na saray Judio. 51Inikbanan na saray mananumlang iray armas da tan sinmuko ra. Say ari tan balang tood nanarian et wala natan so baleg a panamagalang dad saray Judio, a pinmawil irad Jerusalem ya awit day dakerakel ya asamsam da. 52Si Demetrio et malmalet lay inkiletneg ton ari, tan nanarid bansa so kareenan legan na impanoley to. 53Balet ag to tinoor ya amin iray sipan to tan kinalaban toy Jonatan. Ag to tinumangan si Jonatan ed matoor ya impanglingkur to, no ag ingen intuloy ton tinataktakot.
Tinulongan nen Jonatan si Antioco a Kumanem
54Ag abayag, pinmawil si Trifo a kaiba toy malangwer ya Antioco tan kinoronaan ton ari. 55Amin da ra may sondalon ineekal nen Demetrio et tinulongan da may malangwer ya ari. Tinalo day Demetrio, et batik. 56Adakep nen Trifo iray ilipanti tan naplag ed pakaoley to so Antiokia. 57Sinulat nen malangwer ya Ari Antioco si Jonatan tan pinaletan toy kipapasen nen Jonatan a Pangulon Pari tan manoley ed apatiran lugar tan initdan toy ngaran a Kaaro na Ari. 58Impawitan to na sakey a tipon na balituk a kagawaan na lamisaan tan initdan toy kanepegan ya oninom ed saray balituk a kupa, mangisolung na kawes na ari, tan mangipeket na balituk a kibilya na takeb a nitutumang ed Saray Kakanayon na Ari. 59Tinoro to met si Simon ya agi nen Jonatan a gobirnador na lugar a manlapud gilig na dayat diad Fenicia ya anggad ketegan na Egipto si Simon.
60Insan si Jonatan nankurang a kaiba to ray sondalo to diad saray baley na Baleg a Siria, tan akigampid sikato iray amin a sondalon Siriano. Linmad Ascalon, a diman inawat tan pinagalangan na saray totoo. 61Insan linmad Gaza, balet saray totood man et binalewetan da ray puirta ra, ta ag da labay a palooben. Kanyan nilakub to so siudad tan pinoolan tan sinamsaman to ray kaliber-liber a pasen. 62Insan kinerew na saray totood Gaza a mankaaro ra, kanyan akipaknaan ed sikara si Jonatan. Inaala nen Jonatan iray lalakin anak na saray pangulo tan imbaki to rad Jerusalem a pamasengegan to ra na labay ton nagawa. Kayari to ya, nankurang ya anggad Damasco.
63Akabatan nen Jonatan a linmad Cades ed Galilea iray opisyal nen Demetrio a kaiba ray amayamay a sondalo, ta getma ran paeren so plano nen Jonatan. 64Kanyan intilak tod Judea si agi ton Simon tan linma ya abeten to ran bakalen. 65Insan nilakob nen Simon so Bet-sur tan abayag ton binakal. 66Kinerew na saray totood man a mankakaaro ra, et inmabubon si Simon. Sinakop to may baley, pinagit to ray totood man, tan angipasen na saray sondalon manayam diman.
67Nankampo si Jonatan tan saray sondalo to ed gilig na Dayat na Galilea. Diad kabkabwasan ed ontombuk ya agew, pinakurang to ray sondalo to ed patar na Hazor, 68a diman so susulongan na karaklan na saray sondalon taga arum a bansa, ta abeten da. Ag akabatan nen Jonatan ya angitilak ira na saray sondalo a mananeb ed sikara diad kapalandeyan, 69tan nen pinmaway a dinmogpa ira may mananeb, 70pinmoliktar ya amin iray sondalo nen Jonatan tan batik ira. Anggapoy atilak ed sikara, likud ed duaran opisyal a di Matatias a lakin anak nen Absalom tan si Judas a lakin anak nen Calfi. 71Apaabeba si Jonatan, kanyan pinipilat toy kawes to, ininan toy dabuk so olo to, tan nampikasi. 72Insan pinmawil ya akibakal, pinapairap to ray kalaban, tan pinabatik to ra. 73Nen anengneng ya na saramay ombabatik a sondalo to, pinmoliktar ira tan inmosil met ira. Inosilan da ray kalaban ya anggad kampo ra ed Cades, insan da dinakep imay kampo. 74Ag onkulang ed talon libon kalaban a sondalo so apatey ed saman ya agew. Insan pinmawil lad Jerusalem si Jonatan.
ទើបបានជ្រើសរើសហើយ៖
Say Ononan Libro na SARAY MACABEO 11: PnPV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Philippine Bible Society New Testament © 1977, Bible © 1983