Mat 28
28
Yesu bɔa gau
(Maa 16.1-8; Luk 24.1-12; Zãa 20.1-10)
1Kãmabogɔɔ gbɛa, ãsɔ̃anɛnzĩ kɔɔkɔɔ Maliama Madelɛni ń Maliama pãlepio gɛ̀ mia gwai. 2Ɔ̃ tɔɔlɛ lùalua gbãugbãu, asa Dii malaikae bɔ̀ luabɛ, à mɔ̀, à gbɛpi gbeembò a gò mia lɛ́ɛ, ɔ̃ à zɔ̃̀lɛwà. 3Aà oa dɛ lan loupilɛawa mɛ́ aà ula dɛ puuu lan nɛɛziwa. 4Vĩa gudɔ̃anaɔ kũ̀, aalɛ lualua, ɔ̃ aa gɔ̃̀ sãii. 5Ɔ̃ malaikapi ò nɔɛpiɔnɛ: Ásu to vĩa á kṹo. Má dɔ̃ kɛ́ Yesu pɔ wa pà líwa ɔ̃ álɛ wɛɛlɛ. 6A ku lao, à vù lá a òwa. À mɔ, à gu pɔ wà aà wùlɛu gwa, 7í gɛ o aà iwaɔnɛ kpakpa à bɔ̀ gau. A dɔaanɛ́ Galile, we aa wɛsiukɔ̃lɛ. Má òɛ́n we.
8Ɔ̃ aa gò mia kĩi kpakpa ń vĩao, ãma an pɔ na zɔ̃ɔ. Aa baalɛ̀ aalɛ gɛ́ a baokpai aà iwaɔnɛ. 9Ɔ̃ Yesu dàńlɛ gɔ̃̀ɔ, à fɔkpàmá. Kɛ́ aa sɔ̃̀aazi, aa kùlɛɛ̀, ɔ̃ aa ɔnà aà gbakpɛawa. 10Ɔ̃ Yesu ònɛ́: Ásu to vĩa á kṹo. À gɛ o ma gbɛ̃́ɔnɛ aa ta Galile. Wekĩi wá wɛsiukɔ̃lɛ.
11Nɔɛɔ kpɛ ɔ̃ sosa gudɔ̃anaeɔ gɛ̃̀ wɛ̃lɛ guu, aa yã pɔ kɛ̀ɔ ò sa'onkiaɔnɛ pii. 12Ɔ̃ sa'onkiapiɔ gbɛ̃zɔ̃ɔɔ sìsi aa lɛkpàaĩ, ɔ̃ aa ɔ zɔ̃ɔ kpà sosapiɔwa gusaɛ 13aa mɛ̀: À o aà iwaɔ mɛ́ mɔ̀ gwãasĩna, aa aà gɛ sɛ̀ kpãi gɔɔ pɔ álɛ i'o. 14Tó busu gbɛ̃zɔ̃ɔ su yãpi mà, wá awakpaɛ̀, í bɔ yãkeleu. 15Sosaɔ ɔ̃api sì, ɔ̃ aa kɛ̀ lá wa dànɛ́wa. Ɔ̃ yãpi gɔ̃̀ Yudaɔnɛ yãa ũ e ń a gbão.
Yesu zĩ naa a iwaɔnɛ ń ɔzĩ
(Maa 16.9-20; Luk 24.36-53; Zãa 20.11-23; Zĩn 1.6-8)
16Yesu iwa gbɛ̃ɔn kuɛdoɔ tà Galile, sĩ̀sĩ pɔ à a yãnukɛ̀nɛ́ yãa musu.#Mat 26.32 17Kɛ́ aa aà è, aa kùlɛɛ̀, ãma an gbɛ̃eɔ lɛ́ seakɛɛ. 18Ɔ̃ Yesu sɔ̃̀ńzi à yã'ònɛ́ à mɛ̀: Lua iko pii kpàa luabɛ ń tɔɔlɛo.#Dan 7.14 19Ayãmɛto à gɛ bui pii kɛ ma iwaɔ ũ, í ń da'ilɛkɛ ń Mae Lua tɔ́o ń aà Nɛ tɔ́o ń aà Nisĩna tɔ́o, 20í yã pɔ má dìlɛɛ́ɔ danɛ́ aaɔ kũa pii. À ma, máɔ kuánɔ gɔɔpiiɛ e dũnia tiaɛ bee gɛ laaò.
ទើបបានជ្រើសរើសហើយ៖
Mat 28: Boo2024
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Boko Bible © SIM International, 2024.
