Mat 23
23
Mɔizi ikoyãdanɛdeɔ ń Falisiɔ mɔafili
(Maa 12.38-40; Luk 20.45-47)
1Bee gbɛa Yesu yã'ò bilaɛ ń a iwaɔ 2à mɛ̀: Mɔizi ikoyãdanɛdeɔ ń Falisiɔ mɛ́ aa gɔ̃̀ Mɔizi gɛ̃ɛ ũ. 3Ayãmɛto àli yã pɔ aaì oɛ́ɔ kɛ pii, íɔ kũa. Ãma ásu ń kɛa kɛo, asa aali yã pɔ aaì o kɛo. 4Aaì aso gbia yeye wà da gbɛ̃́ɔnɛ ń gãuɛ, mɛ́ baa ɔnɛn do aaliɔ ye wà kaio. 5Aaì ń yãpii kɛ kɛ́ wà ń e yãiɛ. Màa aaì Lua yã ɛsɛba gbɛ̃̀nɛ da,#Iko 6.8 aaì tùfa gbã̀a da ń pɔkasaɔi.#Nao 15.38 6Pɔnablɛble zɔ̃lɛkĩi maaɔ ń luasisikpɛ zɔ̃lɛkĩi maaɔ ɔ̃ aaìɔ wɛɛlɛ wà zɔ̃lɛu. 7Aaìɔ ye wàɔ fɔkpakpamá gãaɛ, wàɔ onɛ mɛtulu. 8Ásuli tó wà oɛ́ mɛtuluo, asa vĩiɔ n dãunaɔn á ũ ápii, mɛ́ á Mɛtulu mɛndoɛ. 9Ásuli o gbɛ̃eɛ á mae dũniau lao, asa á Mae mɛndoɛ, ɔ̃mɛ ku musu. 10Ásuli tó wà oɛ́ dɔaanao, asa á Dɔaana mɛndoɛ, ɔ̃n Mɛsi ũ. 11Gbɛ̃́ pɔ zɔ̃ɔ á guu, aàɔ dɛ á dɔnlɛde ũ.#Mat 20.26-27 12Gbɛ̃́ pɔ ì azĩa kãfĩ, Lua a aà busaɛ, mɛ́ gbɛ̃́ pɔ ì azĩa busa, Lua a aà kãfĩ.
Zɔadɔa Mɔizi ikoyãdanɛdeɔ ń Falisiɔwa
(Luk 11.37-42)
13Waiyoo á yãdanɛdeɔ ń Falisiɔ! Mɔafilideɔ! I kpala pɔ Lua kpà zɛta gbɛ̃́ɔnɛ. Ili gɛ̃uo, mɛ́ ili we gbɛ̃́ pɔ aa ye gɛ̃uɔ gɛ̃̀u sɔ̃o.
14Waiyoo á yãdanɛdeɔ ń Falisiɔ! Mɔafilideɔ! I wabi gbã̀a kɛ Luawa à gyaaɔ bleò. Bee yãi á ĩadama pãsĩ aɔ dɛńla.
15Waiyoo á yãdanɛdeɔ ń Falisiɔ! Mɔafilideɔ! I bɛbɛ tɔɔlɛ ń isiao iwa mɛndo ea yãi. Tó á è sɔ̃, i aà kɛ tɛ́ pɔ ũ dɛála lɛɛ plaɛ.
16Waiyoo á vĩ̀a dɔaanaɔ! I mɛ tó wà mɛ̀ wa sì ń luakpɛo, a yãe vĩo, ãma tó wà mɛ̀ wa sì ń Lua kpɛ vuao, bee mɛ́ yã vĩ. 17Vĩ̀a misaideɔ! A kpele mɛ́ zɔ̃ɔi? Vua yã̀, ge luakpɛ pɔ ì to vua gɔ̃ aà pɔ ũɛ? 18I mɛ lɔ tó wà mɛ̀ wa sì ń sa'okĩio, a yãe vĩo, ãma tó wà mɛ̀ wa sì ń sa'obɔ pɔ ku weo, bee mɛ́ yã vĩ. 19Vĩ̀aɔ! A kpele mɛ́ zɔ̃ɔi? Sa'obɔ yã̀, ge sa'okĩi pɔ ì to sa'obɔ gɔ̃ Lua pɔ ũɛ? 20Gbɛ̃́ pɔ mɛ̀ á sì ń sa'okĩio, a sì ń pɔ pɔ ku weɔɛ lɔ pii. 21Gbɛ̃́ pɔ mɛ̀ á sì ń luakpɛo, a sì ń Lua pɔ ku a guuoɛ lɔ. 22Gbɛ̃́ pɔ mɛ̀ á sì ń luabɛo, a sì ń Lua kpalabaao#Isa 66.1 ń Lua pɔ zɔ̃lɛwàoɛ.
23Waiyoo á yãdanɛdeɔ ń Falisiɔ! Mɔafilideɔ! I toeɔ dosina ń kianaɔkpeo ń dã̀ láo kwide kpa Luawa, ɔ̃ i Mɔizi ikoyã gbiaɔ to we, yãzɛde ń suuuo ń naaio. Yãpiɔ mɛ́ dɛ wà kɛ a kĩni tosai.#Lev 27.30 24Vĩ̀a dɔaanaɔ! I maemilona plɛ á imiau, ɔ̃ i yiongo mɔ́.
25Waiyoo á yãdanɛdeɔ ń Falisiɔ! Mɔafilideɔ! I gbãbɔ bisaɔ kpɛɛ ń taɔ, mɛ́ bĩi ń gbɛ̃taiinkɛao mɛ́ á nɔ̀sɛ pà. 26Falisi vĩ̀a! Bisa guu pipi gĩ́a, a kpɛ i gɔ̃ gbãsĩsai.
27Waiyoo á yãdanɛdeɔ ń Falisiɔ! Mɔafilideɔ! Á dɛ lan mia pɔ wà soolɛ̀wàɔwaɛ. An kpɛ maa wɛ́ɛ, ãma gɛwaɔ ń gbãsĩ piio mɛ́ ń guu pà. 28Màaɛ apiɔ sɔ̃, á bɛa maa gbɛ̃́ɔ wɛ́ɛ, ãma mɔafili ń yãvãio mɛ́ á guu pà.
29Waiyoo á yãdanɛdeɔ ń Falisiɔ! Mɔafilideɔ! I pɔ bo ãnabiɔ miaɔwa, i zãble Lua gbɛ̃́ɔ pɔwa, 30i mɛ: Tó wá ku wá deziɔ gɔɔ yãaɛ, wá bàa aɔ kuńnɔ ãnabiɔ dɛdɛa guuo. 31Beewa á dɔ̃̀ kɛ́ gbɛ̃́ pɔ aa ãnabiɔ dɛ̀dɛɔ buiɔn á ũ. 32À ãiakɛ à á deziɔ taaaba, í a midɛ sa! 33Mlɛɔ! Gbɛ̃nazĩn piligonaɔ! Kpelewa á bɔ tɛ́ yã pɔ daaála guui?#Mat 3.7, 12.34 34A yãi má ãnabiɔ ń ɔ̃nɔnaɔ ń yãdanɛdeɔ zĩwá, í ń gbɛ̃eɔ dɛdɛ, í ń gbɛ̃eɔ pá líwa, í ń gbɛ̃eɔ gbɛ̃ ń flaalao á luasisikpɛɔ guu, í ń yá wɛ̃lɛ ń wɛ̃lɛo. 35Beewa Lua gbɛ̃́ pɔ wà ń dɛdɛ̀ɔ yã a wí á musu, sɛa za gbɛ̃maa Abɛliwa#Daa 4.8 e à gɛ̀ pɛ̀ Balakia nɛ Zakali pɔ a aà dɛ̀ luakpɛ ń sa'okĩio zãnguowa.#2 Lad 24.20-21 36Sĩana malɛ oɛ́, yãpiɔ pii a wi gbãgbɛ̃ɔ musuɛ.
37Yelusalɛũdeɔ, Yelusalɛũdeɔ! A ãnabiɔ dɛ̀dɛ, a gbɛ̃́ pɔ Lua ń zĩ́wáɔ pàpa ń gbɛo a ń dɛdɛ̀. Miɔ ye mà á kãaamazi mɔɔmɔɔ, lá ko ì a gãsĩa ku a nɛɔlawa, ãma ili weio. 38Lua a á kpɛ́ toɛ́ kpɛzĩ ũɛ sa. 39Malɛ oɛ́, za tia á ma e lɔo, e à omɛɛ, baaade gbɛ̃́ pɔ lɛ́ mɔ́ ń Dii tɔ́o.#Soũ 118.26
ទើបបានជ្រើសរើសហើយ៖
Mat 23: Boo2024
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Boko Bible © SIM International, 2024.
