Mat 14
14
Zãa Da'ilɛna gaa
(Maa 6.1-29; Luk 9.7-9)
1Gɔɔ bee busupi ki Helodi Yesu baomà. 2Ɔ̃ a ò a iwaɔnɛ: Gbɛ̃́piá Zãa Da'ilɛnaɛ. Gabɔɛ. Bee yã mɛ́ tò à gbãa'è, àlɛ dabudabuɔ kɛ. 3Asa Helodi Zãa kũ̀ yãa, à mɔkàwà, à aà dà kpɛ́u a dãuna Filipi na Helodia yãiɛ. 4Kɛ́ Zãa ìɔ oɛ̀: N Helodia vĩa nɔ ũ zɛ́ vĩo.#Lev 20.21 5Helodi ye à aà dɛ, ãma àlɛ vĩakɛ bilaɛ, asa aa aà ãnabikɛ sìɛ.
6Helodi ia dikpɛzĩ, Helodia nɛnɔn gbãa ɔ̃wã̀ gbɛ̃́ pɔ mɔ̀ weɔnɛ, ɔ̃ à kɛ̀ Helodiɛ na maamaa. 7Ɔ̃ à lɛgbɛ̃̀ à mɛ̀: Má sì ń Luao, má n gba pɔ pɔ n a wabikɛ̀a pii. 8Ɔ̃ aà da yãdàɛ̀, ɔ̃ nɛpi mɛ̀: Ma gba Zãa Da'ilɛna mi pɛlɛntiu la tia. 9Ɔ̃ kiapi pɔ yà, ãma lɛ́ pɔ a gbɛ̃̀ blɛblenaɔ wáa yãi ɔ̃ à mɛ̀ wà kpawà. 10Ɔ̃ à gbɛ̃́ zĩ̀ Zãa Da'ilɛna mizɔ̃i kpɛ́u. 11Kɛ́ wà mɔ̀ ń aà mio pɛlɛntiu, wa kpà nɛpiwa, ɔ̃ à gɛ̀ò a daɛ. 12Ɔ̃ Zãa iwaɔ mɔ̀, aa aà gɛ sɛ̀ aa vĩ̀, ɔ̃ aa gɛ̀ aa ò Yesuɛ.
Yesu blɛkpaa gbɛ̃ɔn ɔaasɔsɔo lɛɛ sɔoɔwa
(Maa 6.30-44; Luk 9.10-17; Zãa 6.1-15)
13Kɛ́ Yesu yãpi mà, ɔ̃ à gɛ̃̀ go'ilɛna guu, àlɛ gɛ́ gusaɛna kɛ́ àɔ ku ado. Kɛ́ gbɛ̃́ɔ mà, aa bɔ̀ wɛ̃lɛ ń wɛ̃lɛo dasidasi, aa pɛ̀lɛaazi kɛsɛ. 14Kɛ́ Yesu bɔ̀ gó guu, à bila è, ɔ̃ aa kɛ̀ɛ̀ wɛ̃naũ, ɔ̃ à ń gyãeɔ gbã̀gbãnɛ́. 15Kɛ́ oosi kɛ̀, aà iwaɔ sɔ̃̀aazi aa mɛ̀: Guɛá sɛ̃gbãɛ, mɛ́ ĩatɛ̃ i gɔ̃ bila lɔo. Gbɛ̃́ɔ gbaɛ aa ta wɛ̃lɛɔ guu, aa pɔblea wɛɛlɛ lu. 16Ɔ̃ Yesu ònɛ́: I kɛ aa ta teasio. À pɔ kpamá aa ble. 17Ɔ̃ aa òɛ̀: Pɛ̃ɛ mɛn sɔona ń kpɔo mɛn pla ɔ̃ wá vĩ la. 18Yesu ònɛ́: À mɔòmɛɛ la. 19A ò gbɛ̃́piɔnɛ aa zɔ̃lɛ sɛ̃wa, ɔ̃ à pɛ̃ɛ mɛn sɔo ń kpɔ mɛn plapio sɛ̀, à wɛsɛ̀ musu à baaadàu. Ɔ̃ à pɛ̃ɛpi ɛ̀'ɛ a kpà a iwaɔwa, aa kpaalɛ̀ bilaɛ. 20Ampii aa pɔblè aa kã̀. Ɔ̃ wà a miɔna pɔ fɛ̃̀ɔ sɛ̀lɛ gbi kuɛpla pai.#2 Kia 4.42-44 21Gɔ̃ɛ pɔ aa pɔblèɔ kà gbɛ̃ɔn ɔaasɔsɔo lɛɛ sɔo (5 000) taawa, nɔɛɔ ń nɛɔ baasi.
Yesu taa'oa isidaa
(Maa 6.45-56; Zãa 6.16-25)
22Ɔ̃ Yesu nàɛ a iwaɔwa gɔ̃̀ɔ aa gɛ̃ gó guu, aa dɔaaɛ isida baale e àɔ bila gbaɛ. 23An gbaɛa gbɛa à dɛ̀dɛ sĩ̀sĩwa wabikɛi Luawa ado. Gu lɛ́ si, a ku we ado. 24Gópi zãkũ̀ ń gɔ̃sɔ̃lɛo, ɔ̃ zaa'ĩana kàka lɛ́ daɛ, í lɛ́ a za'ɔ̃wã. 25Gufɛ̃nɛ Yesu bɛ ía, àlɛ gɛ́ a iwaɔ kĩi. 26Kɛ́ aa aà è bɛ ía, ɔ̃ sɔ̃ kɛ̃̀ńgu aa mɛ̀: Gyaadeɛ! Vĩa ń kṹ aa wiilɛ̀, 27ɔ̃ Yesu ònɛ́ gɔ̃̀ɔ à mɛ̀: À sɔ̃dilɛ, mamɛ! Ásu to vĩa á kṹo. 28Ɔ̃ Piɛɛ òɛ̀: Dii, tó mmɛ, to mà taa'o ía mà mɔ n kĩi. 29Ɔ̃ Yesu mɛ̀: Mɔ! Ɔ̃ Piɛɛ bɔ̀ gó guu a bɛ ía, àlɛ gɛ́ aà kĩi. 30Kɛ́ a è ĩana lɛ́ a pa, ɔ̃ vĩa aà kũ̀, àlɛ kpalɛ, ɔ̃ à wiilɛ̀ à mɛ̀: Dii, ma suaba. 31Wegɔ̃ɔ Yesu ɔbɔ̀, à aà kũ̀, ɔ̃ a òɛ̀: Luanaaifɛ̃nɛnde! Bɔyãi n seakɛ̀i? 32Kɛ́ aa gɛ̃̀ gó guu, ĩana zɛ̀. 33Ɔ̃ gbɛ̃́ pɔ aa ku gó guuɔ kùlɛɛ̀ aa mɛ̀: Lua Nɛn n ũ sĩana.
34Kɛ́ aa bùa baa, aa kà Gɛnɛzalɛti busuu. 35Wekĩideɔ Yesu dɔ̃̀, ɔ̃ aa aà bao fã̀aa busupiu pii, ɔ̃ wà mɔ̀ɛ̀ ń gyãeɔ pii. 36Wà wabikɛ̀wà, baa aà ula lɛ́, wà e wà ɔkãwà. Ɔ̃ gbɛ̃́ pɔ ɔkã̀wàɔ gbã̀gbã pii.
ទើបបានជ្រើសរើសហើយ៖
Mat 14: Boo2024
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Boko Bible © SIM International, 2024.
