Daa 46
46
Yakɔbu taa Egipi ń a nɛɔ
1Isaili dà zɛ́u ń pɔ pɔ a vĩɔ pii. Kɛ́ à kà Bɛɛsɛba, à sa'ò a mae Izaaki Luawa. 2Ɔ̃ Lua bɔ̀ à mɔ̀wà wɛpungu'ea guu gwã à mɛ̀: Yakɔbu! Yakɔbu! A wèwà à mɛ̀: Má kɛ́! 3Ɔ̃ à mɛ̀: Mamɛ má Lua n mae Lua. Nsu bilikɛ n Egipi gɛa yãmusuo, asa we má n bui kãfĩu maamaa. 4Má gɛ́nnɔ Egipi, mí su ń n buiɔ. Asa Yosɛfu gbá ńyɔ̃ gaa.
5Ɔ̃ Yakɔbu fɛ̀lɛ Bɛɛsɛba. Aà nɛɔ aà dà zugo pɔ Falaɔ̃ gbàɛ aà sɛi guu ń ń nɛɔ ń ń nɔɛɔ. 6Aa ń pɔtuoɔ ń aizɛɛ pɔ aa è Kanaa busuuɔ sɛ̀lɛ aa tàò Egipi. 7Yakɔbu tà we ń a nɛgɔ̃ɛɔ ń a nɛnɔɛɔ ń a tɔũnaɔ mpii.#Zĩn 7.15 8Isaili pɔ aa tà Egipiɔ tɔ́ɔn kɛ: Yakɔbu ń a nɛgɔ̃ɛɔ.
Yakɔbu nɛgɔ̃ɛ sɛ̃ia Lubɛni. 9Lubɛni nɛgɔ̃ɛɔ tɔ́ɔn kɛ: Anɔki, Palu, Ɛzɔ̃nɔ, Kaami. 10Simɛɔ nɛgɔ̃ɛɔ tɔ́ɔn kɛ: Yemuɛ, Yamini, Oada, Yakɛ̃, Zohaa ń Saulu pɔ a ì ń Kanaa nɔɛoo. 11Levi nɛgɔ̃ɛɔ Geesɔ̃, Kɛata ń Mɛlalio. 12Yuda nɛgɔ̃ɛɔ tɔ́ɔn kɛ: Ɛɛ, Onani, Sela, Pɛlɛzi ń Zelao, ãma Ɛɛ ń Onanio gà Kanaaɛ. Pɛlɛzi nɛgɔ̃ɛɔn Ɛzɔ̃nɔ ń Amuluo ũ. 13Isakaa nɛgɔ̃ɛɔ tɔ́ɔn kɛ: Tola, Puva, Yasubu, Simɛlɔni. 14Zabulɔni nɛgɔ̃ɛɔ tɔ́ɔn kɛ: Sɛlɛdi, Eloni, Yalee. 15Nɛgɔ̃ɛ pɔ Lea ń i ń Yakɔbuo Mɛsɔpɔtamiɔn we. Ɔ̃mɛ nɛnɔɛ pɔ wì mɛ Dina ì lɔ. An buipiɔ pii gbɛ̃ɔn baakwi ń aaɔ̃oɛ.
16Gada nɛgɔ̃ɛɔ tɔ́ɔn kɛ: Zɛfɔ̃, Agi, Suni, Ɛzɛbɔ̃, Eli, Alodi, Aleli. 17Asɛɛ nɛgɔ̃ɛɔ tɔ́ɔn kɛ: Imɛna, Iseva, Isevi, Bɛlia ń ń dãe Sɛlao. Bɛlia nɛgɔ̃ɛɔn Hɛbɛ ń Malakiɛo ũ. 18Labã mɛ́ Zilipa kpà Leawa. Bui pɔ a kɛ̀ ń Yakɔbuoɔn we. Aa gbɛ̃ɔn gɛ̃o ń mɛndooɛ.
19Yakɔbu na Lasɛli nɛgɔ̃ɛɔn Yosɛfu ń Bɛ̃yãmɛo ũ. 20Yosɛfu Manase ń Ɛflaiũo ì Egipi ń a na Asɛna, Hɛliɔpɔli wɛ̃lɛ sa'ona Potifɛla nɛoɛ. 21Bɛ̃yãmɛ buiɔ tɔ́ɔn kɛ: Bɛla, Bɛkɛɛ, Asebe, Gela, Naamani, Ɛhi, Losi, Mupiũ, Hupiũ, Aada. 22Bui pɔ Lasɛli kɛ̀ ń Yakɔbuoɔn we. Aa gbɛ̃ɔn gɛ̃o mɛndosaiɛ.
23Dã nɛgɔ̃ɛn Husiũ ũ. 24Nɛfatali nɛgɔ̃ɛɔ tɔ́ɔn kɛ: Yaziɛli, Guni, Yezɛɛ, Sileũ. 25Labã mɛ́ Bila kpà Lasɛliwa. Bui pɔ a kɛ̀ ń Yakɔbuoɔn we. Aa gbɛ̃ɔn soplaɛ.
26Yakɔbu bui pɔ à tàńnɔ Egipiɔn we. Aa gbɛ̃ɔn baaɔ̃sɔo ń mɛndooɛ, aà nɛɔ naɔ baasi. 27Kɛ́ Yosɛfu nɛ'ì Egipi gbɛ̃ɔn pla, ɔ̃ Yakɔbu bui pɔ tà weɔ kɛ̀ gbɛ̃ɔn baaɔ̃kwi.#Zĩn 7.14
28Yakɔbu Yuda zĩ̀ aà dɔaaɛ Yosɛfu kĩi, aà Gosɛ̃ busu zɛ́ ɔlɔɛ̀. Kɛ́ aa kà we, 29ɔ̃ Yosɛfu gɛ̃̀ a sɔ̃gou, à gɛ̀ dai a maelɛ we. Kɛ́ à aà lè, à vĩ̀ kùsiwà, à ɔɔlɔ̀ aà gãu e'e'e. 30Ɔ̃ Isaili ò Yosɛfuɛ: Lá ma wɛsìnlɛ má è ń ku e tia, tó má fɔ̃̀ mà ga sa.
31Yosɛfu ò a vĩiɔnɛ ń a de bɛdeɔ: Má gɛ mà o Falaɔ̃ɛ ma vĩiɔ ń ma de bɛde pɔ ku Kanaa busuuɔ sù ma kĩi. 32Má oɛ̀ sãdãnaɔn á ũ, pɔdeɔn á ũ, mɛ́ a su ń á sãɔ ń á bleɔ ń á zuɔ ń pɔ pɔ á vĩɔ piiɛ. 33Tó Falaɔ̃ á sisì, mɛ́ a á lá bɔ́ zĩ i kɛi, 34à oɛ̀ pɔdeɔn á ũ za á ɛwaasogɔɔ e ń a gbão lá á deziɔwa. Tó á òɛ̀ màa, á zɔ̃lɛ Gosɛ̃ busuu, asa Egipiɔ lí kɔ̃tɛsi ń sãdãnaɔo.
ទើបបានជ្រើសរើសហើយ៖
Daa 46: Boo2024
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Boko Bible © SIM International, 2024.