Bɔa 12
12
Gɛ̃amusu dikpɛ
1Dii yã'ò Mɔiziɛ ń Aalonao Egipi à mɛ̀: 2Mɔɛ bee líɔ dɛɛ́ mɔ sɛ̃ia ũ wɛ̃ ń wɛ̃o. 3À o Isailiɔnɛ pii, mɔɛ bee gɔɔ kwidezĩ ualɛ ń ualɛo pii aali sã sɛ mɛndodo. 4Tó uadeɔ dasi i ka aa sã mɛndo só piio, aa sɛ́ ń ua pɔ ku ń saɛdeɔ a gbɛ̃́ɔ dasilɛu, kɛ́ a kĩni su gɔ̃o yãi. 5Àli sãsa ge blesan bɔlɔna pɔ sãa vĩo sɛ́.#Zãa 1.29; Hɛb 9.14; 1 Piɛ 1.19 6Isaili baade pii lí a pɔ gwa e mɔɛ bee gɔɔ gɛ̃omɛndosaidezĩ. Oosi i dɛ, 7i a au lɛ́ kpɛ́ pɔ wa a nɔ̀ɔ sou kpɛɛlɛ gĩɔwa, ɔplaai ń ɔzɛɛio ń musuo. 8Gwãasĩn doũpi à nɔ̀ɔpi kpatɛa, í só ń kàao ń lá kĩsão. 9Ásuli só búsu ge fuukɛao. Àli kpatɛa ń a mio ń a gbáɔ ń a guupɔɔ. 10Ásuli tó gu dɔ a kĩniwao. Tó a kĩni gɔ̃̀, àli katɛu à tɛkũ. 11Tó álɛ só, àli asanadɔ, í kyalekpa, á gopana líɔ naa á ɔzĩ, í só kpakpa, asa Dii Gɛ̃amusu sa'obɔɛ.
12Gwãasĩnapi má pã Egipia mà nɛgɔ̃ɛ sɛ̃iaɔ dɛdɛ busupiu gupiiɛ ń pɔtuo nɛsana sɛ̃iaɔ pii, mí yãda Egipi tãaɔla. Mamɛ má Dii ũ. 13Aupi iɔ dɛ seela ũ kpɛ́ pɔ á ku a guuwa. Tó malɛ ɔtɔ̃ Egipiɔwa, mɛ́ ma aupi è, má gɛ̃álaɛ, gagapi a á leo. 14Àli gɔɔpi dilɛ ma dikpɛ ũ a yã dɔngu yãi, íɔ dikpɛpi kɛ fɛlɛkaa ũ e á buiwa.
Kaaso dikpɛ
15Àliɔ kaaso e gɔɔ sopla. A zĩ àli pɔsɛ'ɛsɛ pɔ ku á kpɛ́uɔ kɔlɛ,#Bɔa 23.15; Mat 26.17; 1 Kln 5.7-8 asa gbɛ̃́ pɔ pɔsɛa sò gɔɔ soplapiu, wa ade bɔ Isailiɔ guu wà dɛɛ. 16A zĩ ń a gɔɔ sopladeo àli kɔ̃kãaa à ma sisi. Ásuli zĩe kɛ gɔɔ beeɔ zĩ́o, sema blɛkɛa gbɛ̃piiɛ baasio, a lɛ́n we. 17Àli Kaaso dikpɛkɛ, asa zĩ́ bee ɔ̃ ma á bɔlɛ Egipi lan zĩgɔ̃ɔwa. Á buiɔ líɔ dikpɛpi kɛ kɛtokɔ̃ɛ ũ. 18Mɔ sɛ̃ia gɔɔ gɛ̃omɛndosaidezĩ oosi, àɔ kaaso e a gɔɔ baommɛndoodezĩ oosi. 19Pɔsɛ'ɛsɛ su àɔ ku á bɛo e gɔɔ sopla, asa gbɛ̃́ pɔ pɔsɛa sò, bɔmɔn nò, belen nò, wa ade bɔ Isailiɔ guu wà dɛɛ. 20Ásuli pɔsɛa soo. Gu pɔ á kuu pii, àliɔ kaa só.
Gɛ̃amusu dikpɛ sɛ̃ia
21Mɔizi Isaili gbɛ̃zɔ̃ɔɔ sìsi pii, a ònɛ́: À gɛ́ á ua sã sɛi, í dɛ Gɛ̃amusu dikpɛkɛbɔ ũ. 22À ese sáo sɛ à zɔ̃ au pɔ ku ta guuwa, í lɛ́ kpɛɛlɛ gĩɔwa, ɔplaai ń ɔzɛɛio ń musuo. Á gbɛ̃e su bɔ a kpɛ́uo e gu dɔ. 23Tó Dii lɛ́ pã busua àlɛ Egipiɔ dɛdɛ, mɛ́ à au è kpɛɛlɛ gĩɔwa, a gɛ̃aɛ. A to gbɛ̃́dɛdɛna gɛ̃ázi à á dɛdɛo.#Hɛb 11.28 24Apiɔ ń á buiɔ àɔ yãpi kũa kɛtokɔ̃ɛ ũ e á buiwa. 25Tó a gɛ̃ busu pɔ Dii á gbau lá à a lɛgbɛ̃̀wa, àɔ kɛtokɔ̃ɛpi kũa. 26Tó á nɛɔ kɛtokɔ̃ɛpi mi gbɛ̀awá, 27à onɛ́ a dɛ Gɛ̃amusu sa pɔ wì o Diiwa ũɛ, asa kɛ́ à Egipiɔ dɛ̀dɛ, à gɛ̃̀ wá Isailiɔ kpɛ́ɔ musuɛ, i wá dɛdɛo. Ɔ̃ gbɛ̃́ɔ kùlɛ Diiɛ aa mipɛ̀lɛ. 28Kɛ́ aa tà, aa kɛ̀ lá Dii ò Mɔiziɛ ń Aalonaowa.
Egipi nɛgɔ̃ɛ sɛ̃iaɔ gagaa
29Gwãasĩn wɛɛdo Dii Egipi nɛgɔ̃ɛ sɛ̃iaɔ dɛ̀dɛ pii sɛa za Falaɔ̃ pɔ zɔ̃lɛa báawa nɛwa, e à gɛ̀ pɛ̀ dakpɛunaɔ pɔɔwa ń pɔtuo nɛsana sɛ̃iaɔ pii. 30Falaɔ̃ fɛ̀lɛ gwã ń a iwaɔ ń Egipiɔ pii, ɔ̃ bubua dà Egipia, asa uae ku gɛsaio. 31Gwãasĩna ɔ̃ Falaɔ̃ Mɔizi ń Aalonao sìsi a ònɛ́: À fɛlɛ à bɔlɛ ń Isailiɔ ma gbɛ̃́ɔ guu. À gɛ́ Dii sisii lá á òwa. 32À á bleɔ ń á sãɔ ń á zuɔ sɛlɛ lá á òwa. À gɛi, í samaa'omɛɛ.
33Egipiɔ lɛ́ naɛ gbɛ̃́piɔwa aa bɔlɛnɛ́ ń busuu kpakpa, asa aa mɛ̀: Wá gaga piiɛ. 34Isailiɔ ń kaatidɛaɔ kà taɔ guu a sɛ'ɛsɛsai, aa ń ulaɔ fĩ̀fĩwà, aa dàda ń gãu. 35Aa kɛ̀ lá Mɔizi ònɛ́wa, aa ãnusu pɔɔ ń vua pɔɔ ń pɔkasaɔ gbɛ̀a Egipiɔwa. 36Dii tò Egipiɔ ń wɛgwà, ɔ̃ aa kpàmá. Màa aa Egipiɔ pɔɔ sìmá.
Isailiɔ daa zɛ́u
37Isailiɔ dà zɛ́u kɛsɛ, aa bɔ̀lɛ ń Lamɛsɛo aa tà Suko. Gɔ̃ɛɔ gbɛ̃ɔn ɔaasɔsɔo lɛɛ ɔaa aaɔ̃ɛ (600 000), nɛɔ ń nɔɛɔ baasi. 38Bui zĩlo dodoaɔ tàńnɔ dasi lɔ. Bleɔ ń sãɔ ń zuɔ dasi kɛ̀ zai. 39Aa kaakɛ̀ ń kaatidɛa pɔ aa bɔ̀ò Egipio. A sɛ'ɛsɛ vĩo, asa wà ń yá Egipi zɛzɛsaiɛ. Aai blɛ mài e sɛ̀ aa ble zɛ́uo.
40Isailiɔ kua Egipi kɛ̀ wɛ̃̀ ɔaa pla ń baakwioɛ.#Daa 15.13; Gal 3.17 41Wɛ̃̀ ɔaa pla ń baakwiopi gbɛa, dikpɛpi zĩ́ ɔ̃ Dii zĩgɔ̃piɔ bɔ̀lɛ Egipi pii. 42Gwãasĩnapiá Dii pɔɛ. Isailiɔ líɔ itɛ̃kɛu e an buiwa, asa gwãpi ɔ̃ Dii Isailiɔ bɔlɛa Egipi itɛ̃kɛ̀.
Gɛ̃amusu dikpɛ
43Dii ò Mɔiziɛ ń Aalonao: Gɛ̃amusu yã pɔ má dìlɛn kɛ: Buipãlee suli a nɔ̀ɔ soo, 44ãma zɔ pɔ á lù mɛ́ à tɔ̃zɔ̃̀ a só. 45Nibɔ ge gbɛwina suli soo. 46Àli só kpɛ́u, ásuli bɔ ń a nɔ̀ɔpio bàasio. Ásuli sãpi wáe ɛo.#Zãa 19.36 47Isaili pii lí dikpɛpi kɛ. 48Tó bɔmɔ ku á guu, mɛ́ a ye Gɛ̃amusu dikpɛkɛ Diiɛ, aà tɔ̃zɔ̃zɔ̃ a bɛ gɔ̃ɛɔnɛ pii, i gɔ̃ bele ũ, i gbasa dikpɛpi kɛ. Gyafɔɔdee suli bleo. 49Bele ń bɔmɔ pɔ kuánɔɔ, ikoyã doũpiɛ. 50Ɔ̃ Isailiɔ kɛ̀ lá Dii ò Mɔiziɛ ń Aalonaowa pii. 51Zĩ́ bee ɔ̃ Dii Isailiɔ bɔ̀lɛ Egipi gãgã.
ទើបបានជ្រើសរើសហើយ៖
Bɔa 12: Boo2024
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Boko Bible © SIM International, 2024.