اعمالٚ رسولأن ۱۷
۱۷
آشوب، تَسالونیکی میأن
۱ پولُس و سیلاس، جٚه شهرأنٚ آمْفیپولیس و آپولونیا بوگوذشتیدی و به تَسالونیکی فأرسه‌ییدی کی یهودیأن اویه کنیسه دأشتیدی. ۲ پولُس طبقٚ خو عادت بوشو کنیسه دورون و سه‌تأ شَبّاتٚ روزٚ رِه جٚه کیتاب موقدّس اوشأنٚ اَمرأ بحث بوکوده ۳ و توضیح بده و دلیل بأورده کی لازم بو اَمی گونایأنٚ کفاره وأستی مسیح رنج بکشه و جٚه مورده‌یأن ویریزه. اون گفتی: «اَ عیسایَ کی در موردٚ اون شِمره گب زِئن درم، هو مسیح ایسه.» ۴ بعضی جٚه اوشأن و افرادٚ زیادی‌یم جٚه یونانیأنٚ خوداپرست و زنأکأنٚ سرشناس قوبیل بوکودیدی و پولُس و سیلاسٚ اَمرأ همرأه بوبوستید.
۵ ولی یهودیأن حسودی بوکودیدی و چند نفرٚ شریرٚ مردأکأنَ جٚه بازارٚ سر جمَ کودیدی، ایتأ گروه چأکودیدی و شهرٚ میأن آشوب به پا بوکودید. اَ گروه، پولُس و سیلاسٚ پیدا کودنٚ وأسی به یاسونٚ خانه حمله بوکودید تا اوشأنَ جٚه او خانه دورونی ببرید او جماعتٚ ورجأ کی اویه جم بوبوسته‌بید. ۶ ولی وختی رسولأنَ پیدا نوکودیدی، یاسون و چند نفر جٚه ایماندارأنٚ دیگرَ فأکش فأکشٚ اَمرأ ببردیدی مقاماتٚ شهرٚ ورجأ و فریاد بزه‌ییدی: «اَ مردأکأن، دونیایَ به آشوب فأکشیدی. هسأ بموییدی اَیه هم هو کارَ بوکونید ۷ و یاسونم اوشأنَ ببرده خو خانه. اَشأن همه‌تأن جٚه قیصرٚ دستورأن نافرمانی کونیدی، چونکی ادعا کونید اینفرٚ دیگر هم پادشا ایسه کی عیسی نام دأره.» ۸ وختی مردوم و مقاماتٚ شهر اَ گبأنَ بیشتأوستیدی، پریشأنَ بوستید. ۹ بأزین یاسون و دیگرأنٚ جأ ضمانت فیگیفتیدی و اوشأنَ آزادَ کودید.
پولُس و سیلاس بیریه شهرٚ میأن
۱۰ ایماندارأن هو شبٚ میأن، پولُس و سیلاسَ اوسه کودیدی کی بیشید بیریه. اوشأن وختی کی اویه فأرسه‌ییدی، به کنیسه‌یٚ یهودیأن بوشویید. ۱۱ کسأنی کی بیریه میأن زندگی کودیدی جٚه مردومأنٚ تَسالونیکی روشن فکرتر بید، چون خوداوند عیسی کلامَ، اشتیاقٚ اَمرأ قوبیل بوکودیدی و هر روز خودا کلامَ بررسی کودیدی تا به حقیقتٚ پولسٚ گبأن پی ببرید. ۱۲ اَطویی خیلی جٚه یهودیأن و زنأکأن و مردأکأنٚ سرشناسٚ غیریهودی ایمأن بأوردیدی.
۱۳ ولی وختی یهودیأنٚ تَسالونیکی بفهمستیدی کی پولُس بیریه شهرٚ میأنم خوداوند عیسی کلامَ موعظه کونه، اویه بوشوییدی و مردومَ تحریک و بر ضدٚ اوشأن بوشورأنه‌ییدی. ۱۴ ایماندارأن هو موقع پولُسَ اوسه کودیدی کی جٚه دریا رأ بشه، ولی سیلاس و تیموتائوس بیریه شهرٚ میأن بِیسَه‌ییدی. ۱۵ پولُسٚ همراهأن، اونَ تا آتن همراهی بوکودید و اویه جٚه پولُس دستور فیگیفتیدی کی سیلاس و تیموتائوس وأ هرچی زودتر پولُسٚ ورجأ بیشید. بأزین همراهأن آتنَ ترکَ کودید.
پولُس آتنٚ میأن
۱۶ وختی پولُس آتنٚ میأن سیلاس و تیموتائوسٚ منتظر ایسَه‌بو، مجسمه‌یٚ بُتأنَ کی شهرٚ دورون بیده، پریشأنَ بوسته. ۱۷ هَنٚ وأسی کنیسه میأن، یهودیأن و یونانیأنٚ خوداپرستٚ اَمرأ و هَطو هر روز شهرٚ میدانٚ دورون رهگذرأنٚ اَمرأ گب زه‌یی. ۱۸ چند نفر جٚه فیلسوفأنٚ اپیکوری و رواقی‌یم اونٚ اَمرأ شروع به بحث بوکودید. بعضی‌یأن بوگفتیدی: «اَ یاوِه‌گو چی خوأیه بگه؟» چند نفرٚ دیگرم بوگفتیدی: «شاید جٚه خودایأنٚ غریبه گب زِئن دره»، چونکی پولُس جٚه عیسی و اونٚ زنده بوستن جٚه دنیای مورده‌یأن بشارت دَئن دوبو. ۱۹ بأزین اونَ اوسأدیدی، ببردیدی «آریوپاگوسٚ» شورا و اویه اونَ بوگفتیدی: «تأنیم بدأنیم کی اَ تعلیمٚ جدیدَ کی تو دیهی، چی ایسه؟ ۲۰ تی گبأن اَمی گوشأنٚ‌ره غریبه‌یه. پس خوأییم بدأنیم اَ گبأن چی معنی دهه.» ۲۱ تومامٚ اوشأنی کی آتنٚ میأن زندگی کودیدی و اوشأنی کی آتنٚ میأن غریبه بید، هیچ کارٚ دیگری نأشتیدی، مگر گفتن و ایشنأوستنٚ عقایدٚ جدیدٚ اَمرأ خوشأنٚ وختَ بوگوذرأنید.
۲۲ پس پولُس «آریوپاگوسٚ» شورا میأن ویریشته و بوگفته: «اَی آتنٚ مردأکأن، من دأنم کی شومأن در موردٚ دین و مذهب خیلی دقیق ایسید، ۲۳ چونکی وختی شهرٚ میأن گردستن دوبوم و شیمی معبدأنَ دِئن دوبوم، ایتأ مذبح پیدا بوکودم کی اونٚ رو بینیویشته بو: ‹تقدیم به خودایٚ ناشنأخته›. شومأن نشنأخته اونَ پرستش کونیدی. هسأ من جٚه او خودا شمی‌ره گب زنم.
۲۴ «خودایی کی دونیا و هر اونچی‌یَ کی اونٚ میأن وجود دأره خلق بوکوده، آسمان و زیمینٚ مالک ایسه و معبدأنٚ میأنی، کی بشر دسٚ اَمرأ چأکوده‌بوبوسته، ساکن نیبه ۲۵ و چیزی کی آدمأن خوشأنٚ دسٚ مره چأکونیدی نیازی نأره، چونکی خودا نٚفٚس زِئن و حیات و همه‌یٚ چیزأنَ خودش آدمأنَ فده. ۲۶ اون جٚه ایتأ اینسأن، تومامٚ بشر و قومأنَ به وجود بأورده تا کی سرتاسرٚ زیمینٚ سر ساکن بیبید. اوشأنٚ رِه زمان و محلٚ سکونتٚ محدودی برقرار بوکوده، ۲۷ کی اوشأن، خودا دونبأل بگردید، اونَ پیدا بوکونید و شاید اونَ لمس بوکونید، هرچند کی خودا جٚه هیچکدامٚ اَمأن دور نی‌یه. ۲۸ چونکی اونٚ جأ زندگی و حرکت و هستی دأریمی، هَطو کی بعضی جٚه شیمی شاعرأن بوگفتیدی: ‹اَمأن اونٚ زأکأن ایسیمی.›
۲۹ «چونکی جٚه نسلٚ خوداییم، شایسته نی‌یه کی فیکر بوکونیم خودا ذاتٚ الهی، مجسمه‌یٚ طلا، نقره یا سنگی اَمرأ برابر ایسه کی به دسٚ هنرمند و سازنده‌یٚ ایتأ اینسأن اختراع یا چأکوده‌بوبوسته. ۳۰ خودا پیشترأن کارأنی‌یَ کی آدمأن جٚه روی نادانی انجام دَییدی تحمل کودی ولی هسأ همه جا، تومامٚ مردومأنَ حوکم کونه کی وأ توبه بوکونید. ۳۱ چونکی خودا روزی‌یَ بر قرار بوکوده کی جهانَ جٚه جانبٚ ایتأ مرد کی اونَ اینتخاب بوکوده، عیدالتٚ اَمرأ داوری کونه. خودا اونَ مورده‌یأنٚ دونیا جأ ویریزأنه تا اَ کارٚ اَمرأ، اَ حقیقتَ ثابت بوکونه.»
۳۲ وختی کی موضوع‌یٚ کسأنی کی میریدی و دوواره زنده بیدی بیشتأوستیدی، بعضی‌یأن مسخره بوکودیدی ولی چند نفر بوگفتیدی: «اَمأن خوأییم ایتأ فرصتٚ دیگر جٚه اونچی کی بوگفتی بیشنَویم.» ۳۳ اَطویی پولُس او جمَ ترکَ کوده. ۳۴ ولی چند نفر اونٚ اَمرأ همرأه بوبوستید و ایمأن بأوردیدی: دیونیسیوس، عضوٚ آریوپاگوسٚ شورا، ایتأ زنأکی کی داماریس نام دأشتی و چند نفرٚ دیگرم کی اونٚ اَمرأ بید.
ទើបបានជ្រើសរើសហើយ៖
اعمالٚ رسولأن ۱۷: گیلکی (رشتی)
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2010-2019 Gilak Media
