ܡܪܩܘܣ 6

ܝܼܫܘܿܥ ܓܵܘ ܢܵܨܪܲܬ

ܡܬܝ 13‏:53‏‐58؛ ܠܘܩܐ 4‏:16‏‐30

1ܦܠܝܼܛ ܠܹܗ ܝܼܫܘܿܥ ܡ̣ܢ ܬܵܡܵܐ ܘܐ݇ܬܹܐ ܠܹܗ ܠܡܕܝܼܢ݇ܬܹܗ، ܘܬܲܠܡܝܼܕܘܼ̈ܗܝ ܐ݇ܙܝܼܠ ܠܗܘܿܢ ܒܵܬ݇ܪܹܗ. 2ܘܒܝܵܘܡܵܐ ܕܫܲܒܬܵܐ ܫܘܼܪܹܐ ܠܹܗ ܠܡܲܠܘܼܦܹܐ ܓܵܘ ܟܢܘܼܫܬܵܐ، ܘܪܵܒܵܐ ܡܸܢܲܝܗܝ ܕܫܡܝܼܥ ܠܗܘܿܢ ܥܲܓ̰ܒܝܼ ܗ݇ܘܵܘ، ܘܐܵܡܪܝܼ ܗ݇ܘܵܘ، ”ܡ̣ܢ ܐܲܝܟܵܐ ܐܝܼܬ ܠܹܗ ܐܲܢܹܐ، ܘܡܘܿܕܝܼ ܚܸܟ݂ܡܬܵܐ ܦܝܼܫܬܵܐ ܝܠܵܗ̇ ܝܘܼܗ݇ܒܸܠܬܵܐ ܐܸܠܹܗ ܕܗܲܕܟ݂ܵܐ ܚܲܝܠܹ̈ܐ ܓܘܼܪܹ̈ܐ ܒܐܝܼܕܘܼ̈ܗܝ ܒܸܗܘܵܝܵܐ ܝܢܵܐ؟ 3”ܠܹܐ ܝܠܹܗ ܐܵܗܵܐ ܢܲܓܵܪܵܐ ܒܪܘܿܢܵܐ ܕܡܲܪܝܲܡ، ܘܐܲܚܘܿܢܵܐ ܕܝܲܥܩܘܿܒ݂ ܘܕܝܘܿܣܹܐ ܘܕܝܼܗܘܼܕܵܐ ܘܕܫܸܡܥܘܿܢ؟ ܘܠܹܐ ܝܢܵܐ ܚܵܬܘܵܬܹ̈ܗ ܠܐܲܟ݂ܵܐ ܠܟܸܣ ܠܲܢ؟“ ܘܬܲܪܩܸܠܝܼ ܗ݇ܘܵܘ ܒܝܼܹܗ. 4ܐܝܼܢܵܐ ܝܼܫܘܿܥ ܐ݇ܡܝܼܪܹܗ ܐܸܠܲܝܗܝ، ”ܠܲܝܬ ܢܒ݂ܝܼܵܐ ܕܠܵܐ ܐܝܼܩܵܪܵܐ ܐܸܠܵܐ ܓܵܘ ܡܕܝܼܢ݇ܬܵܐ ܕܓܵܢܹܗ، ܘܓܵܘ ܚܸܙܡܵܢܘܼ̈ܗܝ ܘܓܵܘ ܒܲܝܬܹܗ.“ 5ܘܠܵܐ ܡܨܹܐ ܠܹܗ ܥܵܒܹܕ ܗ݇ܘܵܐ ܬܵܡܵܐ ܐܘܼܦ ܚܲܕ ܚܲܝܠܵܐ، ܐܸܠܵܐ ܡܘܼܬܸܒ݂ ܠܹܗ ܐܝܼܕܹܗ ܥܲܠ ܚܲܕ݇ܟܡܵܐ ܡܪ̈ܝܼܥܹܐ ܘܒܘܼܣܡܲܝ ܠܹܗ. 6ܘܥܘܼܓ̰ܸܒ ܠܹܗ ܒܠܲܝܬܵܝܘܼܬܵܐ ܕܗܲܝܡܵܢܘܼܬܲܝܗܝ. ܘܒܸܚܕܵܪܵܐ ܝܗ݇ܘܵܐ ܓܵܘ ܡܵܬܘܵܬܹ̈ܐ ܕܚܵܕܸܪ̈ܘܵܢܹܐ ܟܲܕ ܡܲܠܘܼܦܹܐ.

ܬܲܠܡܝܼ̈ܕܹܐ ܡܲܟܪܘܼܙܹܐ ܘܒܲܣܘܼܡܹܐ

ܡܬܝ 10‏:1، 10‏:5‏‐15؛ ܠܘܩܐ 9‏:1‏‐6

7ܘܩܪܹܐ ܠܹܗ ܠܬܪܸܥܣܲܪ ܬܲܠܡܝܼܕܘܼ̈ܗܝ، ܘܝܘܼܗ݇ܒܸܠ ܠܹܗ ܐܸܠܲܝܗܝ ܫܘܼܠܛܵܢܵܐ ܥܲܠ ܪ̈ܘܼܚܵܬܹܐ ܛܲܡ̈ܐܹܐ، ܘܫܘܼܕܪܲܝ ܠܹܗ ܬܪܹܝ ܬܪܹܝ. 8ܘܦܩܝܼܕܲܝ ܠܹܗ ܕܠܵܐ ܫܵܩܠܝܼ ܡܸܢܕܝܼ ܩܵܐ ܐܘܼܪܚܵܐ ܐܸܠܵܐ ܚܘܼܛܪܵܐ، ܠܵܐ ܬܲܪܡܵܠܵܐ، ܘܠܵܐ ܠܲܚܡܵܐ، ܘܠܵܐ ܙܘܼܙܵܐ ܒܟܸܣܝܵܬܲܝ̈ܗܝ، 9ܐܸܠܵܐ ܕܠܵܒ݂ܫܝܼ ܟ̰ܵܪ̈ܘܿܚܹܐ، ܘܠܵܐ ܠܵܒ݂ܫܝܼ ܬܲܪܬܹܝ ܨܘܼܕܪ̈ܵܬܹܐ. 10ܘܐ݇ܡܝܼܪܹܗ ܐܸܠܲܝܗܝ، ”ܠܐܲܝܢܝܼ ܒܲܝܬܵܐ ܕܥܵܒ݂ܪܝܼܬܘܿܢ، ܬܵܡܵܐ ܗܘܹܝܡܘܼܢ ܗܲܠ ܕܦܵܠܛܝܼܬܘܿܢ ܡ̣ܢ ܕܗ̇ܝ ܕܘܼܟܵܐ. 11”ܘܡ̇ܢ ܕܠܵܐ ܩܲܒܸܠ ܠܵܘܟ݂ܘܿܢ ܘܠܵܐ ܫܵܡܹܥ ܐܸܠܵܘܟ݂ܘܿܢ، ܢܦܘܿܨܘܼܢ ܠܥܲܦܪܵܐ ܡ̣ܢ ܐܲܩܠܵܬܵܘ̈ܟ݂ܘܿܢ ܠܣܵܗܕܘܼܬܲܝܗܝ ܐܝܼܡܲܢ ܕܦܵܠܛܝܼܬܘܿܢ ܡ̣ܢ ܬܵܡܵܐ. 12ܘܦܠܝܼܛ ܠܗܘܿܢ ܘܡܘܼܟܪܸܙ ܠܗܘܿܢ ܬܝܵܒ݂ܘܼܬܵܐ ܠܐ݇ܢܵܫܹ̈ܐ. 13ܪܵܒܵܐ ܫܹܐܕܹ̈ܐ ܦܘܼܠܸܛ ܠܗܘܿܢ، ܘܪܵܒܵܐ ܡܪ̈ܝܼܥܹܐ ܡܫܝܼܚ ܠܗܘܿܢ ܒܡܸܫܚܵܐ، ܘܒܘܼܣܡܲܝ ܠܗܘܿܢ.

ܩܸܛܠܵܐ ܕܝܘܿܚܲܢܵܢ ܡܲܥܡܕܵܢܵܐ

ܡܬܝ 14‏:1‏‐12؛ ܠܘܩܐ 9‏:7‏‐9

14ܟܲܕ ܫܡܝܼܥ ܠܹܗ ܗܹܪܘܿܕܸܣ ܡܲܠܟܵܐ ܒܘܼܬ ܝܼܫܘܿܥ، ܣܵܒܵܒ ܦܪܝܼܣܵܐ ܝܗ݇ܘܵܐ ܫܸܡܹܗ، ܐ݇ܡܝܼܪܹܗ، ”ܐܵܗܵܐ ܝܘܿܚܲܢܵܢ ܡܲܥܡܕܵܢܵܐ ܝܠܹܗ، ܩܝܼܡܵܐ ܡ̣ܢ ܓܵܘ ܡܝܼܬܹ̈ܐ. ܒܘܼܬ ܐܵܗܵܐ ܚܲܝܠܹ̈ܐ ܓܘܼܪܹ̈ܐ ܦܝܵܫܵܐ ܝܢܵܐ ܥܒ݂ܝܼܕܹܐ ܒܝܼܹܗ.“ 15ܐܝܼܢܵܐ ܐ݇ܚܹܪ̈݇ܢܹܐ ܐܵܡܪܝܼ ܗ݇ܘܵܘ ܕܐܹܠܝܼܵܐ ܝܠܹܗ، ܘܐ݇ܚܹܪ̈݇ܢܹܐ ܕܢܒ݂ܝܼܵܐ ܝܠܹܗ، ܡܐܲܝܟ݂ ܚܲܕ ܡ̣ܢ ܢܒ݂ܝܼܹ̈ܐ ܩܲܕ݇ܡܵܝܹ̈ܐ.

16ܐܝܼܢܵܐ ܟܲܕ ܫܡܝܼܥ ܠܹܗ ܗܹܪܘܿܕܸܣ ܐ݇ܡܝܼܪܹܗ، ”ܐܵܗܵܐ ܝܘܿܚܲܢܵܢ ܝܼܠܹܗ، ܗ̇ܘ ܕܐܵܢܵܐ ܦܪܝܼܡ ܠܝܼ ܪܹܫܹܗ، ܩܝܼܡܵܐ ܝܠܹܗ.“ 17ܣܵܒܵܒ ܗܹܪܘܿܕܸܣ ܒܓܵܢܹܗ ܫܘܼܕܪܵܐ ܝܗ݇ܘܵܐ ܘܕܒ݂ܝܼܩܹܗ ܝܘܿܚܲܢܵܢ ܘܕܸܪܝܹܗ ܓܵܘ ܒܹܝܬ ܐܲܣܝܼܪܹ̈ܐ ܒܘܼܬ ܗܹܪܘܿܕܝܼܵܐ ܒܲܟ݂ܬܵܐ ܕܦܝܼܠܝܼܦܘܿܣ ܐܲܚܘܿܢܘܼܗܝ، ܕܓܒ݂ܝܼܪܘܼܗ̇ ܝܗ݇ܘܵܐ ܗܹܪܘܿܕܸܣ. 18ܣܵܒܵܒ ܟܹܐ ܐܵܡܹܪ ܗ݇ܘܵܐ ܝܘܿܚܲܢܵܢ ܠܗܹܪܘܿܕܸܣ، ”ܠܹܐ ܝܠܵܗ̇ ܩܵܢܘܿܢܵܝܬܵܐ ܐܸܠܘܼܟ݂ ܕܓܵܒ݂ܪܹܬ ܒܲܟ݂ܬܵܐ ܕܐܲܚܘܿܢܘܼܟ݂.“ 19ܘܗܹܪܘܿܕܝܼܵܐ ܕܒ݂ܝܼܩܬܵܐ ܝܗ݇ܘܵܐ ܟܲܪܒܵܐ ܒܠܸܒܘܼܗ̇ ܐܸܠܹܗ، ܘܒܵܥܝܵܐ ܗ݇ܘܵܐ ܕܩܵܛܠܵܐ ܗ݇ܘܵܐ ܠܹܗ، ܐܝܼܢܵܐ ܠܹܐ ܡܵܨܝܵܐ ܗ݇ܘܵܐ، 20ܣܵܒܵܒ ܗܹܪܘܿܕܸܣ ܟܹܐ ܙܵܕܹܥ ܗ݇ܘܵܐ ܡ̣ܢ ܝܘܿܚܲܢܵܢ، ܒܗ̇ܝ ܕܟܹܐ ܝܵܕܹܥ ܗ݇ܘܵܐ ܕܐ݇ܢܵܫܵܐ ܙܲܕܝܼܩܵܐ ܘܩܲܕܝܼܫܵܐ ܝܗ݇ܘܵܐ، ܘܟܹܐ ܢܵܛܹܪ ܗ݇ܘܵܐ ܠܹܗ. ܘܟܲܕ ܫܵܡܹܥ ܗ݇ܘܵܐ ܠܹܗ، ܠܹܐ ܝܵܕܹܥ ܗ݇ܘܵܐ ܡܘܿܕܝܼ ܥܵܒܹܕ ܗ݇ܘܵܐ، ܐܝܼܢܵܐ ܒܚܲܕܘܼܬܵܐ ܟܹܐ ܫܵܡܹܥ ܗ݇ܘܵܐ ܠܹܗ.

21ܐܝܼܢܵܐ ܡܛܹܐ ܠܵܗ̇ ܥܕܵܢܵܐ ܠܵܚܘܿܡܬܵܐ ܒܝܵܘܡܵܐ ܕܒܹܝܬ ܝܲܠܕܵܐ ܕܗܹܪܘܿܕܸܣ ܐܝܼܡܲܢ ܕܥܒ݂ܝܼܕ ܠܹܗ ܗܹܪܘܿܕܸܣ ܡܸܫܬܘܼܬܵܐ ܠܓܘܼܪ̈ܵܢܘܼܗܝ ܘܠܪ̈ܲܒܲܝ ܐܲܠܦܹ̈ܐ ܕܚܲܝܠܵܘܵܬܹ̈ܐ ܘܠܓܘܼܪ̈ܵܢܹܐ ܕܓܠܝܼܠܵܐ. 22ܘܥܒ݂ܝܼܪܵܗ̇ ܒܪܵܬܵܐ ܕܗܹܪܘܿܕܝܼܵܐ ܘܪܩܝܼܕ ܠܵܗ̇، ܘܫܦܝܼܪܵܗ̇ ܠܗܹܪܘܿܕܸܣ ܘܠܐܵܢܝܼ ܕܝ݇ܬܝܼܒܹܐ ܝܗ݇ܘܵܘ ܥܲܡܹܗ. ܘܐ݇ܡܝܼܪܹܗ ܡܲܠܟܵܐ ܠܒܪܵܬܵܐ، ”ܛܠܘܿܒ ܡܸܢܝܼ ܡܸܢܕܝܼ ܕܒܵܣܡܵܐ ܠܵܟ݂ܝ، ܘܐܵܢܵܐ ܒܸܬ ܝܵܗ݇ܒܹܢܵܟ݂ܝ.“ 23ܘܝ݇ܡܹܐ ܠܹܗ ܐܸܠܘܼܗ̇، ”ܡܸܢܕܝܼ ܕܛܵܠܒܲܬܝ ܡܸܢܝܼ ܒܸܬ ܝܵܗ݇ܒܹܢܵܟ݂ܝ، ܗܲܠ ܦܲܠܓܵܐ ܕܡܲܠܟܘܼܬܝܼ.“ 24ܘܗ̇ܝ ܦܠܝܼܛ ܠܵܗ̇ ܘܒܘܼܩܸܪܵܗ̇ ܡ̣ܢ ܝܸܡܘܼܗ̇، ”ܡܘܿܕܝܼ ܛܵܠܒܵܢ؟“ ܘܐ݇ܡܝܼܪܵܗ̇ ܐܸܠܘܼܗ̇ ܝܸܡܘܼܗ̇، ”ܛܠܘܿܒܝ ܪܹܫܵܐ ܕܝܘܿܚܲܢܵܢ ܡܲܥܡܕܵܢܵܐ.“ 25ܘܗܲܪ ܒܗ̇ܝ ܥܕܵܢܵܐ ܥܒ݂ܝܼܪܵܗ̇ ܒܓ̰ܲܠܕܘܼܬܵܐ ܠܟܸܣ ܡܲܠܟܵܐ ܘܛܠܝܼܒ ܠܵܗ̇، ܒܹܐܡܵܪܵܐ، ”ܒܵܥܝܵܢ ܐܵܕܝܼܵܐ ܕܝܵܗ݇ܒܹܬ ܠܝܼ ܓܵܘ ܡܵܐܢܵܐ ܪܹܫܵܐ ܕܝܘܿܚܲܢܵܢ ܡܲܥܡܕܵܢܵܐ.“ 26ܦܫܝܼܡ ܠܹܗ ܡܲܠܟܵܐ ܪܵܒܵܐ، ܐܝܼܢܵܐ ܒܘܼܬ ܡܵܘܡܵܬܹ̈ܐ ܕܝ݇ܡܹܐ ܠܹܗ ܘܒܘܼܬ ܐܵܢܝܼ ܕܝ݇ܬܝܼܒܹܐ ܝܗ݇ܘܵܘ ܥܲܡܹܗ ܠܣܘܼܦܪܵܐ، ܠܵܐ ܒܥܹܐ ܠܹܗ ܕܡܲܚܦܸܠ ܗ݇ܘܵܐ. 27ܘܗܲܪ ܒܗ̇ܝ ܥܕܵܢܵܐ ܫܘܼܕܸܪܹܗ ܢܵܛܘܿܪܵܐ ܘܦܩܝܼܕ ܠܹܗ ܐܸܠܹܗ ܕܡܲܝܬܹܐ ܗ݇ܘܵܐ ܠܪܹܫܵܐ ܕܝܘܿܚܲܢܵܢ. ܐ݇ܙܝܼܠ ܠܹܗ ܗ̇ܘ ܘܦܪܝܼܡ ܠܹܗ ܪܹܫܵܐ ܕܝܘܿܚܲܢܵܢ ܓܵܘ ܒܹܝܬ ܐܲܣܝܼܪܹ̈ܐ. 28ܘܡܘܼܐܬܹܐ ܠܹܗ ܪܹܫܹܗ ܓܵܘ ܡܵܐܢܵܐ ܘܝܘܼܗ݇ܒܸܠ ܠܹܗ ܠܒܪܵܬܵܐ، ܘܗ̇ܝ ܝܘܼܗ݇ܒܸܠ ܠܵܗ̇ ܠܝܸܡܘܼܗ̇. 29ܘܫܡܝܼܥ ܠܗܘܿܢ ܬܲܠܡܝܼܕܘܼ̈ܗܝ، ܐ݇ܬܹܐ ܠܗܘܿܢ ܘܫܩܝܼܠ ܠܗܘܿܢ ܠܫܠܲܕܹܗ ܘܡܘܼܬܒ݂ܵܐ ܠܗܘܿܢ ܓܵܘ ܒܹܝܬ ܩܒ݂ܘܼܪܵܐ.

ܬܲܪܣܵܝܬܵܐ ܕܚܲܡܫܵܐ ܐܲܠܦܹ̈ܐ

ܡܬܝ 14‏:13‏‐21؛ ܠܘܩܐ 9‏:10‏‐17؛ ܝܘܚܢܢ 6‏:1‏‐14

30ܘܓ̰ܡܝܼܥ ܠܗܘܿܢ ܫܠܝܼܚܹ̈ܐ ܠܟܸܣ ܝܼܫܘܿܥ ܘܡܘܼܕܸܥ ܠܗܘܿܢ ܐܸܠܹܗ ܟܠ ܡܸܢܕܝܼ ܕܥܒ݂ܝܼܕ ܠܗܘܿܢ ܘܡܘܼܠܸܦ ܠܗܘܿܢ. 31ܘܗ̇ܘ ܐ݇ܡܝܼܪܹܗ ܐܸܠܲܝܗܝ، ”ܬܹܝܡܘܼܢ ܐܵܙܲܠ݇ܚ ܠܚܕܵܐ ܕܘܼܟܵܐ ܓܵܘ ܒܲܪܝܼܵܐ ܒܢܲܦ̮ܫܲܢ ܘܡܲܢܝܸܚܘܼܢ ܚܲܕ݇ܟ̰ܵܐ،“ ܣܵܒܵܒ ܐܝܼܬ ܗ݇ܘܵܘ ܪܵܒܵܐ ܒܹܐܙܵܠܵܐ ܘܒܹܐܬܵܝܵܐ، ܘܠܲܝܬ ܗ݇ܘܵܘ ܠܗܘܿܢ ܥܕܵܢܵܐ ܐܘܼܦ ܠܵܐ ܠܹܐܟ݂ܵܠܵܐ. 32ܘܐ݇ܙܝܼܠ ܠܗܘܿܢ ܒܓܵܡܝܼ ܠܕܘܼܟܵܐ ܡܘܼܫܲܡܸܪ ܒܢܲܦ̮ܫܲܝܗܝ. 33ܘܚܸܙܝܲܝ ܠܗܘܿܢ ܪܵܒܵܐ ܐ݇ܢܵܫܹ̈ܐ ܟܲܕ ܒܹܐܙܵܠܵܐ، ܝ݇ܕܝܼܥܲܝ ܠܗܘܿܢ، ܘܪܚܝܼܛ ܠܗܘܿܢ ܠܬܵܡܵܐ ܡ̣ܢ ܟܠܲܝܗܝ ܡܕܝܼܢܵܬܹ̈ܐ، ܘܡܛܹܐ ܠܗܘܿܢ ܡ̣ܢ ܩܵܕ݇ܡ ܕܝܼܲܝܗܝ. 34ܘܦܠܝܼܛ ܠܹܗ ܝܼܫܘܿܥ ܡ̣ܢ ܓܵܡܝܼ ܘܚܙܹܐ ܠܹܗ ܠܟܸܢܫܵܐ ܓܘܼܪܵܐ ܘܪܘܼܚܸܡ ܠܹܗ ܥܲܠܲܝܗܝ، ܣܵܒܵܒ ܒܸܕܡܵܝܵܐ ܝܗ݇ܘܵܘ ܠܥܸܪ̈ܒܹܐ ܕܠܵܐ ܪܵܥܝܵܐ. ܘܫܘܼܪܹܐ ܠܹܗ ܠܡܲܠܘܼܦܲܝ ܪܵܒܵܐ ܡܸܢܕܝܼܵܢܹ̈ܐ.#ܡܢܝܢܐ 27‏:17؛ ܐ. ܡܠܟ̈ܐ 22‏:17؛ ܒ. ܕܒܪܝܡܝܢ 18‏:16؛ ܚܙܩܝܐܝܠ 34‏:5 35ܟܲܕ ܩܘܼܪܒܸܢܹܗ ܝܵܘܡܵܐ ܠܸܓܢܵܝܵܐ، ܐ݇ܬܹܐ ܠܗܘܿܢ ܠܟܸܣ ܠܹܗ ܬܲܠܡܝܼܕܘܼ̈ܗܝ ܘܐ݇ܡܝܼܪܗܘܿܢ ܐܸܠܹܗ، ”ܕܘܼܟܵܐ ܒܲܪܝܼܵܐ ܝܠܵܗ̇، ܘܥܕܵܢܵܐ ܥܒ݂ܝܼܪܬܵܐ ܝܠܵܗ̇. 36ܫܪܝܼ ܠܟܸܢܫܵܐ ܕܐܵܙܠ݇ܝܼ ܠܙܘܼܡܵܢܹ̈ܐ ܕܚܵܕܸܪ̈ܘܵܢܹܐ ܘܠܡܵܬܘܵܬܹ̈ܐ ܘܙܵܒ݂ܢܝܼ ܠܗܘܿܢ ܡܸܢܕܝܼ ܠܹܐܟ݂ܵܠܵܐ.“ 37ܐܝܼܢܵܐ ܗ̇ܘ ܐ݇ܡܝܼܪܹܗ ܐܸܠܲܝܗܝ، ”ܗܲܒ݂݇ܠܘܼܢ ܐܲܚܬܘܿܢ ܐܸܠܲܝܗܝ ܡܸܢܕܝܼ ܠܹܐܟ݂ܵܠܵܐ.“ ܘܐܵܢܝܼ ܓ̰ܘܼܘܸܒ ܠܗܘܿܢ، ”ܐܵܙܲܠ݇ܚ ܘܙܵܒ݂ܢܲܚ ܒܬܪܲܝܡܵܐܐ ܕܝܼܢܵܪܹ̈ܐ ܡܹܐܟ݂ܘܼܠܬܵܐ ܘܝܵܗ݇ܒܲܚ ܠܗܘܿܢ ܕܐܵܟ݂ܠܝܼ؟“ 38ܐ݇ܡܝܼܪܹܗ ܐܸܠܲܝܗܝ ܝܼܫܘܿܥ، ”ܙܹܠ݇ܡܘܼܢ ܘܚܙܹܝܡܘܼܢ ܟܡܵܐ ܠܲܚܡܹ̈ܐ ܐܝܼܬ ܠܵܘܟ݂ܘܿܢ.“ ܘܐܝܼܡܲܢ ܕܚܙܹܐ ܠܗܘܿܢ، ܐ݇ܡܝܼܪܗܘܿܢ ܐܸܠܹܗ، ”ܐܝܼܬ ܠܲܢ ܚܲܡܫܵܐ ܠܲܚܡܹ̈ܐ ܘܬܲܪܬܹܝ ܢܘܼܢܹ̈ܐ.“ 39ܦܩܝܼܕܲܝ ܠܹܗ ܝܼܫܘܿܥ ܕܡܲܬܒ݂ܝܼ ܠܐ݇ܢܵܫܹ̈ܐ ܒܣܝܼܥܵܬܹ̈ܐ ܥܲܠ ܓܸܠܵܐ ܩܝܼܢܵܐ. 40ܘܝ݇ܬܝܼܒ݂ ܠܗܘܿܢ ܒܣܝܼܥܵܬܹ̈ܐ ܕܐܸܡܵܐܐ ܐܸܡܵܐܐ، ܘܕܚܲܡܫܝܼ ܚܲܡܫܝܼ. 41ܘܫܩܝܼܠ ܠܹܗ ܐܵܢܝܼ ܚܲܡܫܵܐ ܠܲܚܡܹ̈ܐ ܘܬܲܪܬܹܝ ܢܘܼܢܹ̈ܐ، ܘܚܝܼܪܹܗ ܒܫܡܲܝܵܐ، ܒܘܼܪܸܟ݂ ܠܹܗ، ܘܩܨܹܐ ܠܹܗ ܠܲܚܡܹ̈ܐ، ܘܝܘܼܗ݇ܒܸܠ ܠܹܗ ܠܬܲܠܡܝܼܕܘܼ̈ܗܝ ܕܡܲܬܒ݂ܝܼ ܩܵܕ݇ܡ ܟܸܢܫܵܐ. ܘܐܘܼܦ ܠܐܵܢܝܼ ܬܲܪܬܹܝ ܢܘܼܢܹ̈ܐ، ܦܠܝܼܥܲܝ ܠܹܗ ܠܟܠܲܝܗܝ. 42ܐ݇ܟ݂ܝܼܠ ܠܗܘܿܢ ܟܠܲܝܗܝ ܘܣܒ݂ܝܼܥ ܠܗܘܿܢ. 43ܘܫܩܝܼܠ ܠܗܘܿܢ ܬܪܸܥܣܲܪ ܩܘܼܦܹ̈ܐ ܡܸܠܝܹܐ ܡ̣ܢ ܩܸܛܥܵܛܹ̈ܐ ܕܠܲܚܡܵܐ ܘܕܢܘܼܢܹ̈ܐ. 44ܘܐܵܢܝܼ ܕܐ݇ܟ݂ܝܼܠ ܠܗܘܿܢ ܠܲܚܡܹ̈ܐ ܚܲܡܫܵܐ ܐܲܠܦܹ̈ܐ ܓܲܒ݂ܪܹ̈ܐ ܝܗ݇ܘܵܘ.

ܝܼܫܘܿܥ ܒܸܚܕܵܪܵܐ ܥܲܠ ܡ̈ܝܼܵܐ

ܡܬܝ 14‏:22‏‐33؛ ܝܘܚܢܢ 6‏:15‏‐21

45ܗܲܪ ܒܗ̇ܝ ܥܕܵܢܵܐ ܡܘܼܥܒܸܕ ܠܹܗ ܝܼܫܘܿܥ ܠܬܲܠܡܝܼܕܘܼ̈ܗܝ ܕܐܵܣܩܝܼ ܗ݇ܘܵܘ ܠܓܵܡܝܼ ܘܐܵܙܠ݇ܝܼ ܗ݇ܘܵܘ ܡ̣ܢ ܩܵܕ݇ܡ ܕܝܼܹܗ ܠܗ̇ܘ ܡܲܪܙܵܐ ܐ݇ܚܹܪ݇ܢܵܐ ܠܒܹܝܬ ܨܲܝܵܕܵܐ، ܟܲܕ ܗ̇ܘ ܡܲܦܫܸܛ ܗ݇ܘܵܐ ܠܟܸܢܫܵܐ. 46ܘܐܝܼܡܲܢ ܕܫܘܼܕܪܲܝ ܠܹܗ، ܐ݇ܙܝܼܠ ܠܹܗ ܠܛܘܼܪܵܐ ܠܨܲܠܘܼܝܹܐ.

47ܟܲܕ ܗܘܹܐ ܠܹܗ ܪܲܡܫܵܐ، ܓܵܡܝܼ ܒܹܝܬ݇ ܦܲܠܓܵܐ ܕܝܵܡܵܐ ܝܗ݇ܘܵܐ، ܘܗ̇ܘ ܒܢܲܦ̮ܫܹܗ ܥܲܠ ܒܸܪܙܵܐ. 48ܘܚܸܙܝܲܝ ܠܹܗ ܝܼܫܘܿܥ ܓ̰ܲܢܓ̰ܘܼܪܹܐ ܒܛܪܵܝܬܵܐ ܕܓܵܡܝܼ ܣܵܒܵܒ ܦܵܘܚܵܐ ܒܲܠܩܘܼܒ݂ܠܲܝܗܝ ܝܗ݇ܘܵܐ. ܘܒܒܲܕܠܵܐ ܕܐܲܪܒܲܥ ܕܠܲܝܠܹܐ، ܐ݇ܬܹܐ ܠܹܗ ܠܟܸܣ ܠܲܝܗܝ ܒܸܚܕܵܪܵܐ ܥܲܠ ܝܵܡܵܐ ܘܒܥܹܐ ܠܹܗ ܕܥܵܒܹܪ ܗ݇ܘܵܐ ܠܗܘܿܢ. 49ܘܐܝܼܡܲܢ ܕܐܵܢܝܼ ܚܙܹܐ ܠܗܘܿܢ ܐܸܠܹܗ ܒܸܚܕܵܪܵܐ ܥܲܠ ܝܵܡܵܐ، ܚܫܝܼܒ݂ ܠܗܘܿܢ ܕܚܸܙܘܵܐ ܝܗ݇ܘܵܐ، ܘܡܘܼܩܘܸܚ ܠܗܘܿܢ، 50ܣܵܒܵܒ ܟܠܲܝܗܝ ܚܙܹܐ ܠܗܘܿܢ ܐܸܠܹܗ، ܘܙܕܝܼܥ ܠܗܘܿܢ. ܗܲܪ ܒܗ̇ܝ ܥܕܵܢܵܐ ܗܘܼܡܙܸܡ ܠܹܗ ܥܲܡܲܝܗܝ ܝܼܫܘܿܥ ܘܐ݇ܡܝܼܪܹܗ ܐܸܠܲܝܗܝ، ”ܗܘܹܝܡܘܼܢ ܠܸܒܵܢܹ̈ܐ، ܐܵܢܵܐ ܝܘܸܢ، ܠܵܐ ܙܵܕܥܝܼܬܘܿܢ.“ 51ܘܐ݇ܣܝܼܩ ܠܹܗ ܓܵܘ ܓܵܡܝܼ ܠܟܸܣ ܠܲܝܗܝ، ܘܫܠܹܐ ܠܹܗ ܦܵܘܚܵܐ، ܘܥܘܼܓ̰ܸܒ ܠܗܘܿܢ ܒܓܵܢܲܝܗܝ ܪܵܒܵܐ، 52ܣܵܒܵܒ ܠܵܐ ܦܘܼܪܡܹܐ ܠܗܘܿܢ ܡ̣ܢ ܐܵܢܝܼ ܠܲܚܡܹ̈ܐ، ܒܗ̇ܝ ܕܩܸܫܝܵܐ ܝܗ݇ܘܵܐ ܠܸܒܲܝܗܝ.

ܝܼܫܘܿܥ ܒܲܣܘܼܡܹܐ ܐ݇ܢܵܫܹ̈ܐܓܵܘ ܓܹܢܹܣܲܪ

ܡܬܝ 14‏:34‏‐36

53ܘܟܲܕ ܥܒ݂ܝܼܪܗܘܿܢ ܠܡܲܪܙܵܐ ܐ݇ܚܹܪ݇ܢܵܐ، ܐ݇ܬܹܐ ܠܗܘܿܢ ܠܐܲܪܥܵܐ ܕܓܹܢܹܣܲܪ، ܘܓܪܝܼܫ ܠܗܘܿܢ ܠܡܲܪܙܵܐ. 54ܘܐܝܼܡܲܢ ܕܦܠܝܼܛ ܠܗܘܿܢ ܡ̣ܢ ܓܵܡܝܼ، ܗܲܪ ܒܗ̇ܝ ܥܕܵܢܵܐ ܝ݇ܕܝܼܥ ܠܗܘܿܢ ܐܸܠܹܗ ܐ݇ܢܵܫܹ̈ܐ، 55ܘܪܚܝܼܛ ܠܗܘܿܢ ܒܟܠܹܗ ܗ̇ܘ ܐܲܬܪܵܐ، ܘܫܘܼܪܹܐ ܠܗܘܿܢ ܠܡܲܝܬܘܼܝܹܐ ܠܡܲܪ̈ܥܵܢܹܐ ܥܲܠ ܫܘܝܼܵܬܹ̈ܐ، ܟܠ ܐܲܝܟܵܐ ܕܫܵܡܥܝܼ ܗ݇ܘܵܘ ܕܬܵܡܵܐ ܝܗ݇ܘܵܐ. 56ܘܐܲܝܟܵܐ ܕܥܵܒܹܪ ܗ݇ܘܵܐ، ܓܵܘ ܡܵܬܘܵܬܹ̈ܐ، ܝܲܢ ܓܵܘ ܡܕܝܼܢܵܬܹ̈ܐ، ܝܲܢ ܓܵܘ ܙܘܼܡܵܢܹ̈ܐ، ܟܹܐ ܡܲܬܒ݂ܝܼ ܗ݇ܘܵܘ ܡܪ̈ܝܼܥܹܐ ܓܵܘ ܫܘܼܩܹ̈ܐ، ܘܦܲܪܦܸܠܝܼ ܗ݇ܘܵܘ ܒܝܼܹܗ ܕܕܵܩܪܝܼ ܐܘܼܦ ܐܸܢ ܕܗܵܘܝܵܐ ܒܫܸܦܘܼܠܵܐ ܕܠܒ݂ܝܼܫܬܹܗ. ܘܟܠܲܝܗܝ ܐܵܢܝܼ ܕܕܵܩܪܝܼ ܗ݇ܘܵܘ ܟܹܐ ܦܵܝܫܝܼ ܗ݇ܘܵܘ ܒܣܝܼܡܹܐ.

ទើបបានជ្រើសរើសហើយ៖

ܡܪܩܘܣ 6: ABTAB

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី ܟܬܵܒ݂ܵܐ ܩܲܕܝܼܫܵܐ ܒܠܸܫܵܢܵܐ ܐܵܬܘܿܪܵܝܵܐ