ܡܪܩܘܣ 15

ܝܼܫܘܿܥ ܡܫܝܼܚܵܐ ܩܵܕ݇ܡ ܦܝܼܠܵܛܘܿܣ

ܡܬܝ 27‏:1‏‐2، 27‏:11‏‐14؛ ܠܘܩܐ 23‏:1‏‐5؛ ܝܘܚܢܢ 18‏:28‏‐38

1ܒܝܵܘܡܵܐ ܐ݇ܚܹܪ݇ܢܵܐ ܒܨܲܦܪܵܐ، ܣܘܼܙܓܸܪܗܘܿܢ ܓܘܼܪ̈ܵܢܹܐ ܕܟܵܗܢܹ̈ܐ ܥܲܡ ܚܘܵܪ̈ܕܸܩܢܹܐ ܘܥܲܡ ܣܵܦܪܹ̈ܐ ܘܥܲܡ ܟܠܹܗ ܟܢܘܼܫܝܵܐ، ܘܐ݇ܣܝܼܪܗܘܿܢ ܠܝܼܫܘܿܥ ܘܠܘܼܒܸܠ ܠܗܘܿܢ ܘܣܘܼܦܹܐ ܠܗܘܿܢ ܐܸܠܹܗ ܠܦܝܼܠܵܛܘܿܣ. 2ܘܒܘܼܩܸܪܹܗ ܡܸܢܹܗ ܦܝܼܠܵܛܘܿܣ، ”ܐܲܢ݇ܬ ܝܼܘܸܬ ܡܲܠܟܵܐ ܕܝܗܘܼܕܵܝܹ̈ܐ؟“ ܘܗ̇ܘ ܓ̰ܘܼܘܸܒ ܠܹܗ ܘܐ݇ܡܝܼܪܹܗ ܐܸܠܹܗ، ”ܐܲܢ݇ܬ ܐ݇ܡܝܼܪܘܼܟ݂.“ 3ܘܓܘܼܪ̈ܵܢܹܐ ܕܟܵܗܢܹ̈ܐ ܩܵܒ݂ܠܝܼ ܗ݇ܘܵܘ ܥܲܠܘܼܗܝ ܒܪܵܒܵܐ ܡܸܢܕܝܼܵܢܹ̈ܐ. 4ܡܸܢܕܪܸܫ ܒܘܼܩܸܪܹܗ ܡܸܢܹܗ ܦܝܼܠܵܛܘܿܣ، ܒܹܐܡܵܪܵܐ، ”ܩܵܡܘܿܕܝܼ ܠܹܐ ܝܘܸܬ ܓ̰ܲܘܘܼܒܹܐ، ܒܸܚܙܵܝܵܐ ܝܘܸܬ ܟܡܵܐ ܒܸܩܒ݂ܵܠܵܐ ܝܢܵܐ ܥܲܠܘܼܟ݂؟“ 5ܐܝܼܢܵܐ ܝܼܫܘܿܥ ܠܵܐ ܓ̰ܘܼܘܸܒ ܠܹܗ ܐܘܼܦ ܚܕܵܐ ܗܹܡܸܙܡܵܢ، ܗܲܕܟ݂ܵܐ ܕܥܘܼܓ̰ܸܒ ܠܹܗ ܦܝܼܠܵܛܘܿܣ.

ܦܝܼܠܵܛܘܿܣ ܣܲܦܘܼܝܹܗܝܼܫܘܿܥ ܠܝܗܘܼܕܵܝܹ̈ܐ

ܡܬܝ 27‏:15‏‐26؛ ܠܘܩܐ 23‏:13‏‐25؛ ܝܘܚܢܢ 18‏:39‏–19‏:16

6ܒܟܠ ܥܹܐܕܵܐ ܐܝܼܬ ܗ݇ܘܵܐ ܥܵܕܲܬ ܕܫܵܪܹܐ ܗ݇ܘܵܐ ܫܲܠܝܼܛܵܐ ܚܲܕ ܐܲܣܝܼܪܵܐ ܩܵܐ ܥܲܡܵܐ، ܗ̇ܘ ܕܐܵܢܝܼ ܛܵܠܒܝܼ ܗ݇ܘܵܘ. 7ܘܐܝܼܬ ܗ݇ܘܵܐ ܚܲܕ ܐܲܣܝܼܪܵܐ ܫܸܡܹܗ ܒܲܪ ܐܲܒܵܐ، ܗ̇ܘ ܕܦܝܼܫܵܐ ܝܗ݇ܘܵܐ ܕܸܪܝܵܐ ܓܵܘ ܒܹܝܬ ܐܲܣܝܼܪܹ̈ܐ ܥܲܡ ܡܵܪ̈ܘܿܕܹܐ، ܐܵܢܝܼ ܕܒܩܸܛܠܵܐ ܟܹܐ ܥܵܒ݂ܕܝܼ ܗ݇ܘܵܘ ܫܓ݂ܘܼܫܝܵܐ. 8ܡܘܼܩܘܸܚ ܠܹܗ ܟܸܢܫܵܐ ܘܫܘܼܪܹܐ ܠܹܗ ܠܸܛܠܵܒܵܐ ܕܥܵܒܹܕ ܗ݇ܘܵܐ ܐܸܠܲܝܗܝ، ܐܲܝܟ݂ ܕܟܹܐ ܥܵܒܹܕ ܗ݇ܘܵܐ ܥܝܵܕܵܐܝܼܬ. 9ܘܒܘܼܩܸܪܹܗ ܡܸܢܲܝܗܝ ܦܝܼܠܵܛܘܿܣ، ”ܒܵܥܹܝܬܘܿܢ ܕܫܵܪܹܝܢ ܐܸܠܵܘܟ݂ܘܿܢ ܡܲܠܟܵܐ ܕܝܗܘܼܕܵܝܹ̈ܐ؟“ 10ܣܵܒܵܒ ܟܹܐ ܝܵܕܹܥ ܗ݇ܘܵܐ ܦܝܼܠܵܛܘܿܣ ܕܡ̣ܢ ܒܲܚܸܠܵܢܘܼܬܵܐ ܣܘܼܦܹܐ ܠܗܘܿܢ ܓܘܼܪ̈ܵܢܹܐ ܕܟܵܗܢܹ̈ܐ ܠܝܼܫܘܿܥ. 11ܐܝܼܢܵܐ ܓܘܼܪ̈ܵܢܹܐ ܕܟܵܗܢܹ̈ܐ ܚܘܼܦܸܛ ܠܗܘܿܢ ܠܟܸܢܫܵܐ ܕܫܵܪܹܐ ܗ݇ܘܵܐ ܐܸܠܲܝܗܝ ܠܒܲܪ ܐܲܒܵܐ. 12ܡܸܢܕܪܸܫ ܒܘܼܩܸܪܹܗ ܡܸܢܲܝܗܝ ܦܝܼܠܵܛܘܿܣ، ”ܡܘܿܕܝܼ ܒܵܥܹܝܬܘܿܢ ܕܥܵܒ݂ܕܹܢ ܠܐܵܗܵܐ ܐ݇ܢܵܫܵܐ ܕܒܸܩܪܵܝܹܗ ܝܬܘܿܢ ܡܲܠܟܵܐ ܕܝܗܘܼܕܵܝܹ̈ܐ؟“ 13ܘܐܵܢܝܼ ܡܘܼܩܘܸܚ ܠܗܘܿܢ، ”ܙܩܘܿܦ ܠܹܗ.“ 14ܓ̰ܘܼܘܸܒ ܠܹܗ ܦܝܼܠܵܛܘܿܣ، ”ܡܘܿܕܝܼ ܒܝܼܫܬܵܐ ܥܒ݂ܝܼܕܵܐ ܝܠܹܗ؟“ ܐܝܼܢܵܐ ܐܵܢܝܼ ܒܘܼܫ ܙܵܘܕܵܐ ܡܲܩܘܸܚܝܼ ܗ݇ܘܵܘ، ”ܙܩܘܿܦ ܠܹܗ.“ 15ܘܒܥܹܐ ܠܹܗ ܦܝܼܠܵܛܘܿܣ ܕܥܵܒܹܕ ܗ݇ܘܵܐ ܕܵܐܟ݂ܝܼ ܕܟܸܢܫܵܐ ܒܵܣܡܵܐ ܗ݇ܘܵܐ ܠܹܗ. ܫܪܹܐ ܠܹܗ ܐܸܠܲܝܗܝ ܠܒܲܪ ܐܲܒܵܐ، ܘܣܘܼܦܹܐ ܠܹܗ ܐܸܠܲܝܗܝ ܠܝܼܫܘܿܥ ܕܦܵܐܹܫ ܡܸܚܝܵܐ ܠܙܩܝܼܦܵܐ ܡ̣ܢ ܒܵܬ݇ܪ ܕܦܝܼܫܵܐ ܝܗ݇ܘܵܐ ܡܸܚܝܵܐ ܒܫܵܘܛܹ̈ܐ.

ܢܵܛܘܿܪܹ̈ܐ ܡܲܣܚܘܼܪܹܐ ܒܝܼܫܘܿܥ

ܡܬܝ 27‏:27‏‐31؛ ܝܘܚܢܢ 19‏:2‏‐3

16ܗ̇ܝܓܵܗ ܢܵܛܘܿܪܹ̈ܐ ܠܘܼܒܸܠ ܠܗܘܿܢ ܐܸܠܹܗ ܠܓܵܘ ܕܵܪܬܵܐ ܕܝܼܠܵܗ̇ ܦܪܵܛܘܿܪܝܼܢ ܘܩܪܹܐ ܠܗܘܿܢ ܠܟܠܵܗ̇ ܣܝܼܥܬܵܐ. 17ܘܡܘܼܠܒܸܫ ܠܗܘܿܢ ܐܸܠܹܗ ܐܲܪܓܘܵܢܵܐ، ܘܓܕܝܼܠ ܠܗܘܿܢ ܟܠܝܼܠܵܐ ܕܟܸܬܘܹ̈ܐ ܘܡܘܼܬܸܒ݂ ܠܗܘܿܢ ܒܪܹܫܹܗ. 18ܘܫܘܼܪܹܐ ܠܗܘܿܢ ܒܸܕܪܵܝܵܐ ܫܠܵܡܵܐ ܥܲܠܘܼܗܝ، ܒܹܐܡܵܪܵܐ، ”ܫܠܵܡܵܐ ܠܘܼܟ݂ ܡܲܠܟܵܐ ܕܝܗܘܼܕܵܝܹ̈ܐ.“ 19ܘܡܵܚܝܼ ܗ݇ܘܵܘ ܒܙܹܠܵܐ ܥܲܠ ܪܹܫܹܗ، ܘܪܵܝܩܝܼ ܗ݇ܘܵܘ ܥܲܠܘܼܗܝ، ܘܒܵܪܟܝܼ ܗ݇ܘܵܘ ܥܲܠ ܒܘܼܪ̈ܟܵܟܲܝܗܝ ܩܵܕ݇ܡܘܼܗܝ، ܘܣܵܓ݂ܕܝܼ ܗ݇ܘܵܘ ܠܹܗ. 20ܡ̣ܢ ܒܵܬ݇ܪ ܕܡܘܼܣܚܸܪܗܘܿܢ ܒܝܼܹܗ، ܫܘܼܠܸܚ ܠܗܘܿܢ ܡܸܢܹܗ ܓ̰ܘܼܠܹ̈ܐ ܕܐܲܪܓܘܵܢܵܐ، ܘܡܘܼܠܒܸܫ ܠܗܘܿܢ ܐܸܠܹܗ ܓ̰ܘܼܠܹ̈ܐ ܕܓܵܢܹܗ، ܘܦܘܼܠܸܛ ܠܗܘܿܢ ܕܦܵܐܹܫ ܡܸܚܝܵܐ ܠܙܩܝܼܦܵܐ.

ܙܩܵܦܬܵܐ ܕܝܼܫܘܿܥ

ܡܬܝ 27‏:32‏‐44؛ ܠܘܩܐ 23‏:26‏‐43؛ ܝܘܚܢܢ 19‏:17‏‐27

21ܚܲܕ ܐ݇ܢܵܫܵܐ ܩܸܘܪܝܼܢܵܝܵܐ، ܫܸܡܹܗ ܫܸܡܥܘܿܢ، ܒܵܒܵܐ ܕܐܵܠܸܟܣܲܢܕܪܘܿܣ ܘܕܪܘܼܦܘܿܣ، ܒܸܥܒ݂ܵܪܵܐ ܝܗ݇ܘܵܐ ܡ̣ܢ ܬܵܡܵܐ، ܒܹܐܬܵܝܵܐ ܡ̣ܢ ܚܲܩܠܵܐ. ܥܒ݂ܝܼܕ ܠܗܘܿܢ ܫܘܼܚܪܵܐ ܥܲܠܘܼܗܝ ܕܛܵܥܹܢ ܗ݇ܘܵܐ ܠܙܩܝܼܦܵܐ ܕܝܼܫܘܿܥ. 22ܘܡܘܼܐܬܹܐ ܠܗܘܿܢ ܐܸܠܹܗ ܠܓܵܓ݂ܘܿܠܬܵܐ، ܕܘܼܟܵܐ ܕܦܝܵܫܵܐ ܝܠܵܗ̇ ܦܘܼܫܸܩܬܵܐ ”ܕܘܼܟܵܐ ܕܩܲܪܩܲܦܬܵܐ.“ 23ܘܝܘܼܗ݇ܒܸܠ ܠܗܘܿܢ ܐܸܠܹܗ ܚܲܡܪܵܐ ܠܸܫܬܵܝܵܐ، ܚܒ݂ܝܼܛܵܐ ܒܡܘܼܪܵܐ. ܐܝܼܢܵܐ ܠܵܐ ܫܬܹܐ ܠܹܗ. 24ܘܙܩܝܼܦ ܠܗܘܿܢ ܐܸܠܹܗ، ܘܦܘܼܠܸܥ ܠܗܘܿܢ ܠܓ̰ܘܼܠܘܼ̈ܗܝ ܒܕܪܵܝܬܵܐ ܕܦܸܫܟܹ̈ܐ، ܟܠ ܚܲܕ ܡܘܿܕܝܼ ܒܸܬ ܫܵܩܹܠ.#ܡܙܡܘܪ̈ܐ 22‏:18

25ܣܵܥܲܬ ܕܬܫܲܥ ܝܗ݇ܘܵܐ ܐܝܼܡܲܢ ܕܡܚܹܐ ܠܗܘܿܢ ܐܸܠܹܗ ܠܙܩܝܼܦܵܐ. 26ܘܟܬܝܼܒ݂ܬܵܐ ܝܗ݇ܘܵܐ ܥܸܠܬܵܐ ܕܡܵܘܬܹܗ، ”ܐܵܗܵܐ ܝܠܹܗ ܡܲܠܟܵܐ ܕܝܗܘܼܕܵܝܹ̈ܐ.“ 27ܘܙܩܝܼܦ ܠܗܘܿܢ ܥܲܡܹܗ ܬܪܹܝ ܓܲܝܵܣܹ̈ܐ، ܚܲܕ ܡ̣ܢ ܝܲܡܝܼܢܹܗ ܘܚܲܕ ܡ̣ܢ ܣܸܡܵܠܹܗ. 28ܘܦܝܼܫ ܠܹܗ ܬܘܼܡܸܡܵܐ ܟܬܵܒ݂ܵܐ ܕܐ݇ܡܝܼܪܹܗ، ”ܥܲܡ ܥܵܘܵܠܹ̈ܐ ܦܝܼܫ ܠܹܗ ܚܘܼܫܒܸܢܵܐ.“#ܐܫܥܝܐ 53‏:12 29ܘܐܘܼܦ ܐܵܢܝܼ ܕܥܵܒ݂ܪܝܼ ܗ݇ܘܵܘ ܓܵܕܦܝܼ ܗ݇ܘܵܘ ܥܲܠܘܼܗܝ ܘܫܵܥܫܝܼ ܗ݇ܘܵܘ ܪܹ̈ܫܲܝܗܝ ܘܐܵܡܪܝܼ ܗ݇ܘܵܘ، ”ܝܵܐ ܣܵܬܪܵܢܵܐ ܕܗܲܝܟܠܵܐ ܘܒܵܢܝܵܢܹܗ ܒܬܠܵܬܵܐ ܝܵܘܡܵܢܹ̈ܐ،#ܡܙܡܘܪ̈ܐ 22‏:7، 109‏:25 30”ܦܲܨܝܼ ܓܵܢܘܼܟ݂ ܘܨܠܝܼ ܡ̣ܢ ܙܩܝܼܦܵܐ.“ 31ܗܲܕܟ݂ܵܐ ܐܘܼܦ ܓܘܼܪ̈ܵܢܹܐ ܕܟܵܗܢܹ̈ܐ ܓܵܚܟܝܼ ܗ݇ܘܵܘ ܚܲܕ ܥܲܡ ܕܗ̇ܘ ܐ݇ܚܹܪ݇ܢܵܐ ܘܥܲܡ ܣܵܦܪܹ̈ܐ ܘܐ݇ܡܝܼܪܗܘܿܢ، ”ܠܐ݇ܚܹܪ̈݇ܢܹܐ ܦܘܼܪܸܩ ܠܹܗ، ܐܝܼܢܵܐ ܓܵܢܹܗ ܠܹܐ ܡܵܨܹܐ ܦܲܪܸܩ ܠܵܗ̇. 32”ܡܫܝܼܚܵܐ ܡܲܠܟܵܐ ܕܝܼܣܪܵܝܹܠ، ܫܒ݂ܘܿܩ ܨܵܠܹܐ ܐܵܕܝܼܵܐ ܡ̣ܢ ܙܩܝܼܦܵܐ ܕܚܵܙܲܚ ܘܗܲܡܸܢܲܚ ܒܝܼܹܗ.“ ܐܘܼܦ ܐܵܢܝܼ ܕܦܝܼܫ ܠܗܘܿܢ ܙܩܝܼܦܹܐ ܥܲܡܹܗ ܡܲܣܚܸܪܝܼ ܗ݇ܘܵܘ ܒܝܼܹܗ.

ܡܵܘܬܵܐ ܕܝܼܫܘܿܥ

ܡܬܝ 27‏:45‏‐56؛ ܠܘܩܐ 23‏:44‏‐49؛ ܝܘܚܢܢ 19‏:28‏‐30

33ܟܲܕ ܗܘܹܐ ܠܵܗ̇ ܣܵܥܲܬ ܕܬܪܸܥܣܲܪ، ܗܘܹܐ ܠܹܗ ܚܸܫܟܵܐ ܥܲܠ ܟܠܵܗ̇ ܐܲܪܥܵܐ ܗܲܠ ܣܵܥܲܬ ܕܬܠܵܬ. 34ܘܒܣܵܥܲܬ ܕܬܠܵܬ ܡܘܼܩܘܸܚ ܠܹܗ ܝܼܫܘܿܥ ܒܩܵܠܵܐ ܪܵܡܵܐ، ܒܹܐܡܵܪܵܐ، ”ܐܹܝܠܝ ܐܹܝܠܝ، ܠܡܵܢܵܐ ܫܒܲܩܬܵܢܝ؟“ ܕܦܝܵܫܵܐ ܝܠܵܗ̇ ܦܘܼܫܸܩܬܵܐ، ”ܐܲܠܵܗܝܼ، ܐܲܠܵܗܝܼ، ܩܵܡܘܿܕܝܼ ܫܒ݂ܝܼܩܸܢܘܼܟ݂؟“#ܡܙܡܘܪ̈ܐ 22‏:1 35ܐ݇ܢܵܫܹ̈ܐ ܕܟܸܠܝܹܐ ܝܗ݇ܘܵܘ ܬܵܡܵܐ ܐ݇ܡܝܼܪܗܘܿܢ، ”ܠܐܹܠܝܼܵܐ ܒܸܩܪܵܝܵܐ ܝܠܹܗ.“ 36ܘܪܚܝܼܛ ܠܹܗ ܚܲܕ ܡܸܢܲܝܗܝ ܘܡܠܹܐ ܠܹܗ ܐܸܣܦܘܼܓܵܐ ܚܲܠܵܐ#ܡܙܡܘܪ̈ܐ 69‏:21 ܘܐ݇ܣܝܼܪܹܗ ܒܙܹܠܵܐ ܕܡܲܫܬܹܐ ܗ݇ܘܵܐ ܠܹܗ، ܘܐ݇ܡܝܼܪܹܗ، ”ܫܒ݂ܘܿܩܘܼܢ ܕܚܵܙܲܚ ܐܸܢ ܒܸܬ ܐܵܬܹܐ ܐܹܠܝܼܵܐ ܘܡܲܨܠܹܐ ܠܹܗ.“ 37ܡܘܼܩܘܸܚ ܠܹܗ ܝܼܫܘܿܥ ܒܩܵܠܵܐ ܪܵܡܵܐ ܘܣܘܼܦܝܵܐ ܠܹܗ ܪܘܼܚܹܗ. 38ܘܣܸܬܪܵܐ ܕܗܲܝܟܠܵܐ ܦܝܼܫ ܠܹܗ ܦܪܝܼܛܵܐ ܠܬܪܹܝ ܣܵܗܡܹ̈ܐ، ܡ̣ܢ ܠܥܸܠܸܠ ܘܗܲܠ ܠܠܬܸܚܬ.#ܡܦܩܢܐ 26‏:31‏‐33 39ܘܟܲܕ ܚܙܹܐ ܠܹܗ ܪܲܒ ܐܸܡܵܐܐ ܕܟܸܠܝܵܐ ܝܗ݇ܘܵܐ ܠܟܸܣ ܠܹܗ ܕܵܐܟ݂ܝܼ ܡܘܼܩܘܸܚ ܠܹܗ ܝܼܫܘܿܥ ܘܣܘܼܦܝܵܐ ܠܹܗ ܪܘܼܚܹܗ، ܐ݇ܡܝܼܪܹܗ، ”ܫܲܪܝܼܪܵܐܝܼܬ ܐܵܗܵܐ ܐ݇ܢܵܫܵܐ ܒܪܘܿܢܵܐ ܕܐܲܠܵܗܵܐ ܝܗ݇ܘܵܐ.“

40ܐܝܼܬ ܗ݇ܘܵܘ ܐܘܼܦ ܒܲܟ݂ܬܵܬܹ̈ܐ ܒܸܚܝܵܪܵܐ ܡ̣ܢ ܪܸܚܩܵܐ. ܡܸܢܲܝܗܝ ܡܲܪܝܲܡ ܡܲܓ݂ܕܠܵܝܬܵܐ، ܡܲܪܝܲܡ ܝܸܡܵܐ ܕܝܲܥܩܘܿܒ݂ ܙܥܘܿܪܵܐ ܘܕܝܘܿܣܹܐ، ܘܫܵܠܘܿܡ، 41ܐܲܝܢܝܼ ܕܐ݇ܬܹܐ ܠܗܘܿܢ ܒܵܬ݇ܪ ܝܼܫܘܿܥ ܐܝܼܡܲܢ ܕܗ̇ܘ ܓܵܘ ܓܠܝܼܠܵܐ ܝܗ݇ܘܵܐ، ܘܥܵܒ݂ܕܝܼ ܗ݇ܘܵܘ ܚܸܠܡܲܬ ܐܸܠܹܗ. ܘܪܵܒܵܐ ܒܲܟ݂ܬܵܬܹ̈ܐ ܐ݇ܚܹܪ̈݇ܢܹܐ ܕܐ݇ܣܝܼܩ ܠܗܘܿܢ ܥܲܡܹܗ ܠܐܘܿܪܸܫܠܸܡ.

ܩܒ݂ܵܪܬܵܐ ܕܝܼܫܘܿܥ

ܡܬܝ 27‏:57‏‐61؛ ܠܘܩܐ 23‏:50‏‐56؛ ܝܘܚܢܢ 19‏:38‏‐42

42ܘܟܲܕ ܗܘܹܐ ܠܹܗ ܪܲܡܫܵܐ، ܣܵܒܵܒ ܝܼܗ݇ܘܵܐ ܝܵܘܡܵܐ ܕܗܵܕܲܪܬܵܐ، ܕܝܼܠܹܗ ܡ̣ܢ ܩܵܕ݇ܡ ܫܲܒܬܵܐ، 43ܐ݇ܬܹܐ ܠܹܗ ܝܵܘܣܸܦ، ܚܲܕ ܐ݇ܢܵܫܵܐ ܡ̣ܢ ܪܵܡܬܵܐ، ܡܵܠܘܿܟ݂ܵܐ ܡܝܘܼܩܪܵܐ، ܕܒܓܵܢܹܗ ܒܸܣܦܵܪܵܐ ܝܗ݇ܘܵܐ ܠܡܲܠܟܘܼܬܵܐ ܕܐܲܠܵܗܵܐ. ܐܵܗܵܐ ܩܘܼܫܕܸܪܹܗ ܘܥܒ݂ܝܼܪܹܗ ܠܟܸܣ ܦܝܼܠܵܛܘܿܣ ܘܛܠܝܼܒ ܠܹܗ ܦܲܓ݂ܪܵܐ ܕܝܼܫܘܿܥ. 44ܥܘܼܓ̰ܸܒ ܠܹܗ ܦܝܼܠܵܛܘܿܣ ܕܗܲܕܟ݂ܵܐ ܓ̰ܲܠܕܹܐ ܡܝܼܬ ܠܹܗ. ܘܩܪܹܐ ܠܹܗ ܠܪܲܒ ܐܸܡܵܐܐ ܘܒܘܼܩܸܪܹܗ ܡܸܢܹܗ ܕܐܸܢ ܡܝܼܬܵܐ ܝܗ݇ܘܵܐ ܡ̣ܢ ܩܵܕ݇ܡ ܥܕܵܢܵܐ. 45ܡ̣ܢ ܒܵܬ݇ܪ ܕܫܡܝܼܥ ܠܹܗ ܦܝܼܠܵܛܘܿܣ ܡ̣ܢ ܪܲܒ ܐܸܡܵܐܐ، ܝܘܼܗ݇ܒܸܠ ܠܹܗ ܦܲܓ݂ܪܵܐ ܠܝܵܘܣܸܦ. 46ܘܙܒ݂ܝܼܢܹܗ ܝܵܘܣܸܦ ܟܸܬܵܢܵܐ، ܘܡܘܼܨܠܹܐ ܠܹܗ ܠܦܲܓ݂ܪܵܐ ܘܟܘܼܪܡܸܟ݂ ܠܹܗ ܒܟܸܬܵܢܵܐ، ܘܡܘܼܬܸܒ݂ ܠܹܗ ܓܵܘ ܩܲܒ݂ܪܵܐ ܕܢܩܝܼܪܵܐ ܝܗ݇ܘܵܐ ܓܵܘ ܩܵܝܵܐ، ܘܡܘܼܚܕܸܪܹܗ ܟܹܐܦܵܐ ܥܲܠ ܬܲܪܥܵܐ ܕܩܲܒ݂ܪܵܐ، 47ܡܲܪܝܲܡ ܡܲܓ݂ܕܠܵܝܬܵܐ، ܘܡܲܪܝܲܡ ܝܸܡܵܐ ܕܝܘܿܣܹܐ ܚܙܹܐ ܠܗܘܿܢ ܐܲܝܟܵܐ ܦܝܼܫ ܠܹܗ ܡܘܼܬܒ݂ܵܐ.

ទើបបានជ្រើសរើសហើយ៖

ܡܪܩܘܣ 15: ABTAB

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី ܟܬܵܒ݂ܵܐ ܩܲܕܝܼܫܵܐ ܒܠܸܫܵܢܵܐ ܐܵܬܘܿܪܵܝܵܐ