ܡܪܩܘܣ 10

ܩܵܢܘܿܢܵܐ ܒܘܼܬ ܪܲܦܵܝܬܵܐ ܕܒܲܟ݂ܬܵܐ

ܡܬܝ 19‏:1‏‐12

1ܩܝܼܡ ܠܹܗ ܡ̣ܢ ܬܵܡܵܐ ܝܼܫܘܿܥ ܘܐ݇ܬܹܐ ܠܹܗ ܠܬܚܘܼܡܵܐ ܕܝܼܗܘܼܕ، ܠܡܲܪܙܵܐ ܐ݇ܚܹܪ݇ܢܵܐ ܕܝܘܿܪܕܢܵܢ، ܘܐ݇ܙܝܼܠ ܠܗܘܿܢ ܠܟܸܣ ܠܹܗ ܟܸܢܫܹ̈ܐ ܪܵܒܵܐ، ܘܡܲܠܸܦ ܗ݇ܘܵܐ ܠܗܘܿܢ ܡܸܢܕܪܸܫ ܐܲܝܟ݂ ܕܐܝܼܬ ܗ݇ܘܵܐ ܠܹܗ ܥܵܕܲܬ. 2ܩܘܼܪܒܸܢܗܘܿܢ ܠܟܸܣ ܠܹܗ ܦܪ̈ܝܼܫܹܐ ܠܓ̰ܲܪܘܼܒܹܗ، ܘܒܘܼܩܸܪܗܘܿܢ ܡܸܢܹܗ ܐܸܢ ܩܵܢܘܿܢܵܝܬܵܐ ܝܠܵܗ̇ ܕܐ݇ܢܵܫܵܐ ܪܲܦܹܐ ܒܲܟ݂ܬܹܗ. 3ܒܘܼܩܸܪܹܗ ܡܸܢܲܝܗܝ ܝܼܫܘܿܥ، ”ܡܘܿܕܝܼ ܦܩܝܼܕ ܠܹܗ ܐܸܠܵܘܟ݂ܘܿܢ ܡܘܼܫܹܐ؟“ 4ܘܐܵܢܝܼ ܓ̰ܘܼܘܸܒ ܠܗܘܿܢ، ”ܡܘܼܫܹܐ ܝܘܼܗ݇ܒܸܠ ܠܹܗ ܦܣܵܣܵܐ ܐܸܠܲܢ ܕܟܵܬܒܲܚ ܟܬܵܒ݂ܵܐ ܕܕܘܼܠܵܠܵܐ ܘܪܲܦܲܚ.“#ܬܢܝܢ ܢܡܘܣܐ 24‏:1‏‐4 5ܓ̰ܘܼܘܸܒ ܠܹܗ ܐܸܠܲܝܗܝ ܝܼܫܘܿܥ، ܒܹܐܡܵܪܵܐ، ”ܡܘܼܫܹܐ ܒܘܼܬ ܩܸܫܝܘܼܬܵܐ ܕܠܸܒܵܘܟ݂ܘܿܢ ܟܬܝܼܒ݂ ܠܹܗ ܐܸܠܵܘܟ݂ܘܿܢ ܐܵܗܵܐ ܦܘܼܩܕܵܢܵܐ. 6”ܐܝܼܢܵܐ ܡ̣ܢ ܫܘܼܪܵܝܵܐ ܕܒܪܝܼܬܵܐ ܐܘܼܪܙܵܐ ܘܢܸܩܒ݂ܵܐ ܒܸܪܝܲܝ ܠܹܗ ܐܲܠܵܗܵܐ.#ܒܪܝܬܐ 1‏:27 7”ܒܘܼܬ ܐܵܗܵܐ ܒܸܬ ܫܵܒܹܩ ܓܲܒ݂ܪܵܐ ܠܒܵܒܘܼܗܝ ܘܠܝܸܡܹܗ ܘܒܸܬ ܬܵܒܹܥ ܠܒܲܟ݂ܬܹܗ. 8”ܘܬܸܪܘܲܝܗܝ ܒܸܬ ܗܵܘܝܼ ܚܲܕ ܦܲܓ݂ܪܵܐ،#ܒܪܝܬܐ 2‏:24 ܣܵܒܵܒ ܐ݇ܚܹܪ݇ܢܵܐ ܠܹܐ ܝܢܵܐ ܬܪܹܝ ܐܸܠܵܐ ܚܲܕ ܦܲܓ݂ܪܵܐ ܝܢܵܐ. 9”ܗܲܕܟ݂ܵܐ ܡܸܢܕܝܼ ܕܐܲܠܵܗܵܐ ܙܘܼܘܸܓ ܠܹܗ، ܒܲܪܢܵܫܵܐ ܠܵܐ ܦܵܪܹܫ ܠܹܗ.“

10ܐܝܼܡܲܢ ܕܝܼܗ݇ܘܵܘ ܓܵܘ ܒܲܝܬܵܐ، ܒܘܼܩܸܪܗܘܿܢ ܬܲܠܡܝܼܕܘܼ̈ܗܝ ܡܸܢܹܗ ܒܘܼܬ ܐܵܗܵܐ. 11ܐ݇ܡܝܼܪܹܗ ܐܸܠܲܝܗܝ ܝܼܫܘܿܥ، ”ܟܠ ܡ̇ܢ ܕܪܲܦܹܐ ܒܲܟ݂ܬܹܗ ܘܓܵܒܹܪ ܚܕܵܐ ܐ݇ܚܹܪ݇ܬܵܐ، ܒܸܥܒ݂ܵܕܵܐ ܝܠܹܗ ܓܲܝܵܪܘܼܬܵܐ. 12”ܘܐܸܢ ܒܲܟ݂ܬܵܐ ܪܲܦܝܵܐ ܓܲܒ݂ܪܘܼܗ̇ ܘܓܵܒ݂ܪܵܐ ܚܲܕ ܐ݇ܚܹܪ݇ܢܵܐ ܒܸܥܒ݂ܵܕܵܐ ܝܠܵܗ̇ ܓܲܝܵܪܘܼܬܵܐ.“

ܝܼܫܘܿܥ ܡܫܝܼܚܵܐܒܲܪܘܼܟܹܐ ܝܵܠܹ̈ܕ݇ܐ ܙܥܘܿܪܹ̈ܐ

ܡܬܝ 19‏:13‏‐15؛ ܠܘܩܐ 18‏:15‏‐17

13ܡܘܼܐܬܹܐ ܠܗܘܿܢ ܐ݇ܢܵܫܹ̈ܐ ܝܵܠܹ̈ܕ݇ܐ ܙܥܘܿܪܹ̈ܐ ܠܟܸܣ ܝܼܫܘܿܥ ܕܡܲܬܸܒ݂ ܗ݇ܘܵܐ ܐܝܼܕܹܗ ܥܲܠܲܝܗܝ، ܐܝܼܢܵܐ ܬܲܠܡܝܼܕܘܼ̈ܗܝ ܢܓ̰ܝܼܘ ܠܗܘܿܢ ܒܐܵܢܝܼ ܕܡܲܝܬܘܼܝܲܝ ܝܗ݇ܘܵܘ. 14ܐܝܼܡܲܢ ܕܚܙܹܐ ܠܹܗ ܝܼܫܘܿܥ ܬܲܠܡܝܼܕܘܼ̈ܗܝ ܗܲܕܟ݂ܵܐ ܒܸܥܒ݂ܵܕܵܐ، ܟܪܝܼܒ ܠܹܗ ܘܐ݇ܡܝܼܪܹܗ ܐܸܠܲܝܗܝ، ”ܫܒ݂ܘܿܩܘܼܢ ܝܵܠܹ̈ܕ݇ܐ ܙܥܘܿܪܹ̈ܐ ܐܵܬܝܼ ܠܟܸܣ ܠܝܼ ܘܠܵܐ ܡܲܟܠܹܝܬܘܿܢ ܠܗܘܿܢ، ܣܵܒܵܒ ܕܝܼܲܝܗܝ ܝܠܵܗ̇ ܡܲܠܟܘܼܬܵܐ ܕܐܲܠܵܗܵܐ. 15”ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܟܠ ܡ̇ܢ ܕܠܵܐ ܩܲܒܸܠ ܡܲܠܟܘܼܬܵܐ ܕܐܲܠܵܗܵܐ ܡܐܲܝܟ݂ ܚܲܕ ܝܵܠܵܕ݇ܐ ܙܥܘܿܪܵܐ ܕܟܹܐ ܩܲܒܸܠ ܠܵܗ̇، ܠܹܐ ܥܵܒܹܪ ܓܵܘܘܼܗ̇.“ 16ܘܫܩܝܼܠܲܝ ܠܹܗ ܓܵܘ ܕܪ̈ܲܥܢܵܢܘܼܗܝ ܘܡܘܼܬܸܒ݂ ܠܹܗ ܐܝܼܕܹܗ ܥܲܠܲܝܗܝ ܘܒܘܼܪܟܲܝ ܠܹܗ.

ܥܠܲܝܡܵܐ ܥܲܬܝܼܪܵܐ

ܡܬܝ 19‏:16‏‐30؛ ܠܘܩܐ 18‏:18‏‐30

17ܟܲܕ ܒܹܐܙܵܠܵܐ ܝܗ݇ܘܵܐ ܝܼܫܘܿܥ ܒܐܘܼܪܚܵܐ، ܪܚܝܼܛ ܠܹܗ ܚܲܕ ܐ݇ܢܵܫܵܐ ܘܒܪܝܼܟ ܠܹܗ ܩܵܕ݇ܡܘܼܗܝ ܘܒܘܼܩܸܪܹܗ ܡܸܢܹܗ، ”ܡܲܠܦܵܢܵܐ ܛܵܒ݂ܵܐ، ܡܘܿܕܝܼ ܥܵܒ݂ܕܹܢ ܕܝܵܪܬܹܢ ܚܲܝܹ̈ܐ ܕܠܥܵܠܲܡ؟“ 18ܓ̰ܘܼܘܸܒ ܠܹܗ ܐܸܠܹܗ ܝܼܫܘܿܥ، ”ܩܵܡܘܿܕܝܼ ܒܸܩܪܵܝܝܼ ܝܘܸܬ ܛܵܒ݂ܵܐ؟ ܠܲܝܬ ܛܵܒ݂ܵܐ ܐܸܠܵܐ ܐܲܠܵܗܵܐ ܐܲܚܟ̰ܝܼ. 19”ܦܘܼܩܕܵܢܹ̈ܐ ܟܹܐ ܝܵܕܥܹܬ، ܠܵܐ ܙܵܢܹܝܬ، ܠܵܐ ܓܵܢܒܹܬ، ܠܵܐ ܩܵܛܠܹܬ، ܠܵܐ ܝܵܗ݇ܒܹܬ ܣܵܗܕܘܼܬܵܐ ܕܕܘܼܓܠܵܐ، ܠܵܐ ܛܵܠܡܹܬ، ܡܝܲܩܸܪ ܠܒܵܒܘܼܟ݂ ܘܠܝܸܡܘܼܟ݂.“#ܡܦܩܢܐ 20‏:12‏‐16؛ ܬܢܝܢ ܢܡܘܣܐ 5‏:16‏‐20 20ܗ̇ܘ ܓ̰ܘܼܘܸܒ ܠܹܗ ܘܐ݇ܡܝܼܪܹܗ ܐܸܠܹܗ، ”ܡܲܠܦܵܢܵܐ، ܐܲܢܹܐ ܟܠܲܝܗܝ ܢܛܝܼܪܲܝ ܝܘܸܢ ܡ̣ܢ ܝܵܠܕ݇ܘܼܬܝܼ.“ 21ܐܝܼܢܵܐ ܚܝܼܪܹܗ ܒܝܼܹܗ ܝܼܫܘܿܥ، ܘܡܘܼܚܸܒ ܠܹܗ، ܘܐ݇ܡܝܼܪܹܗ ܐܸܠܹܗ، ”ܚܲܕ ܡܸܢܕܝܼ ܒܵܨܘܿܪܵܐ ܝܠܹܗ ܐܸܠܘܼܟ݂. ܙܹܠ݇ ܙܲܒܸܢ ܟܠ ܡܸܢܕܝܼ ܕܐܝܼܬ ܠܘܼܟ݂ ܘܗܲܒ݂݇ܠ ܠܹܗ ܠܡܸܣܟܹܢܹ̈ܐ، ܘܒܸܬ ܗܵܘܹܐ ܠܘܼܟ݂ ܣܝܼܡܬܵܐ ܒܫܡܲܝܵܐ، ܘܫܩܘܿܠ ܙܩܝܼܦܘܼܟ݂، ܘܬܵܐ ܒܵܬ݇ܪܝܼ.“ 22ܐܝܼܢܵܐ ܗ̇ܘ ܦܫܝܼܡ ܠܹܗ ܒܐܵܗܵܐ ܗܹܡܸܙܡܵܢ، ܘܐ݇ܙܝܼܠ ܠܹܗ ܚܲܫܵܢܵܐ ܣܵܒܵܒ ܐܝܼܬ ܗ݇ܘܵܐ ܠܹܗ ܥܘܼܬܪܵܐ ܪܵܒܵܐ.

23ܗ̇ܝܓܵܗ ܚܝܼܪܹܗ ܝܼܫܘܿܥ ܒܬܲܠܡܝܼܕܘܼ̈ܗܝ ܘܐ݇ܡܝܼܪܹܗ ܐܸܠܲܝܗܝ، ”ܟܡܵܐ ܥܲܣܩܵܐ ܝܠܵܗ̇ ܠܐܵܢܝܼ ܕܐܝܼܬ ܠܗܘܿܢ ܥܘܼܬܪܵܐ ܕܥܵܒ݂ܪܝܼ ܠܡܲܠܟܘܼܬܵܐ ܕܐܲܠܵܗܵܐ.“ 24ܐܝܼܢܵܐ ܬܲܠܡܝܼ̈ܕܹܐ ܥܘܼܓ̰ܸܒ ܠܗܘܿܢ ܥܲܠ ܗܹܡܸܙܡܵܢܘܼ̈ܗܝ. ܓ̰ܘܼܘܸܒ ܠܹܗ ܝܼܫܘܿܥ ܡܸܢܕܪܸܫ ܘܐ݇ܡܝܼܪܹܗ ܐܸܠܲܝܗܝ، ”ܒܢܘܿܢܝܼ̈، ܟܡܵܐ ܥܲܣܩܵܐ ܝܠܵܗ̇ ܠܐܵܢܝܼ ܕܝܼܢܵܐ ܒܗܹܒ݂ܝܼ ܥܲܠ ܥܘܼܬܪܲܝܗܝ ܕܥܵܒ݂ܪܝܼ ܠܡܲܠܟܘܼܬܵܐ ܕܐܲܠܵܗܵܐ. 25”ܒܘܼܫ ܦܫܝܼܛܬܵܐ ܝܠܵܗ̇ ܠܓܘܼܡܠܵܐ ܕܥܵܒ݂ܪܵܐ ܒܢܸܩܒܵܐ ܕܚܡܵܛܵܐ ܡ̣ܢ ܕܥܲܬܝܼܪܵܐ ܥܵܒܹܪ ܠܡܲܠܟܘܼܬܵܐ ܕܐܲܠܵܗܵܐ.“ 26ܘܬܲܠܡܝܼ̈ܕܹܐ ܒܘܼܫ ܙܵܘܕܵܐ ܥܘܼܓ̰ܸܒ ܠܗܘܿܢ ܘܐܵܡܪܝܼ ܗ݇ܘܵܘ ܒܹܝܠܲܝܗܝ، ”ܒܲܣ ܡܵܢܝܼ ܡܵܨܹܐ ܦܵܪܹܩ؟“ 27ܐܝܼܢܵܐ ܝܼܫܘܿܥ ܚܝܼܪܹܗ ܒܝܼܲܝܗܝ ܘܐ݇ܡܝܼܪܹܗ، ”ܒܲܪܢܵܫܵܐ ܠܹܐ ܡܵܨܹܐ ܥܵܒܹܕ ܐܵܗܵܐ، ܐܝܼܢܵܐ ܐܲܠܵܗܵܐ ܡܵܨܹܐ ܥܵܒܹܕ ܟܠ ܡܸܢܕܝܼ.“ 28ܓ̰ܘܼܘܸܒ ܠܹܗ ܫܸܡܥܘܿܢ ܟܹܐܦܵܐ ܘܐ݇ܡܝܼܪܹܗ ܐܸܠܹܗ، ”ܗܵܐ ܐܲܚܢܲܢ ܫܒ݂ܝܼܩ ܠܲܢ ܟܠ ܡܸܢܕܝܼ ܘܐ݇ܬܹܐ ܠܲܢ ܒܵܬ݇ܪܘܼܟ݂.“ 29ܓ̰ܘܼܘܸܒ ܠܹܗ ܝܼܫܘܿܥ ܘܐ݇ܡܝܼܪܹܗ، ”ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܟܠ ܐ݇ܢܵܫܵܐ ܕܫܵܒܹܩ ܒܲܝܬܵܐ، ܝܲܢ ܐܲܚܘܿܢܘܵܬܹ̈ܐ ܝܲܢ ܚܵܬܘܵܬܹ̈ܐ، ܝܲܢ ܒܵܒܵܐ ܝܲܢ ܝܸܡܵܐ، ܝܲܢ ܒܲܟ݂ܬܵܐ ܝܲܢ ܒܢܘܿܢܹ̈ܐ، ܝܲܢ ܚܲܩܠܵܢܹ̈ܐ، ܒܘܼܬ ܕܝܼܝܼ ܘܒܘܼܬ ܐܹܘܲܢܓܲܠܝܼܘܿܢ، 30”ܒܸܬ ܩܲܒܸܠ ܚܲܕ ܒܐܸܡܵܐܐ ܐܵܕܝܼܵܐ ܒܐܵܗܵܐ ܙܲܒ݂ܢܵܐ، ܒܵܬܹ̈ܐ ܘܐܲܚܘܿܢܘܵܬܹ̈ܐ ܘܚܵܬܘܵܬܹ̈ܐ، ܘܝܸܡܵܬܹ̈ܐ ܘܒܢܘܿܢܹ̈ܐ، ܘܚܲܩܠܵܢܹ̈ܐ، ܥܲܡ ܪܕܘܼܦܝܵܐ، ܘܒܙܲܒ݂ܢܵܐ ܕܐܵܬܹܐ ܚܲܝܹ̈ܐ ܕܠܥܵܠܲܡ. 31”ܪܵܒܵܐ ܕܝܼܢܵܐ ܩܲܕ݇ܡܵܝܹ̈ܐ ܒܸܬ ܗܵܘܝܼ ܐ݇ܚܵܪ̈ܵܝܹܐ، ܘܐ݇ܚܵܪ̈ܵܝܹܐ ܒܸܬ ܗܵܘܝܼ ܩܲܕ݇ܡܵܝܹ̈ܐ.“

ܓܵܗܵܐ ܕܚܲܪܬܵܐ ܝܼܫܘܿܥ ܡܲܚܒܘܼܪܹܐ ܒܘܼܬ ܡܵܘܬܹܗ

ܡܬܝ 20‏:17‏‐19؛ ܠܘܩܐ 18‏:31‏‐34

32ܟܲܕ ܒܹܐܣܵܩܵܐ ܝܗ݇ܘܵܘ ܒܐܘܼܪܚܵܐ ܠܐܘܿܪܸܫܠܸܡ، ܘܝܼܫܘܿܥ ܒܹܐܙܵܠܵܐ ܝܗ݇ܘܵܐ ܩܵܕ݇ܡܲܝܗܝ، ܥܲܓ̰ܒܝܼ ܗ݇ܘܵܘ ܬܲܠܡܝܼܕܘܼ̈ܗܝ، ܘܙܵܕܥܝܼ ܗ݇ܘܵܘ ܐܵܢܝܼ ܕܐܵܙܠ݇ܝܼ ܗ݇ܘܵܘ ܒܵܬ݇ܪܹܗ. ܘܠܘܼܒܸܠ ܠܹܗ ܠܬܪܸܥܣܲܪ ܠܚܲܕ ܓܹܒܵܐ ܘܫܘܼܪܹܐ ܠܹܗ ܠܹܐܡܵܪܵܐ ܐܸܠܲܝܗܝ ܡܸܢܕܝܼ ܕܗܕܝܼܪܵܐ ܝܗ݇ܘܵܐ ܕܩܲܘܸܡ ܗ݇ܘܵܐ ܐܸܠܹܗ. 33ܐ݇ܡܝܼܪܹܗ، ”ܗܵܐ ܒܹܐܣܵܩܵܐ ܝܘܲܚ ܠܐܘܿܪܸܫܠܸܡ، ܘܒܪܘܿܢܵܐ ܕܐ݇ܢܵܫܵܐ ܒܸܬ ܦܵܐܹܫ ܣܘܼܦܝܵܐ ܠܓܘܼܪ̈ܵܢܹܐ ܕܟܵܗܢܹ̈ܐ ܘܠܣܵܦܪܹ̈ܐ، ܘܒܸܬ ܕܵܝܢܝܼ ܠܹܗ ܠܡܵܘܬܵܐ ܘܒܸܬ ܣܲܦܝܼ ܠܹܗ ܠܐܸܡܘܵܬܹ̈ܐ، 34”ܘܐܵܢܝܼ ܒܸܬ ܡܲܣܚܸܪܝܼ ܒܝܼܹܗ ܘܡܵܚܝܼ ܠܹܗ ܒܫܵܘܛܹ̈ܐ ܘܪܵܝܩܝܼ ܥܲܠܘܼܗܝ ܘܩܵܛܠܝܼ ܠܹܗ. ܘܒܝܵܘܡܵܐ ܕܬܠܵܬܵܐ ܒܸܬ ܩܵܐܹܡ.“

ܒܵܥܘܼܬܵܐ ܕܒܢܘܿܢܹ̈ܐ ܕܙܲܒ݂ܕܲܝ

ܡܬܝ 20‏:20‏‐28

35ܘܐ݇ܬܹܐ ܠܗܘܿܢ ܠܟܸܣ ܠܹܗ ܝܲܥܩܘܿܒ݂ ܘܝܘܿܚܲܢܵܢ، ܒܢܘܿܢܹ̈ܐ ܕܙܲܒ݂ܕܲܝ، ܘܐ݇ܡܝܼܪܗܘܿܢ ܐܸܠܹܗ، ”ܡܲܠܦܵܢܵܐ، ܒܵܥܲܚ ܕܥܵܒ݂ܕܹܬ ܐܸܠܲܢ ܟܠ ܡܸܢܕܝܼ ܕܛܵܠܒܲܚ ܡܸܢܘܼܟ݂.“ 36ܒܘܼܩܸܪܹܗ ܡܸܢܲܝܗܝ ܝܼܫܘܿܥ، ”ܡܘܿܕܝܼ ܒܵܥܹܝܬܘܿܢ ܕܥܵܒ݂ܕܹܢ ܐܸܠܵܘܟ݂ܘܿܢ؟“ 37ܓ̰ܘܼܘܸܒ ܠܗܘܿܢ ܐܸܠܹܗ، ”ܒܵܥܲܚ ܕܚܲܕ ܡܸܢܲܢ ܝܵܬܹܒ݂ ܡ̣ܢ ܝܲܡܝܼܢܘܼܟ݂ ܘܚܲܕ ܡ̣ܢ ܣܸܡܵܠܘܼܟ݂، ܒܚܸܩܪܘܼܟ݂.“ 38ܐܝܼܢܵܐ ܗ̇ܘ ܓ̰ܘܼܘܸܒ ܠܹܗ ܘܐ݇ܡܝܼܪܹܗ ܐܸܠܲܝܗܝ، ”ܠܹܐ ܝܬܘܿܢ ܒܝܼܕܵܥܵܐ ܡܘܿܕܝܼ ܒܸܛܠܵܒܵܐ ܝܬܘܿܢ. ܡܵܨܹܝܬܘܿܢ ܫܵܬܹܝܬܘܿܢ ܟܵܣܵܐ ܕܐܵܢܵܐ ܫܵܬܹܝܢܹܗ، ܘܡܲܥܡܘܿܕܝܼܬܵܐ ܕܒܝܼܘܼܗ̇ ܦܵܝܫܹܢ ܥܡܝܼܕܵܐ، ܥܵܡܕܝܼܬܘܿܢ؟“ 39ܐܵܢܝܼ ܓ̰ܘܼܘܸܒ ܠܗܘܿܢ ܐܸܠܹܗ، ”ܗܹܐ، ܟܹܐ ܡܵܨܲܚ.“ ܐ݇ܡܝܼܪܹܗ ܐܸܠܲܝܗܝ ܝܼܫܘܿܥ، ”ܟܵܣܵܐ ܕܫܵܬܹܝܢܹܗ ܒܸܬ ܫܵܬܹܝܬܘܿܢ، ܘܡܲܥܡܘܿܕܝܼܬܵܐ ܕܒܝܼܘܼܗ̇ ܦܵܝܫܹܢ ܥܡܝܼܕܵܐ، ܒܸܬ ܥܵܡܕܝܼܬܘܿܢ، 40”ܐܝܼܢܵܐ ܝ݇ܬܵܒ݂ܬܵܐ ܡ̣ܢ ܝܲܡܝܼܢܝܼ ܘܡ̣ܢ ܣܸܡܵܠܝܼ ܠܹܐ ܝܠܵܗ̇ ܕܐܵܢܵܐ ܝܵܗ݇ܒܹܢܵܗ̇، ܐܸܠܵܐ ܒܸܬ ܦܵܝܫܵܐ ܝܘܼܗ݇ܒܸܠܬܵܐ ܠܐܵܢܝܼ ܕܦܝܼܫܬܵܐ ܝܠܵܗ̇ ܗܘܼܕܸܪܬܵܐ ܩܵܬܲܝܗܝ.“

41ܐܝܼܡܲܢ ܕܫܡܝܼܥ ܠܗܘܿܢ ܥܸܣܪܵܐ ܬܲܠܡܝܼ̈ܕܹܐ ܐ݇ܚܹܪ̈݇ܢܹܐ، ܟܪܝܼܒ ܠܗܘܿܢ ܥܲܠ ܝܲܥܩܘܿܒ݂ ܘܝܘܿܚܲܢܵܢ. 42ܐܝܼܢܵܐ ܝܼܫܘܿܥ ܩܸܪܝܲܝ ܠܹܗ ܘܐ݇ܡܝܼܪܹܗ ܐܸܠܲܝܗܝ، ”ܟܹܐ ܝܵܕܥܝܼܬܘܿܢ ܐܵܢܝܼ ܕܚܵܫܒ݂ܝܼ ܕܓܘܼܪ̈ܵܢܹܐ ܕܐܸܡܘܵܬܹ̈ܐ ܝܢܵܐ ܟܹܐ ܥܵܒ݂ܕܝܼ ܡܵܪܘܼܬܵܐ، ܘܓܘܼܪ̈ܵܢܲܝܗܝ ܟܹܐ ܥܵܒ݂ܕܝܼ ܫܘܼܠܛܵܢܵܐ ܥܲܠܲܝܗܝ؟ 43”ܐܝܼܢܵܐ ܐܵܗܵܐ ܡܸܢܕܝܼ ܠܵܐ ܗܵܘܹܐ ܓܵܘܵܘܟ݂ܘܿܢ. ܡ̇ܢ ܕܒܵܥܹܐ ܗܵܘܹܐ ܓܘܼܪܵܐ ܓܵܘܵܘܟ݂ܘܿܢ، ܗܵܘܹܐ ܥܵܒ݂ܕܵܢܵܐ ܕܚܸܠܡܲܬ ܐܸܠܵܘܟ݂ܘܿܢ، 44”ܘܡ̇ܢ ܕܒܵܥܹܐ ܡܸܢܵܘܟ݂ܘܿܢ ܗܵܘܹܐ ܩܵܕ݇ܡܵܝܵܐ، ܗܵܘܹܐ ܥܲܒ݂ܕܵܐ ܕܟܠܲܝܗܝ. 45”ܣܵܒܵܒ ܐܘܼܦ ܒܪܘܿܢܵܐ ܕܐ݇ܢܵܫܵܐ ܠܵܐ ܐ݇ܬܹܐ ܠܹܗ ܕܐ݇ܢܵܫܹ̈ܐ ܥܵܒ݂ܕܝܼ ܠܹܗ ܚܸܠܡܲܬ، ܐܸܠܵܐ ܕܗ̇ܘ ܥܵܒܹܕ ܚܸܠܡܲܬ ܠܐ݇ܢܵܫܹ̈ܐ ܘܕܝܲܗ݇ܒܸܠ ܓܵܢܹܗ ܕܸܒ݂ܚܵܐ ܕܦܘܼܪܩܵܢܵܐ ܡ̣ܢ ܓܹܒܵܐ ܕܪܵܒܵܐ.“

ܒܵܣܲܡܬܵܐ ܕܚܲܕ ܣܸܡܝܵܐ

ܡܬܝ 20‏:29‏‐34؛ ܠܘܩܐ 18‏:35‏‐43

46ܘܐ݇ܬܹܐ ܠܗܘܿܢ ܠܐܝܼܪܝܼܚܘܿ. ܘܐܝܼܡܲܢ ܕܦܠܝܼܛ ܠܹܗ ܝܼܫܘܿܥ ܡ̣ܢ ܐܝܼܪܝܼܚܘܿ ܥܲܡ ܬܲܠܡܝܼܕܘܼ̈ܗܝ ܘܟܸܢܫܵܐ ܪܵܒܵܐ، ܚܲܕ ܣܸܡܝܵܐ ܫܸܡܹܗ ܛܝܼܡܲܝ، ܒܪܘܿܢܵܐ ܕܛܝܼܡܲܝ، ܝ݇ܬܝܼܒ݂ܵܐ ܝܗ݇ܘܵܐ ܥܲܠ ܡܲܪܙܵܐ ܕܐܘܼܪܚܵܐ ܘܒܸܓܒ݂ܵܝܵܐ. 47ܐܝܼܡܲܢ ܕܫܡܝܼܥ ܠܹܗ ܕܝܼܫܘܿܥ ܢܵܨܪܵܝܵܐ ܝܗ݇ܘܵܐ، ܫܘܼܪܹܐ ܠܹܗ ܠܡܲܩܘܘܼܚܹܐ ܘܠܹܐܡܵܪܵܐ، ”ܒܪܘܿܢܵܐ ܕܕܵܘܝܼܕ، ܪܲܚܸܡ ܥܲܠܝܼ.“ 48ܪܵܒܵܐ ܐ݇ܢܵܫܹ̈ܐ ܢܓ̰ܝܼܘ ܠܗܘܿܢ ܒܝܼܹܗ ܕܫܵܬܹܩ ܗ݇ܘܵܐ، ܐܝܼܢܵܐ ܗ̇ܘ ܒܘܼܫ ܙܵܘܕܵܐ ܡܘܼܩܘܸܚ ܠܹܗ، ”ܒܪܘܿܢܵܐ ܕܕܵܘܝܼܕ، ܪܲܚܸܡ ܥܲܠܝܼ.“ 49ܟܠܹܐ ܠܹܗ ܝܼܫܘܿܥ ܘܦܩܝܼܕ ܠܹܗ ܕܡܲܝܬܝܼ ܠܹܗ ܠܟܸܣ ܠܹܗ. ܘܩܪܹܐ ܠܗܘܿܢ ܠܗ̇ܘ ܣܸܡܝܵܐ ܘܐ݇ܡܝܼܪܗܘܿܢ ܐܸܠܹܗ، ”ܗܘܝܼ ܠܸܒܵܢܵܐ، ܩܘܼܡ، ܒܸܩܪܵܝܘܼܟ݂ ܝܼܠܹܗ.“ 50ܘܗ̇ܘ ܣܸܡܝܵܐ ܪܘܼܦܝܵܐ ܠܹܗ ܠܒ݂ܝܼܫܬܹܗ ܘܩܝܼܡ ܠܹܗ ܘܐ݇ܙܝܼܠ ܠܹܗ ܠܟܸܣ ܝܼܫܘܿܥ. 51ܒܘܼܩܸܪܹܗ ܡܸܢܹܗ ܝܼܫܘܿܥ، ”ܡܘܿܕܝܼ ܒܵܥܹܝܬ ܕܥܵܒ݂ܕܹܢ ܐܸܠܘܼܟ݂؟“ ܓ̰ܘܼܘܸܒ ܠܹܗ ܗ̇ܘ ܣܸܡܝܵܐ، ܒܹܐܡܵܪܵܐ، ”ܪܲܒܝܼ، ܒܵܥܹܝܢ ܕܚܵܙܹܝܢ.“ 52ܐ݇ܡܝܼܪܹܗ ܐܸܠܹܗ ܝܼܫܘܿܥ، ”ܙܹܠ݇، ܗܲܝܡܵܢܘܼܬܘܼܟ݂ ܩܲܡ ܒܵܣܡܵܐ ܠܘܼܟ݂.“ ܘܗܲܪ ܒܗ̇ܝ ܥܕܵܢܵܐ ܚܙܹܐ ܠܹܗ ܘܐ݇ܙܝܼܠ ܠܹܗ ܒܵܬ݇ܪܹܗ ܒܐܘܼܪܚܵܐ.

ទើបបានជ្រើសរើសហើយ៖

ܡܪܩܘܣ 10: ABTAB

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី ܟܬܵܒ݂ܵܐ ܩܲܕܝܼܫܵܐ ܒܠܸܫܵܢܵܐ ܐܵܬܘܿܪܵܝܵܐ