ܠܘܩܐ 14

ܝܼܫܘܿܥ ܒܲܣܘܼܡܹܐ ܒܫܲܒܬܵܐ

1ܥܒ݂ܝܼܪܹܗ ܝܼܫܘܿܥ ܠܒܲܝܬܵܐ ܕܚܲܕ ܡ̣ܢ ܓܘܼܪ̈ܵܢܹܐ ܕܦܪ̈ܝܼܫܹܐ ܕܐܵܟܹܠ ܗ݇ܘܵܐ ܠܲܚܡܵܐ ܒܝܵܘܡܵܐ ܕܫܲܒܬܵܐ، ܘܐܵܢܝܼ ܢܵܛܪܝܼ ܗ݇ܘܵܘ ܐܸܠܹܗ. 2ܘܐܝܼܬ ܗ݇ܘܵܐ ܬܵܡܵܐ ܩܵܕ݇ܡܘܼܗܝ ܚܲܕ ܐ݇ܢܵܫܵܐ ܡܪܝܼܥܵܐ، ܙܝܼܪܵܐ ܡ̣ܢ ܡ̈ܝܼܵܐ. 3ܒܘܼܩܸܪܹܗ ܝܼܫܘܿܥ ܡ̣ܢ ܢܵܡܘܿܣܵܝܹ̈ܐ ܘܦܪ̈ܝܼܫܹܐ ܘܐ݇ܡܝܼܪܹܗ، ”ܩܵܢܘܿܢܵܝܬܵܐ ܝܠܵܗ̇ ܠܒܲܣܘܼܡܹܐ ܒܝܵܘܡܵܐ ܕܫܲܒܬܵܐ ܝܲܢ ܠܵܐ؟“ 4ܐܝܼܢܵܐ ܐܵܢܝܼ ܫܬܝܼܩ ܠܗܘܿܢ. ܕܒ݂ܝܼܩ ܠܹܗ ܘܒܘܼܣܸܡ ܠܹܗ، ܘܫܒ݂ܝܼܩ ܠܹܗ ܕܐܵܙܹܠ. 5ܘܐ݇ܡܝܼܪܹܗ ܐܸܠܲܝܗܝ ܝܼܫܘܿܥ، ”ܐܲܝܢܝܼ ܡܸܢܵܘܟ݂ܘܿܢ ܐܸܢ ܢܵܦܹܠ ܒܪܘܿܢܹܗ ܝܲܢ ܬܵܘܪܹܗ ܓܵܘ ܒܹܐܪܵܐ ܒܝܵܘܡܵܐ ܕܫܲܒܬܵܐ، ܠܹܐ ܦܲܠܸܛ ܠܹܗ ܗܲܪ ܒܗ̇ܝ ܥܕܵܢܵܐ؟“ 6ܘܠܵܐ ܡܨܹܐ ܠܗܘܿܢ ܓ̰ܲܘܸܒܝܼ ܐܸܠܹܗ ܒܘܼܬ ܐܵܗܵܐ.

ܒܘܼܬ ܡܲܪܲܡܬܵܐܘܡܲܟܲܦܬܵܐ ܕܓܵܢܵܐ

7ܐ݇ܡܝܼܪܹܗ ܐܵܗܵܐ ܡܲܬܠܵܐ ܠܐܵܢܝܼ ܕܝܼܗ݇ܘܵܘ ܟ̰ܝܼܕܹܐ، ܣܵܒܵܒ ܒܸܚܙܵܝܵܐ ܝܗ݇ܘܵܐ ܕܵܐܟ݂ܝܼ ܓܲܒܘܼܝܹܐ ܝܗ݇ܘܵܘ ܕܘܼܟܵܢܹ̈ܐ ܒܪܹܫܵܐ ܕܡܸܫܬܘܼܝܵܬܹ̈ܐ. ܐ݇ܡܝܼܪܹܗ ܐܸܠܲܝܗܝ، 8”ܐܝܼܡܲܢ ܕܦܵܝܫܹܬ ܟ̰ܝܼܕܵܐ ܠܚܠܘܼܠܵܐ ܒܝܲܕ ܐ݇ܢܵܫܵܐ، ܠܵܐ ܝܵܬܒܹܬ ܒܪܹܫܵܐ ܕܡܸܫܬܘܼܬܵܐ، ܕܠܵܐ ܗܵܘܝܵܐ ܚܲܕ ܐ݇ܚܹܪ݇ܢܵܐ ܒܘܼܫ ܡܵܪܹܐ ܐܝܼܩܵܪܵܐ ܡܸܢܘܼܟ݂ ܦܵܐܹܫ ܟ̰ܝܼܕܵܐ ܬܵܡܵܐ، 9”ܘܐܵܬܹܐ ܗ̇ܘ ܕܝܼܠܹܗ ܟ̰ܝܼܕܵܘܟ݂ܘܿܢ ܘܐܵܡܹܪ ܐܸܠܘܼܟ݂، ’ܗܲܒ݂݇ܠ ܕܘܼܟܘܼܟ݂ ܩܵܐ ܐܵܗܵܐ،‘ ܗ̇ܝܓܵܗ ܒܢܟ݂ܝܼܦܬܵܐ ܒܸܬ ܝܵܬܒܹܬ ܒܕܘܼܟܵܐ ܐ݇ܚܹܪ݇ܬܵܐ. 10”ܐܝܼܡܲܢ ܕܦܵܝܫܹܬ ܟ̰ܝܼܕܵܐ، ܙܹܠ݇ ܘܝ݇ܬܘܿܒ݂ ܒܚܲܪܬܵܐ ܕܟܠܲܝܗܝ، ܘܐܝܼܡܲܢ ܕܐܵܬܹܐ ܗ̇ܘ ܕܟ̰ܝܼܕܘܼܟ݂ ܝܼܠܹܗ، ܒܸܬ ܐܵܡܹܪ ܐܸܠܘܼܟ݂، ’ܚܲܒ݂ܪܝܼ، ܐ݇ܣܘܿܩ ܠܥܸܠܸܠ.‘ ܗ̇ܝܓܵܗ ܒܸܬ ܗܵܘܹܐ ܠܘܼܟ݂ ܐܝܼܩܵܪܵܐ ܩܵܕ݇ܡ ܟܠܲܝܗܝ ܐܵܢܝܼ ܕܝ݇ܬܝܼܒܹܐ ܝܢܵܐ ܠܨܘܼܦܪܵܐ ܥܲܡܘܼܟ݂.#ܡܬܠ̈ܐ 25‏:6‏‐7 11”ܣܵܒܵܒ ܟܠ ܕܡܲܪܸܡ ܓܵܢܹܗ ܒܸܬ ܦܵܐܹܫ ܡܘܼܟܸܦܵܐ، ܘܟܠ ܕܡܲܟܸܦ ܓܵܢܹܗ ܒܸܬ ܦܵܐܹܫ ܡܘܼܪܡܵܐ.“ 12ܘܐ݇ܡܝܼܪܹܗ ܠܡܵܪܵܐ ܕܒܲܝܬܵܐ، ”ܐܝܼܡܲܢ ܕܥܵܒ݂ܕܹܬ ܫܵܪܘܼܬܵܐ ܝܲܢ ܐ݇ܟ݂ܵܠ݇ܪܲܡܫܵܐ، ܠܵܐ ܟ̰ܵܝܕܹܬ ܚܲܒ݂ܪ̈ܵܘܵܬܘܼܟ݂، ܐܘܼܦ ܠܵܐ ܐܲܚܘܿܢܘܵܬܘܼ̈ܟ݂، ܝܲܢ ܚܸܙܡܵܢܘܼ̈ܟ݂، ܝܲܢ ܫܒ݂ܵܒ݂ܘܼ̈ܟ݂ ܥܲܬܝܼܪܹ̈ܐ، ܕܠܵܐ ܗܵܘܝܵܐ ܐܘܼܦ ܐܵܢܝܼ ܟ̰ܵܝܕܝܼ ܠܘܼܟ݂ ܘܡܲܕܸܪܝܼ ܠܹܗ ܦܘܼܪܥܵܢܘܼܟ݂. 13”ܐܝܼܢܵܐ ܐܝܼܡܲܢ ܕܥܵܒ݂ܕܹܬ ܐܲܪܚܘܼܬܵܐ، ܩܪܝܼ ܠܡܸܣܟܹܢܹ̈ܐ، ܘܠܣܲܩܲܬܹ̈ܐ، ܘܠܫܦܝܼܠܹ̈ܐ ܘܠܣܸܡܝܹ̈ܐ. 14”ܛܘܼܒ݂ܵܐ ܐܸܠܘܼܟ݂ ܕܠܲܝܬ ܠܗܘܿܢ ܕܦܵܪܥܝܼ ܠܘܼܟ݂، ܣܵܒܵܒ ܒܸܬ ܦܵܝܫܹܬ ܦܪܝܼܥܵܐ ܒܩܝܵܡܬܵܐ ܕܙܲܕܝܼܩܹ̈ܐ.“

ܡܲܬܠܵܐ ܕܡܸܫܬܘܼܬܵܐ ܓܘܼܪܬܵܐ

ܡܬܝ 22‏:1‏‐10

15ܚܲܕ ܡ̣ܢ ܐܵܢܝܼ ܕܝܼܗ݇ܘܵܐ ܝ݇ܬܝܼܒܹܐ، ܐܝܼܡܲܢ ܕܫܡܝܼܥ ܠܹܗ ܐܲܢܹܐ ܗܹܡܸܙܡܵܢܹ̈ܐ، ܐ݇ܡܝܼܪܹܗ ܐܸܠܹܗ، ”ܛܘܼܒ݂ܵܐ ܠܡ̇ܢ ܕܐܵܟܹܠ ܡܹܐܟ݂ܘܼܠܬܵܐ ܓܵܘ ܡܲܠܟܘܼܬܵܐ ܕܐܲܠܵܗܵܐ.“ 16ܐ݇ܡܝܼܪܹܗ ܐܸܠܹܗ ܝܼܫܘܿܥ، ”ܚܲܕ ܐ݇ܢܵܫܵܐ ܥܒ݂ܝܼܕ ܠܹܗ ܐ݇ܟ݂ܵܠ݇ܪܲܡܫܵܐ ܓܘܼܪܬܵܐ ܘܩܪܹܐ ܠܹܗ ܪܵܒܵܐ ܐܲܪ̈ܚܹܐ. 17”ܘܫܘܼܕܸܪܹܗ ܪܹܓܹܗ ܒܥܕܵܢܵܐ ܕܐ݇ܟ݂ܵܠ݇ܪܲܡܫܵܐ ܕܐܵܡܹܪ ܗ݇ܘܵܐ ܠܐܵܢܝܼ ܕܝܼܗ݇ܘܵܘ ܟ̰ܝܼܕܹܐ، ’ܬܹܝܡܘܼܢ، ܐܵܕܝܼܵܐ ܟܠ ܡܸܢܕܝܼ ܗܘܼܕܪܵܐ ܝܠܹܗ.‘ 18”ܘܫܘܼܪܹܐ ܠܗܘܿܢ ܚܲܕ ܒܚܲܕ ܠܸܕܒ݂ܵܩܵܐ ܡܵܗܵܢܵܐ. ܐ݇ܡܝܼܪܹܗ ܐܸܠܹܗ ܗ̇ܘ ܩܵܕ݇ܡܵܝܵܐ، ’ܙܒ݂ܝܼܢܵܐ ܝܘܸܢ ܚܲܩܠܵܐ، ܘܵܠܹܐ ܝܠܵܗ̇ ܕܐܵܙܹܠ݇ܢ ܘܚܵܙܹܝܢܵܗ̇. ܒܸܒܥܵܝܵܐ ܝܘܸܢ ܡܸܢܘܼܟ݂ ܕܦܲܚܠܸܬ ܠܝܼ.‘ 19”ܗ̇ܘ ܐ݇ܚܹܪ݇ܢܵܐ ܐ݇ܡܝܼܪܹܗ، ’ܙܒ݂ܝܼܢܵܐ ܝܘܸܢ ܚܲܡܫܵܐ ܙܵܘܓܹ̈ܐ ܬܵܘܪܹ̈ܐ، ܘܒܹܐܙܵܠܵܐ ܝܘܸܢ ܕܓ̰ܲܪܒܸܢܗܘܿܢ. ܒܸܛܠܵܒܵܐ ܝܘܸܢ ܡܸܢܘܼܟ݂ ܕܦܲܚܠܸܬ ܠܝܼ.‘ 20”ܚܲܕ ܐ݇ܚܹܪ݇ܢܵܐ ܐ݇ܡܝܼܪܹܗ، ’ܐܵܕܝܼܵܐ ܝܘܸܢ ܓܒ݂ܝܼܪܵܐ، ܒܘܼܬ ܐܵܗܵܐ ܠܹܐ ܡܵܨܹܝܢ ܐܵܬܹܝܢ.‘ 21”ܐ݇ܬܹܐ ܠܹܗ ܗ̇ܘ ܪܹܓܵܐ ܘܡܘܼܕܸܥ ܠܹܗ ܠܡܵܪܹܗ. ܟܪܝܼܒ ܠܹܗ ܡܵܪܵܐ ܕܒܲܝܬܵܐ، ܘܐ݇ܡܝܼܪܹܗ ܠܪܹܓܹܗ، ’ܦܠܘܿܛ ܓ̰ܲܠܕܹܐ ܠܥܵܠܘܿܠܹ̈ܐ ܘܠܩܘܼܪ̈ܢܝܼܵܬܹܐ ܕܡܕܝܼܢ݇ܬܵܐ، ܘܡܲܥܒܸܪ ܠܐܲܟ݂ܵܐ ܠܡܸܣܟܹܢܹ̈ܐ، ܘܠܣܲܩܲܬܹ̈ܐ، ܘܠܣܸܡܝܹ̈ܐ ܘܠܫܦܝܼܠܹ̈ܐ.‘ 22”ܘܐ݇ܡܝܼܪܹܗ ܪܹܓܵܐ، ’ܡܵܪܝܼ، ܥܒ݂ܝܼܕ ܠܝܼ ܐܲܝܟ݂ ܕܦܩܝܼܕ ܠܘܼܟ݂، ܘܗܹܫ ܐܝܼܬ ܕܘܼܟܵܐ.‘ 23”ܘܐ݇ܡܝܼܪܹܗ ܡܵܪܵܐ ܠܪܹܓܵܐ، ’ܦܠܘܿܛ ܠܐܘܼܪ̈ܚܵܬܹܐ ܘܠܒܹܝܬ ܣܝܵܓܹ̈ܐ، ܘܡܲܥܒܸܕ ܠܐ݇ܢܵܫܹ̈ܐ ܕܥܵܒ݂ܪܝܼ، ܕܦܵܐܹܫ ܡܸܠܝܵܐ ܒܲܝܬܝܼ. 24”’ܣܵܒܵܒ ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܐܘܼܦ ܚܲܕ ܡ̣ܢ ܐܵܢܝܼ ܐ݇ܢܵܫܹ̈ܐ ܕܟ̰ܝܼܕܹܐ ܝܗ݇ܘܵܘ ܠܹܐ ܛܵܥܹܡ ܠܵܗ̇ ܐ݇ܟ݂ܵܠ݇ܪܲܡܫܝܼ.‘“

ܡܵܢܝܼ ܝܠܹܗ ܬܲܠܡܝܼܕܵܐ

ܡܬܝ 10‏:37‏‐38

25ܟܲܕ ܒܹܐܙܵܠܵܐ ܝܗ݇ܘܵܘ ܥܲܡ ܝܼܫܘܿܥ ܟܸܢܫܹ̈ܐ ܪܵܒܵܐ، ܕܝܼܪܹܗ ܘܐ݇ܡܝܼܪܹܗ ܐܸܠܲܝܗܝ، 26”ܡ̇ܢ ܕܐܵܬܹܐ ܒܵܬ݇ܪܝܼ ܘܠܵܐ ܣܵܢܹܐ ܠܒܵܒܘܼܗܝ، ܘܠܝܸܡܹܗ، ܘܠܐܲܚܘܿܢܘܵܬܹ̈ܗ ܘܠܚܵܬܘܵܬܹ̈ܗ، ܘܠܒܲܟ݂ܬܹܗ ܘܠܒܢܘܿܢܘܼ̈ܗܝ، ܘܐܘܼܦ ܠܓܵܢܹܗ، ܠܹܐ ܡܵܨܹܐ ܗܵܘܹܐ ܐܸܠܝܼ ܬܲܠܡܝܼܕܵܐ. 27”ܘܡ̇ܢ ܕܠܵܐ ܫܵܩܹܠ ܙܩܝܼܦܹܗ ܘܐܵܬܹܐ ܒܵܬ݇ܪܝܼ، ܠܹܐ ܡܵܨܹܐ ܗܵܘܹܐ ܐܸܠܝܼ ܬܲܠܡܝܼܕܵܐ. 28”ܐܲܝܢܝܼ ܡܸܢܵܘܟ݂ܘܿܢ ܐܸܢ ܒܵܥܹܐ ܒܵܢܹܐ ܒܘܼܪܓ̰ܵܐ، ܠܹܐ ܝܵܬܹܒ݂ ܩܵܕ݇ܡܵܝܬܵܐ ܘܚܲܫܒܸܢ ܢܲܦܩܵܬܹ̈ܗ، ܕܐܸܢ ܐܝܼܬ ܠܹܗ ܠܬܲܡܘܼܡܹܗ؟ 29”ܕܠܵܐ ܗܵܘܝܵܐ ܕܡܲܬܸܒ݂ ܒܸܢܝܲܬ ܘܠܵܐ ܡܵܨܹܐ ܬܲܡܸܡ، ܘܟܠܲܝܗܝ ܐܵܢܝܼ ܕܚܵܙܝܼ ܠܹܗ ܫܲܪܝܼ ܡܲܣܚܘܼܪܹܐ ܒܝܼܹܗ. 30”ܒܸܬ ܐܵܡܪܝܼ، ’ܐܵܗܵܐ ܐ݇ܢܵܫܵܐ ܫܘܼܪܹܐ ܠܹܗ ܠܸܒܢܵܝܵܐ ܘܠܵܐ ܡܨܹܐ ܠܹܗ ܠܬܲܡܘܼܡܹܐ.‘ 31”ܝܲܢ ܐܲܝܢܝܼ ܡܲܠܟܵܐ ܕܐܵܙܹܠ ܠܸܦܠܵܫܵܐ ܠܕܲܠܩܘܼܒ݂ܠ ܕܚܲܕ ܡܲܠܟܵܐ ܐ݇ܚܹܪ݇ܢܵܐ، ܠܹܐ ܝܵܬܹܒ݂ ܩܵܕ݇ܡܵܝܬܵܐ ܘܚܲܫܒܸܢ ܕܐܸܢ ܡܵܨܹܐ ܒܥܸܣܪܵܐ ܐܲܠܦܹ̈ܐ ܦܵܠܹܫ ܥܲܡ ܗ̇ܘ ܕܐܵܬܹܐ ܥܲܠܘܼܗܝ ܒܥܸܣܪܝܼ ܐܲܠܦܹ̈ܐ؟ 32”ܐܸܢ ܝܵܕܹܥ ܕܠܹܐ ܡܵܨܹܐ، ܗܹܫ ܗ̇ܘ ܪܸܚܩܵܐ ܡܸܢܹܗ، ܒܸܬ ܫܲܕܸܪ ܐܝܼܙܓܲܕܹ̈ܐ ܕܥܵܒܹܕ ܫܠܵܡܵܐ ܥܲܡܹܗ. 33”ܘܗܲܕܟ݂ܵܐ ܟܠ ܚܲܕ ܡܸܢܵܘܟ݂ܘܿܢ، ܐܸܢ ܠܵܐ ܫܵܒܹܩ ܟܠܹܗ ܡܸܢܕܝܼܹܗ، ܠܹܐ ܡܵܨܹܐ ܗܵܘܹܐ ܐܸܠܝܼ ܬܲܠܡܝܼܕܵܐ.

ܡܲܬܠܵܐ ܕܡܸܠܚܵܐ

ܡܬܝ 5‏:13؛ ܡܪܩܘܣ 9‏:50

34”ܡܸܠܚܵܐ ܨܦܵܝܝܼ ܝܠܵܗ̇، ܐܝܼܢܵܐ ܐܸܢ ܦܵܝܟܵܐ ܡܸܠܚܵܐ، ܒܡܘܿܕܝܼ ܒܸܬ ܦܵܝܫܵܐ ܡܘܼܡܠܸܚܬܵܐ؟ 35”ܠܵܐ ܩܵܐ ܐܲܪܥܵܐ ܘܠܵܐ ܩܵܐ ܙܸܒܠܵܐ ܐܝܼܬ ܠܵܗ̇ ܝܘܼܬܪܵܢܵܐ. ܟܹܐ ܪܲܦܝܼ ܠܵܗ̇ ܠܒܲܕܲܪ. ܡ̇ܢ ܕܐܝܼܬ ܠܹܗ ܢܵܬܝܵܬܹ̈ܐ ܠܸܫܡܵܥܵܐ، ܫܵܡܹܥ.“

ទើបបានជ្រើសរើសហើយ៖

ܠܘܩܐ 14: ABTAB

គំនូសចំណាំ

ចែករំលែក

ចម្លង