ខគម្ពីរពេញនិយមពី Ma‸htehˍ li‸ 7

ចែក​រំលែក

Lawˬ loˬ. Lawˬ kʼo gʼa tuˬ yoˬ. Ca loˬ. Ca kʼo mawˬ tuˬ yoˬ. Yehˬ miˉ hta‸ htawˆ loˬ. Htawˆ kʼo hpaw laˇ tuˬ yoˬ.

Awˬ lawn kʼo, lawˬ ve chaw teˇ gʼaˇ le le lehˬ gʼa tuˬ yoˬ. Ca ve chaw htawˇ, mawˬ tuˬ yoˬ. Yehˬ miˉ hta‸ htawˆ ve chaw awˬ pon htawˇ, yehˬ miˉ hpaw laˇ tuˬ yoˬ.

Ngaˬ maˍ piˇ ve tawˇ hkawˇ hta‸ hkʼa kaˇ leh na yuˬ ve chaw teˇ gʼaˇ le le lehˬ, haˉ pui hkʼoˆ lo yehˬ te ve cuˇ yiˍ cawˬ paˍ hta‸ shuˍ ve yoˬ.

Hkʼe te leh, shu nawˬ hui hta‸ te laˇ piˇ lawˬ gaˇ ve hkʼe, nawˬ hui shu hta‸ oˇ hkʼe te piˇ-oˆ. Awˬ lawn kʼo, tawˇ chi teˇ hkawˇ lehˬ, awˬliˇtawˇhkawˇ li‸ leh Gʼuiˬsha ve tcuh kaˍ paˍ li‸ awˬ hkʼaw lo awˬ hkʼaˇ lonˉ hpeh‸ ve yoˬ.

Ya‸ hkʼaˇ, a sha‸ te‸ kuiˬ lo lo‸-e ve yehˬmiˉhpe‸ lehˬ, maˇ kʼoˍ leh, ya‸ kʼaw ka‸ haˍ jaˇ ve yoˬ. Ca mawˬ leh lo‸-e ve chaw a ciˉ ceh tiˉ cawˬ ve yoˬ.

Maˇ kʼoˍ ve yehˬ miˉ hta‸ lo‸-e loˬ. Awˬ lawn kʼo, luˬ kuiˬ lo kʼai ve ya‸ kʼaw lehˬ kʼehˬ jaˇ leh, yehˬ miˉ hpe‸ ka‸ kʼoˍ jaˇ ve yoˬ. Oˇ kaˬ lo lo‸-e ve chaw ka‸ maˇ jaˇ ve yoˬ.

Nawˬ hui lehˬ, chaw haiˬ hpeh‸ ve ka‸ a shu yawˇ ve yaˇ hta‸ da‸ ve mawˇ piˇ hkawˇ shiˍ ve kʼo, chi a‸ kehˉ leuˉ leh, mvuhˇ naw ma hkʼoˆ chehˇ ve nawˬ hui ve Awˬ pa geh hkʼa lawˬ ve chaw teˇ hpaˍ hta‸ da‸ ve awˬ ceuˬ teˇ hpaˍ yawˇ piˇ tuˬ yoˬ maˇ heˆ laˇ.

Shu nawˬ hui hta‸ venˇbaˆ maˇ gʼa taˍ tuˬ, nawˬ hui shu hta‸ venˇbaˆ taˇ taˍ. Awˬ lawn kʼo, nawˬ hui shu hta‸ venˇbaˆ taˍ ve hkʼa shuˍ shuˍ, shu nawˬ hui hta‸ venˇbaˆ kʼaw‸ taˍ laˇ tuˬ yoˬ. Nawˬ hui shu hta‸ tsuh piˇ kawˬ piˇ ve hkʼa shuˍ shuˍ, shu nawˬ hui hta‸ kʼaw‸ tsuh laˇ kawˬ laˇ tuˬ yoˬ.

Ngaˬ maˍ piˇ ve tawˇ hkawˇ hta‸ kaˇ leh maˇ na yuˬ ve chaw lehˬ, shehˇ shiˍ hkʼoˆ yehˬ te ve cuˇ yiˍ maˇ cawˬ ve chaw hta‸ shuˍ ve yoˬ.

Nawˬ hui a shu yawˇ ve mehˆ shiˍ hkʼaw lo cawˬ taˍ ve toˉ la‸ lonˉ hta‸ maˇ dawˇ nyi leh, aˬ hto‸ ma te nawˬ ve awˬ viˉ awˬ nyi ve mehˆ shiˍ hkʼaw lo cawˬ taˍve mehˆ puˉ hta‸ nawˬ nyi chehˇ ve le. Nawˬ hui a shu yawˇ ve mehˆ shiˍ hkʼaw lo toˉ la‸ lonˉ cawˬ taˍ ve ka‸, aˬ hto‸ ma te nawˬ awˬ viˉ awˬ nyi hta‸, Nawˬ ve mehˆ shiˍ hkʼaw lo cawˬ taˍ ve mehˆ puˉ hta‸ ngaˬ yuˬ tawˆ laˇ shaˍ teh‸ ca kʼoˆ ve le.

Maˇ heˆ heˆ ve tcuh kaˍ paˍ teˇ hpaˍ hta‸ shaˍ ti‸ te-o. Awˬ hkʼaw hpawˇ yawˇ hui haiˬ jaˇ ve veˬ hpeh‸ ve ka‸, yawˬ awˬ guiˬ kʼuˉ hta‸ deh leh nawˬ hui geh laˬ ve yoˬ. Yawˇ hui ve awˬ shiˍ hta‸ nyi kʼo, yawˇ hui ve nyi ma hta‸ gʼa shiˍ tuˬ yoˬ. Aˉ chuˇ cehˬ lo a pehˉ meuˇ shiˍ hta‸ gʼa shaˉ jaw laˇ. Aˉ chuˇ buiˇ lo maˉ nawˆ shiˍ hta‸ gʼa shaˉ jaw laˇ.

Da‸ ve awˬ cehˬ lehˬ, da‸ ve aw shiˍ naw‸ ve yoˬ. Maˇ da‸ ve awˬ cehˬ lehˬ, maˇ da‸ ve awˬ shiˍ naw‸ ve yoˬ.

Da‸ ve awˬ cehˬ lehˬ, maˇ da‸ ve awˬ shiˍ maˇ naw‸ puiˉ. Chi hkʼa shuˍ shuˍ maˇ da‸ ve awˬ cehˬ lehˬ, da‸ve awˬ shiˍ maˇ naw‸ puiˉ.

Da‸ ve awˬ shiˍ maˇ naw‸ ve awˬ cehˬ teˇ cehˬ le le hta‸ htu baˬ leh aˬ miˍ hkʼaw baˬ keu ve yoˬ.