ខគម្ពីរពេញនិយមពី Isr. 10

ចែក​រំលែក

Yusa Je̱e̱n Yus shuarja̱i̱ tuke iruntratin iniaisashtiniaitji. Chíkich iniainiakuisha iikia tuke iruntratniuitji. Nui̱ irunkurkia ikiakánairtiniaitji. Tura Kristu tátintri̱ ishichik tsawant ajasu asamtai nú nukap túratniuitji.

Péṉker anenain tura péṉker túrin ajasártai tusar mai̱ yáiniaikiartiniaitji.

Yus tsaṉkatramkattajnia nu shiir enentáimtamu iniaitsuk kakaram ajasár tuke emetatniuitji. Yus tsaṉkatramkaitjinia nuna umiktatui.

Atumsha esetra enentáimsarum Yus wakera nu túrakrum Yus atumín amastatjarme timia nu wainkiattarme.

Tuma asamtai tuke enentáiji̱a̱i̱ Yus imiá nekas enentáimtusar Yusai̱ jeartai. Ii enentái̱ Kristu numpe̱ja̱i̱ nijiarma asamtai nekas enentáimtakur Kristu nekas winia úuntruiti tiar ii yajauchiri̱ji̱a̱i̱ itit enentáimtumaschatniuitji. Tura ii aya̱shí̱sha saar entsaja̱i̱ imiantniuitji.

Tuma asarum yawe̱tsuk Yus tuke enentáimtusrum kakaram ajastarum. Túrakrum naṉkaamas sunaschatniuitiajtai tiirap.

Túrasha shuar nekas chichaman nékayat ní wakeramuri̱ji̱a̱i̱ṉ yajauchiniam wekaakka Kristu jakamun nakitia asamtai chíkich taṉkun numpe̱ja̱i̱ ni yajauch túramu asakátratin atsawai. Áyatik ashamak tí tsuumai̱ sumamatin tsawantan nákasminiaiti. Nu tsawantai̱ Yus ni nemasri̱n ti kajerak asutiak mash emesrattawai.