ខគម្ពីរពេញនិយមពី Luku 6

ចែក​រំលែក

Fa ahyɛlɛdeɛ maa, na ɛbanyia ɔ muala mɔnwo mɔnwo dɔɔnwo ne ala. Debie biala mɔɔ ɛbava wɔahyɛ la, saa kpole o, anzɛɛ ekyii o, nwolɛ yɛɛ bɛbanlea bɛazia bɛabɔ nwo bɛamaa wɔ a.”

Sonla kpalɛ biala yɛ nyɛleɛ kpalɛ mɔɔ vi ahonle kpalɛ nu la. Sonla mɔɔ ati akunlu le ɛtane la noko yɛ nyɛleɛ ɛtane mɔɔ vea ye ahonle nu la. Mɔɔ wɔ sonla ahonle nu la yɛɛ finde wɔ ye ɛdendɛlɛ nu a.

“Bɛhulo bɛ kpɔvolɛma! Bɛyɛ kpalɛ bɛmaa bɛ! Bɛbɔ bɛ bosea mɔɔ bɛnva bɛ nye bɛndo kɛ bɛkɛzia bɛkɛdua bɛkɛmaa bɛ a. Saa ɛyɛ ɛhye a yɛɛ wɔ ahatualɛ mɔɔ wɔ anwuma la bayɛ kpole a, na eza noko nyɛleɛ ɛhye bahile yɛ nɔhalɛ nu kɛ bɛle Anwuma Nyamenle Bedevinli ne amra: ɔluakɛ Nyamenle le kpalɛ maa anzeayɛlɛma ɔ nee menli mɔɔ ati ɛzɛne ne yɛ ɛsesebɛ kpole kpalɛ la.

“Bɛbɔ mɔdenle bɛze anwunvɔne kɛmɔ bɛ Ze mɔɔ wɔ anwuma yɛ ye la.

Bɛmmatendɛ bɛtia awie anzɛɛ bɛmmabu awie fɔlɛ, ɔluakɛ mɔɔ tendɛ tia ɔ gɔnwo la, bɛtendɛ bɛtia ye, yɛɛ mɔɔ bu ɔ gɔnwo fɔlɛ la, bɛbu ɔdaye noko fɔlɛ. Bɛva ɛtane bɛhyɛ na bɛkɛva bɛ ɛtane bɛkɛhyɛ bɛ.

“Bɛdie. Bɛhulo bɛ kpɔvolɛma. Bɛyɛ kpalɛ bɛmaa menli mɔɔ kpɔ bɛ bɔbɔ la. Bɛyila menli mɔɔ wa bɛ amonle la; na bɛzɛlɛ Nana Nyamenle nyilalɛ bɛmaa menli mɔɔ kɛha bɛ nwo edwɛkɛ ɛtane ɛtane la.

Bɛyɛ mɔɔ bɛkɛhulo kɛ bɛkɛyɛ bɛkɛmaa bɛ la bɛmaa bɛ gɔnwo mɔ noko.

“Saa awie bɔ ɛ nzo nu a, maa ɔbɔ ko ne mɔɔ ɛha la noko anu! Saa awie sɛlɛ wɔ kootu ne a, fa wɔ anwuma tɛladeɛ ne boka nwo. Mɔɔ bɛlɛ ye biala la saa awie sɛlɛ bɛ a bɛva bɛmaa ye; yɛɛ saa awie wua bɛ ninyɛne a, bɛmmadi kɛ ɔkɛzi ɔkɛyɛ na bɛanyia bieko la anwo nyane.

“Baka kpalɛ ɛnzo ma ɛtane, na zɔhane ala noko yɛɛ baka ɛtane ɛnzo ma kpalɛ a.

Baka biala ma ne yɛɛ maa bɛkola bɛnwu ye baka holɛ ko a. Akutue ɛngola ɛnzo amango, yɛɛ amango noko ɛngola ɛnzo akutue.