ខគម្ពីរពេញនិយមពី རོ་མི། 8

ចែក​រំលែក

དཀོན་མཆོག་གི་ ཕང་ཁཱན་དང་ རོ་ཀ་དེན་ཐ་འགྲུབ་ཕེ་ག་ར་ཁཱན་ སོ་ངོ་བ་ཀ་དེན་གེ་ ཧང་ག་རང་གི་ནེ་བུ་ རོག་ཏེ་བ་ཀ་ ལེག་པུ་ཨན་ གནང་མེ་དེན་གེ་ མཛད་ཅ་གི་ལ་དག་ཉི་ ཨ་ཤི་སེན༌ཅ།

ཇི་གི་སེན་ཅ་ ཤི་སྲོག་དང་ཚེ་ ཞིང་ཁམས་ག་འཐེན་པ་བ་དང་ དོན་ག་བ་ ཨོ་མ་དང་མ་འོངས་པ་ སྟོབས་དབང་ ཧང་ད་བུ་རང་ཆོ་ནེ་བུ་ ཐོ་ལ་ཐུང་ཀ་ཆོ་ཁཱན་དང་ ཡོ་ལ་ཧོང་ཀང་ནང་ཀ་ཆོ་ཁཱན་ ཉི་ཨུ་ཉུ་མ་ཚཱད་པ་ བཀོད་ཉི་ཐ་ཁཱན་བ་ཀ་པོང་ཀེ་ ཐུར་གི་རང་ དཀོན་མཆོག་ག་སྙིང་རྗེ་གེ་ ཨ་ཧ་བ་ བེརེ་བེ་མར་བ་དག༌ཉི། ཨོ་ཐ་སྙིང་རྗེ་ཤོ་ ཨ་ཧ་གཙོ་བོ་ ཁིརིས་ཡི་ཤུ་ག་ཐུང་ཀེ་ཨ་ཉི་ ཨ་ཧ་གེན་གནང་མ་གི༌ལ༎

ཨུ་ཉུ་པུརུས་ཀིན་ཨ་ཉི་ ཨའི་ཤུག་མ་ལཱན་ ཆོ་ལེ་གང་ཀ་ དམ་པའི་ཐུགས་ཉིད་གི་ ཨ་ཧ་ཇ་རོ་ཨ་ཉི་གནང༌ཅ། ཨ་ཤི་ཧང་ཏེན་ སྨོན་ལམ་ཏ་པེ་ཁེ་ལེ་སྨོ་རང་ སེ་ལུ་མཱན༌ཅ། དག་པ་ཀབ་ཉི་ ཐུགས་ཉིད་གི་ ཨ་ཧ་དེན་གེ་ གནམ་མེད་ས་མེད་ འོ་བརྒྱལ་ཉི་ དཀོན་མཆོག་ག་ སྨོན་ལམ་ཏབ༌ཅ། རོག་ཧབ་ཏུར་ འོ་བརྒྱལ་ཅ་གི་ལ་སྨོ་ ཨ་ཤི་ཨོ་ཉ་ཀོར་གེ་ ཡེག་ནེ་བུ་ཡེག་པེ་མར༌བ།

ཨོ་ཐ་བ་ཀ་དེན་གེ་ ཨ་ཤི་ཧང་ཡེག་པེ་ཡ། དཀོན་མཆོག་ ཨ་ཧ་དེན་གེ་གི་ནེ་ལ་ ཨི་བི་གི་ ཨ་ཧ་དགྲ་ཨ་ལེ་རེ་བེ་ཡ།

ཨོ་ཉི་ཨ་དེན་གེ་ ཨོམ་ཨི་བི་ ཁིརིས་ཡི་ཤུ་ག་ནང་ཀ་ཅ་གི་ལ་སྨོ་ ཨོ་ཉ་སོ་ངོ་གི་ ཁྲིམས་མ་ཉོང༌པ།

སྡིག་པ་གི་ཕུང་ཁཱན་ སོ་ངོ་ག་སེམས་ཤོ་ ཤི་སྲོག་གི༌ལ། དག་པ་ཀབ་ཉི་ ཐུགས་ཉིད་གི་ དབང་ཁཱན་སེམས་ཀ་ ཚེ་དང་སྐྱིད་པུ་ཨོ་ཕེ།

མང་གི་ ཨའི་གནམ་མེད་ས་མེད་ ཕང་ཉི་གནང་ཁཱན་ ཁིརིས་ག་མཚན་ག་ ཨོ་ཐ་བ་ ཐམས་ཅན་རང་ཕམ་ཉི་ ཨ་ཤི་རྒྱལ་ཁ་ཆི་ལུ་ཉོང་པ༌ཅ།

ཨོ་ཉེ་རང་གི་ནེ་བུ་ ཨ་ཤི་ཨོ་མ་ དཀའ་ཝ་ཅཱད་ཁཱན་ཁེ་པ་ མ་འོངས་པ་ག་ གཟི་བརྗིད་ཀབ་ཉི་ རེ་བ་ཀབ་ཉི་ ཧང་རང་མང་གི།

ཁིརིས་ག་སྙིང་རྗེ་གེ་ ཨའི་ཨི་བི་གི་ ཁ་བེརེ་བེ་རེ་བེ་ཡ། ཧང་དཀའ་ཝ་ཅཱད་པ་ཀབ་ཉི་སྨོ་ ནང་དོག་པ་ཀབ་ཉི་ཡ། ཀ་ལུ་ཏཱད་པ་ཀབ་ཉི་སྨོ་ བི་ནང་ཁུ་ལ་ཀབ་ཉི་ཡ། ཙ་ཏི་ལིང་པ་ཆོ་ལ་ཀབ་ཉི་སྨོ་ ཤི་ལེ་ག་ ཉེན་ཁ་ཆོ་ལ་ཀབ་ཉི་ཡ། ཨུ་ཉུ་མ་ནེ་ལ་ གི་རིང་གི་རེ་བེ་སྨོ།

ཉི་ཨ་ཧ་སེམས་ཀོར་གེ་ ཐམས་ཅན་རང་མཁྱེན་ཁཱན་ དཀོན་མཆོག་གི་ ཐུགས་ཉིད་ག་ སེམས་བུ་མཁྱེན༌ཅ། ཧང་ཡ་དག་ནེ་ལ་ དཀོན་མཆོག་ག་ ཐུགས་བཞེད་དང་ཏུ་ཉི་ ཐུགས་ཉིད་གི་ ཡི་ཤུ་པ་བ་ཀ་དེན་གེ་ སྨོན་ལམ་ཏབ་ཅ་གི༌ལ།

ཧང་ཡ་དག་ནེ་ལ་ དཀོན་མཆོག་ག་ ཐུགས་ཉིད་གི་རིག་ཁཱན་ ཐམས་ཅན་རང་ དཀོན་མཆོག་ག་ སྲས་སྲས་མོ་བ་གི༌ལ།

སྡིག་པ་གི་དབང་ཁཱན་ སོ་ངོ་བ་ཀི་ སྡིག་པ་ག་ཀོར་གེ་ཤ་མིན༌ཅ། དག་པ་ཀབ་ཉི་ དམ་པའི་ཐུགས་ཉིད་གི་ དབང་ཁཱན་སོ་ངོ་བ་ཀི་ ཐུགས་ཉིད་དང་ཏུ་ཉི་ཤ་མིན༌ཅ།

དཀོན་མཆོག་གི་ རོ་ཀ་སྲས་ཆང་མ་ཐ་ལཱན་ ཨའི་ཐམས་ཅན་ག་དེན་གེ་གནང༌མ། ཧང་བཱརའ་ཐམས་ཅན་རང་ རོ་ཀི་ཐུགས་རྗེ་གཟིགས་ཉི་ ཨ་ཧ་མ་གནང་མ་སྨོ།

ཨ་ཧ་བ་ཤོ་ དཀོན་མཆོག་ག་ སྲས་སྲས་མོ་གི་ལ་དག་ཉི་ ཐུགས་ཉིད་རོག་ཏེན་གི་རང་ ཨ་ཧ་རྣམ་ཤེས་ཀབ་ཉི་ འཛོམས་དཔང་ཨ་ཉི་གནང༌ཅ། ཉི་ཨོམ་ ཨ་ཧ་བ་ཤོ་ རོ་ཀ་སྲས་སྲས་མོ་བ་གི་ནེ་ལ་ དཀོན་མཆོག་གི་ཐ་ཁཱན་ བྱིན་རླབས་བ་ ཁིརིས་ཀབ་ཉི་ཏབ་ཐུར་ག་ ཨ་ཤི་བུ་ཉོང༌པེ། དག་པ་ཀབ་ཉི་ ཨ་ཤི་རོ་ཀ་གཟི་བརྗིད་ཁེ་པ་ བོང་མེ་གི་ལ་དག་ནེ་ལ་ རོག་དཀའ་ཝ་ཅཱད་ཁཱན་བ་བུ་ ཨ་ཤི་རོག་ཀབ་ཉི་ བོང་མེ་ཁེ༌ལེ༎

སྡིག་པ་གི་ཕུང་ཁཱན་སེམས་ཀི་ ཧ་ལ་ཨ་ནེ་བུ་ དཀོན་མཆོག་ག་དགྲ་ཨན༌ཅ། ཨུ་ཉུ་ད་བུ་སེམས་ཀི་ དཀོན་མཆོག་ག་ བཀའ་ཁྲིམས་ཕརའ་ཁེ་ཆོ་ལུ་མཱན༌ཅ། ཉི་ཆོ་ལེ་ག་རེ་བུ་བུ་མར༌བ།

ཧང་ཡ་དག་ནེ་ལ་ དཀོན་མཆོག་གི་ བཀོད་ཉི་ཐ་ཁཱན་ ཐམས་ཅན་རང་ ཚ་གྱང་བང་ཉི་ དཀོན་མཆོག་ག་ སྲས་སྲས་མོ་ངོ་མ་བ་ གེན་གནང་མེ་དེན་གེ་ ནོང་མེ་གང༌ཅ།

ཨོ་མ་སག་པུ་ བཀོད་ཉི་ཐ་ཁཱན་ ཐམས་ཅན་རང་ ཝག་ཙ་སིང་མ་ཀབ་ཉི་ ན་ཚ་ཨོ་ཕ་པུརུས་ཀིན་ཨ་ཉི་ ནང་དོག་པེ་གང་ཅ་དག་ཉི་ ཨ་ཤི་སེན༌ཅ།