ខគម្ពីរពេញនិយមពី မၢတ်ႈထႄႇ 6

ចែក​រំលែក

ႁႃ​မိူင်း​ၽြႃး​ပဵၼ်​ၸဝ်ႈ တင်း​တြႃး​တၢင်း​ဢၼ်​သိုဝ်ႈ​တေႃႇ ဢွၼ်​တၢင်း​တႃႉ။ လိုၼ်း​ၼၼ်ႉ​ၸင်ႇ၊ မၼ်း​ၸဝ်ႈ​တၵ်း​ပၼ် လွင်ႈ​တၢင်း​ၵႃႈ​မီး​တင်း​သဵင်ႈ​တင်း​လူင် ၸိူဝ်း​ၼႆႉ​ထႅင်ႈ​ဢေႃႈ။

ပိူဝ်ႈ​ၼႆ​လႄႈ ပုၼ်ႈ​တႃႇ​ဝၼ်း​မိူဝ်ႈ​ၽုၵ်ႈ​ၸိုင် ယႃႇ​ပေ​မႆႈ​ၸႂ်။ ဝၼ်း​မိူဝ်ႈ​ၽုၵ်ႈ​ၼၼ်ႉ တၵ်း​မႆႈ​ၸႂ်​ပုၼ်ႈ​တူဝ်​ၸဝ်ႈ​ၵဝ်ႇ​ဢေႃႈ။ လွင်ႈ​တၢင်း​ဢၼ်​ဢမ်ႇ​လီ​ဢမ်ႇ​ထုၵ်ႇ​ၼႂ်း​ဝၼ်း​မိူဝ်ႈ​ၼႆႉ​ၼၼ်ႉ ပေႃး​ၵုမ်ႇ​ပုၼ်ႈ​ဝၼ်း​မိူဝ်ႈ​ၼႆႉ​ယဝ်ႉ။

ပိူဝ်ႈ​ၼႆ​လႄႈ ၵဝ်​ဝႃႈ​တီႈ​သူ​ၸမ်ႉ၊ တၵ်း​လႆႈ​ၵိၼ်​ၸိူဝ်ႉ​ၼင်ႇ​ႁိုဝ်​ဝႃႈ​ၼႆ ပုၼ်ႈ​ဢသၢၵ်ႈ​လႄႈ​သင်၊ တၵ်း​လႆႈ​ၼုင်ႈ​ၸိူဝ်ႉ​ၼင်ႇ​ႁိုဝ်​ဝႃႈ​ၼႆ ပုၼ်ႈ​တူဝ်​ၵႃႇ​ယႃႉ​လႄႈ​သင်၊ ယႃႇ​ပေ​မႆႈ​ၸႂ်။ ဢသၢၵ်ႈ​မျၢတ်ႈ​သေ​တၢင်း​ၵိၼ်​ဢမ်ႇ​ၸႂ်ႈ​ႁိုဝ်။ တူဝ်​ၵႃႇ​ယႃႉ​မျၢတ်ႈ​သေ​တင်း​ၼုင်ႈ​ဢမ်ႇ​ၸႂ်ႈ​ႁိုဝ်။

မိူဝ်ႈ​ဢၼ်​မႂ်း​သူး​တွင်း​ၸိုင် ၶဝ်ႈ​ၵႃႈ​ၼႂ်း​လုၵ်း​တၢင်း​ၼႂ်း​လႄႈ ဢိုတ်း​ၽၵ်း​တူ​ယဝ်ႉ​ၸင်ႇ၊ သူး​တွင်း​တီႈ​ပေႃႈ​မႂ်း ဢၼ်​မီး​ယူႇ​ၵႃႈ​တီႈ​ဢၼ်​ဢမ်ႇ​ထၢင်ႇ​ဢမ်ႇ​သႃး​ၼၼ်ႉ​တႃႉ။ ပေႃႈ​မႂ်း​ဢၼ်​ႁၼ်​လွင်ႈ​တၢင်း​ဢၼ်​ဢမ်ႇ​ထၢင်ႇ​ဢမ်ႇ​သႃး​ၼၼ်ႉ တၵ်း​ပၼ်​ဢၵျူဝ်း​ဢေႃႈ။

ပိူဝ်ႈ​ၼႆ​လႄႈ သူ​တၵ်း​လႆႈ​သူး​တွင်း​လႄႈ​ဝႃႈ​ၸမ်ႉ၊ ပေႃႈ​ႁဝ်း​ၶႃႈ ဢၼ်​မီး​ယူႇ​ၵႃႈ​ၼိူဝ်​မိူင်း​ၵၢင်​ႁၢဝ်​ပုၼ်ႉ၊ ႁႂ်ႈ​ၼႃႇ​မႃႉ​ၸိုဝ်ႈ​သဵင်​ၸဝ်ႈ​ႁဝ်း မီး​တၢင်း​ဢၼ်​ရူဝ်ႇ​သေႇ​ၵူဝ်​ယမ်​သေ​ၵမ်း​လူၺ်ႈ​တီႈ​ၶႃႈ။- ႁႂ်ႈ​မိူင်း​ၸဝ်ႈ​ႁဝ်း​တႄႇ​ပဵၼ်​သေ​ၵမ်း​လူၺ်ႈ​တီႈ​ၶႃႈ။ ၸိူဝ်ႉ​ၼင်ႇ​ဢၼ်​ဢလူဝ်ႇ​ၸဝ်ႈ​ႁဝ်း​ပျေႉ​ၸုမ်ႇ​ဝႆႉ​ၵႃႈ​ၼိူဝ်​မိူင်း​ၵၢင်​ႁၢဝ်​ပုၼ်ႉ​ၼၼ်ႉ၊ ၵႃႈ​ၼိူဝ်​လိၼ်​မိူင်း​ၼႆႉ​ၵေႃႈ ႁႂ်ႈ​ပျေႉ​ၸုမ်ႇ​သေ​ၵမ်း​လူၺ်ႈ​တီႈ​ၶႃႈ။

ၶႅၼ်း​တေႃႈ​ပၼ်​တၢင်း​ၵိၼ် ဢၼ်​ပေႃး​ၵုမ်ႇ​လဵင်ႉ​ၸႂ်​ၼၼ်ႉ တီႈ​ႁဝ်း​ၶႃႈ ဝၼ်း​မိူဝ်ႈ​ၼႆႉ​သေ​ၵမ်း​တီႈ​ၶႃႈ။

ၸိူဝ်ႉ​ၼင်ႇ​ဢၼ်​ႁဝ်း​ၶႃႈ​ပွႆႇ​လွတ်ႈ​ဢပႅတ်ႈ​ပိူၼ်ႈ တၢင်ႇ​ၵေႃႉ​ဢၼ်​ၽိတ်း​ႁဝ်း​ၶႃႈ​ၼၼ်ႉ၊ ၶႅၼ်း​တေႃႈ​ပွႆႇ​လွတ်ႈ​ဢပႅတ်ႈ​ႁဝ်း​ၶႃႈ​သေ​ၵမ်း​တီႈ​ၶႃႈ။

ယင်း​ဢမ်ႇ​ႁႂ်ႈ​လႆႈ​ၸွမ်း​ၵႂႃႇ​ၵႃႈ​တီႈ​ဢပႅတ်ႈ​တၢင်း​ဢၼ်​ၸူဝ်ႈ​ၵႂႃႇ​ၸူဝ်ႈ​ပႆ​ၼၼ်ႉ​လႄႈ ၶႅၼ်း​တေႃႈ​ၵႄႇ​သႄႇ​ထွတ်ႇ​ထူၺ်ႈ​ဢဝ်​ၵႃႈ​ၼႂ်း​လွင်ႈ​တၢင်း​ဢၼ်​ဢမ်ႇ​လီ​ဢမ်ႇ​ငၢမ်း​သေ​ၵမ်း​တီႈ​ၶႃႈ၊ ဝႃႈ​ၼႆ၊ သူး​တွင်း​တႃႉ။

ပေႃး​သူ​ပွႆႇ​လွတ်ႈ​ဢပႅတ်ႈ​ပိူၼ်ႈ​တၢင်ႇ​ၵေႃႉ​ၸိုင်၊ ပေႃႈ​သူ​ဢၼ်​မီး​ယူႇ​ၵႃႈ​ၼိူဝ်​မိူင်း​ၵၢင်​ႁၢဝ်​ပုၼ်ႉ တၵ်း​ပွႆႇ​လွတ်ႈ​ဢပႅတ်ႈ​သူ​ဢေႃႈ။

တူၺ်း​ၼူၵ်ႉ​ဢၼ်​မိၼ်​ၵႃႈ​ၼိူဝ်​ၵၢင်​ႁၢဝ်​ၸိူဝ်း​ၼၼ်ႉ​တႃႉ။ ၼူၵ်ႉ​ၸိူဝ်း​ၼၼ်ႉ ဢမ်ႇ​ဝၢၼ်ႇ​ဢမ်ႇ​သွမ်ႈ​ၸိူဝ်ႉ​ၽၼ်း။ ၶဝ်ႈ​ၵေႃႈ​ဢမ်ႇ​ပၢတ်ႇ​ဢမ်ႇ​ထိူဝ်။ ဢမ်ႇ​ၸူႉ​ဢမ်ႇ​သိမ်း​ဝႆႉ​ၵႃႈ​ၼႂ်း​ယွင်​ၼႂ်း​ယေး။ ၼႂ်း​ဝႃႈ​ၼၼ်​သေ​ၵေႃႈ ပေႃႈ​သူ​ဢၼ်​မီး​ယူႇ​ၵႃႈ​ၼိူဝ်​မိူင်း​ၵၢင်​ႁၢဝ်​ၼၼ်ႉ လဵင်ႉ​လူ​ၶဝ်​ယူႇ​ဢေႃႈ။ သူ​မျၢတ်ႈ​သေ​ၼူၵ်ႉ​ၸိူဝ်း​ၼၼ်ႉ​ဢမ်ႇ​ၸႂ်ႈ​ႁိုဝ်။

ယႃႇ​ပေ​သိမ်း​ပႅင်း​ၽၼ်ႇတႃႇ​ဢုၵ်ႉ​ၸႃႇ​ၵႃႈ​ၼိူဝ်​လိၼ်​မိူင်း တီႈ​ဢၼ်​ႁေႃ​တင်း​မႅင်း​ၸၢင်ႈ​ယႃႉ၊ ဢၼ်​ၽူႈ​လၵ်ႉ​ၸၢင်ႈ​မူင်ႇ​လႄႈ​လၵ်ႉ​ဢဝ်​လႆႈ​ၼႆႉ။- သိမ်း​ပႅင်း​ၽၼ်ႇတႃႇ​ဢုၵ်ႉ​ၸႃႇ ၵႃႈ​ၼိူဝ်​မိူင်း​ၵၢင်​ႁၢဝ် တီႈ​ဢၼ်​ႁေႃ​တင်း​မႅင်း​ဢမ်ႇ​ၸၢင်ႈ​ယႃႉ၊ ဢၼ်​ၽူႈ​လၵ်ႉ​ဢမ်ႇ​ၸၢင်ႈ​မူင်ႇ​လႄႈ လၵ်ႉ​ဢဝ်​လႆႈ​ၼၼ်ႉ​တႃႉ။- လွင်ႈ​မၼ်း​ၸမ်ႉ ႁူဝ်​ၸႂ်​သူ​ၸၢင်ႈ​မီး​ၵႃႈ​တီႈ​ဢၼ်​ၽၼ်ႇတႃႇ​ဢုၵ်ႉ​ၸႃႇ​သူ​မီး​ၼၼ်ႉ​ဢေႃႈ။

ၽူႈ​လႂ်​ဢမ်ႇ​ၶၢမ်ႇ​တၢင်း​ဢၼ် ၸဝ်ႈ​သွင်​ၵေႃႉ​ၸႂ်ႉ​သွႆ​ၼၼ်ႉ​လႆႈ။ တၵ်း​ၸင်း​ၸဝ်ႈ​ၵေႃႉ​ၼိုင်ႈ​လႄႈ ႁၵ်ႉ​ၸဝ်ႈ​ၵေႃႉ​ၼိုင်ႈ​ဢေႃႈ။ တၵ်း​ဢိင်​ပိုင်ႈ​ၸဝ်ႈ​ၵေႃႉ​ၼိုင်ႈ​လႄႈ ဢမ်ႇ​ၼပ်ႉ​ဢမ်ႇ​ၶၢၼ်း​ၸဝ်ႈ​ၵေႃႉ​ၼိုင်ႈ​ဢေႃႈ။ သူ​ဢမ်ႇ​ၶၢမ်ႇ​တၢင်း​ဢၼ် ၽြႃး​ပဵၼ်​ၸဝ်ႈ​ၸႂ်ႉ​သွႆ​ဢိၵ်ႇ​တင်း​တၢင်း​ဢၼ်​ၸေး​ၸိမ်ႇ​လေႃးၵီႇ​ၸႂ်ႉ​သွႆ​ၼၼ်ႉ​လႆႈ။

သူ​ၸိူဝ်း​ဢၼ်​ယုမ်ႇ​မၢတ်ႈ​ၵေႇ​တင်း​လၢႆ​ၼႆႉ​ဢိူၺ်း၊ ပေႃး​ၽြႃး​ပဵၼ်​ၸဝ်ႈ ဢဝ်​တၢင်း​ၼုင်ႈ​တၢင်း​မႆ​ႁူမ်ႇ​လူမ်ႈ​တူၼ်ႈ​ယိူဝ်ႈ​တူၼ်ႈ​ယႃႈ​ၵႃႈ​ၼႂ်း​ထိူၼ်ႇ ဢၼ်​ဝၼ်း​မိူဝ်ႈ​ၼႆႉ​ဢသၢၵ်ႈ​လိပ်း​ယူႇ​လႄႈ ဝၼ်း​မိူဝ်ႈ​ၽုၵ်ႈ​ဢဝ်​ၶျႃး​သႂ်ႇ​ၵႃႈ​ၼႂ်း​မုၵ်ႉ​ၽႆး​ၼၼ်ႉ​ၸိူဝ်ႉ​ၼင်ႇ​ၼၼ်​ၼၼ်ႉ​ၸိုင်၊ မၼ်း​ၸဝ်ႈ​ယဵင်ႈ​ၶႅၼ်း​တၵ်း​ဢဝ်​တၢင်း​ၼုင်ႈ​တၢင်း​မႆ ႁူမ်ႇ​လူမ်ႈ​သူ​လိူဝ်​တွၼ်း​ၼႃႇ​သေ​ၼၼ်ႉ​ဢမ်ႇ​ၸႂ်ႈ​ႁိုဝ်။

မိူဝ်ႈ​ဢၼ်​မႂ်း​ႁဵတ်း​တႃႇ​ၼႃႉ​တၢင်း​ဢၼ် ၽႄ​ၸွၼ်း​ယိုၼ်ႈ​မႅင်ႇ​ၼၼ်ႉ ၼင်ႇ​ႁိုဝ်​တၢင်း​ဢၼ်​မႂ်း​ၽႄ​ၸွၼ်း​ယိုၼ်ႈ​မႅင်ႇ​ၼၼ်ႉ တၵ်း​ပဵၼ်​ဢၼ်​တဵတ်ႇ​တဵတ်ႇ​ယဵၼ်​ယဵၼ် ဢမ်ႇ​ထၢင်ႇ​ဢမ်ႇ​သႃး​ၸိုင်၊ လွင်ႈ​ဢၼ်​ၶွၼ်​ၶႂႃ​ႁဵတ်း​ၼၼ်ႉ ယႃႇ​ပေ​ႁႂ်ႈ​ၶွၼ်​သၢႆႉ​လႆႈ​ႁူႉ။- ပေႃႈ​မႂ်း​ဢၼ်​ႁၼ်​လွင်ႈ​ဢၼ်​ဢမ်ႇ​ထၢင်ႇ​ဢမ်ႇ​သႃး​ၼၼ်ႉ တၵ်း​ပၼ်​ဢၵျူဝ်း ဢေႃႈ။

လွင်ႈ​ၼင်ႇ​ႁိုဝ် သူ​တၵ်း​ဢမ်ႇ​ႁဵတ်း​သီႇ​လႃႉ​တၢင်း​သိုဝ်ႈ​တေႃႇ​သူ ၵႃႈ​တီႈ​ၽၢႆႇ​ၼႃႈ​ပိူၼ်ႈ​တၢင်ႇ​ၵေႃႉ ႁႂ်ႈ​ၵူၼ်း​တင်း​လၢႆ​လႆႈ​ႁၼ်​ၼၼ်ႉ​ၸိုင်၊ ႁဵတ်း​သတီႉ​တႃႉ။ ပေႃး​ဢမ်ႇ​ၼၼ် သူ​ဢမ်ႇ​လႆႈ​ၶၢမ်ႇ​ဢၵျူဝ်း ၵႃႈ​တီႈ​ပေႃႈ​သူ​ဢၼ်​မီး​ယူႇ​ၵႃႈ​ၼိူဝ်​မိူင်း​ၵၢင်​ႁၢဝ်​ပုၼ်ႉ။

မိူဝ်ႈ​ဢၼ်​သူ​ၵမ်​တၢင်း​ၵိၼ်​ၼၼ်ႉ​ၸိုင်၊ ယႃႇ​ႁႂ်ႈ​မီး​တၢင်း​ဢၼ် ၼႃႈ​ဢူၼ်ႈ​ၼႃႈ​ငဝ် မိူၼ်​ၸိူဝ်ႉ​ၼင်ႇ​ၵူၼ်း​ၸိူဝ်း​ဢၼ် ၸၢင်ႈ​ထိမ်ႇ​ၸၢင်ႈ​မႅပ်း​တင်း​လၢႆ​ၼၼ်ႉ။ ၶဝ်​ၼၼ်ႉ ၼင်ႇ​ႁိုဝ်​ပိူၼ်ႈ​တၵ်း​ႁၼ်​လွင်ႈ​ဢၼ်​ၶဝ်​ၵမ်​တၢင်း​ၵိၼ်​ၼၼ်ႉ​ၸိုင်၊ ၸၢင်ႈ​ယႃႉ​ၼႃႈ​ယႃႉ​တႃ​ၶဝ်​ဢေႃႈ။ ၵဝ်​ဝႃႈ​တီႈ​ၸိုဝ်ႈ​တီႈ​ၸႂ်ႈ​ၸမ်ႉ၊ ၶဝ်​ၼၼ်ႉ​လႆႈ​ဢၵျူဝ်း​ၶဝ်​ယဝ်ႉ။- မိူဝ်ႈ​ဢၼ်​မႂ်း​ၵမ်​တၢင်း​ၵိၼ်​ၼၼ်ႉ၊ ၼင်ႇ​ႁိုဝ်​ပိူၼ်ႈ​တၵ်း​ဢမ်ႇ​ႁၼ် လွင်ႈ​ဢၼ်​မႂ်း​ၵမ်​တၢင်း​ၵိၼ်​ၼၼ်ႉ​လႄႈ ပေႃႈ​မႂ်း​ဢၼ်​မီး​ယူႇ​ၵႃႈ​တီႈ​ဢၼ်​ဢမ်ႇ​ထၢင်ႇ​ဢမ်ႇ​သႃး​ၼၼ်ႉ တၵ်း​ႁၼ်​ၸိုင်၊ တႃး​ႁူဝ်​လႄႈ​သုၵ်ႈ​ၼႃႈ​မႂ်း​တႃႉ။- ပေႃႈ​မႂ်း​ဢၼ်​ႁၼ် လွင်ႈ​တၢင်း​ဢၼ်​ဢမ်ႇ​ထၢင်ႇ​ဢမ်ႇ​သႃး​ၼၼ်ႉ တၵ်း​ပၼ်​ဢၵျူဝ်း​ဢေႃႈ။