ខគម្ពីរពេញនិយមពី Romanos 12

ចែក​រំលែក

Ja̧danö, ju'wedö böjȩ jojodö ja̧bö tjö̧ji̧danöma ja̧bö kwö̧jaduwoko chömöledö. Diosma kwomukwataduwi̧ balewachinö ja̧obö ösödo̧, ja̧danö balewachinö ja̧obö weköbaduwo, 'yayi̧ jawada omukwatadö bakibaduwanö. Ja̧danö, Dios ökwödö kwomukwataduwi̧ balewachinö ja̧itjö̧ma, Dios ösödi̧ jawa kwöwaisaduwena, inesö otiwa jawa, sulabe jwii̧ jawama.

Chömöledö, Diosma ökwödönö lȩlö̧jinö edinobetjö̧, yötawaduwakwö, Diosnö kwiyawaduwo, Diosnö iyawadö, ina 'yaba̧ladö iyawadö bakibaduwanö. Jejenö kwiyawaduwobö chösöda chömöledö. Ja̧danö, Diosnö iyawadö kwö̧jaduwobema, jo̧ba wei̧da jwaikwöda ja̧bö kwö̧jaduwo chömöledö, Dios ösödi̧danö. Jejenö Diosnö kwösödaduwobö otiwa chömöledö.

Diosnö kwo̧'wo̧ wana̧lö, kwo̧'wo̧ luwo̧ ösöwanö omukwata̧lö kwö̧jaduwo, Diosma jö̧a̧li̧danö ja̧akwo̧ jö̧ba̧lö. Ja̧danö, wene baibenama, me'dawachibökönö kwö̧jaduwo. Ja̧danö, kabatökönö Diosnö abebö kwö̧jaduwo chömöledö.

Jau chömöledö, wanedö yötawa: Suli̧ ökwödönö juluwo jö̧ba̧löma webökönaduwi, ökwödöda otiwanö ja̧bö ja̧nö kwujuluwaduwo suli̧tjöma.

Ja̧danö, kwömöledö Jesúsnö ösödadönö kwösödaduwo, ökwöda kwöjawo̧danö, ja̧danö kwömöledöduwinö otiwanö kwomukwataduwo, ökwödada kwomukwatakwawemi o̧penönö jobadö kwömöledöduwinö otiwanö kwomukwataduwo, jobadönö ösödö.

Ju'wedönö isabenö kwösödaduwo, wamedama kwösödaduwoko, okwanö kwösödaduwo. Jau chömöledö, sulabe jawa Dios öpöjödi̧ jawama kwöpöjödaduwo. Ja̧danö wanedö yötawa: Otiwa jawa 'diinö do̧ka̧laduwo, ja̧da kwösödaduwo.

Ja̧danö ju'wedökwö wene jwiinö kwö̧jaduwobö ji̧tjö̧ma, wene jwiinö kwö̧jaduwo chömöledö.

Chömöledö, ju'wedö ökwödönö sulabenö ja̧tjenama, balekwa mikwa yelösöda ja̧bökönaduwi sulabenöma. Diosda sulabenö ja̧badönö lȩbebo̧ chömöledö, ökwödömaökö. Baikwö laebobe Dios iwenema: Duluwo̧ma baikwö yöawobe: Ötjödasa balekwa mikwa lȩbebo̧ma, ötjöda lȩtebocha jojodö sulabenö ja̧tji̧ mikwa, jö̧ba̧lö laebobe Dios iwenema.

Kwotidaduwi̧ma otiwanö kwotidaduwo, nuwelö̧jachibökönö, ja̧danö jwaikwöda Duluwo̧ Dios wei̧ ja̧bö kwö̧jaduwo, kwomajadeduwinö Diosnö ösödö.

Jau chömöledö, Diosma otiwa jawa iyö, ötjönö weinobe ökwödönö yötawobö. Jejenö weinobetjö̧, ökwödönö bakwo̧nökwena weta, Omukwatökönaduwi, ökwödöma otiwadösa, jö̧ba̧lö. Jau chömöledö, Diosda ökwödönö bakwo̧nökwena pjabatinama, Jesúsnö kwösödaduwobö, ¿jö̧tö? Jo̧kwajabetjö̧ otiwo̧sa jö̧ba̧löma kwomukwataduwa chömöledö, bakwo̧nökwena, Dios pjaatinökwesa, jö̧ba̧lö kwomukwataduwo.

Bakwo̧ ökwönö sulabenö ja̧itjö̧ma, balekwa mikwa sulabenöma ja̧bökönaduwi chömöledö, jwaikwöda otiwanö ja̧böda kwö̧jaduwo okobe deinö, Aaa, biya̧ma otiwanö ja̧awa, jö̧ba̧lö tjöwaisinö.

Okobe deinö kwömöledöduwinö bakweminö dösölö̧jinö ja̧bö kwö̧jaduwo. Ja̧danö, Otiwadösa, jö̧ba̧löma kwomukwataduwoko, ja̧danö ju'wedönöma, Mikwawöködö, jö̧ba̧löma kwomukwataduwoko, jo̧kwadabedönöma. Okobe deinö kwömöledöduwinöma bakweminö ösödö kwomukwataduwo, ja̧danö, Aaa, waisadösa, jö̧ba̧löma kwomukwataduwoko.

Jau chömöledö, Dios iwene wei̧danö ja̧köbaduwo. Baikwö weobe Dios iwenema: Kwöpöjojonö a̧wi̧chi̧ tjöitjö̧ma, jo̧banö kwakwawa kwiyo, ja̧danö ojwiyo o̧ti̧ tjöitjö̧ma, ojwiyo kwiyo. Jejenö ja̧köbitjö̧ma, taba lö̧jökwe ö̧jakwo̧ kwöpöjojoma, jö̧ba̧lö laebobe Dios iwenema.

Ju'wedö usula kwemawaduwinö sulabenö ja̧tjenama, Diosnö akebaduwo jobadönöma, jobadönö pjaatobö akebaduwo. Jau chömöledö, pjaatobö akebaduwo, lȩeboböma akebaduwoko, ökwödönö sulabenö ja̧badönöma. Ja̧danö ju'wedö tjo̧'wo̧ ösöwanö tjö̧jenama, jobadökwö kwo̧'wo̧ ösöwanö ösödö kwö̧jaduwo, ja̧danö ju'wedö o̧'wo̧ tjo̧achö tjubudekwenama, jobadökwö kwubudekwaduwo.

Kwömöledöduwi Cristonö ösödadö jwibö tjö̧jenama, pjakataduwo, ja̧danö jelobetjö ichajadö tjichibenama, öpöjödabökönö te'ada̧lö pjakataduwo.

Jau chömöledö, isabenö, Otiwo̧sa, ju'wedötjö bajalekwönönö bo̧sa, jö̧ba̧lö kwomukwataduwoko. Baikwö wanedö yötawa diteba'o jawa chömöledö: Jojo bakwo̧ iteba'oma, nöinö ujuna̧lobe, ¿jö̧tö? Bakwo̧dajayonö, nöinö ujuna̧lobe iteba'o jawama. Ja̧danö, okobe jwiinö ujuna̧li̧ma bakwainöma ja̧okobe, ¿jö̧tö? Ja̧danö, ökwödö Cristonö ösödadöma ba̧jekwadö dö̧jijayonö, bakwo̧ iteba'obedösa, Jesúskwö a̧jö ju̧kwadöma. Ja̧danö, bakwo̧ iteba'o jawadanö dötewinö duju̧kwobe dömöledökwö chömöledö.