ខគម្ពីរពេញនិយមពី Tohi a Paulo ki te kau LOMA 8

ចែក​រំលែក

Pea e tou iloi e gaue te Atua i te u mea fuli ki te lelei o natou e ofa kia te ia, o natou kua paui o mulimuli ki tana fakatuutuu.

Koteuhi e au iloi papau e mole ko te mate, pe ko te mauli, pe ko te kau aselo, pe ko te kau tominasio, pe ko te u mea o te sekulo aeni, pe ko te u mea o te sekulo ka hau, pe ko te u mafimafi, pe ko te maoluga, pe ko te loloto, pe ko he tahi age mea nee fakatupu e feala anai tana fakamavae tatou mai te ofa o te Atua nee fakaha ia Sesu-Kilisito totatou Aliki.

Pea e feia pe mo te Laumalie e tokoni mai ia kia tatou i totatou vaivai, koteuhi e mole tou iloi te mea ae e lelei ke tou kole i atatou faikole. Kae ko te Laumalie totonu e faikole ki te Atua o uhiga mo tatou aki ni hoi e mole feala ke fakaha e ni kupu.

Kotea anai ha tou ui ki te u mea aia? Kapau e kau te Atua mo tatou, pe ko ai ae e fakafehagai mai kia tatou?

Koia i te temi nei, e mole i ai he tautea kia natou e ia Sesu-Kilisito.

Ko te ofa ki te u mea o te kakano, ko te mate; kae ko te ofa ki te u mea o te Laumalie, ko te mauli mo te tokalelei.

Kae i te u mea fuli aia, e lahi age tatatou malo aki ia ae e ofa kia tatou.

E au fakafuafua ko te u mamahi o te temi nei e mole tonu ke fakatatau natou ki te kololia ka hau ae e fakaha anai kia tatou.

Ko ai ka ina fakamavae anai tatou mai te ofa o Kilisito? Pe ko te mahaki anai, pe ko te mamahi, pe ko te fakataga, pe ko te fia kai, pe ko te masiva, pe ko te tuutamaki, pe ko te heleta?

Pea ko te Atua ae e sio i te u loto, e ina iloi te mea ae e fia kole e te Laumalie Maonioni, koteuhi e faikole te Laumalie o uhiga mo te kau sagato, o mulimuli ki te finegalo o te Atua.

He ko natou fuli ae e taki e te Laumalie o te Atua ko te u foha o te Atua.

He ko natou ae e mauli o mulimuli ki te kakano e ofa ki te u mea o te kakano, kae ko natou ae e mauli o mulimuli ki te Laumalie e ofa ki te u mea o te Laumalie.

Ia ia ae nee mole ina haofaki tona Alo totonu, kae nee ina foaki ia o uhiga mo tatou fuli, o feafeai, pe e mole ina foaki mai anai kia tatou te u mea fuli pe mo ia?

E fakamooni te Laumalie totonu ki totatou laumalie ko tatou ko te u fanau a te Atua. Koia, kapau ko he u fanau tatou, pea ko tatou foki ko he u fanau mau tofiga: mau tofiga a te Atua, pea mau tofiga fakatahi mo Kilisito, mo kapau e tou mamahi fakatahi mo ia, o uhi ke tou fakatahi mo ia i tona kololia.

He ko te ofa ki te u mea o te kakano e fili ki te Atua, koteuhi e mole fakalogo te kakano ki te lao a te Atua, pea e mole pe ina fealagia ia.

Koia e talitali ai te malamanei katoa mo he holi mamahi ki te lakaga e fakaha anai e te Atua tana u foha.

Kae, e tou iloi, o kaku mai ki te aho nei, e lauga mo mamahi te malamanei katoa i te u mamahi o te temi fanau.