ខគម្ពីរពេញនិយមពី Luke 3

ចែក​រំលែក

Iskutak maak misiwe anichii iinuuch kaa siikahaahtuwaakanuutwaau, ekw kaye wiya Jesus kaa siikahaahtuwaakanuut. Mekwaach maak e ayimihaat chii uhchi tuupayuu kihchikiishikw, Kaa payehchisiyich Ahchaahkw kaa uhchi aashiitutaakut Jesus mwehch umiimiiu e ishinaakusiyich. Ekw kaa uhchi pehtaakusit awen anite uhchi kihchikiishikuhch e itwet, “Eukw uu chii Nikus kaa saachihiitaan kaye naashch kaa naniheyihtamihiyin.”

Ekw John kaa nishkweushihaat e itaat, “Misiwe e tashiyekw nipiihch chisiikahaahtaatinaawaau niya, mikw maak kutak awen chika takushin uste e chisteyihtaakusit ishpishaat niya. Wiya maak chika siikahaahtaakuwaau Kaa payehchisiyich Ahchaahkwa, kaye ishkuteyuu. Namui maak mechim nitepicheyihtaakusin chechii aapihkunamuch umaschisin.

Chipaa kweskaatisiinaawaau ekw maak che nuukuhch taapwe mitun tekash e nakatamekw chimachaatisiiwinawaauh. Kaye ekaawii iteyihtamukw chechii ushimututamuwekw Chishemanituu utaahkuyuwesuwin mikw aniyaa Abraham e ihtaat e uhchiyekw. Chiwiihtamaatinaawaau, Chishemanituu chika chii ihtuutaweu uyeyuuh asiniih kaa itapiyich chechii uhchi ushihaat Abraham utawaashiimiyuu.

Wesh muyaam shaash e ayeskuushtech usitaaskw eukw che ishinaakuhch che naatwaakahwaakanuut an mistikw anite e utipiyuut. Wesh tahtu mistikw ekaa kaa miyu miinishuut chika naatwaakahwaakanuu kaye chika machishtawepinaakanuu ishkutehch.” Eukw uyuu kaa itwet John.

Wesh Isaiah, aniyaa uchischiwehiichesuu chii itasinahamukupane Chishemanituu utayimuwinihch, Ihtaau awen e tepwet anite pakwaatiskamikaahch e itwet, “Ayeskuwiihkamuwaahkw Utipeyihchikeu meskanaayuu che pimuhtet kaye kuiskumuhtaawaahkw. An maak meskanuu anite che ati wawaayaach chipaa taapituuhtaakanuu, kaye maak anite e wachiyuuhch e ichisimuhch an meskanuu chipaa taapituuhiikanuu an wachii chechii uhchi miyumuhch an meskanuu. Ekw maak anit e waawaachisimuhch an meskanuu, chipaa kuiskumuhtaakanuu kaye maak anit e machihch, chipaa miyuuhtaakanuu. Ekw maak misiwe iinuuch che waapamaatwaau upimaachihiiweu, aniyuu Chishemanituu kaa pechi itishahwaat.” Eukw uyuu kaa itasinahamukupane aniyaa Isaiah.