ខគម្ពីរពេញនិយមពី KOLOSIANG 2

ចែក​រំលែក

Kapc cdcmpila nolu Kristo Jisumc torvgsutonc Ru:tumdcm, cdcmpidag Bvkkolo turtoka, appvrc pvra:la odokkc mosa:la odokkc mc:jvgdo mongapto, kapc nolum poyirtoji, aipai binamc pv:se-pv:yelangka.

Cdcm ka:tok jc nolum sc:kosin asin kangkurla kinnam agom odokkc cpv:pc yadnamlok ki:rugpc rugkosuyoka, tani:kvdv:dok lutcng gvtcngkvdv:dcmpc, mo:pvsok ncrkvg yalokvdv: dokkcmpc, odokkc Kristokcdcmpc ima:pc.

Odokkc nolu, imur ager gernam odokkc noluk adinno gadpukma:namno sila dungaji, Ru:ncpvncbv Bvk lcdulo turmotoku, ngoluk appvng gvmurkvdv:dcm mc:yinsuge:la, oko yc:tumnamdc ngoluk birudi:pc dagridagji odok lugot lujcmdokki luncdcm la:pakge:la; scm bv angupc lc:to, cdcm Kurusdo pvtlvgge:la.

Kapcnc Bvkkolo appvng Ru:ncpvnc amvrpc du:do-dagdo, Odokkc nolu Bvkkolo turnamlok pv:namdo gva:to, sc:kobv appvng lujvglurolok mittukdc:ji odokkc migomdoncdc:ji.

Cdcmpidag nolum sc:kosin kcbangcm ba:moyoka donam agom tawunamno odokkc tv:namno cdcmanggom ipusijarlo cdcmanggom po:lo karrenlo, cdcmanggom yodla du:do longclo. Cdcbulu yallo okodc gva:pcnncji; cmpige:la ncrkvgpc avdc Kristokc.