If you would like a copy of this version please contact info@davaraudiobibles.org

Lhomi New Testament

हुनी येशुसो ढुल स्‍युन छुरील खोङ् रोरङ् स्‍युसे सार् दील लोक्‍न युङ बेत्। ॱनी हुदु येशु झ्‍यीस्‍सल मी यरीगी घोङ्‌रीय च्‍यीक् तेन्‍दङ् डक्‍च्‍यक् खुर्न युङ बेत्। ॱनी हुबे छ्‌य स्‍यक्‍न हुन्‍दुक् झ्‍यीप्‍प दी येशुगी ॱह घोनी हुगी घोङ्‌रीय दील खोङ्‌गी ॱवे भीज रङ् ॱलो दीरी झ्‍यी। रङ्‌गी दीक्‍प घयेत् ह धक्‍सोङ् ॱसुङ बेत्। हीगोल उन यो़प्‍पे छ्‌यो़डीम्‍गी चयेलम यरीबे हुगी मी हुगी तम् हुगो को़न्‍ज्‍योक्‍ल ॱमो़म्‍बी़त् तोङ्‌गेङ्‌गी केच्‍च्‍यल डोगेन् बेत् ॱनो़बे ॱसम्‍ल खुर बेत्। ॱनी हुबे ॱसम्‍ल दी येशुगी ॱह घोनी, खोङ्‌गी हुबल खीक्‍की घन्‍डल नुक्‍मे ॱनोक्‍सम् अयेक्‍प तोङ्‌गेन्। रङ्‌गी दीक्‍प धक्‍सोङ् सीर धङ् घोङ्‌रीयल लोङ्‌ल छ्‌यम् सीर हीगो घङ्‌गो ले ॱल्‍हा बेक्‍क? कोलीमीगी ॱरेबुल जम्‍बुलीङ्‌दु दीक्‍प धक्‍तु ची़च्‍च्‍येमे ॱवङ् खुङ् यो़प्‍प खीत्‍रङ्‌गी ॱह घोज्‍ये यो़प्‍पल ङे तो़ङ्‌गी सीन्‍न हुगी घोङ्‌रीय दील खोङ्‌गी रङ् लोङ्‌ल रङ्‌गी तेन् दी इक् खुर्ल खीम्‍ल लोक्‍ल ज्‍युक् ॱसुङ बेत्। हुनी घोङ्‌रीय दी लोङ्‌न खीम्‍ल टप्‍नर बेत्। हीगो थोङ्‌नी हुगी मी घयेत् दी ज्‍यीक्‍टक् लङ्‌न कोलीमील हीन्‍दुक्‍मे ॱवङ् ॱनङ्‌दुक् ॱनो़न हुबे को़न्‍ज्‍योक्‍ल तो़प्‍प पुब बेत्।

हुनी थो़न्‍न फीन्‍नी, यङ् येशुल मत्‍ती सीक्‍केन् गोलदर् च्‍यीक् गोलदु दो़प्‍प ठेप्‍प बेत्। ॱनी हुल येशुगी ङे ॱलोप्‍टुक्‍ल ॱस्‍योक् सीन्‍न भो़ब बेत्। हुनी हुगो लोङ्‌न खोङ्‌दङ् दल टप्‍नर बेत्।
ॱनी तीङ्‌ला मत्‍ती दीगी रोरङ्‌गी खीम्‍दु येशु धङ् खोङ्‌गी ॱलोप्‍टुक् दीब स्‍यालक्‍ल भो़ब बेत्। ॱनी हुदु गोलदर् धङ् दीक्‍च्‍येन् ॱयोङ्‌म आक् गज्‍येन् भो़न सगीन् यो़प्‍प बेत्। ॱनी हीगो फरीसी घयेक्‍की थोङ बेत्। हुनी हुबे खोङ्‌गी ॱलोप्‍टुक् दीबल खीक्‍की चयेलम घन्‍डल गोलदर् धङ् दीक्‍च्‍येन् ॱयोङ्‌म घयेत्‍तङ् कङ्‌ज्‍यीक्‍ल सम सगेन् बेक्‍क? सीन्‍न झ्‍यीब बेत्। ॱनी हीगो येशुगी ॱह घोनी खोङ्‌गी हुबल नेप्‍प घयेत्‍ल मेन्‍द, मी ज्‍याबोक्‍मल ॱमेम्‍बा मीत् गो़गेन् बेत्। ॱसुङ्‌रप्‍ल थो़ङ्‌गेङ्‌गी केच्‍च्‍य हीगोल नम् च्‍येत्‍न ॱह घोव झ्‍यीज्‍यीत्।
छ्‌यो़प्‍प पुबले त ङ ॱनी खीत्‍रङ्‌सो नङ्‌दु ॱङीङ्‌ज्‍यी झ्‍यीत्‍री चीयल मङा गुगुक् सीर यो़क्‍केन् बेत्।
ङ ॱनी छ्‌यो़डीम्‍ल चीगेन् मी ढङ्‌बु घयेत् भो़त्‍तु युङ मेम्‍ब, दीक्‍च्‍येन् घयेत् भो़त्‍तु युङ हीन् झ्‍यीब बेत्।

ॱनी तीङ्‌ला येशु च्‍येल्‍ल युहन्‍ना बप्‍तीस्‍की ॱलोप्‍टुक् दीब युङ्‌न हुबे खोङ्‌ल ङीत् ॱनी छम् छम् ॱनुक्‍नेल स्‍युक्‍को़त्। ॱनी फरीसी घयेत् एत् ॱनुक्‍नेल स्‍युक्‍कुक्। ॱनी नीज्‍यरङ्‌गी ॱलोप्‍टुक् घयेत् हीब घन्‍डल ॱनुक्‍नेल मीत् स्‍युक्‍केन् बेक्‍क? सीन्‍न ढीब बेत्। ॱनी येशुगी लेल्‍ल भालीङ्‌गी यङ्‌ल मक्‍पे छ्‌यीट्‌टो घयेत् नङेल्‍ल स्‍युक्‍को़प्‍प बेक्‍कक् ॱनी? नेम्‍बेत् ॱनाङ् मक्‍प हुबदङ् ढेबे धी़ दी ॱलीत्‍नी क, हुबल नङेन् फोक्‍न ॱनुक्‍नेल स्‍युक्‍केन् बेत्। मी ॱसी़ इक् घो़ घोक्‍पुल खोङ् डोगेङ्‌गी ॱल्‍हेम्‍ब मीत् ज्‍यक्‍केन् बेत्। खोङ् डोगेङ्‌गी ॱल्‍हेम्‍ब दीगी घो़ घोक्‍पु दी हरुङ् मङ्‌दु च्‍येत् तोङ्‌गेन् बेत्। ॱनी मी ॱसी़ इक् पाबोक्‍की भेक्‍क घोक्‍पुल गोङ्‌ज्‍यङ् ॱसम्‍ब ॱमीत् ॱलुक्‍केन् बेत्। ॱलुक्‍न ॱनी, हुगो खो़न भेक्‍क दी भोङ् डोगेन् बेत्। हुनी गोङ्‌ज्‍यङ् दी इक् भो़त् डोगेन् बेत्। हुनी भेक्‍क दी इक् मीत्‍तल डोगेन् बेत्। गोङ्‌ज्‍यङ् ॱसम्‍ब भेक्‍क ॱसम्‍बल ॱलुक्‍न क, ॱङीक्‍कर् दो़क्‍केन् बेत् झ्‍यीब बेत्।

हीन्‍दुक् सीरे यङ्‌ल येशु च्‍येल्‍ल छ्‌यो़गी छोगङ्‌गी गोयो़प्‍प छ्‌यीस्‍स्‍यो च्‍यीक् युङ्‌न हुगी छ्‌यक् छेन हीन्‍दुक् स्‍यी़ब बेत्। हुन्‍दो ङे भुमु उ छ्‌येस्‍सोङ्। नीज्‍यरङ् झ्‍यो़न्‍न छ्‌यक्‍वङ् केन ॱसो़दु ची़त्‍रो ॱनङ् सीन्‍न झ्‍यीब बेत्। ॱनी हीनी येशु धङ् ॱलोप्‍टुक् दीब हुगोदङ् दल फीम्‍ब बेत्।
ॱनी लम्‍ल डोये यङ्‌ल भुमु च्‍यीक्‍की येशुगी तक्‍नी छुल्‍ल युङ्‌न खोङ्‌गी ली़गी घो़ छ्‌यी घो़गी थी़च्‍ची दील रेक् तङ बेत्। हुल ली़गी ठक् भप्‍न युङ्‌नी ॱमत् छ्‌येप्‍प, लो च्‍युन्‍नी ॱसोङ हीङ्‌गो़प्‍प बेत्। हुगो झ्‍यीनी हुगी रोरङ्‌गी ॱसीम्‍ल ङ येशुगी ली़गी छ्‌यी घो़ च्‍यीक्‍ल रेक्‍च्‍ये झ्‍युङ्‌नरङ्, ङे नज हीगो ढक् डोगेन् बेत् ॱनो़ब ॱसम्‍न युङ हीङ्‌गो़प्‍प बेत्। हुनी येशु तक्‍ल लोक्‍न तेन हुगी भुमु दील भुमु रङ्‌गी छ्‌य स्‍यक्‍प दीगी रङ् ढक्‍नर बेत्। ह रङ् ॱलो दीरी झ्‍यीन ज्‍युक् झ्‍यीब बेत्। हीनी ॱनी हुगी नज दी ढक्‍नर हीङ्‌गो़प्‍प बेत्।
हीनी येशुसो हुगी गोयो़प्‍प छ्‌यीस्‍स्‍यो दीगी खीम्‍ल ॱलीब बेत्। ॱलीत्‍नी, उन ॱलीमु ज्‍युर्केन् धङ् मी गज्‍येन् छोन हुट्‌ट ज्‍यक्‍कीन् यो़प्‍प ठेप्‍प बेत्। ॱनी खोङ्‌गी हुब घयेत् कुरीक्‍ल खीत्‍रङ् घयेत् छ्‌यील ज्‍युक्। हुगी भुमु हुगो ॱस्‍यीय मेम्‍ब, ॱङीत्‍ल ॱसोङ बेत् सीन्‍न ॱसुङ बेत्। ॱनी हील हुगी मी घयेत् दी ढो़स्‍सक् झ्‍यीब बेत्। ॱनी हीन्‍न अक्, हुगी मी घयेत् दी येशुगी कुरीक् छ्‌यील दीत्‍न तङ्‌न नङ्‌ल भुमु दी झ्‍यीस्‍सल स्‍युन फीन्‍न भुमु दीगी लक्‍पनी सीन्‍नी, हुनी हुगो ॱस्‍यर्च्‍यक् ॱसोम्‍बुल लोङ बेत्। ॱनी हीगी केच्‍च्‍य हीगो हुगी लुङ्‌बल घल अक् धर्नर बेत्।

येशु हुनी यङ् फीन्‍नी लम्‍ल स्‍यर्च्‍योक् मीरङ् ॱङी तीङ् दीत्‍न युङ्‌न हुबे खोङ्‌ल ॱवे दाऊद्‌गी ज्‍यी़त् ङीत्‍ल ॱङीङ्‌ज्‍यी जेत्‍रो ॱनङ् सीन्‍न केत् ज्‍यब बेत्। ॱनी येशु खीम् च्‍यीक्‍की नङ्‌ल स्‍युन देत्‍नी, हुदु स्‍यर्च्‍योक् ॱङीबु दी इक् युङ बेत्। ॱनी खोङ्‌गी हुब ॱङीबुल खीक्‍की ॱमीक् हुगो थोङ्‌गेल्‍ल ङे सो छुगेन् बेत् ॱनो़बल छ्‌य स्‍योक्‍को़प्‍प? सीन्‍न ढीब बेत्। ॱनी हीगी लेल्‍ल हुबे चोव ज्‍यीन्‍दक् ङीक्‍की छ्‌य स्‍योक्‍को़त् झ्‍यीब बेत्। हुनी खोङ्‌गी हुबे ॱमीक् दील रेक्‍न खीत्‍रङ्‌गी छ्‌य स्‍यक्‍प दी डस्‍सीरङ् झ्‍युङ्‌ल ज्‍युक् झ्‍यीब बेत्। हुनी हुबे ॱमीक् दी थोङ्‌गेल्‍ल ॱसोङ बेत्। ॱनी येशुगी हुबल हीगी केच्‍च्‍य हीगो मी ॱसुल आक् ॱमत् ॱस्‍यो़त् सीन्‍न गन्‍दीक्‍म ॱङाब बेत्। ॱनी हीन्‍न अक्, हुब ॱङीबी़ हुनी फीन्‍नी खोङ्‌गी ढीक्‍की केच्‍च्‍य घयेत् दी हुगी लुङ्‌बल घल अक् ॱस्‍येत्‍न टम्‍ब बेत्।
येशुसो यङ् हुनी फीन्‍नी, खोङ् च्‍येल्‍ल यङ् ॱनो़प्‍प अयेक्‍प स्‍यीन्‍नरे मी तम् लप् ॱमीत् छुगेन् च्‍यीक् ठीक्‍न युङ बेत्। ॱनी येशुगी हुगी ॱनो़प्‍प दी तो़न्‍न दीत्‍न तङ्‌नी, हुगी मी दी तम् लप् छुगेल्‍ल झ्‍युङ बेत्। ॱनी उन यो़प्‍पे मी यरीगी हीगो डस्‍सी इस्राएल्‍की लुङ्‌बदु नम्‍ल अक् झ्‍युङ थोङ् ॱमत् ॱनोङ् झ्‍यीब बेत्। हीगी ढीक्‍ल फरीसी घयेक्‍की यङ् हुल ॱनो़प्‍प अयेक्‍प घयेक्‍की चोबो़ङ्‌गी ॱवङ् यो़प्‍पेत्। ॱनी हुगी ॱवङ् दीगी क ॱनो़प्‍प अयेक्‍प ॱयोङ्‌म घयेत् दी तो़न्‍न दीक्‍को़प्‍पेत् झ्‍यीब बेत्।

हुनी येशु सार् धङ् युगङ् घयेत्‍ल गीर्न यहुदीगी छ्‌यो़गी छोगङ् घयेत्‍ल स्‍युन ॱलोप्‍स धङ् तेङ् यी़गी ज्‍यागक्‍की केच्‍च्‍य ॱनेम्‍बु ॱस्‍येत्‍न बीन्‍न मी घयेक्‍की नज ॱनम्‍ब गज्‍येन् ढक्‍तु ची़प्‍प बेत्।
ॱनी घल अक् मी घयेत् छेत्‍मीत् लुक्‍चीब मीप्‍पे लुक् डस्‍सी यो़प्‍प धङ् हुब केन् झर्न ॱसीम्‍दुक् यो़प्‍प येशुगी थोङ्‌नी खोङ् हुब घयेत्‍ल ॱङीङ् छय बेत्। हुनी खोङ्‌गी ॱलोप्‍टुक् दीबल हीन्‍दुक् ॱसुङ बेत्। तो़न्‍दोक् ह गज्‍येन् छो़दुक्। ॱनी ॱङलक्‍प दी को़न्‍सी दुक्। तो़न्‍दोक्‍की दक्‍पुल तो़न्‍दोक् दी़क्‍केङ्‌गी ॱङलक्‍प तोङ्‌रो झ्‍यी सीन्‍न खीत्‍रङ् ॱसुव तोप्।

ស្ដាប់នូវ मत्‍ती 9