If you would like a copy of this version please contact info@davaraudiobibles.org

Romani Arli Bible 2024, CC-BY-SA-4.0, The Word for the World International and The Word for the World Europe, 2024. (Text)
Romani Arli New Testament Audio Bible, CC-BY-SA-4.0, Davar Partners International, 2025. (Audio)

Romani Arli New Testament

I kad o Isus završinđa sa ple vaćeribnaja, phenđa ple učenikonenđe: “Džanena soi zako duj dive o prazniko Pasha. Tegani man, e Čhave e manušesere, ka den te ovav čhivdo ko krsto.”
Tegani o šerutne sveštenici hem o starešine e jevrejengere čedinde pe ko boro e prvosveštenikosoro kova vičinđa pe Kajafa hem dogovorinde pe ko hovavne te dolen e Isuse hem te mudaren le.
I phende: “Naka ćera adava zako vreme e praznikosoro, te na pobunini pe o narodo.”


A o Isus inele ano gav Vitanija, ano čher e Simonesoro e Gubavcosoro. I sar inele uzalo astali, ali koro leste jekh đuvli e čareja savo inele ćerdo oto šužo bar, ano savo inele skupo mirisno ulje hem čhorđa le upro lesoro šero.
Kad o učenici dikhle adava, lelje te holjanen vaćerindoj: “Sose esavko bespotrebno čhoriba? Bute parenđe šaj ine te biknel pe adava, a o pare te den pe e čororenđe.”
A o Isus džanđa sostar vaćerena, i pučlja len: “Sose uznemirinena akala đuvlja? Oj ćerđa maje šukaripe. Adalese so o čorore manuša uvek ka oven uzala tumende, a me naka ovav uvek tumencar. Čhorđa akava mirisno ulje upra mande te pripremini mlo telo zako paruniba. Čače vaćerava tumenđe, kaj god ki sa i phuv ka vaćeri pe akava Šukar lafi, ka vaćeri pe hem akalestar so oj ćerđa, sar setiba olatar.”


Tegani jekh oto dešu duj apostolja – okova kova vičinđa pe Juda Iskariot – dželo koro šerutne sveštenici hem pučlja len: “Kobor ka den man pare te izdajinav tumenđe e Isuse?”
I on dinde le trijanda srebrna kovanice. I otegani o Juda lelja te rodel šukar prilika te izdajini e Isuse.


A ko prvo dive oto Prazniko e bikvascone marengoro o učenici pučle e Isuse: “Kaj mangeja te ćera će te ha e pashakoro hajba?”
A o Isus phenđa lenđe: “Džan ki diz koro adava hem adava manuš hem vaćeren lese: ‘O učitelj vaćeri: Mloi vreme paše. Kora tute ka slavinav i Pasha mle učenikonencar.’ ”
I o učenici ćerde sar so phenđa lenđe o Isus hem adari ćerde zako hajba e pashakoro.


Kad peli i rat, o Isus čhivđa pe uzalo astali ple dešu duje apostolencar. I sar hana ine, o Isus phenđa lenđe: “Čače vaćerava tumenđe, jekh tumendar ka izdajini man!”
On but rastužisale, i lelje jekh palo avereste te pučen le: “Te na injum me adava, Gospode?”
A ov phenđa lenđe: “Okova kova mancar macinđa o maro ano čaro, ov ka izdajini man. Čače, o Čhavo e manušesoro valjani te merel sar so pisini ano Sveto lil, ali jao okole manušese kova ka izdajini le! Po šukar ka ovel lese te na ovel ine bijando!”
A lesoro izdajniko o Juda pučlja: “Te na injum me adava, Učitelju?”
A o Isus phenđa lese: “Ađahari sar so phenđan.”


Sar hana ine, o Isus lelja o maro, zahvalinđa e Devlese hem phaglja le, i dinđa le e učenikonenđe, vaćerindoj: “Len hem han! Akavai mlo telo.”
Tegani lelja i čaša e moljaja, zahvalinđa e Devlese hem dinđa la olenđe, vaćerindoj: “Pijen olatar sare! Adalese so akavai mlo rat oto savez, savo čhorela pe butenđe, zako oprostiba e grehengoro. I vaćerava tumenđe da naka pijav više oti akaja mol sa đi o dive kad ka pijav tumencar i nevi mol ano carstvo mle Dadesoro.”
Tegani đilabde psalmija, i džele ki e Maslinakiri gora.


Tegani o Isus phenđa lenđe: “Erat sare ka ačhaven man, adalese soi pisime ano Sveto lil:

‘Ka mudarav e pastire,
hem o bakre ka našen taro stado.’

Ali kad ka uštav taro mule, ka džav angla tumende ki Galileja.”
A o Petar phenđa lese: “I sare te ačhavde tut, me naka ačhavav tut!”
O Isus phenđa lese: “Čače vaćerava će, ki akaja rat, angleder so o bašno ka đilabi, trin puti ka hovave da na pendžareja man.”
O Petar phenđa lese: “Naka ćerav adava, čak hem te valjanđum te merav tuja.”
I ađahar vaćerde sa o učenici.


Tegani o Isus dželo ple učenikonencar ko than vičime Getsimanija, i phenđa lenđe: “Bešen akate đikote me džava adari hem molinav man.”
Peja lelja e Petre hem soduje čhaven e Zevedejeseren. Pelo lese žal hem pharipe, i phenđa lenđe: “Edobor injum žalosno da mlo vilo ka pharjol! Ačhoven akate hem džangale pazinen mancar.”
I dželo hari po dur, pelo mujeja đi phuv hem molinđa pe vaćerindoj: “Dade mleja, te šaj, cide akaja čaša e patnjaja mandar. Ali, nek ovel pali ti volja, a na pali mli.”
Tegani irinđa pe koro učenici hem arakhlja len sar sovena, i phenđa e Petrese: “Ah, našti li ine nijekh sati džangale te pazinen mancar! Džangale pazinen hem molinen tumen te na peren ko iskušenje. O duho mangela te ćerel okova soi šukar, ali o teloi bizoralo.”
I palo dujto puti dželo hem molinđa pe vaćerindoj: “Dade mleja, te našti te cide mandar akaja čaša e patnjaja, te na pijav olatar, nek ovel pali ti volja.”
I palem, kad irinđa pe, arakhlja len sar sovena adalese so phandljona ine lengere jaćha. Ov ačhavđa len hem palem dželo po dur, i trito puti molinđa pe, vaćerindoj ista lafija.
Tegani irinđa pe koro učenici hem phenđa lenđe: “Pana li sovena hem odmorinena? Ače, alo o sati kad me, o Čhavo e manušesoro, ka ovav dindo ko vasta e grešnikonengere. Ušten! Hajde! Ače mlo izdajniko avela.”


I sar pana o Isus vaćeri ine adava, alo o Juda, jekh e dešu duje apostolendar, hem oleja but džene, e mačencar hem e kaštencar, kolen bičhalde o šerutne sveštenici hem o starešine e jevrejengere.
A o Juda, lesoro izdajniko dinđa len znako vaćerindoj: “Kas ka čumudinav – ovi adava. Ole dolen.”
I odmah alo đi o Isus hem phenđa: “Zdravo, učitelju”, hem čumudinđa le ki čham.
A o Isus phenđa lese: “Amala, ćer okova savese aljan.”
Tegani o manuša ale, dolinde e Isuse hem phandle le. I dikh, jekh okolendar kola inele e Isuseja dolinđa pe ko mači, ikalđa le hem khuvđa oleja e prvosveštenikosere sluga hem čhinđa lesoro kan.
Tegani o Isus phenđa lese: “Irin o mači olese ko than, adalese so sare kola dolena pe ko mači, oto mači ka meren. Tu li mislineja da me našti te rodav mle Dadestar te bičhali maje akana više oto dešu duj armije anđelen? Ali te ćerđum adava, sar ka pherđon o Sveta lila save vaćerena da valjani te ovel ađahar?”
Tegani phenđa e manušenđe: “Mačencar hem kaštencar aljen pala mande te dolen man, sar palo pobunjeniko. Divencar ano Hram bešljum hem sikavđum e narodo, i na dolinđen man. Ali, sa akava ulo sar te pherđol okova so mandar pisinde o proroci.”
Tegani sa o učenici ačhavde le hem našle.


Okola kola dolinde e Isuse, legarde le koro prvosvešteniko o Kajafa, kora kaste čedinde pe o učitelja e Zakonestar hem o starešine. O Petar odural džala ine palo Isus sa đi ko boro e prvosveštenikosoro, i đerdinđa andre hem bešlo e slugencar te dikhel so ka ovel.
A o šerutne sveštenici hem sa o sabor rodena ine nesavo hovavno svedočiba protiv o Isus sar te šaj ćeren te ovel mudardo, ali našti ine te arakhen le, iako ale but hovavne svedoci.
A ko kraj ale duj džene hem phende: “Akava manuš phenđa: ‘Šaj te peravav o Hram e Devlesoro hem zako trin dive palem te vazdav le.’ ”
I o prvosvešteniko uštino hem pučlja e Isuse: “Tut li nane so te phene ko akava so vaćerde protiv tute?”
A o Isus trainđa.
I o prvosvešteniko phenđa lese: “Hava tut sovli upro dživdo Devel, phen amenđe tu li injan o Hrist, o Čhavo e Devlesoro?”
O Isus phenđa: “Ađahari sar so phenđan. Ali vaćerava tumenđe: Od akana ka dikhen man, e Čhave e manušesere, sar bešava ko počasno than, oti desno strana e Najzorale Devlesiri hem sar avava upro oblaci e nebosere.”
Tegani o prvosvešteniko pharavđa ple šeja hem phenđa: “Hulinđa upro Devel! Na valjani amenđe više svedoci! Ače, akana šunđen i hula! So mislinena?”
A on phende: “Zaslužini te merel!”
Tegani čhungarde le ko muj hem khuvde le dumukhencar. A nesave khuvena le ine šamarke, vaćerindoj: “Hriste, prorokujin amenđe ko khuvđa tut!”


I sar o Petar bešela avri ano boro, ali nakoro leste jekh sluškinja hem phenđa: “Hem tu injanle e Isuseja tari Galileja!”
A o Petar anglo sarijende hovavđa vaćerindoj: “Na džanav sostar vaćereja!”
Kad iklilo angli kapija, dikhlja le jekh aver sluškinja, i phenđa okolenđe kola inele adari: “Akava inele e Isuseja e Nazarećanineja!”
O Petar palem hovavđa hem pana halja sovli: “Na pendžarava adale manuše!”
Na nakhlo but palo adava, okola kola terđona ine adari ale nakoro Petar hem phende: “Tu čače injan jekh olendar! Izdajini tut to vaćeriba!”
Tegani o Petar lelja te vičini prokletstvija upra peste hem te hal pe sovli: “Na pendžarava adale manuše!”
I odmah o bašno đilabđa. Tegani o Petar setinđa pe e Isusesere lafendar: “Angleder so o bašno ka đilabi, trin puti ka hovave da na pendžareja man.” I iklilo taro boro hem zorale runđa.

ស្ដាប់នូវ Matej 26