If you have would like a copy of this version please contact info@davaraudiobibles.org

Text: Lolo New Testament, © 2016, New Tribes Mission
Audio: Lolo Audio New Testament ℗ 2018, Davar Partners International

Lolo New Testament

Mwa enne mmetcheloni muwa unde wagatchile, andimuwa atene a anamakuta na andimuwa atene a aJudewu, kohotchokotchela ndila tchivi yafuna atu hara ira kawande mugwihana mulandu Yesu ira apiwe. Evale aliwa kohommangaga, mudowana, nvaheda governadore Pilatu.


Mwa enne mulombwana Judasi Iskariyoti wenno amugulihile, agaonne ira: <<Yesu umala tongiwa ira apiwe>>, ohotchindja youmbuwela yaye. Liye tukula kobiri 30 da parata dedo damugulihilena liye Yesu, liye dowana wa andimuwa a anamakuta na andimuwa a aJudewu ale ira awelihe. Agaafwanyile, ohowongaga eraga: <<Miyo dihitega muwari moguliha sangiri na mutu ahategileve!>> Evale aliwa kohowakulaga, aliwa ira: <<Hiyo jejo kaniiziwile. Jejo jawo weka!>> Evale mulombwana Judasi Iskariyoti ohovokeda kobiri dile muNyumbani mwa Nabwiya, liye dowaga jaye. Agadowile, ohovimangelelaga, liye kwa.
Mwa enne andimuwa a anamakuta ale kohotukulaga kobiri da parata dile, aliwa kwi: <<Zela mazu anafwanyeya mmalamuloni, kavali wandeya ira kobirila idowe yaheliwe mukaxani mwemo munaveleliwa kobiri, mwasiwa tchi kobiri iguliwena sangiri.>> Kagamanle tchokotchelavo zela kobirile, kohoumbuwelaga zelru, aliwa tukula kobirile, dowa gulana munda mmohi eriwa Munda wa Namaomba Jombwe ira akale masiye owakoyamo atu oza. Nona mundole fiyeda peno unaitaniwa Munda wa Sangiri. Mwa enne kohokwakwanela mazu anno awongile namafiyiheda Jeremiya oira: <<Kohotukula kobiri 30 da parata, peresu yenno yagarateliwe na Ana Izarayeli angasi angasi ira liye aguliwena, aliwa dowa gulana munda wa Namaomba jombwe, nnga mwemo mwadirumele Nabwiya.>>


Yesu agavahediwe mmandani mwa governadore Pilatu, kohomuimelihaga vamentoni vaye. Evale Pilatu ohonfukaga eraga: <<Kodi weyo uli Mwene wa aJudewu?>> Evale Yesu ohowakulaga eraga: <<Nyo gunawonga eni.>> Nomala eno, andimuwa a anamakuta vamohi na andimuwa a aJudewu ale kohoroma munukeda Yesu jengo jidjindji, mbwenye liye kawakunlegeve yengo. Mwa enne Pilatu ohonfukaga, liye ira: <<Kodi weyo kunavwa jengo jatene jeji jinaunukeda atu ji?>> Yesu mbwenye kamuwakunlege nne yofuka imohi yanfuka governadore ule zela mulandu uli watene kamunukeda atu. Evale mulombwana Pilatu ohoroma tikiniheya.


Fwanyeya ira yafiya Pwando ya Mavirelo nnga yenno yanna atu, governadore ule ohokana yolemelela yaye yomukutcha munyakadeya wenno anamwindji kafuna atu musakulra. Eto jaireya atu enne, mukadeya mule mohokala mutu mmohi oiziweya bure, aitaniwa Baraba. Mwa enne atwale kagalive ogumanene evale, Pilatu ohafukaga eraga: <<Nnga nyo munafuna ira dimukutche ani? Dimukutche mulombwana Baraba, owu dimukutche Yesu, wenno unaitaniwa Namatikeliwa?>> Pilatu awongele eno mwasiwa liye ohoiziwa ira atwale kamusumenle Yesu na mwasa wa nrima bahi. Eto fwanyeya ira mulombwana Pilatu agalive nimburo notonga nenne ogaratene, muhiyanaye ohorumihaga milanyo na atu amohiwa ira: <<Mutu wapama uyo kumuirele yabure, umuhiye. Mwasiwa miyo peno morohani dihizuzuma valukulu na mwasa wa mulombwana wenno!>>
Mbwenye andimuwa a anamakuta vamohi na andimuwa a aJudewu ale, kohatujaga anamwindjale ira kamusakulre mulombwana Baraba akutchiwe eto Yesu apiwe. Mwa enne governadore ule ohowelela afuka anamwindji eraga: <<Kodi mwa atu ambinli ala, ofwanelela munanfuna nyo ira dimukutche guvi?>> Aliwa kohowakulaga, aliwa kwi: <<Nnafuna munkutche mulombwana Baraba!>> Pilatu ohafuka akoka eraga: <<Nnga damukutcha mulombwana Baraba, Yesu wenno unaitaniwa Namatikeliwa, dimuirena avi?>> Atene kohoiraga: <<Akomeliwe vamuradini!>> Evale Pilatu ohafuka eraga: <<Mulombwanola kodi unafwanyeyana mulandu nni?>> Mbwenye aliwa kokuwagave na mazu olimbiha keragave: <<Kamukomeleni vamuradini!>>
Mwa enne mulombwana Pilatu agaonne ira kawanda agondjiha anamwindjale na jowonga jaye eto na mwasa oira madugudugu kerave simbwa, ohotukula mahindje, liye hambamo mandaye vamentoni va anamwindji atene kaing'anaga, liye awandela eraga: <<Miyo kadinnavo yaga veva zela sangiri na mulombwanola. Unafuna rumelela sangiri naye gu nyenne nyoka!>> Noira enne, mwindji watene kohowakulaga keraga: <<Sangiri na mutula, nikale na hiyo vamohi na ahimihu!>> Evale Pilatu ohomukutcha Baraba nnga mwafunela atu. Evale ohoruma ira Yesu awaxuliwe. Agawaxuliwe, Pilatu oharuma anyakondwaye eraga: <<Tiyeni, mwankomele vamuradini!>>


Mwa enne anyakondo a governadore kohomutukulaga Yesu, aliwa mudowana palasiyo ya governadore, aliwa agumaniha anyakondo afwiwa, atene aliwa murindja, muhela vari. Kohomuwungulaga jowara jaye jile, aliwa muwariha kapa yofila yagali youmbuwela. Noira enne, koholuwaga kara ya minga, aliwa muwariha mmuruni mwaye eto kohomuhidedihaga murere mmandani mwaye, muwono odjana. Evale kohodowaga, aliwa nkokorelaga eto kampetaga keraga: <<Mwene wa aJudewu oye! Oye! Mwene wa aJudewu oye! Oye!>> Evale komutapelaga mare. Noira enne, kohomuwakaga murere kamuhidedihile atu ule, aliwa roma nkomagana mmuruni. Nomala mpeta eno, kohomuwungula kapa ile, aliwa muwariha jowara jaye. Evale kohomutukulaga, aliwa mudowagana ira kankomele vamuradini.


Mwa enne aliwa kamudowagana nimburo nafuna atu dowa mukomela nne, kohongumanana mulombwana mmohi eni nkuda Sirene aitaniwa Simawu. Kaganfwanyile mulombwanole, kohomukanyihedaga, aliwa mutukuliha muradi wenno afuna komeliwavo Yesu. Evale kohofiya nimburo naitaniwa Gologota. Gologota ku wonga Nimburo na Nigaragazu na mutu. Kagafiyile wewule, kohotukulaga vinyu ogumaniha na jimohi jiwa johoziva pama, aliwa nvaha ira ang'we. Mbwenye funa nvaha Yesu, agalawihile vang'onove kang'wilege. Evale aliwa kagamanle mukomela vamuradini, kohoganaga jowara jaye muwari mosakanya jogu ya ngari. Noira enne, kohogaratigi vevale, aliwa muing'anelaga. Mwa enne kohotukula isi tabwa, aliwa lrembavo muselu kamutongilena atu oira: ULA GU YESU, MWENE WA AJUDEWU. Kagalrembile eno, kohodowa aliwa komela vazulu va muradi vale, muruni waye.

Kohokalawo eto ambava ambinli kakomeliwe vamohi na Yesu, mmohi ikukuru ya muwononi odjana, mmohiwa ikukuru ya muwononi oromana, Yesu afwanyeya vari. Mwa enne atu kaviraga mundila kohoromaga mpeta Yesu, kawuzuzaga miru diwa kamuruwanaga keraga: <<Kahi wenne wawongetcha ira unowanda bwanyula Nyumba ya Yehova eto umange muwari mwa malambo mararu bahi? Kavivune eto! Eto akala uli Mwana Mulugu, katita vamuradini vili we vo!>> Na makalelo amohive kohokalawo eto andimuwa a anamakuta na anamafundjiha malamulo na andimuwa a aJudewu kazile, roma mpetaga Yesu kawongaga keraga: <<Uluwole, gwenno aavulumutchetcha atu oindjiva. Peno eto kanawanda vivulumutcha. Akala liye gu Mwene wa aIzarayeli, atite vamuradini vili liye vale tchineneva. Atita, hiyo nnomuroromela. Liye eto amunyindela Mulugu eto awongetcha ira: <Miyo dili Mwana Mulugu.> Akala Mulugu unonfuna, Mulugu akale wenno unafuna nvunela tchineneva.>> Eto ambava ambinli kakomeliwe vamohi na Yesu ale, na aliwene kohoromaga mpeta na makalelo amohive.


Noira enne, wohozaga isi ilukulu ilambo yatene, romela pandi ya 12 ora fiyeda 15 ora. Mwa enne yagafiyile pandi ya 15 ora ile, Yesu ohowongaga na mazu okuwa eraga: <<Eli, Eli, lama sabatani?>> Yenno inatapulela: <<Mulugu waga, Mulugu waga, mudihiyele nni?>>
Agairile enne, atu kaligi evale, kaganvwile eraga: <<Eli, Eli>>, mohoiziwa yengo tchivi, kohowongaga ira: <<Unamuitana Eliya.>> Evale mutu mmohi ohotamangaga, dowela ntondje, liye nyetiha na vinyu ohokala pama nnga vinagere, liye hela murereni, dowa nvaha Yesu ira ang'we. Afwaye amohi mbwenye kohowongaga keraga: <<Kamuhiyeni, nimuone akala Eliya unamuitana liye unoza anvulumutche!>> Noira enne, Yesu ohowelela wonga akoka no kuwa undimuwa, liye velela muzimu waye.
Mwa tempu yenne yakwa Yesu kurtina ilukulu yafwanyeya mmba mwa Nyumba ya Yehova yohokauwaga vari na vari roma zulu fiyeda vati. Eto ilambo yatene yohoinainaga eto mabwe kohotweyaga. Masiye kohuleyaga eto atu adjindji otchenihiwa kakwile, kohovenyaga mokwani. Yesu agavennye mokwani, atu kavenyile mokwani ale kohodowa sidadi yotchenihiwa ya Jeruzalemu, aliwa akumelelaga atu adjindji.
Fwanyeya ira mundimuwa wa anyakondo vamohi na anyakondo afwaye atene kamuing'anelaga Yesu, kagaonne indarandara ya ilambo vamohi na jatene jaireyaga, kohorendjeyaga valukulu, aliwa roma ova eto kohowongaga keraga: <<Mutula, mwa ibaribari ali Mwana Mulugu.>>
Eto vevale vohokalaga ahiyana adjindjene kamukamihedetcha, anno kamuharile Yesu kuma Galileya. Ahiyanale koing'anaga vevo vakomeliwe Yesu, kagali olapela wene. Muwari mwa ahiyanale, vofwanyeyaga Mariya nkuda Madala, Mariya mmaye Tiyagu na Joze, vamohi na mwadi Zebedewu.


Mwa enne nzuwa niviraga, ohokalawo namamuhara wa Yesu mmohi wenno ali orayela, wa sidadi ya Arimateya, aitaniwa Joze. Liye ohodowaga wa Pilatu, nvepa ira amurumelihe maningo a Yesu. Noira enne, Pilatu ohomurumelihaga ira atukule. Mwa enne mulombwana Joze ohovenyaga, liye dowa tukula maningo a Yesu, liye bulruwalri na nguwo yofulriwa pama, yosakanyiwa na usalru wapama, liye dowa mukoya nifukweni nafuna liye koyiwa, wewo wali wahanarome koyiwa mutu. Nifukwe namukoyile liye nne nali nifukwe natimbihile liye nibweni. Mwa enne agamukoyile wewule, ohopingiritchaga nibwe nlukulu, liye dowa funganawo. Noira enne, ohomaruwa, liye dowaga. Mbwenye Mariya nkuda Madala vamohi na Mariya mmohiwa ule, kohodowaga, aliwa garati sogolro wa nifukwe nne.

Mmetcheloni muwa, ku wonga nagavirile siku nosakanyeda jatene ja sabado, andimuwa a anamakuta vamohi na aFarizewu kohogumanelaga vamentoni va Pilatu. Aliwa kwi: <<So Governadore, hiyo nihiumbuwela yengo imohi. Maliba nyenga ule ahanakwe, ohowonga ira: <Siku naneraru, nnovenya mokwani!> Mwa eno, inafwanela mwaarume atu ira kadowe kaing'anelege pama nifukwe nne, fiyeda malambo mararu. Tawiha ira anamamuharaye anavenye, kadowe kabe maningo aye ale, kakuma evo kaawandelege atu ira: <Uhuvenya mokwani.> Eto jaireya eno, yonama yenno inokala ilukulu kwaranya yonama yoroma ile!>> Evale mulombwana Pilatu ohowongaga eraga: <<Mwaatukule anyakondo ala ira mudowe mwaing'anelege nifukwe nne na makalelo nnga muiziwile nyo!>>
Mwa enne kohodindaga nibwe nafungana atu nifukweni ule eto kohahiyawo agwarda ira kaing'anelege nifukwe nne.

ស្ដាប់នូវ Matewuji 27