ROME 13
13
Wanglamlampa Phangme me Ngohtüoh
1 #
Tit 3.1; 1 Pet 2.13-14; Det 8.15; Jn 19.11. Kahta lili wanglam lampalan phangme ngohtüoh; hangjingne Kahwang mepu yejepute wanglam lampa ao-o yenang; hüyange ngaiye ngohpu wanglam lampalan Kahwange leye ngai. 2Tüokhei aowe tüopa wanglam lampa tien yongnang, Iye Kahwange leye tamyangpupa tien-e yongnang; tüokhei aoyinne tien-e yongnang iman-e yoi nying nyingke ngaophünpu ngelak. 3#1 Pet 2.14.Hangjingne wanglam lampalan toimei jingne nyamlak yenang, hüpoi toimeng jingne nyamlak ngohnang. Nange wanglam lampate yenyampe ngohhu nangkü a? Hanghe ümei hatüo lingtüoh, hüyange nange I mepu monghahpu tüolak. 4#1 Thes 4.6.Hangjingne nang tangte ümei jingne Kahwang mepu I shaoshanpa ja ngohnang. Hüpoi nange hanghe ümeng tüopa lingma-a, nyamyah. Hangjingne jajang jawe Iye yanglow yejon; hangne Kahwang mepu I shaoshanpa ja; mongshih ngaiye ümeng lingpalante phuh hahpa ngohnang. 5Tüokhei Kahwang mongshih ngaipu te nyampu ne shaha yeje, hüpoi numan juteih mongjang jingne-o numan-e wanglam lampa phangme ngohyah. 6Hangjingne tüojingne numan-e kahngin phanang; hangjingne iman-e tüopa toi yelakpe linge, Kahwang toishao me shaoshanpalan ngohnang. 7#Mt 22.21; Mk 12.17; Lk 20.25.Aote hanghe phalak ne ngoh, imante üshei phatüoh; kahngin phalak ne ngohpupate kahngin phatüoh, poon phalak ne ngohpate poon phatüoh; aote iyeshelakne ngoh, Ite iyeshetüoh, hüyange aote yihnoon hüolak ne ngoh, Ite yihnoonpu hüotüoh.
Jawe Jate Teikentüoh
8 #
Mt 22.39-40; Rom 13.10; Gal 5.14; Kol 3.14; Jas 2.8. Jawe japhei teikenlak tokte kaiye, ao phei-o pheeisea tahnang. Hangjingne aowe yoi yupite kennang Iye ngaokeng ngaine tamyangki. 9#Woi 20.13-14; Hin 5.17-18; Lev 19.18; Mt 19.19.Tüokhei, “Nange phwngngampu toi tahling, nange tahtoi, nange tahkuh, nange tahwau;” hüyange üne-o ngaokeng ütam ngohma-a, “Nange nang yupipate yoike kenyah,” tüopa ngaome üshei omme ngohnang. 10#Mt 22.39-40; Rom 13.8; Gal 5.14; Jas 2.8.Kenpuwe yupite hanghe ümengo yeling ja, tüokhei kenpuwe ngaokeng ütahte ngaine tamnang.
11 #
Eph 5.14; 1 Thes 5.6. Hüyange sha-a shiye ngohpu mepu lüolak ngoiteki she numan-e tüopa wengtuh ju shing. Hangjingne teman-e üwangne meng ngohpupa phei-a sha-a yinyepuwa ünyei teman shongte owe ngohnang. 12#1 Jn 2.8; Eph 5.11; 1 Thes 5.8.Wangnyak nangjange taiteki, wangngai owe peiteki. Tüokhei teman-e wangnyak toishao tüotüoh, hüyange wangngai wehok o tümyah. 13#1 Thes 4.12; Gal 5.19-21.Teman-e nyihning kih-e ngaoting iye kemhah; phayangpa hei yuwe jokpume yeje, iymei lengpu hei yejaoyeshapu me yeje, teelapu hei aohüng müktakpu me yeje. 14#Gal 3.27; 5.16.Tüonanlei numan-e Youngwanpa Jesu Khrista oyah, hüyange meiye lengpu ngaitamlak jingne mei tahteih.
اکنون انتخاب شده:
ROME 13: KONYBSI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.