Tawˆ kʼai ve li‸ 27
27
Tuˉ tanˇ kuiˬ
1Aˍhkeˇshaˍ suhˆ hta‸ yuˬ leh tuˉ tanˇ kuiˬ hta‸ gʼa te ve yoˬ. Oˇ ve lehˬ, awˇ ceˍ awˇ hpawˇ hkʼa hui gʼa cawˬ piˇ leh, zuhˬ hpawˇ 5 shaw‸, kʼehˬ hpawˇ 5 shaw‸, mvuh hpawˇ 3 shaw‸ gʼa cawˬ piˇ ve yoˬ. 2Tuˉ tanˇ kuiˬ chi ve awˬ hkʼoˆ, awˇ ceˍ awˇ hpawˇ lo awˬ hkaw awˇ maˬ hta‸ suhˆ teˇ baˉ ceh tiˉ gʼa yuˬ te leh, oˇ ve hta‸ kuiˇ hkʼa deh‸ gʼa oˍ taˍ ve yoˬ. 3Hkʼaw‸ laˉ keu kuiˬ mu‸ hkʼu, hkʼaw‸ laˉ toˆ yuˬ tuˬ hkehˇ pe le, kawˆ hkehˇ, luˉ kʼu, iˉ kaˆ keu tsuhˇ kuiˬ hkehˇ, chi ve hkʼa peu-eˬ hta‸ kuiˇ yuˬ leh gʼa te taˍ ve yoˬ. 4Tuˉ tanˇ kuiˬchi ve awˬ ceˬ awˇ ceˍ lo kuiˇ yuˬ leh awˬ hkʼeh‸ te peuˬ hkʼaw‸ nawˉ, 5suhˆ taˬ keu taˆ hpeh‸ tuˬ kuiˇ la‸ kawˬ awˇ maˬ gʼa te tcuhˉ naw‸ piˇ taˍ ve yoˬ. 6Aˍhkeˇshaˍ suhˆ yuˬ leh suhˆ taˬ teˇ hpaˍ te peuˬ hkʼaw‸ nawˉ, kuiˇ hkʼa deh‸ gʼa oˍ taˍ ve yoˬ. 7Suhˆ taˬ chi teˇ hpaˍ lehˬ, la‸ kawˬ oˇ ve teˇ hpaˍ awˬ hkʼaw lo gʼa shi keu taˍ ve yoˬ. 8Tuˉ tanˇ kuiˬ awˬ hkʼaw hpawˇ lo, awˬ kʼoˍ gʼa cawˬ piˇ ve yoˬ. Hkʼaw hkʼoˆ lo nawˬ hta‸ awˬ hkʼaˇ beˆ maˍ piˇ taˍ ve hkʼe, nawˬ hkʼa deh‸ gʼa te ve yoˬ.
Aˉ po kʼo bon yehˬ hta‸ ko tuˬ awˬ hkʼaˇ
9Aˉ po kʼo bon yehˬ hta‸ hkʼa deh‸ gʼa ko taˍ ve yoˬ. Bon yehˬ awˬ hawˉ hpawˇ lo, da‸ jaˇ ve hpa 100 shaw‸ yuˬ leh gʼa ko taˍ ve yoˬ. 10Oˇ kaˬ lo kuiˇ la‸ kawˬ nyiˇ chi maˬ cawˬ ve kuiˇ yehˬ hkuiˉ daw nyiˇ chi maˬ gʼa duˇ ti taˍ leh, awˬ hkaˆ leh kʼuˉ kʼaweh‸ hta‸ hpu gʼa yuˬ te taˍ ve yoˬ. 11Bon yehˬ awˬ na hpawˇ lo htawˇ oˇ ve hkʼa shuˍ gʼa te taˍ ve yoˬ. 12Mvuhˇ nyi kʼehˬ hpawˇ lo, 50 shaw‸ zuhˬ ve hpa gʼa yuˬ ko taˍ ve yoˬ. Oˇ kaˬ lo la‸ kawˬ teˇ chi maˬ cawˬ ve yehˬ hkuiˉ daw teˇ chi maˬ gʼa duˇ ti taˍ ve yoˬ. 13Bon yehˬ mvuhˇ nyi tawˆ hpawˇ lo htawˇ, 50 shaw‸ zuhˬ ve hpa gʼa yuˬ ko taˍ ve yoˬ. 14Bon yehˬ taˍ meu‸ hpe‸ teˇ hpawˇ lo yehˬ hkuiˉdaw 3 maˬ duˇ ti leh, 15 shaw‸ zuhˬ ve hpa gʼa yuˬ ko taˍ ve yoˬ. 15Bon yehˬ taˍ meu‸ hpe‸ awˬ nu ve teˇ hpawˇ lo htawˇ, oˇ ve hkʼa shuˍ gʼa ko taˍ ve yoˬ. 16Taˍ meu‸ hpe‸ hta‸ ko tuˬ ve lehˬ, awˬ sheuˉ nawˉ-ehˍ, nyiˉ-ehˍ, nyi naˆ meuˉ-ehˍ cawˬ leh nyi sha jaˇ ve hpa 20 shaw‸ hta‸ yehˬ hkuiˉ daw awˇ maˬ duˇ ti leh gʼa ko taˍ ve yoˬ. 17Bon yehˬ hta‸ hkʼa caw zuhˇ lo cawˬ taˍ ve yehˬ hkuiˉ daw oˇ ve teˇ hpaˍ awˬ hkʼoˆ lo, hpu taˬ, kuiˇ la‸ kawˬ leh hpu kʼuˉ kʼaw-eh‸ gʼa te keu taˍ ve yoˬ. 18Bon yehˬ hta‸ ko taˍve vanˇ lehˬ, zuhˬ hpawˇ 100 shaw‸, kʼehˬ hpawˇ 50 shaw‸, mvuh hpawˇ 5 shaw‸ gʼa cawˬ piˇ leh, kuiˇ la‸ kawˬ te keu taˍ ve da‸ jaˇ ve hpa yuˬ leh gʼa ko taˍ ve yoˬ. 19Aˉ po kʼo bon yehˬ leh vanˇ ko tuˬ awˬ pon loˍ ve awˬ ceuˬ teˇ hpaˍ hkʼa peu-eˬ hta‸ kuiˇ ceh tiˉ yehˇ leh gʼa te ve yoˬ.
Kawˆ faiˇ hta‸ ha‸ shaˉ ve
20Aˬ miˍ kawˆ faiˇ awˬ pon tuˉ tuˬ loˍ ve shaˍlonˍ chu hta‸, Iˉsaˍreˍlaˆ chaw teˇ hpaˍ hkʼa deh‸ ca leh nawˬ geh yuˬ laˬ tuˬ gʼa hto piˇ taˍ ve yoˬ. 21Ka ti‸ shaˉ caˆ ta kʼoˍ teh taˍ ve bawehˇ awˬ baˬ hpawˇ, ngaˬ chehˇ taˍ kuiˬ bawehˇ lonˉ hkʼaw, Aˍronˍ leh yawˇ ve yaˇ teˇ hpaˍ lehˬ, mehˆ muiˉ naˆ la htaˇ ka‸ te leh mvuhˇ htiˇ la htaˇ hkʼa gaˬ, ngaˬ mehˆ gʼuˇ suhˍ kawˆ faiˇ hta‸ gʼa nyi ha‸ shaˉ taˍ ve yoˬ. Chi ve lehˬ, Iˉsaˍreˍ laˆ chaw teˇ co peuˬ teˇ co gʼa ha‸ shaˉ taˍ tuˬ ve awˬ liˇ teˇ maˬ hpeh‸ ve yoˬ.
اکنون انتخاب شده:
Tawˆ kʼai ve li‸ 27: LHBE
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Lahu Bible Edited © Thailand Bible Society and Bible Society of Myanmar, 2010, 2020.