Tawˆ kʼai ve li‸ 20
20
Awˬliˇtawˇhkawˇ 10 hkawˇ
1Gʼuiˬsha lehˬ, tawˇ chi teˇ hpaˍ hta‸ kʼoˆ taˍ ve yoˬ. 2Ngaˬ lehˬ, shu ceˬ shu hpfuhˆ te chehˇ ve nawˬ hui teˇ hpaˍ hta‸ Eˇjiˇtu‸ mvuhˇmiˬ hkʼaw shiˍ tawˆ la piˇ taˍ ve nawˬ hui ve Gʼuiˬsha hpeh‸ ve yoˬ.
3Ngaˬ awˬ hkʼoˆ awˬ kaˍ awˬ nu gʼuiˬsha hta‸ nawˬ hui oˉ kʼoˍ maˇ gʼa pui.
4Shaˉ ho‸ hta‸ maˇ gʼa te. Mvuhˇ naw ma hkʼoˆ leh miˬguiˬ hkʼoˆ cawˬ ve awˬ ceuˬ hta‸ shuˍ da‸ ve shaˉ ho‸ hta‸ maˇ kʼoˆ, iˉ kaˆ hkʼaw cawˬ ve awˬ ceuˬ hta‸ shuˍ da‸ ve shaˉ ho‸ hta‸ maˇ kʼoˆ, nawˬ hui maˇ gʼa te. 5Shaˉ ho‸ oˇ hkʼe ve teˇ hpaˍ hta‸ nawˬ hui oˉ kʼoˍ maˇ gʼa pui. Awˬ lawn kʼo, ngaˬ lehˬ nawˬ hui ve Gʼuiˬsha hpeh‸ leh, awˬ nu ve gʼuiˬsha teˇ hpaˍ hta‸ nyi ma maˇ cawˇ. Ngaˬ hta‸ canˇ ve chaw hta‸, yawˇ hui ve yaˇ shehˆ co, awˇ co hkʼa gaˬ ngaˬ ciˍ yanˍ piˇ tuˬ yoˬ. 6Ya‸ hkʼaˇ, ngaˬ hta‸ ha‸ leh ngaˬ ve awˬliˇtawˇhkawˇ hta‸ na yuˬ chehˇ ve chaw hui ve yaˇ awˬ hinˉ awˬ meunˍ co-e hkʼa gaˬ, ngaˬ ha‸ shaˉ leh awˬ bon na‸ piˇ tuˬ yoˬ.
7Gʼuiˬsha ve awˬ meh hta‸ nawˬ hkʼe leˇmaˇ gʼa kʼoˆ guiˇ. Oˇ hkʼe te ve chaw hta‸ ngaˬ ciˍ yanˍ piˇ tuˬ yoˬ.
8Shinˉ nyi teˇ nyi lehˬ, da‸ kehˬ ve awˬ nyi hpeh‸ ve hta‸ nawˬ hui gʼa dawˇ nawˇ taˍ ve yoˬ. 9Nawˬ hui kanˉ te caˇ tuˬ ve awˬ yanˇ hkaw‸ nyi cawˬ ve yoˬ. 10Ya‸ hkʼaˇ, suhˍ nyi teˇ nyi lehˬ da‸ kehˬ ve shinˉ nyi hpeh‸ ve yoˬ. Oˇ ve teˇ nyi hkʼaw, nawˬ hui leh nawˬ hui ve yaˇ paˍ yaˇ miˇ teˇ hpaˍ, nawˬ hui ve awˬ ceˬ paˍ awˬ ceˬ ma teˇ hpaˍ, nawˬ hui ve ceˇ caˬ leh, nawˬ hui geh chehˇ taˍ ve hkehˉ chaw teˇ hpaˍ, te‸ chiˉ kanˉ maˇ gʼa te. 11Awˬ lawn kʼo, awˬ nyi chi ve hkaw‸ nyi hkʼaw, ngaˬ lehˬ miˬguiˬ mvuhˇ naw, laˇ tsuhˇ gʼuiˬ leh oˇ ve teˇ hpaˍ hkʼaw hkʼa cawˬ ve hkʼa peu-eˬ hta‸ te hpanˍ peuˬ leh, suhˍ nyi teˇ nyi htaˇ gʼaˇ jehˇ taˍ ve yoˬ. Hkʼe te leh, ngaˬ lehˬ awˬ nyi chi ve teˇ nyi hta‸ awˬ bon na‸ piˇ leh da‸ piˇ kehˬ piˇ taˍ ve yoˬ.
12Gʼuiˬsha nawˬ hui hta‸ piˇ laˇ ve mvuhˇmiˬ hkʼaw co zuhˬ ha zuhˬ gʼa chehˇ tuˬ, nawˬ ve awˬ pa awˬ e hta‸ yawˆ yawˆ yan yan te-o.
13Nawˬ chaw hta‸ maˇ gʼa tiˇ pehˍ.
14Nawˬ haˉ chawˇ haˉ paˆ maˇ gʼa te.
15Shu ve mawˇ hta‸ nawˬ maˇ gʼa hkʼawˇ.
16Shu hta‸ maˇ heˆ heˆ ve shaˉ hkiˆ nawˬ maˇ gʼa hkanˍ.
17Shu ve mawˇ hta‸ nawˬ maˇ gʼa sheˉ lai. Shu miˇ ma hta‸ maˇ kʼoˆ, shu ve awˬ ceˬ paˍ awˬ ceˬ ma, shu ve ceˇ caˬ leh shu ve mawˇ jeˬ hkʼaˬ ve teˇ ceuˬ hta‸ maˇ kʼoˆ, nawˬ maˇ gʼa sheˉ lai, teh‸ Gʼuiˬsha kʼoˆ ve yoˬ.
Iˉsaˍreˍlaˆ chaw kawˆ ve
18Iˉsaˍreˍlaˆ chaw teˇ hpaˍ lehˬ, mvuhˇ tawˍ mvuhˇ htehˆ ve, mvuhˇ tiˉ po-e‸ ba ve, behˬheh ma hkawˇ bvuhˬ tawˆ la ve, leh hkʼaw hkʼoˆ lo mvuhˇ hkʼawˇ hta‸ gʼa mawˬ ve teˇ yanˇ yawˇ hui kawˆ jaˇ leh vuiˇ kuiˬ lo huˉ taˍ ve yoˬ. 19Hkʼe te leh yawˇ hui Moˉseˍ hta‸ kʼoˆ piˇ ve, Nawˬ awˬ to ngaˬ hui hta‸ tawˇ yaw laˇ-oˆ. Ngaˬ hui na yuˬ tuˬ yoˬ, teh‸ kʼoˆ ve yoˬ.
20Oˇ htaˇ Moˉseˍ lehˬ, Taˇ kawˆ. Nawˬ hui yawˇ hta‸ kawˆ puiˉ ve nyi ma cawˬ la leh, venˇbaˆ maˇ gʼa te tuˬ, Gʼuiˬsha nawˬ hui hta‸ lawˇ nyi chehˇ ve yoˬ, teh‸ yawˇ hui hta‸ kʼoˆ piˇ ve yoˬ. 21Chaw oˇ ve teˇ hpaˍ vuiˇ kuiˬ lo huˉ taˍ ve yoˬ. Moˉseˍ lehˬ Gʼuiˬsha chehˇ taˍ kuiˬ moˬ awˬ paˇ lo jiˆ kʼai ve yoˬ.
Tuˉ tanˇ kuiˬ awˬ lawn
22Oˇ htaˇ Gʼuiˬsha Moˉseˍ hta‸ kʼoˆ piˇ ve, Ngaˬ mvuhˇ naw hkʼoˆ chehˇ taˍ leh tawˇ yaw laˇ chehˇ ve hta‸ nawˬ hui gʼa mawˬ peuˬ. 23Nawˬ hui ngaˬ hta‸ oˉ kʼoˍ pui ve hkʼe, hpu shi yuˬ te taˍ ve awˬ kaˍ awˬ nu gʼuiˬsha teˇ hpaˍ hta‸ oˉ kʼoˍ maˇ gʼa pui. 24Je‸ hta‸ yuˬ leh nawˬ hui ngaˬ awˬ pon tuˉ tanˇ kuiˬ gʼa te tuˬ yoˬ. Oˇ ve awˬ hkʼoˆ lo nawˬ hui ve nuˇ, yawˬ teˇ hpaˍ hta‸ yuˬ leh ngaˬ hta‸ gʼa tuˉ tanˇ laˇ ve yoˬ. Nawˬ hui ngaˬ hta‸ oˉ kʼoˍ pui tuˬ kʼoˆ piˇ taˍ ve chehˇ kuiˬ teˇ kaˬ le le lo, ngaˬ nawˬ hui geh laˬ leh, nawˬ hui hta‸ awˬ bon na‸ laˇ tuˬ yoˬ. 25Nawˬ hui haˉ pui shiˍ hta‸ yuˬ leh ngaˬ awˬ pon tuˉ tanˇ kuiˬ te ve teˇ yanˇ, dawˆ hkoˇ taˍ ve haˉ pui shiˍ hta‸ maˇ gʼa yehˇ. Nawˬ hui haˉ pui shiˍ hta‸ tcuhˇ yuˬ htawˆ ve kʼo, haˉ pui shiˍ oˇ ve hta‸ ngaˬ kʼaw‸ yehˇ maˇ hpeh‸. 26Ngaˬ ve tuˉ tanˇ kuiˬ hta‸ go maˇ gʼa te tcuhˉ taˍ. Oˇ hkʼe te ve kʼo, go oˇ ve awˬ hkʼoˆ lo nawˬ hui taˆ-e chehˇ ve teˇ yanˇ, nawˬ hui awˬ kʼu nyi hpeh‸ la leh gʼa ya‸ taw tuˬ yoˬ.
اکنون انتخاب شده:
Tawˆ kʼai ve li‸ 20: LHBE
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Lahu Bible Edited © Thailand Bible Society and Bible Society of Myanmar, 2010, 2020.