Tawˆ kʼai ve li‸ 10
10
Paˉ ce‸ hkʼa biˇ tawˆ la ve
1Oˇ ve hkʼaw‸ nawˉ, Gʼuiˬsha Moˉseˍ hta‸ kʼoˆ piˇ ve, Jawˇmawˇ geh kʼai-o. Ngaˬ lehˬ jawˇmawˇ leh yawˇ ve a ma‸ lonˉ teˇ hpaˍ hta‸ nyi ma heh la piˇ taˍ peuˬ ve yoˬ. Yawˇ hui mehˆ gʼuˇ suhˍ anˇ tuˬ awˬ heˆ teˇ hpaˍ gʼa te maˍ piˇ tuˬ awˬ pon maˇ kʼoˆ, 2ngaˬ Eˇjiˇtu‸ chaw hui hta‸ hkʼaˬ hkʼe te ciˍ yanˍ piˇ taˍ ve awˬ lawn, nawˬ ve awˬ yaˇ awˬ duˬ awˬ hawehˍ awˬ haˆ teˇ hpaˍ hta‸ hto maˍ piˇ leh, ngaˬ Gʼuiˬsha hpeh‸ ve hta‸ nawˬ hui gʼa shiˍ tuˬ awˬ pon maˇ kʼoˆ, ngaˬ yawˇ hui ve nyi ma hta‸ chi hkʼe heh la piˇ taˍ ve yoˬ, teh‸ yawˇ hta‸ kʼoˆ piˇ ve yoˬ.
3Hkʼe te leh, Moˉseˍ leh Aˍronˍ jawˇmawˇ geh kʼai leh kʼoˆ ve, Heˍbrehˇ chaw hui ve Gʼuiˬsha chi hkʼe kʼoˆ ve yoˬ. Nawˬ lehˬ ngaˬ ve tawˇ hta‸ maˇ na leh, hkʼaˬ maw maw te chehˇ tuˬ sheˍ ve le. Ngaˬ ve chaw teˇ hpaˍ ngaˬ hta‸ oˉ kʼoˍ ca pui hpeh‸ tuˬ, yawˇ hui hta‸ hpehˇ piˇ-oˆ. 4Nawˬ lehˬ, ngaˬ ve chaw hta‸ maˇ hpehˇ piˇ ve kʼo, shawˉ pawˍ nawˬ ve mvuhˇmiˬ hkʼaw ngaˬ paˉ ce‸ hkʼa biˇ tawˆ la piˇ tuˬ yoˬ. 5Paˉ ce‸ oˇ ve teˇ hpaˍ maˇ jaˇ ve pa taw, miˬguiˬ hkʼoˆ biˇ sheˆ kʼai tuˬ yoˬ. Vaˇ shiˍ ce la htaˇ maˇ luˬ leh cawˬ taˉ ve awˬ ceuˬ hkʼa peu-eˬ hta‸ yawˇ hui te luˬ te sheˆ piˇ tuˬ yoˬ. 6Paˉ ce‸ oˇ ve teˇ hpaˍ lehˬ, nawˬ ve hawˉ yehˬ, nawˬ ve a ma‸ lonˉ teˇ hpaˍ ve yehˬ, leh nawˬ ve chaw teˇ hpaˍ ve yehˬ hkʼaw hkʼa biˇ lo‸ la tuˬ yoˬ. Nawˬ ve awˬ puˍ awˬ pi hui ka‸ chi hkʼe ve awˬ ceuˬ hta‸ teˇ pawˆ ka‸ maˇ gʼa mawˬ jaw sheˍ, teh‸ yawˇ hta‸ kʼoˆ piˇ ve yoˬ. Oˇ hkʼe kʼoˆ piˇ peuˬ hkʼaw‸ nawˉ, Moˉseˍ jawˇmawˇ geh tawˆ kʼai ve yoˬ.
7Oˇ htaˇ jawˇmawˇ ve a ma‸ lonˉ teˇ hpaˍ kʼoˆ ve, Chaw chi hpaˇ ngaˬ hui hta‸ hkʼaˬ maw maw te sho‸ sha‸ laˇ tuˬ sheˍ ve le. Iˉsaˍreˍlaˆ chaw chi teˇ hpaˍ, yawˇ hui ve Gʼuiˬsha hta‸ oˉ kʼoˍ gʼa ca pui tuˬ, yawˇ hui hta‸ hpehˇ piˇ-oˆ. Eˇ jiˇ tu‸ mvuhˇmiˬ luˬ kʼai chehˇ ve hta‸ nawˬ maˇ shiˍ laˇ, teh‸ jawˇmawˇ hta‸ kʼoˆ piˇ ve yoˬ.
8Hkʼe te leh, yawˇ hui Moˉseˍ leh Aˍronˍ hta‸ jawˇmawˇ geh kʼaw‸ shiˍ veu laˇ leh, Nawˬ hui ve Gʼuiˬsha hta‸ oˉ kʼoˍ ca pui tuˬ tawˆ kʼai loˬ. Ya‸ hkʼaˇ, a shu teˇ hpaˍ kʼai tuˬ ve le, teh‸ yawˇ huiˉ maˬ hta‸ na nyi ve yoˬ.
9Oˇ htaˇ Moˉseˍ kʼoˆ ve, Ngaˬ hui hkʼa peu-eˬ kʼai tuˬ yoˬ. Ngaˬ hui ve yaˇ paˍ yaˇ miˇ, nuˇ, yawˬ, aˉ che‸ chi hkʼa peu-eˬ ve hta‸ shiˍ leh kʼai tuˬ yoˬ. Awˬ lawn kʼo, ngaˬ hui bon pawehˇ lonˉ teˇ maˬ gʼa te tuˬ yoˬ, teh‸ jawˇmawˇ hta‸ kʼoˆ piˇ ve yoˬ.
10Jawˇmawˇ kʼaw‸ kʼoˆ ve, Nawˬ hui ve yaˇ miˇ yaˇ nehˬ teˇ hpaˍ hta‸ shiˍ kʼai maˇ hpeh‸, teh‸ Gʼuiˬsha ve awˬ meh hta‸ cuˇ leh ngaˬ hkanˍ ve yoˬ. Nawˬ hui lehˬ, ngaˬ hta‸ kʼaw‸ hpfuhˆ tuˬ te chehˇ ve yoˬ. 11Nawˬ hui oˇ hkʼe te maˇ hpeh‸. Nawˬ hui kʼai gaˇ tehˬ ve kʼo, hawˉ hkʼaˆ paˍ teˇ hpaˍ ceh tiˉ kʼai leh Gʼuiˬsha hta‸ oˉ kʼoˍ ca pui-o, teh‸ Moˉseˍ hta‸ kʼoˆ piˇ peuˬ hkʼaw‸ nawˉ, yawˇ huiˉ maˬ hta‸ gʼa‸ kʼoˬ piˇ ve yoˬ.
12Oˇ htaˇ, Gʼuiˬsha Moˉseˍ hta‸ kʼoˆ piˇ ve, Vaˇ shiˍ ce la htaˇ maˇ luˬ leh cawˬ taˉ ve awˬ ceuˬ hkʼa peu-eˬ ve hta‸ paˉ ce‸ maˇ maˇ tawˆ la leh te luˬ piˇ tuˬ, Eˇjiˇtu‸ mvuhˇmiˬ hkʼoˆ lo nawˬ ve la‸ sheh che peu-o, teh‸ Moˉseˍ hta‸ kʼoˆ piˇ ve yoˬ. 13Moˉseˍ htawˇ, Eˇjiˇtu‸ mvuhˇmiˬ hkʼoˆ lo yawˇ ve juˇ fuiˍ taˬ hta‸ che peu ve yoˬ. Oˇ htaˇ, Gʼuiˬsha lehˬ mvuhˇ nyi tawˆ hpawˇ lo ve mvuhˇ haw lonˉ hta‸ tanˇ hkuinˇ tanˇ vanˇ meuˆ laˬ tcuh ve yoˬ. Mvuhˇ htiˇ la htaˇ, mvuhˇ haw oˇ ve lehˬ paˉ ce‸ hkʼa biˇ meuˆ chiˇ veu laˇ ve yoˬ. 14Paˉ ce‸ oˇ ve teˇ hpaˍ lehˬ, Eˇjiˇtu‸ mvuhˇmiˬ hkʼaˬ ti chi ti lo biˇ sheˬ ve yoˬ. Chi taw taw maˇ ve paˉ ce‸ hta‸ chaw yaˇ teˇ pawˆ ka‸ maˇ mawˬ jaw. Awˬ hkʼaw‸ nawˉ htawˇ teˇ pawˆ ka‸ gʼa kʼaw‸ mawˬ tuˬ ve maˇ heˆ. 15Miˬguiˬ chi naˆ ho‸ lehˍ hpeh‸ htaˇ hkʼa gaˬ, yawˇ hui miˬguiˬ hkʼoˆ chehˇ taˍ leh, vaˇ shiˍ ce la htaˇ maˇ luˬ leh cawˬ taˉ ve awˬ ceuˬ hkʼa peu-eˬ ve hta‸ te luˬ te sheˆ piˇ ve yoˬ. Eˇjiˇtu‸ mvuhˇmiˬ hkʼaw cawˬ ve suhˆ cehˬ, iˉ shiˍ cehˬ teˇ hpaˍ awˬ hkʼoˆ lo nawˉ lehˍ ve suhˆ hpa‸ teˇ maˬ ka‸ maˇ cawˬ taˉ ve yoˬ.
16Oˇ htaˇ jawˇmawˇ lehˬ, Moˉseˍ leh Aˍronˍ hta‸ haˆ kuˬ yuˬ leh kʼoˆ ve, Ngaˬ lehˬ nawˬ hui ve Gʼuiˬsha hta‸ maˇ kʼoˆ, nawˬ huiˉ maˬ hta‸ maˇ kʼoˆ te ya‸ jaˇ peuˬ. 17Chi hta‸ pa taw, chi beu‸ ngaˬ ve venˇbaˆ hta‸ hpehˇ laˇ leh, kawˆ tuˬ uiˍ ve awˬ ceuˬ chi hta‸ yuˬ baˬ laˇ tuˬ, nawˬ hui ve Gʼuiˬsha geh bon lawˬ laˇ-oˆ, teh‸ yawˇ huiˉ maˬ hta‸ kʼoˆ piˇ ve yoˬ. 18Hkʼe te leh, Moˉseˍ jawˇmawˇ geh tawˆ kʼai leh, Gʼuiˬsha geh bon lawˬ ve yoˬ. 19Oˇ htaˇ, Gʼuiˬsha lehˬ mvuhˇ nyi kʼehˬ hpawˇ lo ve mvuhˇ haw lonˉ hta‸ gʼaˇ hte‸ kʼaw‸ meuˆ laˬ piˇ lawˬ leh, paˉ ce‸ oˇ ve teˇ hpaˍ hta‸ laˇ tsuhˇ gʼuiˬ nyi hkʼaw meuˆ kʼoˬ piˇ ve yoˬ. Eˇjiˇtu‸ mvuhˇmiˬ hkʼaw paˉ ce‸ teˇ hkeh ka‸ maˇ kʼaw‸ cawˬ taˉ ve yoˬ. 20Ya‸ hkʼaˇ, Gʼuiˬsha lehˬ jawˇmawˇ ve nyi ma hta‸ teˇ pawˆ kʼaw‸ heh la piˇ leh, yawˇ lehˬ Iˉsaˍreˍlaˆ chaw hui hta‸ maˇ hpehˇ piˇ.
Naˆ ho‸ lehˍ hpeh‸ la ve
21Oˇ ve hkʼaw‸ nawˉ Gʼuiˬsha Moˉseˍ hta‸ kʼaw‸ kʼoˆ piˇ ve, Chaw yaˇ shoˆ nyi htawˇ nyi maˇ gʼa law‸ law‸ naˆ ho‸ ve teˇ ceuˬ, Eˇjiˇtu‸ mvuhˇmiˬ hkʼoˆ gaˬ la piˇ tuˬ, nawˬ ve la‸ sheh mvuhˇ hpe lo chiˇ taˍ-o‸, teh‸ Moˉseˍ hta‸ kʼoˆ piˇ ve yoˬ. 22Moˉseˍ yawˇ ve la‸ sheh mvuhˇ hpe lo che peu ve teˇ yanˇ, shehˆ nyi hkʼa gaˬ Eˇjiˇtu‸ mvuhˇmiˬ hkʼa peu-eˬ hkʼaw naˆ ho‸ lehˍ hpeh‸ la ve yoˬ. 23Eˇjiˇtu‸ chaw teˇ hpaˍ teˇ gʼaˇ hta‸ teˇ gʼaˇ mawˬ da‸ maˇ hpeh‸ leh, chaw teˇ gʼaˇ ka‸ yehˬ baˬ lo tawˆ-e maˇ gaˬ ve yoˬ. Ya‸ hkʼaˇ, Iˉsaˍreˍlaˆ chaw hui chehˇ taˍ kuiˬ lo lehˬ, awˬ gʼeuˆ ba lehˍ cawˬ ve yoˬ.
24Oˇ htaˇ, jawˇmawˇ Moˉseˍ hta‸ kuˬ leh, Nawˬ hui ve Gʼuiˬsha hta‸ oˉ kʼoˍ ca pui tuˬ tawˆ kʼai loˬ. Nawˬ hui ve miˇ yaˇ teˇ hpaˍ hta‸ htawˇ shiˍ kʼai-o. Ya‸ hkʼaˇ, nawˬ hui ve ceˇ teˇ hpaˍ hta‸ choˬ kaˬ lo gʼa teh taˉ ve yoˬ, teh‸ yawˇ hta‸ kʼoˆ piˇ ve yoˬ.
25Moˉseˍ kʼoˆ ve, Oˇ hkʼe yoˬ kʼo ngaˬ hui Gʼuiˬsha hta‸ tuˉ tanˇ piˇ tuˬ ve to nuˇ to shaˆ teˇ hpaˍ, nawˬ ngaˬ hui hta‸ gʼa piˇ feu laˇ tuˬ yoˬ. 26Oˇ hkʼe maˇ heˆ kʼo, ngaˬ hui ve ceˇ teˇ hpaˍ hta‸ htawˇ, ngaˬ hui geh gʼa shiˍ kʼai tuˬ yoˬ. Teˇ hkeh ka‸ teh taˉ maˇ hpeh‸. Ngaˬ hui ve Gʼuiˬsha hta‸ tuˉ tanˇ piˇ tuˬ ve to nuˇ to shaˆ hta‸ ngaˬ hui hkʼa deh‸ gʼa leuˆ yuˬ ve yoˬ. Ngaˬ hui oˇ kaˬ lo maˇ gaˬ sheˍ ve ceh ceh, Gʼuiˬsha hta‸ hkʼaˬ hkʼe ve to nuˇ to shaˆ gʼa tuˉ tanˇ piˇ tuˬ ve hta‸ ngaˬ hui maˇ shiˍ, teh‸ jawˇmawˇ hta‸ kʼoˆ piˇ ve yoˬ.
27Gʼuiˬsha lehˬ, jawˇmawˇ ve nyi ma hta‸ kʼaw‸ heh la piˇ leh, yawˇ lehˬ Iˉsaˍreˍ laˆ chaw hui hta‸ maˇ hpehˇ piˇ. 28Oˇ htaˇ, jawˇmawˇ Moˉseˍ hta‸ kʼoˆ piˇ ve, Ngaˬ mehˆ gʼuˇ suhˍ tawˆ kʼai-o. Ngaˬ hta‸ taˇ kʼaw‸ te sho‸ sha‸ laˇ-oˆ. Nawˬ ngaˬ geh teˇ pawˆ kʼaw‸ laˬ ve kʼo, nawˬ gʼa suh tuˬ yoˬ, teh‸ yawˇ hta‸ kʼoˆ piˇ ve yoˬ.
29Moˉseˍ lehˬ, Nawˬ kʼoˆ ve hkʼe ngaˬ nawˬ geh teˇ pawˆ kʼaw‸ laˬ tuˬ ve maˇ heˆ, teh‸ jawˇmawˇ hta‸ kʼoˆ piˇ ve yoˬ.
اکنون انتخاب شده:
Tawˆ kʼai ve li‸ 10: LHBE
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Lahu Bible Edited © Thailand Bible Society and Bible Society of Myanmar, 2010, 2020.