LUKAS Ɓìɓan ɓi ɓi ghɛɓsii lɛ ɓɛɛ konag kì woògh Syeesyee à Ɓɔlɛ ànɛ

Ɓìɓan ɓi ɓi ghɛɓsii lɛ ɓɛɛ konag kì woògh Syeesyee à Ɓɔlɛ ànɛ

Kaàtà à Syeesyee à Ɓɔlɛ ànɛ Lukas à kàngà à nɔ̀ɔ̀tii girig rìkàn ɗi Marikus lɔŋ yɛ̀ɛ Matyoo:

- Ɓi kaàtà à Lukas, Zyaŋ Bàɓtis àrì ŋwaànɛ à syògày Yeesus bee, nnyɛɛ ki ɓàɓtìghà nyi, ajɛ̀m ìnɛn innɛ Yeesus à kɛ̀ɛ min ɓi-reɓ kìtulɛɛ ri mɛ̀fèèghrɛn (3:1--4:13).

- Yɛ̀ɛ à rèsii kìɓan kiǹ à kɛ̀n min asu à rèsì kìsay ki Yeesus à kìghà à Galile, à kakàlì Syeesyee à Ɓɔlɛ à kìlɔ̀ŋ ki Bɛ̀ll, à wɔ̀ɔ̀wɔ̀ɔ̀zì ɓɛ̀roroɓ (4:14--9:50).

- Ɓi ɓɛ̀syàpiìtɛ̀rɛ̀ taànìn ɓìden mɛtin mɛɓɛɛ̀ rì ntɛ̀ɗ ɗì bog à kpaŋ ɓɛ̀syàpiìtɛ̀rɛ̀ ntɛ̀ɗ rì taànìn ɓìden rìtin ɗì taàraa, Lukas à rèsii yɛ̀ɛ Yeesus à pɛsɛɛ a Galile à kɛ̀n a Yorisalɛm. Wɔ̀lɛ ɓi coo kibɔɔŋ ki, Lukas à kpaa ɓìɓan ɓidɛŋ ɓi Marikus à ɓùŋi ɓi fɛlɛ yɛ̀ɛ dàɗkì ì muu Samaritɛŋ ànɛ à rɔɔtɛ̀ngà ǹɗem, nsoò lɛ guŋgum ànɛ à ɓaghà kìyèg, nsoò lɛ man ànɛ à kɛ̀ngà kìyogsaagh ikum wu seŋi... rì ɓiɓan ɓidɛŋ tì yɛɛ̀ rìkɛ̀n ɗi Yeesus à kɛ̀ngà kì ghɛɛ̀ ɓɛ̀-Maata ɓɛɛ̀ Marii.

- Ɓìɓan ɓi Yeesus à kìghà a Yorisalɛm ɓi ri ɓi ɓɛ̀syàpiìtɛ̀rɛ̀ 19 ɓìden 29 à kpaŋ ɓɛ̀syàpiìtɛ̀rɛ̀ 21 ɓìden 38.

- Mɛ̀tɔɓ mɛ Yeesus à sugtɛɛ kìghɛɛ̀ ɓi ziinɛ à kpaŋ yɛ̀ɛ ɓɛ ri nyi ɓiì wolì ɓi kɔrɔs mɛri ɓi ɓɛ̀syàpiìtɛ̀rɛ̀ 22 à kpaŋ 23.

- Lukas à ràtɛɛ kaàtà wìì ɓi ŋwosi Paskà à ɓùŋ kìɓan ki yɛ̀ɛ Yeesus à rèsɛ̀ngà ɓɛ̀yilàg ɓɛdɛŋ ɓi bee inɛ a Emayus, ɗì rìɓɔg ɗi à ɓɔkà aɗyòò.

I ɓɛri lɛ ɓɛ kpaa lɛ kaàtà à Lukas à renaagh lɛɛ̀gwey rì à Marikus ɓi mɛ̀to mɛ ɓiɓan mɛ mɛ ri miì, ki ri girig saaɗ lɛ coo gasɛ̀n ìrì ɓi nyìinyìm à ɓɛ̀kaàtà ɓɛǹ.

Ɓi ɓɛ̀syàpiìtɛ̀rɛ̀ ɓɛ ǹtonto ɓaa rìtumɛ̀n, Lukas à ka rèsii la, rì ɓisuucɛ innɛ à kangà kaàtà wìì, à kɛ̀n beèbɛ̀y à rèsì rìfuu yì ɗi Zyaŋ Bàɓtis ri ɗi Yeesus; nnyɛɛ kpaa yɛ̀ɛ ŋwaà fìtom a Bɛ̀ll à wogsìghà Zakarii à seŋi Zyaŋ rìyalɛ̀n ɗi man ànɛ̀n rì kìɓan ki riyalɛ̀n ɗi Yeesus, à ɓiisɛ̀n fyem fi Marii à ghàɓkà (1:46-55) rì fi Zakarii (1:67-79) rì fi Simeyɔŋ (2:29-32). Lukas à kalii tì girig kìɓan ki ɓɛ̀ɓèŋì-jɔ̀ɔ̀ ɓɛ ɓɛ kɛ̀ngà kìɓɔgsii Yeesus ŋwos anɛ à Yalɛ̀ngà.

I ŋwaà fiɓii ɓìɓan ɓi Lukas à rèsii ɓìn ɓi rìtumɛ̀n ɗi kaàtà ànɛ, àrì lɛ à ghɛn lɛ a kɔ̀nkɔn lɛ a resi lɛ Yeesus àrì Man à Bɛ̀ll à ki ɓa girig kìyalì ki a Isirayɛl, rì lɛ rìyù ɗii ɓi ziinɛ ɗi ri gɛn à kìɓan ɓisuu ɓum ɓɛ̀cèm ɓɛ ɓi ziinɛ.

Lukas a kɔ̀ngi ti lɛ a resi ɓum lɛ Bɛ̀ll àrì rì coo geesɛ̀n ɓi ɓɛg ànɛ a ɓumɓɛ tì ti tì sɛɛtàg fɛlɛ yɛ̀ɛ ɓɛ̀soghàsogha, rì ɓɛ̀yiɓ, rì ɓɛ̀kèn rì ɓum ɓɛ nyìighnyìg. Kìsay ki Nghay à Bɛ̀ll ki ɓuŋɗɛɛ fɛ ɓi kaàtà ànɛ. Kìnyàà, bɔ̀ŋzɛ̀n rì bɔgsɛ̀n ì Bɛ̀ll ɓyɛɛ̀ kɛ̀ɛ̀kɛɛ nɗaŋ ri Syeesyee à Ɓɔlɛ.

Lukas àrì muu Gìrɛg ànɛ a yii ɓìsyɔ̀ɔ̀ ɓi Ɓɛ̀yudɛ̀n lɛ syeesyee, kɛɛ̀ki àrì lɔŋ cààmɛ̀n kìcèm à kaakàà lɛ a tɛɛ̀zi ɓìɓan ɓi ɓi ri lɛ ɓi yeesì Mwaànɛ à yii ɓi ɓisyɔ̀ɔ̀ ɓi Ɓɛ̀yudɛ̀n rìwog.

Syeesyee à Ɓɔlɛ à Lukas nnyɛɛ ɓisɛɛ kì fɛmɓɛɛ riwog. Nni wàànɛ ù ɓiì ɓàli nyi lɛ tintɔ̀ɔ̀ŋ, ù ɓiì siitɛɛ ki yiì roànɛ àrì Ǹkòrì-ɓum ɓɛ̀cèm.

اکنون انتخاب شده:

LUKAS Ɓìɓan ɓi ɓi ghɛɓsii lɛ ɓɛɛ konag kì woògh Syeesyee à Ɓɔlɛ ànɛ: BAFNT

های‌لایت

کپی

مقایسه

به اشتراک گذاشتن

می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید

در مورد Bafia Nouveau Testament اطلاعات بیشتر کسب کنید

LUKAS Ɓìɓan ɓi ɓi ghɛɓsii lɛ ɓɛɛ konag kì woògh Syeesyee à Ɓɔlɛ ànɛ

آیات محبوب کتاب مقدس از
LUKAS Ɓìɓan ɓi ɓi ghɛɓsii lɛ ɓɛɛ konag kì woògh Syeesyee à Ɓɔlɛ ànɛ

كتاب‌ مقدس:

Bafia

ترجمه: Bafia Nouveau Testament - BAFNT