LUKAS 4

Satàn a fèèghrɛɛ Yeesus

(Mt. 4:1-11; Mk. 1:12-13)

1Yeesus à sukày ɓi Zyuridɛŋ ǹɗonɛn ri Kìtɛntɛ̀ɛ̀n ki Nghay; fɔɔnnɛ Nghay à tinìghà nyi lɛ a kɛǹ ɓi-reɓ. 2Wɔɔ nnɛ Satàn a fèèghrɛ̀ngà nyi mɛ̀ru mɛ̀tin mɛɓɛɛ̀; à kɔ̀rìghà kɛ̀ɛ ɗi com ɓi mɛru mɛ̀n mɛ̀cèm. Nni yɛ̀ɛ mɛ ghaghìghà fɔɔnnɛ zày ì kɔngà nyi. 3Nni Satàn a kpaaghà nyi lɛ: I ù yii lɛ ù rì Man à Bɛ̀ll, kali gɔ̀g ìnɛ lɛ yɛ̀ɛ ghas̀ bìrɛs. 4Yeesus à ɓàg nyi lɛ: Mum à yin lɛ à ghɛɓ lɛ bìrɛs yɔ̀ ri yɔ̀.

5Nni Satàn a tekà nyi, à ɓɔgtɛ̀n tì rì nyi aɗyoo, à rèsì nyi ɓìlɔ̀ŋ ɓìcèm ɓi ɓi ziinɛ, ɓi maa kìden à cààmɛ̀n, 6à kpaa nyi lɛ: Ǹɗì wɔ̀ ɓiì faà rìkem rì ìkum wucèm wu ɓi ɓìlɔ̀ŋ ɓi; lɛ ɓɛ faghà mɛ̀ ɓyɔ, ǹɗì girig lɛ ǹfa ɓyɔ rì ŋwaànɛ ǹkɔ̀ni lɛ ǹfa. 7Ɓìcèm ɓi ri ɓiì wooghrɛɛ ri wɔ̀ di ù ɓaagh mɛ̀ mɛ̀ɗu asu. 8Nni Yeesus à ɓàkà nyi lɛ: Ki ri kì kànɛn lɛ: Ɓɔgsag Kan Bɛ̀ll wɔ̀ɔ̀, nyi nnɛ ù kì kìsay cɛ̀ncii.

9Fɔɔnnɛ Satàn a kɛ̀ɛ̀dìtìghà rì Yeesus a Yorisalɛm, à ɓɔgsì nyi ɓi fìran fi naà-Bɛ̀ll à kpaa nyi lɛ: I ù yii lɛ ù rì Man à Bɛ̀ll, lɛla fɛ, u kɛǹ kì ciɓì ɓi zi. 10Lɛ ki ri kì kànɛn lɛ: Bɛ̀ll à ɓiì reɓsii ɓum ɓii ɓɛ titom lɛ ɓɛɛ ɓeŋ̀ wɔ̀ 11rì tì lɛ: Ɓɛ ri wɔ̀ ɓiì lɛ̀ŋlɛŋi ɓi ɓyàg lɛ kɔ̀ɔ tuusi ikòò ɓi gɔ̀g.

12Nni Yeesus à ɓàkà nyi lɛ: Ki rì kì kànɛn lɛ: Kɔ̀ɔ fèèghrɛn Kan Bɛ̀ll wɔ̀ɔ̀.

13Yɛ̀ɛ Satàn a lègsìghà nyi kìfèèghrɛɛ ɓi bee yiǹ yìcèm nni à ghaghìghà fìràɓ, à ɓoŋdì lɛ syeesyee à cààmɛ̀n àdɛŋ a ghɛnɛn.

Yeesus à tumɛɛ kìsay kii a Galile

(Mt. 4:12-17; Mk. 1:14-15)

14Nni Yeesus à sugtìghà a Galile ǹɗonɛn ri ìtèɗ wu Kitɛntɛ̀ɛ̀n ki Nghay; fɔɔnnɛ rìkem ɗii ɗi saàghà ɓi kìlànà ki zi kiǹ kìcèm. 15A rèrèsàkà ɓum ɓìɓan ɓi Bɛ̀ll ɓi naa yi bɔŋ̀zɛ̀n, ɓum ɓɛ̀cèm ɓɛ sɛsɛ̀g nyi.

Ɓɛ ɓeni Yeesus a Naazarɛt

(Mt. 13:53-58; Mk. 6:1-6)

16Yeesus à kɛ̀ngà a Naazarɛt ɓi bàn ìnɛ à tɔɔghà wɔɔ, a ɗiŋì ɓi naà-bɔ̀ŋzɛ̀n lɔŋ yɛ̀ɛ àa nti à kìlàg ɓɛ̀ŋwos ɓɛ Saɓàt. Nni à pɛ̀sɛ̀ngà aɗyòò lɛ a ɓay kaàtà à Bɛ̀ll. 17Ɓɛ ceesìghà nyi kaàtà à ǹkpaŋzì-ɓìɓan anɛ lɛ Ezayii, yɛ̀ɛ à ŋwàɗkà kaàtà ànɛn à tanɛ̀n jàŋ inɛ ì rì ǹkànɛn lɛ:

18Nghay à Kan à rì ɓi mɛ̀ ɓisuulɛ à

ɓɔngà mɛ̀ à siŋì mɛ̀ mɔ̀ɔ lɛ ǹkakàlì ɓɛ̀yɛɓàyɛɓa Syeesyee à

Ɓɔlɛ,

à rom mɛ̀ lɛ, nghagsi ɓum ɓɛ naà-zày lɛ:

ɓɛ ɓiì kpagii naà-zày;

à rom dì mɛ̀ lɛ,

ǹkpaà ɓɛ̀ɗyaŋɗyàŋ lɛ ɓɛ ri ɓiì ghɛnɛɛ ti;

ɓumɓɛ ɓɛ̀ro ɓum ɓɛɛ̀ kìki mɛtɔɓ m̀pisì ɓɔ ɓi mɛ̀tɔɓ,

19rì tì lɛ, ǹlam̀ɓɛn lɛ,

bèg ìnɛ Kan à ɓiì rèsii geesɛ̀n yìì i kpaŋi.

20Fɔɔnnɛ Yeesus à pɛ̀ɛ̀zìghà kìtaàgh kaàtà, à ceesì nyi rì ǹkìì-kìsay, à kɔ̀rì min ɓi zi. Ɓum ɓɛ̀cèm ɓɛ ɓɛ ɓaghà ɓi naà-bɔ̀ŋzɛ̀n ɓɛ ɓanɓàngà nyi rì mis lɛ tɔ̀n tɔ̀n tɔ̀n!

21Nni à tumɛ̀ngà ɓɔ rìkpaa lɛ: Jɛ̀ɛ̀ ìnɛ ɓì woogh ìnɛ̀n di m̀ɓàli, ì roni gɛɛ̀nɛ. 22Fɔɔnnɛ ɓum ɓɛ̀cèm ɓɛ sɛsɛ̀kà nyi, ɓɛ ki kuukuùghràg ɓɛ̀syeesyee ɓɛ jɛ̀ɛ̀ ɓɛ à kpaakpaaghà, di ɓɛɛ tɔtɔg lɛ: Àa man à Yoosɛɓ yɛɛ ri lɛ? 23Yeesus à kpaa ɓɔ lɛ: Ǹ-yii saaɗ lɛ, ɓì rì mɛ̀ ɓiì terì dàɗkì ìnɛ lɛ: Wɔ̀ m̀ɓoò-ɓum, ɓoorɛn wɛ̀ɛmiɗ; ɓìɓan ɓi tì wokà lɛ, ù kìghà a Kapɛrinawum, kìya girig ɓyɔ fɛ ɓi kìlɔ̀ŋ kɔɔ. 24Nni à kpaatìghà ɓɔ lɛ: Ǹkalii mìni saaɗ à rìkpaa lɛ: Ǹkpaŋzì-ɓìɓan a maà kem ɓi ɓi kìlɔ̀ŋ kii. 25Saaɗ innɛ ǹkpaa mìni lɛ: Ɓi mɛ̀ru mɛ ǹkpaŋzì-ɓìɓan Eli, mɛ̀kpɔɓ mɛ ɓɛ̀yiɓ mɛ ronɛ̀ngà a Isirayɛl ɓi cààmɛ̀n ki bwey yi kosɛ̀ngà à kpaŋ bèg yìraa rì kìden. Zày ì kìghà ɓi kìlɔ̀ŋ kìcèm. 26Kìɓan kifog, Bɛ̀ll à romgà ɓi Eli yɛ̀ɛ kibog ki ɓi mɛ̀kpɔɓ mɛǹ, lɔŋ yɛ̀ɛ ǹkpɔɓ wu giɓ wu wu ɓaghà a Sarɛɓta, ɓi kìlɔ̀ŋ ki lɛ Sidɔŋ innɛ à romgà nyi. 27Ɓɛkukwiy ɓɛ ronɛ̀ngà girig a Isirayɛl ɓi cààmɛ̀n ki ǹkpaŋzì-ɓìɓan ànɛ lɛ Elize, kìɓan kifog, ǹsoò kìbog ki ɓi ɓɔ ki wɔngà ɓi, i ki cee ɓi lɛ Naman ŋwaànɛ a Sirii.

28Mɛ̀rem mɛ ɓeɓtɛ̀ngà ɓum ɓɛ̀cèm ɓɛ ɓɛ ɓaghà ɓi naà-bɔ̀ŋzɛ̀n ìnɛn yɛ̀ɛ ɓɛ wokà fɔlɔɔ. 29Nni ɓɛ pɛsɛ̀ngà ɓɛ kpaŋzì nyi ɓi bàn, ɓɛ kɛ̀n ɗì nyi ɓi bèn ì dòn lɛ bàn yàà inɛn ì ɓaghà ǹtoŋɛn ɓi dòn aɗyoo lɛ di ɓɛɛ tyɔg nyi wɔɔ, a kɛǹ kìkpìi azi 30kìɓan kìfog, à fyeeghà ɓɔ ɓi nyìinyìm à ghaàgh nyi.

Ŋwaànɛ à ɓaghà rì kìɓeɓtàg ki nghay

(Mk. 1:21-28)

31Fɔɔnnɛ Yeesus à sɛngà a Kapɛrinawum ànɛ à ɓaghà bàn ìnɛ a Galile, à rèèrèsàg ɓum ɓìɓan ɓi Bɛ̀ll ŋwosi Saɓàt. 32Ɓum ɓɛ kuuràkà rìkuu ɗii ɗi rirèsì, ɓisuulɛ, à tòtòkà rì jɛ̀ɛ̀ ì rìlàmì. 33Nni wɔɔ ɓi naà-bɔ̀ŋzɛ̀n ìnɛn, ŋwaàdɛŋ à ɓaghà rì kìɓeɓtàg ki ǹghay; ŋwaàncèm à tumɛ̀ngà rìlàmɓɛ̀n jɛ̀ɛ̀ aɗyoo lɛ: 34Aàgh! Yeesus ànɛ a Naazarɛt, ki ri wɔ̀ la ri ɓìsi? Ù yuuyì kɔ̀m fɛ lɛ u cuusi ɓìsi? Mɛ̀ ǹ-yii lɛ ù rì roànɛ à rì ǹtɛnɛn, ànɛ Bɛ̀ll à romiì. 35Yeesus à fwaàdɛ̀ngà kìɓeɓtàg ki ǹghay kìn, à kpaa kɔ lɛ: Sìmdi ŋwɔm, u ki kpaŋ ɓi ŋwaànɛ; nni kìɓeɓtàg ki ǹghay ki rogà ŋwaànɛ̀n ɓi zi ɓi nyìinyìm à ɓum, ki kpaŋ kɛ̀ kɛɛ̀ ki nyi com. 36Nni ìris wu ɓangà ɓum ɓɛ̀cèm, ɓɛ tum rìkpaakpàà wɔɔ ɓɔ rì ɓɔ lɛ: Rìkuu ɗi jɛ̀ɛ̀ ɗi be ɗyɛɛ ri lɛ! Ghɛɛna yɛ̀ɛ à fwààdɛɛ ɓìɓeɓtàg ɓi mɛghay rì ìtèɗ wu rilàmì, ɓi ki kpagi! 37Nni rìkem ɗii ɗi saàghà min jàŋ bimiɗ ɓi kìlànà ki zi kiǹ.

Yeesus à wɔ̀ɔ̀zii ɓɛ̀roroɓ lɛɛ̀gwey

(Mt. 8:14-17; Mk. 1:29-34)

38Yɛ̀ɛ Yeesus à pɛ̀sɛ̀ngà ɓi naà-bɔ̀ŋzɛ̀n, nni à kɛ̀ngà a mɛɛ mɛ Simɔn, à tanɛ̀n jɛɛ gili Simɔn di à rì rì kìfɛɓ ɓi nyoo lɛɛ̀gwey; fɔɔnnɛ ɓɛ tɔkà Yeesus lɛ a ghɛɓsi nyi. 39Nni Yeesus à loŋmɛ̀ngà giɓ anɛ̀n ɓi nyoo, à fwààdɛ̀n kìfɛɓ ki ki ɓaghà nyi ɓi nyoo kìn, kìfɛɓ ki lèg, giɓ a ghàs kì pɛ̀sɛɛ aɗyoo, à tumɛ̀n ɓyom ɓi kìyɛn lɛ a kaà ɓɔ. 40Di ŋwos a mɛ nɔ̀ŋì, ɓum ɓɛ̀cèm ɓɛ ɓɛ ɓaghà rì ɓɛ̀roroɓ mɛ̀kuu mɛ̀kuu, ɓɛ yughày nyi rì ɓɔ, fɔɔnnɛ à sasàghìghà ɓɔ ɓyàg ɓi nyoo, a wɔ̀ɔ̀wɔ̀ɔ̀zì ɓɔ. 41Ɓìɓeɓtàg ɓi mɛghay ɓi kpaŋkpàŋgà girig ɓum lɛɛ̀gwey ɓi nyoo, di ɓyɛɛ̀ syaasyaàdɛ̀n ɓi kpaakpàà lɛ: Ù rì Man à Bɛ̀ll, wɔ̀lɛ Yeesus kɛ̀ɛ fa ɓyɔ bee ìnɛ lɛ, ɓyɛɛ toòghrɛn, ɓisuulɛ ɓi yighà lɛ nnyɛɛ ri Kiris.

42À faŋìghà kì kɛ̀ɛ ɓi kìlɛŋ ki jàŋ sariwa lɛ ɓuɓ; nni ɓìtuu ɓi ɓum ɓi tumɛ̀ngà nyi rìkaa, yɛ̀ɛ ɓi tanɛ̀ngà nyi, ɓɛ kɔǹ lɛ ɓɛɛ cɛɛ̀zi nyi kɛ̀ɛ ghaghi à càɗ ɓɔ. 43Kìɓan kìfog Yeesus à kpaaghà ɓɔ lɛ: Ki ghɛɛ̀sɛɛ lɛ, ǹghagsi Syeesyee à Ɓɔlɛ à kìlɔ̀ŋ ki Bɛ̀ll ɓi bàn yimbog, lɛ kìɓan kiǹ kɛ̀ɛ̀ki Bɛ̀ll à romgày mɛ̀ miì. 44Fɔɔnnɛ à kakàlìghà ɓum Syeesyee à Ɓɔlɛ ɓi naa yi bɔ̀ŋzɛ̀n yi a Galile.

اکنون انتخاب شده:

LUKAS 4: BAFNT

های‌لایت

کپی

مقایسه

به اشتراک گذاشتن