MARKA 2
2
Ta Yesu loko a hanyisa xilema.
1Kuteloko ku hundzile masiku man'wana, Yesu a vuya a nghena eKapernawume, kutani ku twakala leswaku u kona endlwini. 2Vanhu lavo tala va hatlisa va hlengeletana kona; ku pfumaleka ni vutshamo emahlweni ka nyangwa, kambe Yesu a a va dyondzisa rito.
3Kutani ku fika ka yena lava tisaka munhu loyi a khwanyaleke swirho, a rhwariwa hi mune wa vavanuna. 4Vona va tsandzeka ku n'wi tshinelela hi ku tala ka vanhu; kutani va hahlula lwangu ra yindlu leyi a nga ka yona; kuteloko va boxile va nembeleta masangu lawa loyi a khwanyaleke swirho a etleleke ka wona. 5Yesu, kakuloko a vona ku pfumela ka vona, a ku eka muvabyi: “N'wananga, u rivaleriwile swidyoho swa wena.” 6Kasi vatsari lava tshameke kwalaho, va sandza etimbilwini ta vona, va ku: 7“Loyi u vulela yini sweswo? Wa sandza! I mani la nga rivalelaka milandzu loko xi nga ri Xikwembu ntsena?” 8Yesu a hatla a swi tiva emoyeni wa yena leswaku va anakanye sweswo etimbilwini ta vona, kutani a ku eka vona: “Mi anakanyisela yini sweswo etimbilwini ta n'wina xana? 9Ku olova yini xana? Loko ndzi ku eka la khwanyaleke swirho: ‘U rivaleriwe swidyoho swa wena,’ kumbe loko ndzi ku eka yena: ‘Pfuka, u teka masangu ya wena, u famba’? 10Kambe ku va mi ta tiva leswaku N'wana wa munhu u ni matimba la emisaveni ku rivalela vanhu swidyoho” (a ku eka la khwanyaleke swirho): 11“Pfuka, u teka masangu ya wena, u tifambela ekaya ka wena.” 12Kutani a hatlisa a pfuka, a teka masangu ya yena, a famba emahlweni ka vanhu hinkwavo; hinkwavo va hlamula, va dzunisa Xikwembu, va ku: “A hi si vona leswonghasi.”
Ta ku vitaniwa ka Levhi.
13Yesu a engeta a suka a ya tlhelo ra lwandle, vunyingi hinkwabyo byi ya ka yena, kutani a va dyondzisa. 14Kakuloko a hundza a vona Levhi, n'wana Alfiya, a tshamile endlwini ya ku luva; a ku eka yena: “Ndzi landze.” Kutani Levhi a suka a n'wi landza.
15Kuteloko Yesu a tshamile eswakudyeni endlwini ya Levhi, valuvisi lavo tala ni vadyohi va tshama na Yesu ni vadyondzisiwa va yena, hikuva vanhu lavo tala a va n'wi landza. 16Kambe loko vatsari ni Vafarisi va n'wi vona a dya ni valuvisi ni vadyohi va ku eka vadyondzisiwa va yena: “U dyela yini ni valuvisi ni vadyohi, u nwela yini na vona?” 17Yesu, kakuloko a twa sweswo, a ku eka vona: “Lava hanyaka a va lavi n'anga, kambe yi laviwa hi lava vabyaka. A ndzi tanga ku ta vitana lava lulameke, kambe vona vadyohi.”
Ta ku titsona swakudya.
18Vadyondzisiwa va Yohane ni Vafarisi a va tshama va titsona swakudya. Kutani va ta eka Yesu, va ku eka yena: “Vadyondzisiwa va Yohane ni Vafarisi va titsonela yini swakudya xana? Kasi vadyondzisiwa va wena a va titsoni?” 19Yesu a ku eka vona: “Xana vanakulobye va muteki va nga titsona swakudya loko muteki a ha ri na vona xana? Hi nkarhi hinkwawo lowu muteki a nga kona na vona, va nga ka va nga titsoni swakudya. 20Kambe masiku ma ta lawa muteki a nga ta susiwa ka vona; hi kona va nga ta titsona swakudya. 21A ku na munhu loyi a rhungelaka xitiva lexintshwa engubyeni ya khale; xitiva lexintshwa xi nga handzula nguvu ya khale, kutani ku handzuka ku ta engeteleka. 22Kambe a ku na munhu loyi a nga chelaka vhinyo leyintshwa eminkwameni ya khale, hikuva vhinyo leyintshwa yi nga handzula mikwama kutani vhinyo yi halaka, na yona mikwama ya fa; kambe vhinyo leyintshwa yi fanele ku cheriwa eminkwameni leyintshwa.”
Ta min'oko ni Savata.
23Kute hi siku ra Savata, kakuloko a hundza exikarhi ka masimu, vadyondzisiwa va yena va sungula ku tshova min'oko, va ri karhi va famba. 24Vafarisi va ku eka yena: “Vona, va endlela yini leswi nga pfumeleriwiki hi Savata?” 25Yesu a va byela, a ku: “Xana a mi si hlaya leswi endliweke hi Davhida, siku a pfumaleke swakudya, a ri ni ndlala yena ni lava ngi va ri na yena; 26hilaha a ngheneke endlwini va Xikwembu enkarhini wa Abiyatara, muprista lonkulu, a dya swinkwa swa mhamba leswi nga fanelangiki ku dyiwa hi vanhu, loko va nga ri vaprista ntsena, a va a nyika ni lava ngi va ri na yena?” 27Kutani a ku eka vona: “Savata yi endleriwe munhu, kasi munhu a nga endleriwanga Savata. 28Hikwalaho-ke, N'wana wa Munhu i hosi ni ya yona Savata.”
اکنون انتخاب شده:
MARKA 2: TSO29
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.
