Mataio 15
15
O le Sesē o le ‘au Faresaio ma le ‘au Tusi‘upu
(Mare 7.1-13)
1‘Ona ō mai ai lea ‘iā Iesu o tusi‘upu ma faresaio mai Ierusalema, ‘ua fa‘apea mai, 2“Se a le mea ‘ua soli ai e ou so‘o le ‘uputu‘u a ē anamua? Auā ‘ua lē fafano o latou lima pe a latou ‘a‘ai.”#Teu 4.2; Luka 11.38
3A ‘ua tali atu o ia, ‘ua fa‘apea atu ‘iā te i latou, “Se a le mea ‘ua soli ai e ‘outou fo‘i le poloa‘iga a le Atua ‘iā ‘outou ‘uputu‘u? 4Auā ‘ua poloa‘i mai le Atua, ‘ua fa‘apea mai, ‘‘Ia e āva i lou tamā ma lou tinā;’ i le ma lea, ‘O lē ‘upu leaga i le tamā po o le tinā, ‘ia fasiotia lava ia.’#Eso 20.12; 21.17; Teu 5.16; Levi 20.9 5A ‘ua ‘outou fai mai, ‘ai sē fai ane i le tamā po o le tinā, ‘‘Ai se mea ‘ua ‘iā te a‘u e aogā ‘iā te oe, o le taulaga lea;’ 6‘ona lē toe āva ai lea o ia i lona tamā po o lona tinā. ‘Ua fa‘apea ‘ona ‘outou fa‘alēaogāina le poloa‘iga, a le Atua ‘iā ‘outou ‘uputu‘u. 7O ‘outou tagata fa‘afiaamiotonu, e tatau lava ‘iā te ‘outou le valo‘aga a Isaia, ‘ua fa‘apea mai:#Isai 29.13
8‘‘Ua āva mai ‘iā te a‘u lenei nu‘u i o latou laugutu,
a o latou loto ‘ua taumamao ‘iā te a‘u.
9E tapua‘i fua mai i latou ‘iā te a‘u i lo latou fai ma matā‘upu o poloa‘iga a tagata.’”
O Mea e ‘Ele‘elea ai le Tagata
(Mare 7.14-23)
10‘Ona vala‘au atu a lea o Iesu i le motu o tagata, ‘ua fetalai atu ‘iā te i latou, “Fa‘alogo mai ia ma ‘ia ‘outou lagona. 11E lē o le mea ‘ua tu‘u i le gutu e leaga ai le tagata, a o le mea e sau mai le gutu, o lea ‘ua leaga ai le tagata.”#Mata 12.34; 1 Timo 4.4
12‘Ona ō mai ai lea o ona so‘o ‘iā te ia, ‘ua fai mai ‘iā te ia, “‘Ua e silafia ‘ea ‘ua tigā le ‘au faresaio i lo latou fa‘alogo i lea ‘upu?”
13A ‘ua tali atu o ia, ‘ua fa‘apea atu, “O la‘au uma e le‘i totōina e lo‘u Tamā o i le lagi, e lia‘iina ia. 14Tu‘u pea ‘iā i latou, o tauaso i latou e ta‘ita‘i i ē ‘ua tauaso; ‘āfai fo‘i e ta‘ita‘iina le tauaso e le tauaso, ‘ona la pa‘u‘ū uma ai lea i le lua.”#Luka 6.39; Mata 23.24; Ioane 9.40; Roma 2.19
15‘Ona tali mai ai lea o Peteru, ‘ua fa‘apea mai ‘iā te ia, “‘Ia e fa‘amatala mai ‘iā te i matou lenā fa‘ata‘oto.”
16‘Ona fetalai atu ai lea o Iesu, “Tou te lē āu lagona fo‘i ‘ea e ‘outou? 17Tou te lē āu iloa ‘ea, o mea uma ‘ua tu‘u i le gutu, ‘ua o‘o ia i le manava, ‘ona lafoa‘iina lea i le maliuga? 18A o mea e sau mai le gutu, ‘ua alu a‘e ia mai le loto, o mea ia e leaga ai le tagata.#Mata 12.34 19Auā e alu a‘e mai le loto o le manatu leaga, o le fasioti tagata, o le mulilua, o le faita‘aga, o le gaoi, o le molimau pepelo ma le ‘upu leaga.#Kene 8.2 20O mea ia e leaga ai le tagata; a o lē ‘ai ma lima e le‘i fafano, e lē o lea e leaga ai le tagata.”
O le Fa‘atuatua o le Fafine
(Mare 7.24-30)
21‘Ua maliu ‘ese Iesu i lea mea, ‘ona o‘o atu ai lea o ia i le lau‘ele‘ele o Turo ma Saitonu. 22Fa‘auta fo‘i, o le fafine o Kanana ‘ua sau mai lea lava itū, ‘ua ‘alaga mai ‘iā te ia ‘ua fa‘apea mai, “Le Ali‘i e, le alo o Tavita, ‘ia e alofa mai ‘iā te a‘u; ‘ua leaga lava la‘u tama teine i le temoni ‘ua i ai.”
23A ‘ua leai se ‘upu na tali atu ai Iesu#15.23 Iesu: O le fa‘aliliuga tuai; ia. ‘iā te ia. ‘Ona ō mai ai lea o ona so‘o, ‘ua ‘ai‘oi mai ‘iā te ia, ‘ua fa‘apea mai, “‘Ia e tu‘uina atu ‘iā te ia e alu, auā ‘ua mulimuli mai o ia ma ‘alaga mai ‘iā te i tatou.”
24A ‘ua tali atu o Iesu, ‘ua fa‘apea atu, “E le‘i ‘auina mai a‘u i nisi, ‘ae tau lava o mamoe o le ‘āiga o Isaraelu ‘ua lē iloa.”#Mata 10.6
25‘Ona sau ai lea o le fafine,#15.25 fafine: O le fa‘aliliuga tuai; ia. ‘ua ifo ‘iā te ia, ‘ua fa‘apea mai, “Le Ali‘i e, ‘ia e fesoasoani mai ‘iā te a‘u.”
26‘Ona tali atu ai lea o Iesu, ‘ua fa‘apea atu, “E lē tatau ‘ona ‘ave le mea e ‘ai a le fānau ma lafo i ulī.”#15.26 ulī: po o le ta‘ifau po o le maile.
27‘Ona fai mai ai lea o le fafine,#15.27 fafine: O le fa‘aliliuga tuai; ia. “Le Ali‘i e, e moni a oe; ‘ae ui i lea ‘ua ‘a‘ai e ulī o momoi mea ‘ai ‘ua pa‘u‘ū i laulau a o latou matai.”
28‘Ona tali atu ai lea o Iesu, ‘ua fa‘apea atu ‘iā te ia, “Funa e, ‘ua tele lou fa‘atuatua; e pei o lou mana‘o, ‘ia fa‘apea lava ‘ona faia ‘ia te oe.” ‘Ona mālōlō ai lea o lana tama teine i lea lava itū aso.#Mata 8.10, 13
‘Ua Fa‘amālōlōina e Iesu le To‘atele o Tagata
29‘Ua maliu ‘ese Iesu i lea mea, ‘ona o‘o atu ai lea o ia e lata ane i le vai o Kalilaia; ‘ua maliu a‘e i le mauga, ‘ua nofo ai i lalo.#Mare 7.31 30‘Ona ō mai ai lea ‘iā te ia o le motu o tagata e to‘atele, ‘ua ‘iā te i latou o ē pipili, o ē tauaso, o ē gūgū, o ē mumutu, ‘atoa ma nisi e to‘atele, ‘ua latou tu‘u atu ‘iā i latou i vae o Iesu; ‘ona fa‘amālōlō ai lea e ia o i latou. 31‘Ona taufaiofo ai lea o le motu o tagata ‘ina ‘ua latou iloa atu o ē sa gūgū ‘ua tautala, o ē sa mumutu ‘ua ‘ato‘atoa, o ē sa pipili ‘ua sāvavali, o ē sa tauaso fo‘i ‘ua va‘ai; ‘ona latou vivi‘i atu ai lea i le Atua o Isaraelu.#Mare 7.37
‘Ua Fafaga e Iesu le To‘atele o Tagata
(Mare 8.1-10)
32‘Ona vala‘au atu ai lea o Iesu i ona so‘o, ‘ua fa‘apea atu, “‘Ou te alofa atu i le motu o tagata, auā o le aso tolu lenei o tatou nonofo ma i latou, e leai fo‘i ni a latou mea e ‘ai. ‘Ou te lē mafai ‘ona tu‘uina atu ‘iā te i latou, e ō matelaina, ne‘i latou lailoa i le ala.”#Mata 14.14
33‘Ona fai mai ai lea o ona so‘o ‘iā te ia, “Tatou te maua ifea ‘ea i le vao ni areto e tele, ‘ina ‘ia mā‘o‘ona ai le motu o tagata ‘ua to‘atele na‘uā?”
34‘Ona fetalai atu ai lea o Iesu ‘iā te i latou, “E fia ‘ea ni a ‘outou areto?”
‘Ona latou fai mai ai lea, “E fitu ma nai i‘a lāuiti.”#15.34 nai i‘a lāuiti: po o nai i‘a laiti po o nai tama‘i i‘a.
35‘Ona fetalai atu ai lea o ia i le motu o tagata ‘ia latou nonofo i lalo.#15.35 nonofo i lalo: O le fa‘aliliuga tuai; ta‘o‘oto i lalo. 36‘Ona tago ai lea o ia i areto e fitu ma i‘a, ‘ua fa‘afetai, ma tofitofi, ‘ona avatu ai lea e ia i ona so‘o, ‘ona avatu ai lea e le ‘au so‘o i le motu o tagata. 37‘Ona ‘a‘ai ai lea o i latou uma lava, ‘ua mā‘o‘ona; ‘ua latou fu‘e fo‘i i toe ‘aiga, ‘ua tūtūmu ai ‘ato e fitu. 38O i latou fo‘i na ‘a‘ai e to‘afa afe#15.38 to‘afa afe: O le fa‘aliliuga tuai; toafagaafe. o tane, ‘ae le‘i faitaulia fafine ma tamaiti.
39‘Ua tu‘uina atu e Iesu le motu o tagata e ō, ‘ona maliu a‘e ai lea o ia i le va‘a, ‘ua alu atu i le nu‘u o Makatala.
اکنون انتخاب شده:
Mataio 15: RSCB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Revised Samoan Catholic Bible © Bible Society of the South Pacific, 2010.