EZEKIYEL 40
40
ƊEKKA VI TEMPELLA HIƊI INDA VI NAGATA
Vun-ziyna hiɗi wur-daŋŋa vi Tempella
1Hay buurta doogota vi tilla, kuɗ busata dok-ma' yam vaslta vi kalta vuma goy gorvo'o, hay tun cawta vi busata, busat doogo yam fiɗi bugol ɦo-gaata vi hoyok-ziyna, kayni mi buur ma Ma-Vatɗina kal donota valam hayanu. Nam tuɗan ɗaw goyni. 2Hay slen ma Lawn ɗekem kiranu, nam tuɗan hay nagata vi Israyel, colan kulo kay hiɗiyta ta fiyok ŋolo, ki hoyok-ziyn ka ini hay gal ma kayamna vi hiɗiy na'ta nala. 3Nam tuɗan goy ɗawni. Ɗuw na kayni, sa mara kep, tuwam sli tuw wayta nala; hay ɓalamu zigewn ka'a, barawna hiɗi zugulda kaw kay ŋaɓ liyna. Nam ka colay goboy hiɗi vun-ziyda. 4San kayni di tanu: Goora vi sana, ɗuwaŋ hiɗi iraŋu, humaŋ hiɗi humaŋ kaw. Tunaŋ ŋalda vaŋu tam slen kaf ma nan min ɗekem kiraŋu. Kay nan maraŋ tan kayni kay ɗuwa. Slen kaf ma naŋ ma wumu, naŋ ma dum cawam goy tam jafna vi Israyel.
5Ɗuw na kayni, tuw ziyda ma goy jiyna ŋuyi hiɗi gulmun kafe. Zugulda ta ŋaɓta ta ir goldoŋ karkiya ka hay ɓam sa namna, goldoŋ kep kayni ŋaɓta valamu suw goy kay ŋaɓta vi goldoŋ ma ɦawana ir way-ɓamta kep kep, nam ŋaɓ be'da vi inda vi ziyda: Zugul kepe, fiyokka valam ta kulota ir zugul kepe kaw.
6Nam kal kat vun-ziyda ta ira' muɗi hay gal kuɗuwta. Nam jik kulo'o kay va ma jik kulona. Nam li ŋaɓta vi ŋafta vi vun-ziyda, zugulda kepe kuɗ beɗemu, zugulda kep kuɗ beɗemu kaw. Kay vun-ziyda tuta. 7Ziy ma kalafna kaf fiyokka valamu ir zugul kep, buɗukka valamu ir zugul kep kaw. Ziy ma kalafna kaf jaram ir goldoŋ vasl vasl. Ŋafta vi vun-ziyda, goboy hiɗi diɓira vi vun-ziyda, hay kalafi, ka ir zugul kepe. 8Nam ŋaɓ diɓira vi vun-ziyda ma kalafna. Zugul kepe. 9Nam ŋaɓ diɓira vi vun-ziyda, goldoŋ glafandi, hiɗi dolla valamu: Goldoŋ ma'. Diɓira vi vun-ziyda ay hay kalafi, 10ziy ma kalafna vi vun-ziyda kuɗuwta ka ɦidi hay gal hena, ɦidi hay gal hena kaw. Ŋaɓta valam ki tuwam nala, dolla ma hay galam kafna ŋaɓta valam ki tuwam nala kaw. 11Nam li ŋaɓta vi vun-ziyn ma mal goyna: Goldoŋ doogo, hiɗi fiyokka vi vun-ziyda kaw ir goldoŋ doogo yam ɦidi. 12Goy vok ziy ma kalafna liy ma hini goy ɦawana ir goldoŋ kepe hay gal hena, hay gal hena kaw. Ziy ma kalafna kaf ka hiɗi goldoŋ karkiya hay gal hena, goldoŋ karkiya hay gal hena kaw. 13Nam li ŋaɓta vi vun-ziyda, fokay kat yam ziy ma kalafna hena pa ta-ta tam yam-ziyd heta ma kalaf gal hena. Buɗukŋa valam ir goldoŋ dok-ma' yam vasl jar vunam ma goy malina ma ŋiray goy dig tuwamna. 14Nam ŋaɓ goldoŋ dok-karkiya kay dolla, goboy tam wur-daŋŋa, kat vun-ziyda. 15Liyn ma hini goy ɦawa jar vun-ziy ma kal kalafna hiɗi diɓira vi vun-ziy ma kalafna jaram ir goldoŋ dok-vasl. 16Kaway ciliy vun fenetrena vi ziy ma kalafna, hiɗi dol ma kalafna, hiɗi vun-ziyna ma kalafna ŋuyi talam kafe; fenetrena ka tam diɓira kaw, ŋuyi talam kafe hay gal ma kalafna; Gomona ka cuki kulo kay dolla, hiɗi tuwam ceɗay ŋaa'a ŋolo.
17Nam tuɗan hay wur-daŋŋa ma goy jiyna, liyn ma ziy ma kalafna ka ini haya, yam nagata ta hay wur-daŋŋa kaf ka dakay gaa ŋaa'a; ziy ma kalafn ka dok-ɦidi ini kulo kay yam nagata namna ma dakay gaana. 18Yam nagata ma dakay gaana ka goboy kat vun-ziyna, nam ŋray kuɗ fiyokka vi vun-ziyna. Kayni mi yam nagata ma dakay gaa'a hay kalafna. 19Nam ŋaɓ buɗukŋa hay vun-galana ma gaana pa ta-ta tam vun wur-daŋŋa ma kalafna. Nam ir goldoŋ kis, hay gal kuɗuwu hiɗi gal gaa'a.
20Nam ŋaɓ fiyokka hiɗi buɗukka vi vun-ziyna ma gal gaana vi wur-daŋ ma goy jiyna. 21Ziy ma kalafna valamu ɦidi hay gal hena, ɦidi hay gal hena kaw dolla valam hiɗi diɓira ŋray ca hiɗi vun-ziy ta jewta, fiyokka valam ir goldoŋ dok-vasl, buɗukka valam ir goldoŋ dok-ma' yam vasl kaw. 22Fenetrena valamu, diɓira valamu, gomona valamu kaw, buɗukŋa valam ŋray ca hiɗi vun-ziyna ma iram muɗi gal kuɗuwna. Liyn ma jik kulo kalam kay kal hayamna ka siɗiya, diɓira valamu ka goy vokomu kaw. 23Vun-ziyna ka kep hay wur-daŋ ma kalafna, ɗiger vok vun-ziyn ma gal gaana, ɗiger vok vun-ziy ma gal kuɗuwna. Nam ŋaɓ jar vun-ziyna ir goldoŋ kis.
24Nam tuɗan hay gal ma kayamna, liyn ma vun-ziyna ma kayamna ka haya, nam ŋaɓ dolla hiɗi diɓira, buɗukka valam ŋray ca. 25Vun-ziyna namna hiɗi diɓira valamu fenetren ka ŋuyi talamu, ki fenetren hegen nala kaw. Fiyokka valamu ir goldoŋ dok-vasl, be'da valamu ir goldoŋ dok-ma' yam vasl may. 26Liyn ma jik kalamu kay co kulo hayamna ka siɗiya, diɓira valamu ka kulo vokomu. Hay galam kaf gomon ka kulo kay dolla. 27Wur-daŋŋa ma kalafna ka hiɗi vun-ziyna hay gal ma kayamna. Nam ŋaɓ vun-ziyda ta-ta tam vun-ziy hena hay gal ma kayamna: Ir goldoŋ kis.
28Nam tuɗan hay wur-daŋŋa vi ziyda ma kalafna, jik hay vun-ziyd ma kayamna. Nam ŋaɓ vun-ziyd ma kayamna, buɗukŋa valam ŋray ca. 29Ziy ma kalafna va'a, dolla va'a hiɗi diɓira va'a buɗukŋa valam ŋray ca. Vun-ziyn namna hiɗi diɓira valamu, fenetren ka ŋuyi talamu, fiyokka valamu ir goldoŋ dok-vasl be'da valamu ir goldoŋ dok-ma' yam vasl. 30Tuwam ka ŋuyi hiɗi diɓira ma ir goldoŋ dok-ma' yam vasl kuɗ fiyokka valamu, goldoŋ vasl kuɗ be'da valamu kaw. 31Diɓira valamu ka hay galla vi wur-daŋ ma goy jiyna, gomona ka cuki kulo kay dolla valamu, liyn ma san tun sem kalamu kay jik a co kulo hayna ka glafandi.
32Nam tuɗan hay wur-daŋŋa ma hay kalafna ma gal kuɗuwna. Nam ŋaɓ vun-ziyda, buɗukka va' ŋray ca. 33Ziy ma kalafna va'a, dolla va'a hiɗi diɓira va'a buɗukŋa valam ŋray ca. Vun-ziyda na'ta hiɗi diɓira va'a fenetren ka ŋuyi talamu, fiyokka valamu ir goldoŋ dok-vasl, be'da valamu ir goldoŋ dok-ma' yam vasl. 34Diɓira va'a ka hay galla vi wur-daŋŋa ma goy jiyna, gomona ka kulo kay dolla va' hay gala' kaf, liyn ma tun sem kalamu kay jik a co kulo kalamna ka glafandi.
35Nam tuɗan kat vun-ziyd ma gal gaana. Nam ŋaɓamu, buɗukŋa valam ŋray ca, 36ziy ma kalafna va' nala kaw, dolla hiɗi diɓira va'a kaw, fenetrena ka ŋuyi talam kafe. Fiyokka valamu ir goldoŋ dok-vasl, be'da valamu ir goldoŋ dok-ma' yam vasl. 37Dolla valamu ka hay wur-daŋŋa ma goy jiyna. Gomona ka cuki kulo kay dolla valamu hay galam kaf, liyn ma san tun sem kalamu kay jik a co kulo hayna ka glafandi.
38Ziyda goorta tara ka kepe, vuna' ka jar dolla vi vun-ziyna. Kayni mi liyn ma nisi muz tuw faray ma ŋalam goy ɗifini hayna. 39Hay diɓira vi vun-ziyda, tablen ka lakay hay galam hen ma', tablen ka lakay hay galam hen ma' kaw; nisi ŋat kulo kalamu ɗifin ma ŋal-goyna, ɗifin ma kay sulukŋa, ɗifin ma kay jiw-zlata. 40Hay gal ma kepna ma goy jiyna, hay gal ma jik kulo kalamna, hay liyn ma kal kalafi hay vunam ma gaa pana, tablena ka lakay ma; lo hay gal hena, hay gal diɓira vi vun-ziyda, tablen ka ma' kaw. 41Hay galla vi vun-ziyda, tablen ka fiɗi hay gal hena, tapay pet ir table glafandi, ma nisi as ŋat farayn kulo kalamna. 42Table hena ma koti hiɗi hiɗiy ma ceɗayna ka fiɗi li kay ɗifin ma ŋal-goyna, fiyokka valamu ir goldoŋ kep hiɗi gali, be'da valamu ir goldoŋ kepe hiɗi gali, fiyokka valam ta kulota ir goldoŋ kepe; nisi as kay lak kulo kalamu slen ma ŋat farayn hiɗi namna, slen ma ŋat ɗifin ma ŋal-goyna hiɗi ɗifin hen kaf. 43Sle ma gaɓ sliwna fiyokka valamu ir way-ɓamta kep kepe, ka gaɓay goy tam Ziyd cusl' cusl'; faray ma ŋatam ɗifinna ka lakay kulo kay tablena.
44Goy bugol vun-ziyd ma kalafna, ziy ma kalafna vi sa li lop nul ma gina ka lo, hay wur-daŋŋa ma hay kalafna: Heta ay kat vun-ziyda ma gal gaana, ira' muɗi kir ma kayamna, heta ay kat vun-ziyda ma gal kuɗuwna, ira' muɗi kir liy ma gaana may. 45Nam di tan ala: Ziyda goorta ta ira' muɗi gal kayamta zawni, na' vi muliyan-sa-ɗifinna sa ka ŋom ziyda; 46ziy goor heta ta ira' muɗi gal gaat zawni, na' vi muliyan-sa-ɗifinna sa ka ŋom giwin-ma-ɗifinna. Nisi kayni si gurona vi Sadok, sa jar gurona vi Levi, sa co vok ir Ma-Vatɗina kay li lop ɗifinna valamu.
47Nam ŋa wur-daŋŋa, fiyokka valamu ir goldoŋ kis, be'da valamu ir goldoŋ kis kaw. Gefem ŋray ca. Giwin-ma-ɗifinna ka colay goy vok ziyda.
Liyn ma peldetna
48Nam tuɗan hay diɓira vi ziyda. Nam ŋa dolla vi diɓira. Goldoŋ vasl hay gal hena, goldoŋ vasl hay gal hena. Buɗukŋa vi vun-ziyda ir goldoŋ ɦidi hay gal hena, goldoŋ ɦidi hay gal hena kaw. 49Diɓira fiyokka valam ir goldoŋ dok-ma', be'da valamu ir goldoŋ doogo yam kepe; liyn ma san tun selem haya kay jik kulo kalamu ka'a. Dol ma ŋulona ka kat dol ma gurayna, hena hay gal hena, hena hay gal hena may.
اکنون انتخاب شده:
EZEKIYEL 40: Massana
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
BIBALDA TA PELDETTA © L'Alliance Biblique du Cameroun, 2001