Isaías 24
24
Kay pachata Dios castigananmanta
1Qawariychik, Tayta Diosmi kay pachata purmachispa chunnichinqa,
chaypi yachaqkunatam cheqechinqa.
2Runakunatawan sacerdotekunatapas,
criadontawan patronnintapas,
criadantawan patronantapas,
rantiqnintawan rantikuqtapas,
prestakuqtawan prestaqnintapas,
lliwtam cheqechinqa.
3Tayta Diosmi kaynata nin:
Kay pachaqa pasaypaqtam chunninqa,
pasaypaq mana imayuqñam kanqa, nispa.
4Kay allpam chakiruspan qawirun,
lliw kay pacham pasaypaqta qawiruspa chakirun,
ancha reqsisqa runakunam hukmanyarun.
5Kay pachatam llapa runa millakuypaqta ruwarunku,
kamachikuykunata mana kasukuspanku,
allin ruwayta saqeruspanku,
wiña-wiñaypaq pacto ruwasqankuta saqeruspanku.
6Chayraykum kay pachata ñakay intuykun
runankunapas chinkanankukama;
kay pachapi yachaqkunam qollurun,
aschallañam puchurunku.
7Vinom pisirun,
uvas plantakunam qawirun,
kusikuyllapi kawsaqkunam llakipi rikurirun.
8Tamborwan kusikuyninkum qollurun,
kusikuyllapiña chaqwakuyninkum tukurun,
arpakunapa miskillaña waqayninmi upallarun.
9Takillawanña vino upyayninkum tukurun,
poqosqa aqam tomaqkunapaq qatqeyarun.
10Chaqwallapiña kaq llaqtam chunnirun,
wasikunapas manaña yaykuy atinankukamam wichqakurun.
11Vino tukuruptinmi runakuna callekunapi waqachkanku,
lliw kusikuyninkum tanirun,
kay pachapim kusikuy chinkarun.
12Llaqtam tuñisqa qeparun,
punkunkunam pakipakurun.
13Kay pachapi nacionkunam kayna kanqa:
Imaynam aceitunasta waqtapaspa cosecharusqanku hinam kanqa,
otaq uvas cosechayta tukuruptinku maskaparusqanku hinam kanqa.
14Chaymanta puchuqkunam kusikuywan qaparispa takinqaku,
intipa seqaykunan lawmantaraqmi Tayta Diospa hatu-hatun kayninmanta takinqaku.
15Chayraykuyá intipa qespimunan lawpi kaqkunapas Tayta Diosta hatunchaychik,
lamar qocha patanpi kaqkunapas, Israelpa yupaychasqan Tayta Diospa sutinmantam rimarinku.
16Kay pachapa patankunamantaraqmi kay takita uyarirqaniku:
¡Allinkuna ruwaq hatunchasqa kachun! niqta.
Chaymi nirqani:
¡Ay, imañataq kayqa, imañataq kayqa!
Iskay uyakunam contrato ruwasqankuta saqerunku,
paqway iskay uyañam rikurirunku.
17Kay pachapi yachaqkuna,
manchakuymi suyasuchkankichik,
wichinaykichikpaq trampam listollaña kachkan.
18Chaynapim manchakuymanta lluptiqpas uchkuman wichiykunqa,
uchkumanta lloqsiruspa ayqeqtañataqmi trampa hapirunqa,
cielokunapi yakukunam taqtakaykamunqa,
kay pachapa cimientonkuna katkatatanankama.
19Kay pacham pasaypaqta ñutupakurunqa,
pasaypaqtam chitqapakurunqa,
pasaypaqtam katkatatarunqa,
20sinka runa hinam tampikachanqa,
chuklla hinam aywikachanqa;
huchankuna llumpayta llasasqanraykum manaña hatariyta atinqachu.
21Chay punchawmi Tayta Dios ñakarichinqa
hanaq pachapi kaqkunatapas,
chaynallataq kay pachapi reykunatapas.
22Lliwta huñuruspanmi paykunata uchkupi presocharunqa,
carcelpim wichqarunqa,
unay punchawkuna pasaruptinmi paykunata ñakarichinqa.
23Tukuy Atiyniyuq Tayta Dios,
Sión moqopiwan Jerusalenpi munaychakuptinmi,
killapas penqakunqaraq,
intipas tutayanqaraq;
Diospa kanchariynintam ancianonkuna rikunqaku.
Chuya Qellqa Revisión @ Sociedad Bíblica Peruana, 2012