Isaías 25
25
Diosta yupaychanapaq taki
1Dios Taytalláy,
Diosniymi kanki;
sutikita hatunchaspam yupaychayki,
ñawpaqmanta admirakuypaq prometesqayki kaqkunatam ruwayman churarunki.
2Llaqtakunatam tuñirachispa pasaypaqta purmarachinki,
llaqtapa qaqay-qaqay perqankunatam tuñirachinki,
cheqniqniykupa suma-sumaq llaqtankutapas taqmaparunkim,
manañam musoqmantaqa hatarichinqakuñachu.
3Chayraykum takyasqa llaqtakuna yupaychasunki,
mana llakipayakuq llaqta kachkaspapas manchakusunkim.
4Qanmi karqanki mana imayuqkunapa amparakunan,
wakchakunapa sasachakuyninpi hapipakunan,
loco paramanta pakaykuqnin,
rupaymanta llantuykuqnin.
Mana llakipayakuq runakunapa samatyayninqa
poqoy tiempopi sinchi para hinaraqmi.
5Qamqa chunniq allpapi rupay hinaraqmi
huklaw nacionmanta hatunchakuq runakunata kumuchinki,
imaynam puyu llanturuptin rupay chiriyarun
chaynam badulaki runapa pay tukuq kayninta chinkarachinki.
6Tukuy Atiyniyuq Tayta Diosmi Sión moqopi,
llapallan nacionkunapaq hatun convidota ruwanqa,
miskillaña mikuykunatawan unay watayuq vinotam convidanqa,
miskillaña mikuykunatawan suma-sumaq vinotam convidanqa.
7Kay orqopim llaqtakunata tapaq telata llikipanqa,
llapa nacionkunapa tapaqnin velotam llikipanqa.
8 # 1 Co 15.54. #
Ap 7.17; 21.4. Tayta Diosmi wañuyta wiñaypaq chinkachinqa,
lliw runapa weqentam pichanqa,
llaqtanpa penqaypi kasqantam kay pachamanta chinkachinqa.
Tayta Diosmi chaynata nin.
9Chay punchawpim ninqaku:
¡Qawariychik, paymi Diosninchikqa!
payllapi hapipakusqanchikraykum salvaykuwanchik,
chaynaqa, salvawasqanchikraykuyá anchata kusikusun, nispanku.
10 #
Is 15.1—16.14; Jer 48.1-47; Ez 25.8-11; Am 2.1-3; Sof 2.8-11. Tayta Diosmi atiyninwan Sión moqota waqaychanqa;
Moab naciontam ichaqa, wanupatapi qopata hina maymi kasqampi saruparunqa.
11Moabqa allin nadeaq hinaraq haykayachkaspapas,
nadeaspa sapa maki hoqariyninmi ukuman apaykunqa,
chaynatam Tayta Diosqa hatun tukuyninta tuñichinqa.
12Diosmi alto-alto mana yaykuy atina perqankunta tuñichinqa,
allpayanankamam pampapi ñuturunqa.
Chuya Qellqa Revisión @ Sociedad Bíblica Peruana, 2012