Isaías 17
17
Damascopa contranpi willakusqanmanta
1 #
Jer 49.23-27; Am 1.3-5; Zac 9.1. Damasco llaqtapa contranpim Isaías kaynata nirqa:
Damasco llaqtaqa manañam llaqtañachu kanqa,
aswanqa tuñichisqa perqakunallañam montorayanqa.
2Aroer llaqtaqa mana runayuqñam chunninqa,
animalkunapa mikunanñam kanqa,
mana pipa manchachisqanmi chaypiqa animalkunallaña puñunqa.
3Efraín llaqtapa, Damasco llaqtapa, qaqay-qaqay perqankunapas puchukanqam.
Siria nacionpi puchuqñataqmi,
Israel llaqta kaqlla kanqa.
Tukuy Atiyniyuq Tayta Diosmi chaynata nin.
Israel castigasqa kananmanta
4Chay punchawkunapiqa Jacobpa hatunchasqa kayninmi asllayanqa
Tukuy ima kapuqninpas tukurunqam.
5Imaynam trigota rutuspa wichiqnintañataq
makinwan pallapaykunku,
otaq Refaim qechwapi trigota cosechanku,
chaynam kanqa.
6Imaynam aceitunata pallaruptinku iskay-kimsa rurullaña qeparun,
otaq allin ruruq kallmapi tawa pichqallaña puchurun,
chayman rikchakuqmi kanqa.
Israelpa yupaychasqan Tayta Diosmi chaynata nin.
7Chayna punchawkuna kaptinmi
runakuna unanchaqninta yuyarispa maskanqaku,
Israelpa Chuya Diosnintam qawarinqaku.
8Makinkuwan ruwasqanku capillakunatapas,
dedonkuwan llunkisqanku Asera idolonkutapas,
intiman rikchakuq idolonkutapas,
manañam qawarinqakuñachu.
9Chay punchawkunapim Israelpa allin murallasqa llaqtankunapas wichirispa purmanqa,
imaynam Canaán allpapi runakuna,
Israelta manchakuspanku llaqtankuta purmachkaqta saqesqankupi hina.
10Israel, salvaqniki Diostam qonqarunki,
amparakunaykipaq kaqtam mana yuyankichu.
Kuyayllapaq plantakunatam plantakunki,
huklaw nacionmanta apamusqa miskillaña ruruq sachapa takarpunkunataraqmi tarpunkipas,
11tarpusqayki punchawllam wiñarachinkipas,
paqarintillanmi rururachinkipas.
Ichaqa mana hampiy atina onqoy hapirusqanraykum
mana imatapas cosechankiñachu.
12Achka llaqtakunapa chaqwakuyninmi uyarikun,
lamar qochapa qapariynin hinaraq.
Achka runakunapa qapariyninmi uyarikun,
nana-nanaq lloqllapa kunrururuynin hinaraq.
13Chayman rikchakuqña hamuptinkupas,
Dios qaqchaptinmi karukunamanraq lluptinqaku,
wayrapa apasqan qopa hinaraq,
sinchi wayrapa hoqarisqan allpa hinaraq.
14Chisinkuytam mancharikuyllapaqña rikurirunku,
ichaqa manaraqpas achikyaytaqa chinkarunkuñam.
Chaynam llapa ñakarichiqninchikpas
chaynataq haykam suwawaqninchikpas chinkarunqaku.
Chuya Qellqa Revisión @ Sociedad Bíblica Peruana, 2012