Isaías 16
16
Moab runakuna Judaman ayqekusqankumanta
1Nacionpi kamachikuqman malta carnerota apachiychik,
chunniqpi Sela llaqtamanta Sión moqoman apachiychik.
2Imaynam qesanmanta mancharichisqa urpikuna pawanku,
chaynam Moab llaqtapi warmikunapas Arnón mayu patanpi muyuchkanku.
3Sión moqopi yachaqkunatam ninku:
Pakaykuwanaykikupaqyá tanteanakuychik,
waqaychaykuwanaykikupaqyá rimanakuychik,
chawpi punchawpiyá tuta hina llantuykuwayku,
qanman ayqemuqkunatayá pakaykuwayku,
qanman lluptimuqkunataqa amayá traicionawaykuchu.
4Moab nacionmanta ayqemuqkunayá qamkuna ukupi yachachunku.
Wañuchiqkunamantayá pakaykuychik.
Ñakarichisqa kayniyku tukuruptinqa,
llaqtakuna purmachiq tukuruptinqa,
chaynataq enemigopas nacionmanta pasaruptinqa,
5Diosmi hatun kuyakuyninpi huk kamachikuqta
Davidpa mirayninmanta churanqa.
Paymi juzgaspan allin arreglota ruwanqa,
runakuna allinta ruwanankupaqmi hikutanqa, nispanku.
6Moab llaqtapa hatun tukuyninqa yachasqam kachkan.
Llumpaymi hatun tukuspa yanqa rimaq kayninpas,
llulla kayninpas manam takyanqachu.
7Chayraykum Moab runakuna llaqtankumanta qaparkachanqaku.
Kir-hareset llaqtamanta kaq ñupupasqa uvas pasaskunamantam
anchallataña waqanqaku.
8Hesbonpa chakrankunapi plantakunam qawirun,
Sibmapi uvas huertakunam pasaypaqta qawirun,
nacionkunapi munaychakuqkunam ikllimuqkunatapas sarutyarun,
kallmankunapas Jazer llaqtakama mastarikuspam chunniqkama chayarqa.
Lamar qochapa waklawninkamaraqmi chayarurqa.
9Chayraykum Sibma llaqtapi uvas huertamanta,
Jazer llaqtapi kaqkunawan kuska ñoqapas waqachkani.
Hesbón llaqta, Eleale llaqta, qamkunaraykum weqeyta chaqchuchkani.
Tarpukuynikikunapa hawanpim, cosechaykikunapa hawanpim
guerrapi peleaqkuna qaparirqaku.
10Kusikuyninkum tukurunña,
tarpusqa chakrakunapi qapariyninkum tukurunña,
uvas huertankupi takiyninkum manaña kanñachu,
uvas sarunankupipas manañam sarunqakuñachu,
vinopaq uvastapas manañam sarunqakuñachu.
Diosmi kusikuyninkutapas tukurachin.
11Chayraykum Moab nacionmanta arpa hina sonqoy waqan,
Kir-haresetmantam arpa hina sonqoy waqan.
12Moab nacionpi kaqkunaqa
moqokunapi capillakunaman yaykuspapas,
pisipanankukama santuarionkupi mañakuspapas,
manam ima ruwaytapas atinqakuchu.
13Chaynatam ñawpaq tiempokunapi Moab nacionpa contranpi Tayta Dios rimarqa.
14Kunanñataqmi Tayta Dios kaynata nin:
Kimsa watamantam,
llamkapakuq runapa yupasqan watamanta hina,
Moab nacionpa hatun kayninqa tuñichisqa kanqa,
nana-nanaq runayuq kaspapas penqayman churasqam kanqa.
Chaymanta puchuqkunapas mana atiyniyuq pisi runakunallam kanqaku, nispa.
Chuya Qellqa Revisión @ Sociedad Bíblica Peruana, 2012