Isaías 15
15
Moabpa contranpi willakusqanmanta
1 #
Is 25.10-12; Jer 48.1-47; Ez 25.8-11; Am 2.1-3; Sof 2.8-11. Moab llaqtapa contranpim Isaías kaynata willakurqa:
Ar llaqtata ñutusqanku tutam
Moab nación tuñichisqa karqa.
Kir llaqtata vencesqanku tutam
Moab nación purmachisqa karqa.
2Bayitwan chaynataq Dibonwan sutichasqanku
moqopi capillakunamanmi waqaq qespirqaku.
Moab castakunam Nebo llaqtarayku, Medeba llaqtarayku waqanqaku.
Llapallankum umankupas, barbankupas rutusqa kachkanku.
3Qachqa pachayuqmi callekunapi purinku.
Wasikunapa hawankunapipas, plazakunapipas,
manaña sayaypas atinankukamam lliw waqachkanku.
4Jahaza llaqtayuqkunapas uyarinankukamaraqmi,
Hesbonpi chaynataq Eleale llaqtapi yachaqkunapas waqachkanku.
Chayraykum Moab soldadokuna qaparkachanku,
llumpay manchakuymantam katkatatanku.
5Moab nacionraykum sonqoy qaparin.
Runankunam kimsa watayuq vaquilla kaqllaraq
Zoar llaqtakama lluptichkanku.
Luhit wichaytam waqastin qespichkanku.
Horonaim llaqtaman riq ñantam
llakikuypi kasqankurayku qaparispa richkanku.
6Nimrim wayqopi yakupas chakirusqanraykum
qorakunapas lliw chakirunña.
Manaña ikllimunankamam pastopas chakirun.
7Chayraykum runakunaqa
wasinkupi huñusqanku kapuqninkutapas,
chaynataq ima pakasqankutapas
Saucellaña wayqopa waklawninmanraq astachkanku.
8Moabtam kuchun-kuchun llakillana inturun,
Eglaim llaqtakamam qapariyninku uyarikun,
Beer-elim lawkamam qayakuyninku uyarikun.
9Dimón llaqtapi yakukunapas yawarwan huntañam kachkan
chaywanpas Dimón llaqtamanqa hatun castigotaraqmi kachamusaq.
Moab llaqtamanta ayqeqmanmi leonta kachaykusaq,
chay nacionpi puchuqkunatam leonkuna mikunqa.
Chuya Qellqa Revisión @ Sociedad Bíblica Peruana, 2012